وانا اليوم داك عيني ما غمدت انوم كيف عاد انا تاني 😀... وانا اتنقل النقله الحضاريه دي من مججوب سيد الدكان و الله جابو الترزي لي حسن الخلي قلبي شغال دلوكه 😂💔 ... اصبحت الوطه مشيت جبت لي عروكه لطخت يديني للاباط.👋. وردمت ليك كرعيني ما خليت حته ووشي خليت الا عيوني ..👀 امي جات ماره بجمبي قالت لي البت العامله زي الضب دي بتسوي كدي مالك😂 قال اصلو ما اشتغلت بيها😂✋ عركت لييييك نفسسسي طلعت مني 4 فنايل وبنطلونين لمن حسيت بنفسي ضعفت.😂.. .لوت لي خشمه قالت لي أريتو يجيب فايده بعد دا.😞. مشيت الدولاب نكشت ليك الهدوم دي وبقيت اعزل لقيت ليك هدومي كلها جديده وانا ما لبستها وفكيت الجوعيره.. 😢💔 جاتني امي جاريه قالت لي خلاص الحاله قامت.. مالك قال.. قلت ليها عليك الله عايني هدومي بورقتن 😭 ما مرقت بيهن زي البنات.. عندها شبشب دكتور شول تقيل صقعتني بيهو.😁. قالت لي مجنونه هسه انا قايله في شي.💔... قلت ليها يسسسمك في توب أم العروس بعدين.😂.. عاينت لي بقعر عينها قالت لي دا كان عرستي💔.. أكلتها في حناني...الساعه بقت 4 ..ومواعيدنا بعد المغرب انا استحميت 3 مرات 😂 لمن جسمي بقي اغبش ..اتمسحت سرحت شعري ومرقت لي خصلتين بالجمبه .. امي قالت لي قجتك الزي ضنب التيس دي لميها 😐 قلت ليها يمه ما تحبطيني عليك الله انا كدا عاجباني 😥 قالت لي منكوشه م سمحه قلت ليها بالمويه والزيت بترقد.. وجلطتهن بالفرشه.وربطهن بالطرحه ساعه.. بس فكيت الطرحه كدا . تاني اتنفشن... امي قالت لي دا راس خصله لمي شعرك ما تفضحينا بوشك العامل زي كورة الشحاد دا ( عليك الله شوف امي دي 😂😂😂 ) أكتر إنسان مدمرني في الحياه بس برضو بحبها ....
اتمكيجت مكياج خفيف ولبست لبسه الوانها هاديه ..عاد نحن في اللبس كان قمنا صعبين وطلعت حلاتي شديد 😍 شفت نفسي بالمرايه مالكم 😂 اها لمن المغرب أذن انا كنت انتهيت.. ضرب لي تلفون رديت قال لي ألو لمن كتفي رجف.. وجاتني رفه في قلبي قال لي انا بصلي المغرب في الجامع الجمبكم خليك جاهزه... قلت لي سمح وهو ما عارف انا جاهزه لي ساعه... 😂 ..وانا مارقه إقبال جارتنا قلت ليها علي فكره مجوب سيد الدكان قالت داير بت أختك... (كان لازم أكلمها لاني ضمنت بعد كدا 😂 ) قالت لي محجوب يحج بلا عمار الخايب العفن خليته بتنبز ومشيت 😂 ... اها أولاد حلتنا بلعبو كوره في الفسحه من شافوني وقفو... واحد قال لي اقيف اقيف خلي الخاله دي تمشي.. قلت لي احترم نفسك يا ود يخلخل ضروسك ويملاها ليك شطه 😕 نرفزني وانا كنت مبسوطه وما عايزه اخرب جوي😂 طلعت علي الزلط قال لي شايفك تعالي في عربيه (جي إكس آر) قدامك انا جمبها.. في اللحظه دي انا حرنت قبلي ومسكتني رعشه انا اركب جي اكس آر دي انا لمن اشوفها في الشارع ساي بمرق طرحتي اتمره.. اجي أركب فيها.. ومع واحد مز... أقرص نفسي اشوفني بحلم ولا انا مت ودي الجنه ولا الحاصل شنو.. شويه كدا وصلتو سلم علي انا حيلي برد وجاني طمام ولفة راس وشلاليفي ديل يرجفن فتح لي باب العربيه دخلت... وجا هو قعد... وانا قعدت ابكي... ( اتمرمطت انا واتعذبت فرحه ساي بكيت هوي يا ريان اسكتي هسه الود يقول عليكي شنو) قال لي مالك في حاجه.. قلت لي لا لا بس جيرانا خليتهم عندهم وفاه... قال لي البركه فيكم خلاص ارجعك.. وداير يلف.. كنكشت لي في الدركسون قلت لي الله والنبي كان تلف 😞 قاعد يضحك قال لي مالك يا بت قلت لي ما تندمني اني قلت ليك... ابتسم ابتسامه خفيفه وواصل