#قصه_حقد_الاخوان#
#للكاتبه_فردوس_عبد_اللطيف#
بسم الله الرحمن الرحيم
1+2+3+4+5+6+7+8+9+10 الأخير
انا ساهرة .. فتحت عينى عالدنيا كنا عايشين بيت جدى ابي معلم وامى معلمه بيت واخى الاصغر منى عماد
عمى صلاح محامى وزوجته معلمه وعدهم ولد اثنين عادل اكبر منى وحامد اصغر منى ..عايشين ناكل سوا ونضحك سوا حياه بسيطه نلعب سوا ويه ولد عمى مرة نتعارك ومرة نتصالح كلوبنا صافيه ما بيهه حقد جدى كان شخصيته قويه نخاف منه مرات يجمعنا يحجيلنه سوالف بيهه حكم يرويلنه روايه بيهه معنى يعلمنه الصح من الغلط بطريقه القصه صرت بالمتوسطه اشوف نظرات ابن عمى لى نظرة حب مو نظرة اخوان الصراحه انى هم احس من يكون كاعد بمكان يعجبنى اروح يمه واسولف واذا هو طالع اضوج احس بفراغ واذا نروح لبيت جدى ويه امى اخبصهه يمته نرجع لان اشتاقله
بيبيتى شخصيتهه ضعيفه حجايه توديهه وحجايه تجيبهه مرت عمى تغار من امى بعد نسوان حما ودايما تفتن لبيبيتى تسويلنه مشاكل تشوف ابوى يحبهه لامى وهى عمى ما ينطيهه اعتبار تطلع حقدهه بالفتن..
همزين كل وحدة بمدرسه تدرس جان هم سوتلهه مشاكل فديوم امى مريضه وتعبانه نايمه بالفراش دخلت للمطبخ اسمعها تحجى ويا بيبي دكلهه جذب ترى مو مريضه حتى لاتشتغل شوفى عمه لازم تسوين حل وتقسمين الشغل بينه وهى اذا غسلت ماعون واحد دك اعلان ولازم الكل يدخل انذار رحت كتلهه لامى كامت خطيه من الفراش كوة حتى تساعدهم بالشغل...
امى متقبل تحجى لابوى على الى جاى يصير دكول ذولى اخوان ما اريد يتعادون عمتى سكينه متزوجه وتجينا بالمناسبات عدهه 3 جهال اجانى ابن عمى حامد كلى ساهرة ترى اخوى عادل يحبج ويستحى يحجى وياج ويعترفلج انى ضحكت وسكتت ما اكدر اجاوب بقيت كلما اشوف عادل كلبي يدك واتخربط وايدى ترجف وهو بس يباوع بعيونه نظراته تقتلنى ..هسه غير يحجى ويفضنى..جدى فد يوم كاعدين وكله لعمى خاف اموت اخذ ساهرة لعادل سمعت مرت عمى نبصت
هسه ياعمى خلى يكبرون وهما يختارون مو احنا بكيفنا نحجى
بس انا وعادل بقت الحجايه بكلوبنه واعتبرنه نفسنا واحد للثانى..فديوم كنت راجعه من المدرسه وهو واكف بالباب واحد جان لاحكنى شافه تخبل ولج هذا ليش يمشي وراج اعرفه فاشل بالدراسه وبس يركض ورة البنات
وانى شعلى مو تشوفنى مدنكه وامشى
من يومهه ظل يوكفلى براس الشارع ومن اروح للدوام يوصلنى
ومرة تعارك ويه واحد صجمنى وتمالخ وياه ورجعنه للبيت هدومه ملخه وامه ظلت تصيح وانت شعليك بيهه خاف عبالك صدك تتزوجهه عشم ابليس بالجنه
رحت لغرفتى بجيت لمن ما مليت..دخلت امى ها يمه اشبيج
لا ماكو شي بس راسبه بدرس
اى ملتهيه بالتلفزيون والمسلسلات
او هسه بالله شكلهه واذا احجيلهه راح دكلى عوفى وشتسوين بابن عمج خليهه سكته احسن
عادل اكبر منى ب3 سنين وشاطر نجح من الخامس للسادس اعدادى
وانى طلعت كمال بلانكليزي بالثانى متوسط
كلى ولا يهمج انى ادرسج
للحكايه بقيه#
#قصه_حقد_الاخوان_جزء2#للكاتبه_فردوس_عبد_اللطيف
بدا عادل يدرسنى بالعطله وصرت احب الانكليزى ويه كل سطر يذبلي حجايه غزل
حبيته وحبيت الدرس وتعمقنا بحبنا اكثر وامه الخبيثه كلسع تجى علينه ها ماخلصتو شطلع هالدرس
لو تتحجج..
