#بنت_الشيخ
الجزء الخامس
Nada hs (ندى ح.س)
انه كاعده بنصهم بس مااحجي.. بس اجمع معلومات واربط شي بشي حته اعرف هذا ياهو الحلو... هو الشيخ نفسه لو واحد من اخوته.. ظل هل سؤال زارف گلبي زرف استحي انشد(اسأل)
نوب اجو اخوتي وكعدو يم ابوي وتغيرت السالفه ومحد حچه بالشيخ بعد..
نوب بدت سالفه الچايات .. كل ساع يردون چاي انه طگت روحي شني شجاكم مره مرتين مو خمس مرات بساعتين بس...
بس شكله الشحم والدسم مال الطليان اثر عليهم...
للعصر طشو اخوتي وابوي كلمن بغرفته وانه هم رحت سبحت وصعدت لغرفتي نمت حته بغير ماامشط.. كعدت للمغرب لكيت شعري صاير يزه(كومة صوف الخروف) نوب اريد امشطه مايتمشط .. حته راسي كام يوجعني منه... بللته بماي يله تمشط
بالعشه محد راد اكل بس الفروخ .. وامهاتهم طلعن من التمن والشعريه مال الظهر وانه طلعت موز وتفاح ضميتهن من مالات العزيمه هههه اكلتهن وسهرت يمكن ل3 الصبح ع فلم .. انه كل شي مافتهم منه ولا الحك اقره الترجمة بس چي فلم رومانسي وكله حب وبوس🤤
كعدت ثاني يوم ب10 ونص.. لگيت امي غداهه مستوي وظال التنظيف عليه.. نظفت وكملت واجه ابوي... انه راحت من بالي انه ابوي اليوم يروح لعم هذا الحليو...
كعد ابوي يتغده وامي واخوتي يسألون بي...
امي:شصار وياك اليوم؟
ابوي:رحنه ع عمهم وكالو ماموجود اليوم وباجر ماتلكونه.. شو شويه وطبكت سيارته وبيده علاليك مسواك مبين مو مال واحد طالع مكان بعيد.. طبينه وياه وهو مثل المسودن..كلساع طافر لا كعد ولا حچينه ويا احنه هم من شفنه هيج خلينه وطلعنه.. خطيه عناد ظل يتعذر مني چي لنهه صارت بوجهي ..
مجيد:وهو عليمن كاتل روحه اله يصالحه..خله يطبه مرض شيسويله!
ابوي:لا شلون غير الوادم تاكل وجهه اذا ظلو هيج...
حليم:اي صدگ..چا حچي الوادم مايرحم..
ظلو يسولفون وانه صفنت كلش ...سرحت بهذا الحلو المادري عنه هو نفس الشيخ لو واحد من اخوته...
مر اليوم وانه بكل دقيقه اذكره.. هو صح انه من اشوف حلو اظل افكر بي واتخيله زوجي بس ماكو يوم واحد لو يومين وانسه وماافكر بي بكثره.. بس هذا لا لا اخذ گلبي وعگلي هههه...
الاشتغلت اشوفه كدامي النمت اشوفه بغرفتي... انضرب راسي كلش بي هههه...
مرت ايام وايام وانه ع نفس حالي... وي فروخ اخوتي الماينحملون لو اكضي اليوم سرحانه وسكته وهم ضايجة بس بداخلي مااطلع..وهو ماعدي احد اشكيله واحاچي... كلمن لاهي بروحه.. وانه بس اكل بروحي واكول شمعنه انه ظليت بلايه زواج شني النقص بيه.. ليش البنات البعمري صارن امهات وانه بعدني مگابله نسوان اخوتي يحبلن ويجيبن وخواتي ومگابله الخطاطير مال ابوي ومرات خطاطير امي..لوتجيني ايام اظل نهار بطوله انظف وبعدين يجي الليل وانفجر ابچي من الوحدة انه برغم هذه اضحك كدام الناس ودوم مكشره ويجوز بعينهم انه مرتاحه وماعدي شي مدللة بت شيخ وكل شي عدنه خير من الله والذهب الالبسنه النسوان تظل تسولف بي وملابسي كله من الزين ..بس انه داخلي جحيم..ضوجة..غربة..ووحدة.. هاي الوحدة كتلتني كتل...خاصة بالليل..كلمن يلهي وي مرته لو بدراسته مثل زيدون لو ابوي يلهي تخابره الناس لو يطلع لو نايم وامي هم ماتگربلي وتعرف شبيه.. هي هذه طبعهه... صح تحبنه وتخاف علينه من الهوه الطاير بس احنه البنات مانصير عزيزات اله لمن ناخذ ويمكن كامت تدعي الله يخلصهه مني وترتاح من شوفة وجهي...
