ليلة سمر
همس القوارير
البارت التاسع
بعد ما راح باسم للدكتور واخذ علاجه حس بنشاط مثل ما گولتلكم وگالي حضري نفسج اليوم بلكت اگدر وفعلا تجهزت وصرت اربعه وعشرين حبايه اني يوميه البس قمصان نوم ومكياج وتسريحات ومرات البس عدسات وباروكات يوميه شكل جديد احب التغيير بس هالمره اهتميت اكثر ودعيت ربي كون يحقق اخر حلم ألنا ويعوض تعبنا خير ويجبر بخاطرنا فعلا اجه باسم وصعدنا لغرفتنا من وكت وبده يبوسني وتقربلي بس هالمره مو جهد قوي والحمدلله وصار الي صار وفعلا حسيت بارتياح لان شفته هو همين ارتاح وصرنا حالنا حال اي متزوجين لو تشوفون شلون فرح باسم وكل شويه يبوسني من الفرحه واني همين فرحت لفرحه فعلا هذه السوالف تقرب المرأه والرجال من بعض حسيته يحبني من صودك حسيته اقرب من روحي ألي سبحانك ربي الك بيها حكمه وايراده ماكو احلا من الحلال المهم بدت حياتنا طبيعي وما تندمت لان اخذت باسم وحبيته كان انسان رومانسي وحباب وضل يمارس حياته بشكل طبيعي والحمدلله وبعد شهرين حملت بنتي نسمه وصارت عندي احلى بنوته بالدنيا وطلعت حلوه عليه والحمدلله وبعد ولادتي اربع اشهر تزوجت حماتي حوراء الي كانت ساكنه ويانا وفعلا كان عرسها كولش حلو ومرتب ومبقالي غير بس اني وعمتي وباسم وهسه صارت نسمه نورت حياتنا واصلا عمتي فقيره من بعد ما تزوجت حوراء عمتي كامت تگضي وقتها اكثر شي عند بناتها تروح وتبات يمهم ومرات تبقى يومين او اكثر يعني ممأثره عليه خطيه واني ضليت كول شهر اروح لبيت امي يومين وبيت ابويه يوم وارجع لبيتي شوي اغير جو من اشوف اهلي ما اطول عليكم من بعد نسمه حملت مرة الخ وجبت حيدوري وصار عندي بنيه وولد وبقيت نفس اهتمامي ولا تغير شي بيه يوميه اني عبالك عروس ترتيب وتعديل ومكياج وبقت علاقتي بنت خالتي بالرغم تزوجت بس بقينا نتراسل ونسولف بالساعات عن المكياجات واللبس والترتيب وكلشي حلو ونحبه وبعد مرور اربع سنوات جبت بنتي الثانيه ريم وصار عندي بنات اثنين وولد بصراحه احلى شي بالدنيا الاطفال ملو عليه حياتي وگلبي وروحي وكبرت مسئوليته لباسم بالرغم كان يحبهم حيل وعنده روحه من الدنيا جهاله بس همين التربيه والمسئوليه صعبه قررنا بعد منخلف وگلنا كافي عدنا خير من الله من صار عمر ريم سنه تقريبا حسيت باسم بده يتغير كام مو هلكد يسولف ويانا واني اكول يمكن مضغوط من الشغل او احتمال عنده مشكله خاصه بطل يغار عليه مثل الاول يعني مره من المرات تواعدنا اني وحماتي المتزوجات اثنين ورحنا للمنتزه وهو اجه وصلنا وانطانا مصرف للجهال وگال صارت عندي شغله بعدين اجي عليكم احنا همين بقينا وتعشينا والجهال كولش تونسوا وفرحوا وركبتهم بالالعاب وكل وحده من حمواتي وياها زوجها واني لا صودك حسيت بفراغ وگلت ياريت جاي ويانا ولا گاعده مثل الغريبه بس كانت فرحة الجهال بالالعاب تسوه الدنيا عندي المهم خلصنا من الكعده وگالوا يالله خلونا نروح خابرت على باسم
باسم : الوووو
سمر : هلو حبيبي وين انت
باسم : هلو گلبي اني بالشغل
سمر: زين احنا خلصنا شوكت تجي علينا
باسم : اني ما اكدر اجي عندي شغل
اني استغربت بصراحه
سمر : شنو يعني ما تگدر منو يجيبني اني
باسم : اخذولكم تكسي وتعالوا شنو ينرادلها علم
سمر : اني اخذ تكسي بهليل ولوحدي شلون ما اگدر انت تعال
باسم : اووووف شگد مزعجه اني جيه ما اجي واخذي تكسي وتعاي واذا ميعجبج ابقي بالشارع وسده للتلفون
يااا صخام هاي شنو هذا شبيه ليش هيج صار ما عنده غيره تخبل خو ما تخبل كمت خابرت على سعد ابن عمي واجه عليه خطيه بس گوتله اجاني يركض وما قصر كعدت بالسياره مالت سعد وكعدت الجهال واني الف حسبه وحسبه ابالي شغيره هذا ليش هيج صار والله متت قهر حجيت ويه سعد
سمر : سعد اريد اسألك سؤال بس عليك وداعته لابوك تجاوبني بصراحه
سعد : احجي خيتي اذا عندي جواب اكيد ما اكذب عليج
سمر : باسم شبيه اشو متغير مو مثل الاول شنو صاير اكو شي الله عليك اكو وحده بحياته لو شنو
سعد : والله يا خيتي كل مره تعرف رجلها وانتي ادرى بيه من اي واحد ثاني شوفي النقص الي بلبيت شنو وحاولي تعوضينه
سمر : يعني اكو شي مو وما تگدر تحجي
سعد : ان شاءالله ماكو اله الخير وانتي حاولي تعرفين الخلل وين
من حجيت ويه سعد هالشكل عرفت اكو شي بالموضوع واكو وحده ثانيه بس هوه ما يكدر يحجي حتى لا تصير مشاكل بس لمحلي ضليت محتاره المهم وصلنا الولد ونزلنا وتشكرت منه ودخلت البيت غيرت للجهال وغسللتلهم وكانوا تعبانين من اللعب خطيه بسرعه ناموا
