#بنت_الشيخ
الجزء الثاني عشر
Nada hs
مرت ايام وحته مانشدت ع سالفه عناد..خطب لا؟ كل فكري بالفشله ولهضيمه المريت بيهه... مو حبا بياسر بس هيج انه استصغرت روحي ع الصار بيه وع كرامتي الانمسحت مسح وع ذلتي الذليت روحي بيها لياسر...
بيوم انه نايمه الظهر...رايحه بسابع نومه مو بس نايمه... گعدت ع صوت ابن حليم:عمه عمه اكعدي اكعدي!
انه كعدت ع حيلي وخزرته عبالي يريد يتقشمر عليه لو يغلط:خير؟
كومي يدي يريدج! كومي بسرعه!
نزلت انه خايفه شكو؟ ابوي شيريد مني؟ .. شفت اهلي كلهم جوه ووجوهم زينه..يعني مو مال اكو مصيبه..
ابوي:تعاي حليمه!
-ها بويه! امرني؟
ابوي:شوفي بويه.. اخوتج باچر يرحون للقريه.. انه اريدنج ترحين وياهم..اتونسين وتريحين راسج جم يوم... تگضيلج هيج مده وردي..
بلعت ريك وكلت:صار بويه.. اروحن.. شوكت نمشي؟
ابوي:باچر من الصبح يطلعون..انتي تولمي (تجهزي)
مجيد:والله لنتونس ونسه ..انتي شايفه الرگي شلون صاير غادي چا شايفه السمچ يرد الروح...
حليم:والله انه مامستلذ باكلنه هنا..غادي طعم الاكل غير شي..
امي:يوما البيت يظل تايه چا رحت وياكم..
زيدون:يمه روحي ويانه..
ابوي:لالا! ضافوني وادم ياهو اليسوي الچاي الگهوه؟! امكم خلوهه!
مجيد دنگ راسه وضحك وكال:ابوي يريد يصرفنه حته ياخذ راحته وي امي هههه..
حليم تدنه منه وكال:چا تعلمني بدروب ابوي؟ بس لانرد ونلگه امي حبله النوب ههههه..
انه اسمعهم وصدك ضحكت بداخلي ههههه... يصنفون ع امي وابوي وهمه مايدرون بالسالفه.. تعشينه وكملنه وطبعا انه هاي المده كلهه مالي شغل باي شي.. لااجيس ولااشتغل.. كلهه بس تريد تونسني .. حته هاي الروحه للريف حسيتهه علمودي مو علمود شغل ولاشي...
صعدت غرفتي وحضرت كل الغراض الاحتاجه غاد... كثرت ثياب مو حته اظل هواي..بس هيج انه من الفرحه حطيت هواي..
راح اشوفن كاعنه العفناهه واشوفن خالاتي وخوالي.. اشمن ريحه الكاع غادي والزرع والبيت الطين من نرشه وتطلع ريحته تخبل..كلش مشتاگه لمكانه مال كبل..
طلعنه ثاني يوم من الصبح..رحنه سيارتين.. انه وي بيت مجيد وبيت حليم وزيدون وحد بس صارت سيارتهم تغص وتبلع.. من طلعنه جنت انعس وبعدني مثوله.. وكل شوي اغفه.. من حسيت السياره كامت ماتمشي ع درب عدل والطسات كامت تخلي راسي يطك بالجامه صحيت.. فتحت عيوني ع وسعهن..
حته هذا الدرب احبه.. تمنيت انزل وامشي مشي لحد مااوصل بيوت اهلنه.. چن اول مره اروحن غاد.. اريد اشوف كل شي
وصلنه ع بيت يدي (جدي) وتلگتنه كرايبنه كلهه غادي...
انه احس روحي صدك صرت بنص اهلي .. العالم الانه منه..والاجيت منه والعشت بي نص عمري...
من شفت خالاتي وبناتهن وولدهن وخوالي ..حصرتني بچيه ومن احضنهن كوه اكض روحي ماابجي.. ابلع ريگي حته لاابجي .. كلش اشتيهت ابجي بذيج اللحظات..
نوب طشت الهوسه شوي ..اخوتي راحو يم الشط وانه وي النسوان جرجرني يم تنور الطين.. بس ريحه الچيمه(الحطب او وقود التنور) ترد الروح.. تلمست طرف التنور بيدي.. حسيت بي خشن وحار.. تعودت ع تنور الستيل بلمدينه.. استصعبتهه ع نسوان السلف شلون يخبزن بي وهو هيج حار.. ماجن انه گبل چنت اخبز بي.. صار الخبز ع التنور وي سوالف وي هوسه فروخ وي ضحك وونسه..