قال لي م حكيتي لي عنك... قلت ليهو انا ريان عبد اللطيف قريت محاسبه ماليه جامعة السودان اتخرجت لي 3 سنه.. قال لي شغاله قلت ليهو لا عاطله..... قال لي طيب هواياتك شنو قلت ليهو بربط اسكريم في البيت وفك الضحكه.. قلت لي في سري انا بكنس حوش زي الاستاد بأركانه بقوم من 6 بغسل عده ممكن ياكلو فيها طلاب النيلين وتفضل.. بمسح 6 غرف وصالون لمن اقوم ركبي مقشرات وصلبي برجف زي الغساله الخسرانه.. اححي انا انت ما عارف ساي هو انا عندي زمن لهوايه... لكن لو انت جيت وانقذتني اهوهيو ليك للصباح 😂 المهم مشينا كافي ظريف اول ما نزلنا خلاني امشي قدامه وهو بركن العربيه وانا ما ناقشه حناني طوالي انقشطت جوه لقيت لي طاوله فيها سته كراسي جريت لي كرسي وقعدت... جاني السيرفس قال لي معليش يا اخت دي طاولة عائله... قلت لي آي نحن عائله زوجي برا.. قال لي طيب سوري بنعتذر.. قلت ليهو ما مشكله ..وسنوني انبشكن برا وتاني البلمهن شنوو... اها اشوف ليك حسن جا داخل بفتش رفعت ليهو يدي جاني قال لي قعدتي هنا تعالي طاوله ثنائيه دي لشله او عائله من الخجله خمشت لي سكين وملعقه ... ما عارفه زاتي خمشتهم لشنو هههههه المهم لمن وصلت وقعدت فكرت ليهن ختيتن ف الواطه... 😂😂 المهم قعدنا وانا اول مره اعاين ليهو في عيونو... قال لي عارفه انك مختلفه.. قلت لي كيف.. قال لي بتحسسيني انك طفله.. 😄 قلت ليهو ع فكره انا عمري 26 سنه قال لي وانا عمري 32سنه بس برضو انتي طفله... قلت لي ف سري طفله عاقله بالغه ست بيت ومره ونص..... انا كان همي كلو في الموضوع العرس 😂 الزول دا بقول في شنو انا ما عارفه... قال لي من اول يوم شفتك عجبتيني.. بتصرفاتك ورواشتك وضحكتك وخجلك... كلك علي بعضك كدا... حلقي نشف كرررر اتكلت في الكرسي وطقطقت اصابعيني... ما تستغربو قاعد اعمل (ريفريش) لنفسي طولت ما سمعت كلام سمح 😂😂 قال لي حتي توترك دا بحبه... كبيت لي كبايه مويه كربعتها.... وطلبنا الاكل اكلنا واحنا راجعين في الشارع قال لي ع فكره اليوم حلو معاك وعدى بسرعه قلت ليهو وانا مبسوطه اني لاقيتك والله قال لي عارفه يا ريان.. انتي بتشبهي خطيبتي شديد.... بس راسي بقي كبييير حسيت بيهو تقل وجاتني حاجه قويه تقول فنوني بي طوبه... بلعت ليك ريقي تزعطاشر مره وعيني الشمال دي رت رت رجفت بقت بتغمض براها.... قال لي الله يرحمها ويغفر ليها.... بس جوعرت ليك وفكيت البكيه 😭😭😭😭 بكيت بي حرقه قال لي مالك قلت لي ما تقول لي ماتت وابكي واتنجخ واتنفض... التقول بعرفها ( اول مره في حياتي افرح علي موت زول) مسك يدي قال لي عليك الله ما تبكي لو بتعزيني... قلت لي ف سري والله انا بعزك لكن انت ما عارف انا المبكيني شنو 😂😂😂 يعني فرضا انو خطيبتك دي ما كانت ماتت انا كان طرشتك الاكل الاكلناهو دا بنخرينك 😂 اها لمن قربنا نصل قال لي دا شارع الكلاب انزلك بالشارع التاني عارف وقاعد يضحك وعرفت انو حنك الكلاب ما مشي فيهو 😂 عايزه انزل كدا قال لي ريان حاشوفك متين تاني قلت ليهو.ف سري.. هو الشوف دا كم مره اوعدك الشوفه الجايه مدى الحياه... وكان ما جيت بالعافيه شيخ أبكر بجيبك 😂😂 ..قلت ليهو بينا تلفونات ومشيت... ختيت رجلي كدا بدور افتح الباب اتصل قال لي كدا عرفت البيت.... 😍 قلت لي قصدك شنو قال لي بس كنت عايز اعرف بيتكم وعرفته..... انا من الفرحه نزلت الستاير والملايات غسلتهن... عشان الزمن ما يضايقنا ساي يمكن عرسي بعد اسبوع 😂😂😂
يتبع.....