وبيوم من الايام اجتنه سميره..وجهه مگلوب ودمعتهه بطرف عينهه وجايه بطرگ عمرهه ماجايبه فروخهه وياهه...
هي مو من عادتهه تجينه هيج وكت ولا تجي بدون فروخهه... بعدين كعدت يم امي وهي تسولف وتنحب ودموعهه تصب.. كامت تشكي وتبچي...
سميره:يمه انه مامقصره وانه احبنه بس هو طلع روحي...يمه بس يصيح عليه واليوم غلط عليه وانه بعد مااتحمل ...يمه كلي لابوي يطلگني منه..انه طلعت روحي..مو عيشه هاي..يجي الليل يطلع يسير بنهار دوام العصر يگضيهه عرك وياي ..
امي:شجاكم! عين وصابتكم... هسه هو وين من اجيتي؟
سميره:يمه مادري بي مدري ياهو الخابره وراحله..
امي:سهله..يجي ابوج وهو تصرف ويا..
-اكلج سميره...فروخج وين؟
سميره:ظلو يم عمتهم وحدهم
امي:جيرة بكصتج! چا المن خليتيهم ووحدهم؟!
سميره:يمه ماريدهم لحد يجيبهم وراي ...طلعو روحي همه وابوهم..
امي:اي عد ماضرطت تربعت(مثل عند الريفيين يعني شي يشبه اجت تكحلها عمتها بس بغير صيغه😂)
سميره:يمه چا انه موديه عليه ياخذني انه شلي غرض؟
-يمه خطيه بسج منهه خليهه ترتاح ماتشوفين بطينهه لخشمهه؟!
امي:اي كتلتن روحچن ع هذه الغريب ! هاي تاليهه يكسرني ابتي ...يله گومي مني مالي خلگج...محد اجتني بيهه خير!
گمنه من امي وهي ظلت تدرم عله اختي سميره.. كعدنه بغرفة امي نوب اجن نسوان اخوتي سلمن ع سميره وتفاجئن بيهه وصار حچي وسوالف بينه وعرفن سبب جية سميره وطاحن لرائد رجل سميره دوسه ونص واختي هم ماگصرت اخر شي گامت تبچي وذن فلحة وملحة مكيفات طايحات للولد دوسه ونص...
انه ادري بيهن يكرهن رائد چي اخذ سميره وكتل روحه عليهه وهنه رادن سميره لاخوهن عود... بس ماصارت ومااعترضو ع رائد ..يعني بيت عمي چنهم ماهاوين سميره هلگد وتنازلو عنهه وهسه بناتهم مشمتات بسميره...
انه انقهرت عليهه محروگ گلبهه وتبچي وذن مكيفات ومشمتات
گلت:سميره..تعاي بغرفتي احسلج ..
سميره:يله جايه
صعدنه لغرفتي وظلينه نسولف وهي بس تكشي مافتهمت منهه شي بعدين انه حچيت عليهه ومارضيت چي تحچي ع رائد...
ومنعتهه تحچي ع رجلهه كدام نسوان اخوتي...
وره العشه گعدنه كلنه سوه وامي چانت مسولفه لابوي ع زعلة سميره عاد ابوي اجته من الله ع الله...
ابوي:بويه بعد ردة لذاك الچلب ماتردين... لو بفرشلج الگاع ذهب
حليم:شني سالفتك بويه شتگول علينه الناس..
ابوي:انته مالك شغل باختك...انه بكيفي اردهه مااردهه!
امي:تهده خويه شجاك..مرد المره بيت ريلهه(رجلهه)
ابوي عصب:انتي شمالج الاخره! انه من البدايه ماراضي بهذه رايد مدري راعد! حته اسمه الله گالبه..
من گال ابوي هيج انه حصرتني الضحكه..ابتسمت ودنگت..
باوعت لسميره چنهه ماراضيه بحچي ابوي... اي مبين عليهه عياره تتزعل يوم يومين ماتگدر ع فراگه وكل الحچته حچي لسان.:
مرت ايام وسميره بعدهي يمنه... عيالهه محد اجاهه..والصدگ انه اشوفنهه هي الغلطانه ..واصلا ماسمعنه منهه شي يوجب الزعل والطلعه من بيتهه.. هو رائد مايقصر اعرفه اخو خيته .. يحب اهلي ويحب مرته بخبال... لسه اتذكر شسوه علمودهه
چنه نشوفه من طابق الثاني يتخطف يم بيتنه ويعاين للباب .. خو من چانت تروح للمدرسه يظل الدرب كله لاحگهه...