مرت خالي تخبز وتشمر يمنه خبز ناكله واحنه كاعدين بالكاع
السوالف سوت واهس النه والشوگ والمحنه وريحه اهلنه غاد تنسي الواحد همومه..
صار وكت الغده وانمدت سفره شطولهه.. صارت نصين.. نص زلم ونص نسوان:.. ع الاكل وبعدنه نسولف..هواي سوالف چثيره.. بس همزين محد نشدني ع ياسر وع الايام السوده .. حسيتهم يعرفون بس مايردون يحرجوني.. وانه اجه ابالي يمكن اخوتي موصينهم..
ايام كلش حلوه .. برغم الجرح البيه..وبرغم من اختلي وحدي اذكر الايام السوده مال ياسر.. من اذكره اكره روحي واتمنه بسرعه ينگطع التفكير مني.. بس هم ظلت ايام حلوه.. ماتنسي
كلهه شالتنه ع چفوف الراحه.. يوميه معزومين بمكان.. والسوالف ماتخلص والضحكه ماتفارك وجوههم..
اخوتي ونسوانهم تلث ايام ظلو..والرابع گالو نروح.. انه مارضيت .. ردت اريح نفسي مثل ماوصاني ابوي.. كتلهم ماارجع اظلن بعد.. همه كيفو..شافوني فرحانه ومكيفه.. ماضغطو علي.. راحو بس شني اخذو گلبي وياهم من راحو.. ظليت اعاين ع سياراتهم لحد ماابتعدت وصارت وره الاشجار وبعدين اختفت كلش..
مرت خالي الچبير كلش حبابه.. تواسي واشيل هم الكل.. اذا شافت واحد مكدر لو ضايج لازم تجي يمه تعرف شبي وتضحكه وتونسه... اسمهه صبريه.. خطيه هي مامخلفه.. وهي زوجت خالي ..جابتله مره وهم خوش مره.. تحترمهه ومابينهن شي.. حته ولد خالي يصيحون لصبريه يمه...وكلهه تصيحهه يمه..
صبريه چانت مثل امي..لالا مو امي.. الام بينهه وبين فروخهه تحط حدود ..مانكدر نحچي كلشي يمهه..ونخاف لا اطلع سرنه للابو لو للاخو.. اكولن عليها اخت؟ بس لالا هم مو اخت.. ذنيچ خواتي مجيده وسميره.. شحصلت منهن.. وحده چانت تنغص عليه والثانيه عود جابتلي رجل وكسرت ظهري بي وتالي طلع خنثي... شما اوصف صبريه مااوفيهه..
سمعتلي وصبرتني... چنه دوم نتاني الوادم اطش وينامون لو الظهر لو بليل نظل نسولف.. هي غرفتهه وحدهي.. نسدهه علينه ونكعد.. خالي چان اكثر شي يم مرته الزغيره.. هي تغسله واتوكله وتشربه.. صبريه شويه چبيره ومالها بذني.. بس هي ام البيت وكلهه تشيرهه كبل لايسوون شي..
احسهه صدگ فهيمه وحكيمه وتعرف شتحچي وي الواحد واطيب علته..
هواي بچيت يمهه.. هواي مسحت دمعتي بيدهه.. ماكالت لا تبجين..كالت ابچي وريحي روحچ..
حچيتلهه كل شي.. حته طلعاتي وي ياسر الي لليوم مادرو اهلي بيهه بس سميره تدري.. حته من كض ايدي .. حته من حب ع راسي.. كل المواقف سولفتهن الهه.. وماخفت منهه خاف تحچي لو تطي بيه .. ابد احسهه گلب زلمه .. تحفظ السر.. من تگول سرچ ابير احسهه طالعه من گلبهه...
كل مانختلي وحدنه نكمل وين وكفنه بسالفتي.. چي حچيتهه من البدايه وبكل تفاصيل ولحظاتهه... ماكدرت اكمل بيوم وليله..
وصلت لاخر ايام ويا وسولفتهن كلهن... احس حمل طاح من گلبي من حچيت وارتاحيت.. والاكثر ريحني حچيهه.. كلهه حكم وامثال.. خلتني اقتنع وارضه بالانه بي.. خلتني اقتنع مو انه الصوج.. خلتني مااكره روحي..خلتني اكره ياسر واليوم العرفته بي.. خلتني احب روحي مثل ماانه...
خففت عني هواي.. سمعتلي وطيبت خاطري بحچاياتهه الحلوات.. انام مرات وانه جوه ايدهه تفلي براسي.. شگد حبيتهه وتعلقت بيهه ذيچ الفتره.. بكل مكان انه وراهه.. حته من يوم الراحو اخوتي بعد ماطلعت من بيت خالي .. ظليت يمهه..