شكد مكروهه
وانى استحى ما اكدر اجاوب وعادل هماتين ميجاوبهه حتى لا تصيح عليه كدامى وتقل قيمته..
صبحنا فد يوم على صياح بيبيتى جدى توفى الله يرحمه الانسان الحنون العطوف سوينه فاتحه وصار البيت كله كابه وحزن صرنه كل واحد يباوع للثانى وبعيونه كلام بس صامت
بدت تشتغل خباثه مرت عمى تحوك مؤامرات ودساءس لحد ما خلت بيبيتى تكرة امى وتشد وياها...
حتى عمى صار ميحجى ويه ابوى الا من طرف خشمه
بما ان عمى محامى كان جدى مسويله وكاله عامه والاخ محول كلشي اله البيت وكان عندة بنايه صغيرة بيهه محلين وفوكهم شقق ماجرات هم استولى عليهم
بس ما كنا نعرف حتى مبصم بيبيتى على تنازل حصتهه اله وباسمه
ظلت بيبيتى تبجى على جدى توفت ورة سنه من وفاته خلصت الفاتحه عشنا كالغرباء بالبيت واحد بعيد عن الثانى واحد يتحاشه الثانى بس انا وعادل نبقى نتسامر ونتغازل ..كبر حبنا وزاد .كل يوم نعيشه يكبر حبنا ويانه صار هو النفس الى اتنفسه
مرت عمى بدت تاذى والدتى لدرجه كبيرة اخر شي كامت تتبله عليهه تذب تهم على مرة على امى مرة على ابوى
اخر شي ابوى بعد ما تحمل طكت روحه
ودز على عمتى وكلهه خلى كل واحد ياخذ حقه وكلمن يروح لطريقه واحنا اخوان مانريد نخسر بعض
هنا اجت الصاعقه
جاوبهم عمى كلشي باسمى ابوى وامى تنازلو الى
كله شنو يعنى
اخوى ترى انى ساكت وما طلعتك من البيت لانك اخوى بس هسه اكللك ما الك عيشه هنا هذا بيتى وشوفلك درب وانى مستعد ادفعلك ايجار سنه وراها دبر حالك
ابوى انصدم تخربط ارتفع ضغطه صبينا عليه ماى وامى ظلت تصيح لحد ما سكتت من فتح عيونه
وراها كالت الفلو س فداك المهم صحتك
كلهه ابوى سدى الموضوع ولا تحجين بي راح ادور على بيت
طلعنا من بيت عمى تحولنا بيت ايجار يم مدرسه امى وفاركت حبيبي عادل
طلعت ودعت ذكرياتى ودعت حبي الاول والاخير دموعى نزلت بدون توقف
عادل يبجى مثل النسوان
اجه على ابوى كله عمى انا ابنك تحتاج شي
ابوى دار وجهه عنه وكله انت ابن ابوك...و
يعنى شنو بعد ما اشوف عادل بعد ما كنا عايشين كل التفاصيل الحلوة والمرة
كعدنه بمنطقه جديدة وابوى وعمى صارو اعداء كانه مو دم واحد والعشرة والعمر من الطفوله لحد ماكبرو كل هذا راح علمود الفلوس هى هاى الدنيا طمع الانسان
مرت الايام من يجى العيد ونتذكر لمتنه وجدى وبيبيتى شننسى فتحنه عينا على لمه الاهل والسوالف والضحك
عمتى تجينا على طول
كمت اسالهه على عادل ماتعرف شي وانى كلبى مشتعل نار منين اسمع اخبارك عادل كمت ما اقرى وماعندى خلك للدراسه
فد يوم امى وابوى بالدوام اندك الباب
منو
فتحى انا عادل
يابعد كلبي حبيبي وينك حظنى هو يبجى وانى ابجى
ولج تعذبت وين عفتينى راح اموت
اسم الله عليك ياعمرى يومى قبل يومك
كعد يمنه بالهول كان اخوى الصغير بالبيت يمنه سولفنه وضحكنا
ورة شويه كال اروح
ليش ابقى يمنه
ولج اخاف عمى يجى ويطردنى خلى جياتى الكم سريه احسن
وصيت اخوى ميحجى وقشمرته بهديه وصدك ما حجه هو هم يحب عادل ويريدة يجينا ويخاف لا ابوى يسمع ويطرة
طلع عادل واخذ روحى وياه فطر كلبي دموعنه تنزل بصمت بس كنت سعيدة بشوفته
للحكايه بقيه
