ليلة سمر
همس القوارير
البارت الثالث
المهم كنا بين فتره وفتره نروح لبيت ابونا نبقى يومين ونرجع كانت زوجة ابويه تعاملنا عادي يعني مجرد خطار وراح يرحون يعني ما مهتمتلنا وبنفس الوقت ما مأذيتنا وصار عند بابا طفل وطلع مريض خطيه بقى عايش سنه وبعدها توفى وكلش انقهرت عليه لان كنت اروح والعبه بوكتها اشوفها لمرة ابويه هواي تبجي على ابنها مرات ابجي وياها لان كولش اشتاقله وبقينا ساعه هنا وساعه هنا وهمين من ورى زواج امي شهرين وحملت باخويه يزن من ادهم وجابته ليزن كان كولش حلو حبيبي طالع على ماما وكنت اموت عليه ونلعب وياه اني وفهودي ومرت الايام والسنين واحنا على هذا الحال ابويه صار عنده ولد اثنين وامي صار عدها ولد اثنين وبنيه وكنا كولنا عايشين عند ماما وما تغير شي هي تشتغل وادهم يصرف مرات اشوفها تعاركه على مصرف لو مسواك هو ميهتم شويه ويجي يرضيها ومره من المراة سوت عيد زواجها بالبيت ورحنا اني وياها اشترت محبس ذهب كولش حلو وغالي وگالتلي
ماما : باعي سموره مو تحجين وتگولين انه اشتريته للمحبس منو يسألج گوليله بابا ادهم جابه بعيد زواجنا
سمر : ماشي ماما بس ليش يعني شنو بابا ادهم مجابلج هديه
ماما : لا ماما هو ميعرف بالذهب انطاني فلوس وگالي اشتري على ذوقج
اني اعرف امي تكذب واعرف ادهم مجابلها شي بس حبت تتباهى كدام خالاتي وكدام الناس انو هي مخسرت من اختارت ادهم وتركت بابا الي مكان يقبل تصرف فلس من راتبها وحتى شغلاتها الي كانت تحتاجها هو يجيبهن الها من ماله الخاص مكانت تقبل تعترف انو هي غلطت وان اختيارها كان غلط حتى لا يشمت بيها بابا والناس الي تعرفهم حتى بيت بيبي ام امي يعرفون ادهم يستغلها لماما بس ميحجون لان كانت ماما متنطيهن مجال عوفونا من هذا كوله ونجي لحياتي اني من بعد ما كبرت وصرت شابه وصلت للثالث متوسط وبطلت لان مفلحت بالمدرسه بالرغم امي كان اهم شي عدها دراستنا وبقيت بالبيت شلت مسئولية البيت واخواني وامي كانت تروح للدوام واني ابقى انضف واغسل وارتب واطبخ واداري اخواني ومن تجي امي كله تعبانه والشغل كوله براسي صح كنت اتعب بس ما بيدي شي برغم امي هيج تصرفت بس عمرها ما حرمتنا من شي واي شي نطلبه توفره النا اني صح ما فلحت بالدراسه بس اخويه فهد ما شاءالله كولش شاطر بالدراسه وامي كانت كولش متعبه نفسها عليه مدرسين ومصرف وغرفه لوحده كانت توفرله كولشي حتى يصير شاب ويعتمد على نفسه من صار عمري ١٦ سنه تقريبا كنت رايحه زياره لبيت جدي ابو ابويه وبقيت عدهم يومين اغير جو لان ضايجه واني عدهم اجه ابن عمي وكنت اول مره اشوفه شاب خلوق يطلع عمره ٢٠ سنه ودينتضر يتوضف بدائرة الكهرباء شفته صراحه هو مو حلو كولش يعني اسمر وطويل بس عيونه كبار يعني شكله مقبول اني نعجبت بشخصيته وكانت اخلاقه حلوه من راح صاحتلي بيبيتي ام ابويه
بيبي : تعالي سموره يمي خلي احجيلج حجايه
سمر : بلي بيبي جيتج
اجيت وكعدت يمها
بيبي : باعي بيبي اني كولش احبج وانتي كولش عاجبتني وما اريدج ترحين لواحد غريب شرايج باسم ابن عمج خوش وليد وحباب واخلاقه حلوه واتمنى تكونين من نصيبه
سمر : هااا بيبي والله ما ادري الراي الاول والاخير لماما ولبابا بكيفهم اني ما اعرف
بيبي : اني يهمني رايج انتي اذا انتي موافقه حتى اكدر احجي بالموضوع لان اني حجيت ويه باسم وكولش رحب بالفكره وگال بنت عمي واريدها وما احصل مثلها ادب وجمال واخلاق
سمر بصراحه اني خجلت من كلام بيبي وگتلها خلاص اني موافقه وبيبي كولش فرحت
من رجعت للبيت رحت يم ماما وسولفتلها بالموضوع
سمر : ماما اريد احجي وياج
ام سمر : اي ماما احجي شنو محتاجه
سمر : ممحتاجه شي سلامتج بس واني بيت بيبي حجت وياي بسالفه
امي عدلت كعدتها وتقربت مني
ماما : اي وشنو رادت بيبيتج ام طاهر
سمر : بصراحه فتحت وياي موضوع وخطبتني لباسم ابن عمي وگالت اهم شي رأي امج وابوج
ماما : مستحيل اقبل هاي سوالف ابوج حتى ياخذكم مني لا ماما عوفيها للسالفه
سمر: ماما شنو ياخذنا وما ياخذنا اني لو اريد اروح كان رحت من زمان بس اني ما اريد اروح وبعدين اول وتالي اني راح اتزوج شنو ابقى طول عمري يمج وابن عمي اولى بيه
ماما : لا ماما انتي بعدج صغيره ولا تفكرين بالزواج هسه من يصير عمرج ١٨ الله كريم
سمر كمت من يم ماما واني ضايجه ما اعرف ليش لان يمكن تمنيت اتزوج واخلص من العذاب او يمكن اني كنت حابه فكرة الزواج وفعلا باسم دخل مزاجي وكولت لازم اتزوجه حتى لو امي ما قبلت بابا يقبل ضليت ليل ونهار افكر باسم وكنت اخلق الحجج حتى اروح اشوفه