چنت كل مااريد اعاونهن بشي مايخلني .. نروح نفتر انه وبنات خالي ونحوي رگي ومرات ننزل نسبح بالشط ومرات نركض..
بيوم من الايام ركضن هنه مسافه وردن يم المكان الانه بي... توسلن بيه يله ركضي ومدري شني.. انه كتلهن روحن مني.. اريد اركض وحدي... صدك هنه ماجادلن ولا لحن عليه..
تكترن ع صفحه.. وانه عاينت ع دربي زين خاف بي عاثوره لو شي... فتحت اديه ع حيلهن... غمضت عيني وركضت...
ركضت واحس روحي مثل الطير الطلعو من القفص.. چان محبوس ويغرد محد يسمعه... وهسه فكوله(فتحوله) القفص وكل مابي من سرعه يريد يشرد..
حسيت بنسمات الهوه كامت تجي بوجهي.. كلش عذب وبي ريحه الريف الاحبهه.. صدگ چان الجو بي حروره شويه... بس ماحسيت ..ماحسيت بحر ولا برد.. حسيت براحه..حسيت بنسمانت الهوه..سمعت صوت الشجر يتحرك ..صوت ماطور الماي المخلينه ع الساگيه.. صوت الماي ينزل بسرعه منه.. صوت خشب يحترك..ريحه الحطب وصلتني..صوت عصافير تزقزق...
كله سمعته.. بس صوت البشر ماسمعته...
مغمضه اركض واسمع..اتخيل روحي اشوفن كل الاسمعه واعرف مكانه واعرف منين جاي الصوت...
حسيت رجليه وكفت وحدهه.. فتحت عيوني واحس جفوني حارات
كمت الهث.. واسحب نفس طووويل..احس التعب يطلع مني اجر النفس هيج...
كعدت بالكاع وظليت اعاين حواليه... حسيت روحي حريت.. هم طكيتهه ركضه.. بس ماغمضت عيني هلمره.. ورديت من نفس الدرب الركضت بي..لكيت بنات خالي واكفات كلهن ويعاينن عليه ويتبسمن...
صحت وانه اركض وتعديتهن :يله ولجن للشط..
انه اركض واسمع صوتهن وراي ع فرد ركضه.. التفتت وكلهه تضحك تريد تلحكني... وصلت كبلهن وچفتت بالشط... احس طوفت بالماي.. وصوت الچفته صار باذني وطشار الماي شفته لحد ماغمضت عيني اخر لحظه..
كمت اغطط روحي وارد اطلع راسي النوب.. بكل غطه اغطهه احس روحي ترتاح..احس الهم ينزل مني بالماي... احس انه طفل ومكيف بروحه يسبح وماوراه لا هم ولا غم..
چيتن وراي بنات خالي وكمنه وحده تذب ع الثانيه ماي... كلش تونسنه... ماطلعنه لحد ما كامت خالتي تصيح علينه...
طلعنه وثيابنه ناكعه ههه... وصلت لبيت خالي واسمع صوت الشفط مال رگي واصل يم سابع جار ههههه....
لگيتهم ياكلون خبز حار وركي وعايفين المركه محد جايسهه..:
صبريه:تعاي يمه اكلي! شلون رجيه(رگيه) تفوتج.
-اي يمه جايه.. بس اذبن ثوبي..
ذبيت ثوبي بسرعه وكعدنه ناكل وصار الشفط ماله والي ...
من صار الظهر وخلصو اكل وشغل ..كلمن راح لمكانه ينام...
صفينه بي انه وصبريه...
صبريه:ارتاحت رويحتج يمه؟
-اي.. كلش.. اتمنه اظلن هنا بس هم اشتاگيت لاهلي!
صبريه:اي.. اشوفنج هليام ضيج خلگج!
-يمه اريد اروحن بعد.. انه احس روحي صرت زينه.. اريد اردن لاهلي...
صبريه:لا ماخليج.. ظلي يمنه.. ارتاحي بعد .. تلحكين ع اهلج ماضايعين!
دمعت عيوني عليهم.. بس مااكدر ارد طلب امي صبريه..
ظليت ايام واسبوع واسبوعين...ظليت شهر كامل بالريف...
كل مااريد ارد لاهلي امي صبريه ترزلني.. حسيت صدك احسلي اظلن بعد .. بس وره الشهر كمت ابجي عليهم .. مايمر الليل اذا ماابجي واذكرهم.. حاولت وياي صبريه ماكدرت.. لمن ايست مني كلش كالت لخالي... بس هم صادف خالي عده شغل.. يومين يله فرغ... توسلت بامي صبريه تجي وياي مارضت
بس وعدتهه اجيهم بعد..