وطبت سميره بشهرهه وعيالهه هم مامنهم خبر..المصيبه هي مو بس سميره طبت بشهرهه فليحة ومليحة وراهه هم.. بذنيچ الايام دخلنه انذار.. امي مولمه(محضره) ثلث جنط ..ومولمه عباتهه وجواريبهه
وصدگ انفتگن علينه وحده وره الاخره...
نزلت مليحة الظهر وچانو الولد وابوي كلهم طالعين..
مليحة:عمه الحگيلي راح اجيب...
امي:خايبه ووجعه..چا انتي مهتمه؟! يوميه اخذج وتجيبين ونرد!
فليحة:عمه شبيچ وياهه..ماتشوفينهه اتلوه؟
امي:دگن ع حليم خل يجي يوصلنه..حته كمت استحي السسترات كلهن عرفني..نوب لگيتنهه موديل اله تجيبن بالمستشفي(المستشفى)...جدة وتجيبيجن بالبيت ولا من شاف ولا من درة...
ظلت امي ادردم عليهن وانه حايره يم مليحة ...تمشي تروح منا وترد منا وانه هم وياهه..الصدگ غير انه من شفتهه بطني گامت توجعني وياهه... ظليت چني انه اطلگ...
اجه حليم بسرعة بس خابرته فليحة واخذهن للمستشفه ..وامي من طلعت لباب البيت لحد ما ردو وبيدهم الفرخ تدرم عليهه هههه
امي تگول اكره المستشفه وبس العيارات يرحن يجيبين بيهه... وصدگ گبل هنه بالريف وحده تجيب الاخره...
اجت مليحة وبيدهه منصور ع اسم ابوي...شايلته ولا چنهه توهه جايبه...وحليم هم چنه اول مره مخلف... كيفنالهم وخلينه مليحة بغرفة امي هي وفرخهه..چي غرفتهه فوگ ماتگدر تصعد...
وانه ابتليت...من جابت فروخهه كلهم ظلو يمي...واوف شسوو بيه نوب ملطلطين ... لوما مجيد وابوهم يكتلونهم مايفكون مني ياخه
ابوي هم من دره بمليحه جايبه ولد دلعه واطاهه ضبه فلوس مدري شكثر عاد...واجو اهلهه الهمه بيت عمي... وهم صرنه هوسه ووره يومين من جابت مليحة ذبحو مدري شچم ذبيحه وابوي عزم كل گرايبنه ..يعني المقربين كلش..بيت عمي اهل مليحه وعمامي الباقين... بس شني هل مره ابوي جاب طباخ چي هواي ذبايح... انه كيفت وبيومهه ماتعبت بس بالخبز...
هواي خبزت بالگونيه ومحد عاونتني بس مجيده اجتني تالي اخر شي عاونتني...
وخلصنه من فليحة وابنهه واجانه الوعد المصخم الاخر... سميره هم بالليل گعدتني ..
سميره:حلومه!حلومه! گعدي ولج راح اموتن..
-ها ها ولج شبيج.. كعدت من نومتي ونسيتهه هي حبله راح من بالي عبالي شو شبيهه...
سميره:نزليني وگعدي امي...راح اجيب
كضيتهه من ايدهه ونزلتهه كوه ...شو هاي كل خطوه تزيد بچي
رحت ندهت(گعدت) امي حته تاخذهه تجيب...
سميره بيهه وما تصرخ..نوب دنيه ليل ..فضحتنه فضيحه... هي من تطلگ مو هيج..يعني صوتهه مايسنمع تظل بس اتلوه.. بس هلمره سوتنه سالفه...اخوتي كلهم گعدو ع صوتهه وحته الفروخ
نوب انه الثوله مو حرت بيهه اريد اسكتهه وحرت بأمي الچنهه هي رايحه تجيب تعاي طلعي عباتي تعاي وين جواريبي طلعي شحاطتي... عاد انه الثوله مادري خليت لامي شحاطه فرده وفرده... وحده مالتي ووحده نعال لاستيك مال بيت... ههههه
وهذه كله وسميره تصرخ الحگولي راح اموت... حته ابوي راد يبچي عليهه وظل يروح ويجي وياهه... اخوتي ظلو واگفين حايرين شيسوون.. نسوان اخوتي گعدن يمهه ويصبرن بيهه شو مانسمع بس فليحة هم گامت تصرخ...مجيد انه راح اجيب...
انه بيهه صدگ انثولت واطيت امي عباة قديمه وحته مفتوگه مادري...
