#زواج ماوراء البحار
ايما البطاط
اول _وثاني وثالث واخير
حقيقه
بنهاية ٢٠٠٢ اي قبل سقوط بغداد بأشهر وصلت باخرة من الامارات رست بميناء ام قصر ..ساعة ٣ الفجر نزل جميع الركاب واخر شي نزلت بنية تجر بجنطتها جر .. على طول ٣ ايام الرحلة محد شافها طلعت من غرفتها بالباخرة بس من تصير وجبة الافطار لان جان بوكتها ايام شهر رمضان المبارك ..نزلت وتباوع يمين ويسار جانت حايرة تروح وتجي وتسأل الناس وصلت للريسبشن وسألت شخص بالاستعلامات عن تلفون اتريد اتخابر احد ..من سمعت صوت احد انفجرت بالبجي (بابا الحگلي اني لارسا موجودة بميناء ام قصر تعاللي بسرعة )
سدت التلفون والكل انتبه على بچيها الكل يريد يعرف قصة هاي البنية
خلي نعرفكم بيها
لارسا شابة بعمر ٢٣ سنة مواليد ١٩٧٩ طويلة حلوة حنطية عيونها عسلي كبار شعرها احمر ،، نرجع بيكم لسنة ١٩٩٨ سنة اولى كلية الفنون الجميلة لارسا ابوها ضابط وخواتها كلهم كليات وامها موظفة واخوها اصغر منها ابوها انسان محافظ متشدد ميخلي بناته حتى يحطون مكياج من دخلت لارسا للكلية جان الكل يباوع عليها بس اكو شخص كام يلحكها وين متروح تدخل محاضرة يروح وراها تروح للكافتريا يروح وراها .. الى ان مرة من المرات دتفتح التلفزيون فشافت هذا الي ذابح روحه عليها مذيع بتلفزيون الشباب اوووف هذا الي يركض وراية مذيع ياعيني خل اشوف اسمه شنو عرفت اسمه نديم وبما انه لارسا اتحب المظاهر من عرفت مذيع اتغيرت نظرتها عليه كام يجيها للمحاضرات كامت هي هم تبادله النظرات صارت تلبس وتتأنق علموده .. الى ان اتشجع واجة صارحها بحبه ،، هي طارت من الفرح وكالت لازم مو بس ارتبط بي اخليه يخطبني هم .. من صارحها گلتله اني مو مال علاقات ترتبط بية تجي تخطبني لان ابوية انسان متشدد وميقبل اسوي علاقة وية اي شخص .. طبعا نديم فرح كلش لان ين لاگيها يرتبط بهيج بنية
خلي نعرفكم بنديم
نديم مواليد ١٩٧٦ طويل ابيض عيونه ناعسه خشمه جبير مشيته بيها نوع النزاكة من عائلة منفتحة امه لادين لاديانة ابوه سكير اخوه الجبير سديم مرته حرگت روحها من القهر مال عيالها وماتت .. بنات خالته تربطهم علاقة قوية بعدي صدام حسين نديم يادوب بطرگ الراتب مال التلفزيون يلبس تيشرت مزرف بالكلية بحيث كامت لارسا بكل مناسبة تهديله تيشرتات علمود تشوفه يلبسها بالتلفزيون ،، من خلال علاقاته بالنظام السابق حصل عقد عمل بالامارات راتب خرافي فراح بدون ميتخرج من الكلية عاف لارسا بعد ان انفق وياها بس يثبت نفسه بدبي راح يخطبها ويسحبها يمه للامارات ..جانت الفرحة جبيرة وكامت تتباهى انه هذا المذيع نديم حيخطبها الكل جانوا يعرفون حقيقة عنه بس مگلولها انه هو .... جانوا متراهنين ولد الكلية بأنه مستحيل يخطب لارسا رادوا يفهموها بحقيقته لكن جانت اتدافع عنه ومتقبل اي حجاية عليه سنة ٢٠٠٠ جان لارسا عمرها ٢١ سنة وفى بوعده نديم ودز اهله يخطبوها .. فرحت كلش ولبست الحلقة وراحت اتباهت ابين صديقاتها ورادت تحط اصبعها الي لابسة بي الحلقة بعيون كلمن متراهن انه نديم ميخطبها ،، اوك گلبي بكيفج
من انطت ذهب النيشان لام زوجها سافرت للاردن جان نديم دينتظرها فرحوا اثنينهم واحد باللاخ لان صار سنتين ممتشاوفين جان حاجزلها بفندق حلو كلش بنص عمان ،، هي اتخبلت اول مرة طالعة واول مرة تشوف الاجواء خارج العراق ،،انبهرت بكلشي وهو هم جان يريد يشوفها انه هو اتغيرت احواله مو ذاك الي جان يقبل بهدايا التيشرتات من عدها ،، سألها عن ذهبها گالت خليته يم امك گلها يصير خير ماما اكيد راح ادزه من تشوف جماعة جايين للامارات .. ماما عزة يسميها ماما 😩 حط الويسكي وبدأ يشرب للصبح
سنة ٢٠٠١ صار عمر لارسا ٢٢ سنة اتخرجت و راح تسافر يم نديم الكل حاسديها الكل يتمنى يكون بمكانها بنات الكلية ولا وحدة مخطوبة هي جانت اول وحدة وجمالة زواج برة العراق سوت عرس بنقابة المهندسين طلعت اتجنن بس العريس جان ينتظرها بالاردن هو محضر العرس من فاتت بالقاعة جان ابوه گايدها وگعدها عالكوشة ،، يومين بقت ابيت اهله امه غيارة غارت من لارسا لان شافتها حتروح يم ابنها وراح تاخذه منهم وهو المعيل الوحيد الهم .. بس لارسا مهتمت كل همها توصل يم زوجها نديم بيوم سفرها بمطار بغداد اجوي اهل لارسا ديودعوها ومن ضمنهم ابوها ل لارسا .. شافها لابسه بنطرون كام يعيط ويصيح بنص المطار ,, هاي اخر تربيتي بنطرون كاوبوي حصر اتسافرين بي هاي اخر تربيتي حاطة مكياج كومة بوجهج ،، لارسا كامت تبجي وام نديم اتشفت بيها وابو لارسا مستمر يعيط بنص المطار على بنته تالي گلها انتي حتروحين اتسافرين (ان كنت لا اراكِ فأن الله يراكِ) ودعت اهلها بغصة وابوها مقبل يودعها علمود بنطرونها الكاوبوي وامها وخواتها واخوها الكل ديبجون عليها بزمن صدام مجانوا يقبلون يطلعون ذهب بالمطار لازم بس الحلقة فمن ديفتشوها ل لارسا شافوا ذهب النيشان لابسته فگلولها رجعيه لاهلج لان الذهب يتصادر بالمطار رجعت لارسا انطت الذهب لام نديم باعتبارها ام زوجها وايدي امينة