لميت غريضاتي وبيه فرحه چي راده.. انه اول ماجيت للسلف ماحنيت الهم ولافكرت بيهم.. بس احس روحي طابت واشتاگيت الهم بعد مااكدر..
خالي ونسوانه وخالاتي وخالي الاخر.. ماقصرو.. حطو صوغات اشكال والوان.. الزبد والدهن والروبه ولبن والبيك اب ترسوهه رگي وبطيخ ترس... من كل شي عدهم حطو بالسياره..
حبيت خالاتي وخوالي وصعدت وي خالي .. خالي كلش مريح.. طول الدرب مشغل حضيري وساعه يكلبهه ع رعد الناصري ونوب ع ساجده عبيد ونوب يديره ع مواويل داخل حسن... كلش يحب ذول المطربين.. وكضه الدرب كله يسولف ع الاغاني المشغلهه...
وينشدني تعرفين هذا ياهو اليغيني وياهو الملحن وياهو الكتب الاغنيه... ونسني كلش بالدرب.. لحد ماطبينه للمدينه الدنيه ظهر والشوارع فارغه... الصدك انخمش گلبي من شفت شوارع المدينه..
تمنيت اردن وي خالي.. بس شويه واختفه هذه الاحساس... التهيت وي خالي ونساني...
طبينه ع اهلي وچن عبالك الي سنين ماشايفه بيتهم... من حطيت رجلي بعتبه باب الحوش تذكرت من شلت الدبه مال غاز وشفت الزلمه بالحديقه.. ضحكت نوب رديت لميت حلكي..
رحت لغرفه امي لكيتهه نايمه.. حطيت ايدي بلكاع سندت روحي وحبيت راسهه كعدت..
امي:يمن هله؟ هله ميه هله! وين كطعتي بينه؟
-يمه متت عليج..
حبيتهه وهي هم وظلت تنشدني شلونج ما لونج؟ انه اختصرت عليهه وكتلهه خالي متانيج بالديوانيه!
امي:ولج جا ماحجيتي! ياخوي يبن امي..
لبست امي شيلتهه عدل وتكبعت(لبست عبايه) وراحت لخالي..
انه رحت ادور ع زيدون طاك كلبي علي.. مالكيته.. جوه ردت اصعد ولاكتني فليحة.. هم حاببتني وظلت تنشدني ع اهل السلف واخبارهم...
صعدت غرفتي ولكيت زيدون نايم بغريفتي .. هههه خطيه يمكن طاك كلبه عليه.. كعدته ولك زيدان! زيدون! خايب انه اجيت!
كعد ع صوتي واجاني طاير حبيته وهو هم كيف بيه كلش.. ظل يعاتبني ويلومني ليش هيج بطيتي...
ارتاحيت شويه وبعدين نزلت .. لكيت اخوتي وابوي هم سلمت عليهم واحس روحي ردتلي بشوفتهم... حته افروخ اخوتي كلها حوطتني وهذا اليحبني وهذا المجلب بثوبي وهذا اليريد اكعده بحضني... خالي راد يروح بس ابوي ماخلاه.. عطلو يبات يمنه خطيه هو خابر ع اهله ع غادي وكالهم راح يبات يمنه..
كعد شويه بالديوانيه نوب اجه يمنه.. امي وابوي كالوله انته مو غريب .. امي حارت باخوهه.. واحنه سوينه العشه اشكال والوان مجيده هم بليل درت بخالي يمنه اجت هي ورجلهه وفروخهه..
التمينه لمه تخبل.. بيني وبين روحي كلت يمكن الصار بيه هذا بصالحي .. كشفت محنه اهلي ومعزتهم اليه.. جنت دوم اشوفهم مو بحالي ومحد مهتم... بس انه ماعذرتهم وماعذرت الشغل والمسؤوليه العليهم.. اول ماطحت كلهم مدولي اديهم... سندوني وكفوني ع حيلي .. خلصوني من بلوة چبيره..وهاي انه رديت الهم احسن .. ما اكولن نسيت وراح الماضي.. لا هم اذكر ومرات اتحسر.. بس مو مثل اول .. صار عدي هذا امر الله مااعترض واله بيهه اراده...
ثاني يوم خالي راح.. وانه وامي ظلينه طول اليوم سويه نسولف ع السلف وع الوادم غادي... مرت ايام وعرفت بيهه ابوي متعارك وي رائد وسميره من يومهه بعد ماطبت بيت ابوي انمعت خطيه هم صارت بين نارين...
رجعت حلومه الاوليه.. بس شويه ملچومه.. بعده جرحي ماطاب كلش.. بين مده ومده اذكر التلفونات تالي الليل وي ياسر وافكر اكول وين راح وشيسوي هسه واخذ مره لو بعده؟
يتبع...
بداية النهايه.......