صارن اثنين يطلگن وامي ماتگدر وحدهه.. اخوتي گالو روحي وياهن... عاد انه مادريت بروحي.. لبست شيله امي وتگبعت(لبست عبايه) وهم لبست الفرده وفرده الاطيت فرداتهن لامي... صعدناهن بالسياره بس شني سميره انتهت... متنه من الخوف عليهه... وظلت تصب مايات لحد مايبست علما وصلنه المستشفه...
من طبينه فحصن سميره اول شي لان شافنهه منتيهه... گالن گبل عمليه... نوب اخذن فليحة گالن هم راح تجيب...
فليحة مال حاضر بس طبت سمعنهه صريخ الفريخ... شويه وطلعنهه وبيدهه بتهه ...بس سميره ماكو ..نص ساعه وهي بالعمليه... طلعوهه منتهيه متنه عليهه من الخوف... نوب ماشايفين وحده تجيب عمليه... وهاي سميره لعبت بينه فلك... بس تصرخ وهي نايمه...ساعه تگول راح اموت وتخلي امي تخرط بوجهه...ساعه تگول ابني مات يمكن ساعه تغلط ع رائد وتسبه موتتنه علما صحت كلش ووعت ع روحهه... امي من ضيمهه گامت تبچي بعد ماصحت سميره... بس انه الطحت بيهه...
امي حطت راسهه بالگاع عود تبچي وانه هم حصرتني البچيه ع هاي الليله الشفناهه وصارت مشاعرنه مرهفه مثل مايگولون اهل التفلزيون ههه... شو مااشوف بس امي گطعت بچيتهه وشالت راسهه خزرتني....
-ها يمه شبيچ؟
امي:وعمه اليعميج اي والله!
سميره:شكو يمه؟ شمسويه حلومه؟
امي اشرت ع رجليهه وگالت:هاچ! چا شتسوي بعد! وانه اگول ياهو اليشوفني يضحك!
انه وسميره ماتحملنه طكينه من الضحك... نوب خفت ع سميره كتلها لا تضحكين لا تنفتك عمليتج... شو انه باوعت ع رجليه واشوف هم فرده وفرده😂😂 رجعت فطست من الضحك ... وهمزين لابسه نفس الفردات مال امي ...تبادلنه انه وياهه .. وحمدنه الله ع ذيج الضحكه وذيچ الليله المرت سلامات علينه وع سميره.. فليحة طلعت اخذهه مجيد وسميره گالو تبات ليله يله..
ظلت ذيج الليله كلها بالمستشفه وابوي حرگ التلفون علينه حرگ.. طبعا هو ابوي وده تلفون بيد مجيد حته يخابرنه وكل دقيقه يخابر
خطيه انتهه من الخوف عله سميره وهي عزيزته...
ها نسيت اگلكم ..سميره جابت وليد.. سمته حمزة.. بس شني طلع ارواحنه بس يبچي.. نجيبه منا ونرده منا ...
ثاني يوم الصبح اجت الدكتوره وگالت تكدرون اطلعون وكتبت الهه علاج ... دگينه ع مجيد واجانه...
شو اول ماوصلنه سميره برطمت وگلبت خلقتهه...انه عرفت بيهه رادت تبچي ع رائد... خليناهه بغرفة امي والهوسه الصارت ذاك حدها بغرفة امي... وهي خطيه بس مدنگه گوه تحچي... ابوي طب عليهه وحب راسهه واطاهه فلوس وگعد شويه وراح...
خطيه ظلت اليوم بطوله بس مدنگه ماتحچي... من خفت الهوسه يمهه وطشت العالم ظلت دموعهه تصب..نوب انه حرت شلون اسكتهه..وهي بس تصرخ رائد ليش مااجه رائد طلع چذب مايحبني ... زرفت گلبي عليهه... خليت راسهه بين اديه وحضنتهه وظلت تبچي...انه هم ماتحملت وظليت ابچي وياهه..
طبت امي علينه ورزلتنه وكالت
امي:خفه حالچن وبله! تنحبن عليمن ! عوزنه ضيم احنه! بيش مفاولات!
-يمه ودي ع رائد يجي يشوفهه خطيه!
امي:اي واحنه ماعدنه كرامه! يو ماعدنه زلم نشورهه! نذله ذل ومانخلي يشوف ابنه..
سميره:يمه فدوة حاچي ابوي خل يردني!
امي:اكسر رجلج اذا رديتي وحدج! ولاتجيبين هاي السالفه بعد ابوچ يتسودن تره!
يتبع...
شلونكم حبايب...جدا اسفه ع التأخير الصار بالنشر...بس هلفتره كلش مشغوله اعذروني😍...
شلونها حلومه لحد هسه؟ اكثر موقف حبيتو؟
