ليلة سمر
همس القوارير
البارت الثامن
بعد ما قرروا سعد وباسم يوم ثاني يرحون للدكتور حتى يفتهمون شنو القضيه وليش ديصير ويه باسم هالشكل وفعلا اجانا سعد من وكت وطلعوا راح للدكتور اني بقيت يم عيالي هنا كمت اساعدهم بالبيت وانضف وعمتي كانت حبابه متخليني اشتغل هواي بس اني كنت ما اقبل لان متعلمه على الشغل بيتنا اصلا اني كنت دايره بيت اهلي وكنت من اشتغل تگول حوراء اخت باسم تگوللها
عمتي : اتعلمي الشغل من سمر شوفي شلون شغلها يبرد الگلب
حوراء : اوووف يمه انتي شما اسويلج ميعجبج
سمر : عوفيها عمه اني موجوده خليها لا تشتغل خلي ندللها شوي قبل لا تتزوج
عمتي : لا يمه ميصير لازم تتعلم كولشي واريدج انتي تعلمينها باجر وراها زواج لازم تصير معدله وام بيت لا يرجعوها عليه ههههه
سمر : هههههه مو مشكله عمتي اني اعلمها لا يضل بالج
صارت المغرب وباسم وسعد ما اجوي ضل بالي عليهم دكيت على باسم ميجاوب گولت يجوز يم الدكتور ورى نص ساعه واجه سلم علينا وصعد فوگ للغرفه وصعدت وراه
سمر : ها حبيبي شنو گالك الدكتور
باسم : گال مسألة وقت تبقى عالعلاج والابر المنشطه وان شاءالله خير ورى اسبوع تعالي اشوف شنو صار وياك
سمر : ان شاءالله خير كم ابره انطاك
باسم : انطاني ٣ ابر ضربت وحده اليوم وبين يوم ويوم ابره وحبوب مرتين باليوم
سمر : خو متأثر على سكرك
باسم : لا متأثر اطمئني
سمر : الحمدلله يلا حبي غير ملابس وخلينا ننزل نتعشى ويه عمتي وحوراء
وبعدها نزلنا وتعشينا وضلينا كاعدين وياهم للساعه ١١ كرزات وفاكهه وسوالف وضحك وما حسينا بالوقت بعدها صعدنا لغرفتنا وهمين غيرت ولبست دشداشة نوم وتمكيجت ورحت يمه بامل اناقتي لان مخليت هالشي يأثر عليه وتلزم عليه حجه بالعكس اهتميت لنفسي اكثر
واجه يمي خطيه متلهف همين حاول وحاول يتقربلي وتعب ومكدر وصار وجهه اصفر
سمر : لا تضوج حبيبي بعدنا اول يوم علاج ان شاءالله خير
باسم : نصبر والله كريم لا تعوفيني سمر
سمر : شلون اعوفك وانت روحي مستحيل حبيبي لا تفكر هالشكل وياك لاخر العمر
باسم : اني ما اگدر اعيش بلياج بس مو بيدي دأسوي كولشي لخاطرج
سمر : والله اعرف بعد عمري ربي يعديها على خير لا تفكر ووياك لأخر العمر انت زوجي وحبيبي
من حجيت وياه هيج حسيته ارتاح شويه خطيه والله صعبه عالرجال هيج امور يحس بالنقص
بعدها يوم ثاني راح باسم للدوام واني بلشت تنضيف ويه عمتي وسويته للبيت مرايه ودخلت اسبح وطلعت اراسل بنت خالتي وصديقتي نبأ وسولفتلها كولشي وحلفتها لا تحجي
نبأ : يا ربي شنو هاي صودك دتحجين سموره شلون حظ عليج يا عيني
سمر : شئسوي تعبت من هالسالفه ومليت مو بس لان ما متقربلي لا وهمين نفسيته تعبانه وما يتحمل مني حجايه وصاير اعصاب وين جانتلي هالسالفه
نبأ: اكولج ليش ميروح لدكتور رائد ابو صديقتنا فرح خوش دكتور ويفهم بهاي السوالف
سمر : ياا واذا گالي منو گالج عليه شنو اگوله وهو ميريدني احجي غير يموتني اذا گوتله حاجيتلج
نبأ : اي طبعا ميقبل اصلا تمس رجولته بس اني اگولج شنو تگوليله سامعه بيه من زمان او طلعته من النت ماكو شي صعب طلعيلج حجه او حل
سمر : اي صح بس خلينا نشوف هسه هذا الدكتور شنو يسوي واذا ماكو حل اگوله على دكتور رائد
نبأ: ماشي حبي خوش اقتراح الله يساعدج يا قلبي والله قهرتيني طول عمرج ما عندج حظ
سمر : الله كريم بلكت ربي يعوضني بالجايات
نبأ : ان شاءالله يارب
وسديته منها ومسحت كولشي اخاف يقراه باسم وتعدى اسبوع كامل على العلاج وماكو اي نتيجه بس تعب واجهاد لصحته وتلفت اعصابه اكثر واكثر بعدها راجع باسم الدكتور نفسه وهمين انطاه غير علاج وهمين كولشي ماكو وتعبت نفسيت باسم بالاكثر وبالبيت كوله عيطه وهوسه ويخلق المشاكل حتى يفرغ عصبيته اني همين كمت اعذره وحجيت وياه على دكتور رائد بالبدايه ما تقبل الفكره وبعدين من غير ما اعرف رايح عنده ومنطيه علاج حبوب ومقويات وانطاه شيشه بيها عسل ومكسرات ومجموعة اعشاب قيمتها ١٥٠ الف لوحدها وگاله تستمر عليها والعسل الي بيها خاص لمرضى السكري
وبقى تقريبا اسبوع كامل ياخذ منها ٣ مرات باليوم والحبوب مرتين يگول كمت احس بنشاط وبطاقه مو مثل قبل من كولشي اتعب هسه كمت ما اتعب وبقى مستمر عالعلاج وگلنا نصبر اسبوع الخ ونشوف النتيجه شنو
