حكاية انو حسن يصل البيت دي باقيه لي زي الحلم اصلوو ما واقعه لي ابدا😂 الصباح بدري قشة عيني من النوم (خمشت ليك النطع والشمله) نفضتهم وختيتهم مشيت جبت الطلح رصيتو وانقشطت في الاوضه جبت الزيت وكما خلقتني يا مولاي اتجلبطت ليك بالزيت الا عيوني..بس اشوف ليك امي جايه من بعيد بتأشر لي بيدينها 😥 وبتقول الله الليله بضررك كان دايره تفضحيني.. قلت ليها يمه في شنوو خليني اتحبس فكتني بكباية الزيت جات في الحيطه اتفرقشت حته حته.. قلت دي كان جات ف راسي كان ودتني الآخره طوالي 😂 قلت ما مشكله وقت حمتني الدخان أنجلخ بسس مسحت ليك الكريم في جسمي عامتن 😂 لو لي مراد في وشي البس كيس 😂 امي قالت هسه انتي بتسوي كدي مالك ودي شنو الاكياس دي البيت دا البنضفو منو قلت ليها اسمعي هنا يا أستاذه انا من الليله ما بنضف عرسي قرب شوفي ليكي شغاله لبيتكم دا.. بس كوركت يا علي تعال شوف ريان قالت (بيتكم) .. طوالي قمت علي حيلي ملصت مني الاكياس ديك كلها وطلعت لي خمسه دست غسلتهن قمت لمن ما شايفه صلبي يرجف.. نمت نومه وحده صحيت العصر... اول ما قمت.. لقيت مره قاعده علي راسي بتعاين لي ولسه فيني باقي نعسه وانا حسب م بدور زول يقعد جمبي زحيت ليك كراعي بعيد ولطشتها في صلبها قلت ليها قومي المره اتحولت مني في الكرسي وانا حسب راسي منكوش وتعبانه من الغسيل افتكرتني مجنونه 😂😂😂امي قالت لي دي جارتنا سكينه سكنت في بيت ناس سعاد بعد رحلو.. قلت ليها اها يعني ناس سعاد رحلو امي قالت لي من امس ولا من الليله قلت ليها م عارفه والله والخجله دايره تقتلني وانا لاطشه المره من غير سبب.. اها المره بقت تعرف ف نفسها قالت عندها 3 أولاد وبت اصغر وحده البت و عمرها 23 سنه.. عندها ولدها الكبير ملازم والفي النص مهندس وآخر واحد خلص طب وبعمل في الامتياز.. قلت ليها ليه سكنتو متأخرين كدا يا ريت لو ناس سعاد رحلو من زمان.. بس بقو يضحكو 😂 المهم المره دي ضحكت وسكتت صرة وشها عادي😕 زي الكأنها م كانت بتضحك😕 حيرتني المهم فتشت لي نكته من مافي قلت عشان أتأكد من الحاجه دي.. فتحت تلفوني وضحكت امي قالت لي مالك قلت ليها اسمعي النكته دي في وحده إسمها بتول صحت لقت نفسها بالعرض المره دي ضحكت وفصلت طوالي في ساعتها.. 😂😂 يعني انا لمن اضحك بقعد لي دقيقه او اقل مبتسمه.. اتونست معاها وعزمتها عرسي 😂😂 اللسه ما حددو.. 🌚
اها مرت اسبوعين ما شفت فيها حسن اشتقت ليهو يوم بالليل بنتونس قال لي ريان لو قلت ليك الجمعه الجايه نعمل العرس حتوافقي.. بصوت عالي قلت لي عرس شنو انا لسه ما اتحبست بس بقي يضحك وانا من الخجله بقيت ساكته.. قال لي انا عايزك كدا انتي كدا عاجباني... قلت لي في سري انت ما عارف حاجه ساي والله انا افك الطرحه والبس قميص الهزاز تقول دا ( الجاك سيد العده) 😂😂💔 قال لي انا بكره بتصل على علي اخوك حاسوقك تعزلي حاجات الشيله ما بقدر استحمل انك بعيده مني اكتر من كدا.. تلفوني بقي لي تقيييل والضحكه لي الضرس الاخير وعنقلت كرعيني في آرش السرير.. بس قفلت التلفوون وجريت لامي لقيتها بتعمل ف قهوه وشبيت ليها ف رقبته وبقيت اكورك قلت ليها بكره ماشه اجيب شيلتي.. امي قعدت في البنبر وبقت تبكي.. قلت ليها يمه مالك انا هسه قلت ليك ماشه اجيب كفني 😂💔قالت لي ما قادره اتخيلك عروس.. انتي لسه صغيره..ما كان اعرس ليكي.. قلت ليها يمه عليك الله كبر اكتر من كدا كيف ..منتصر بتاع القصب مسميني الجقه.. سمعتو بالصدفه وعيال الحله مسميني الخاله... 🌚💔 المهم بكت وسكتت 😂 قلت ليها انتي قولي خايفه من حوشك الزي الاستاد البتنهزيني ليهو من طقة الديك الاولاني دا.... المهم اصبحت الصباح مشيت عزلت شيلتي كلها ومشت معاي اخت حسن .. ورجعت مبسوطه ... امي قالت لي اها بجيبوها متين قلت ليها هنا مافي غير اختو أمو وأبو حيجو السودان بعد بكرا قالت اوعك توري زول خلي الجيران يتفاجأو ما عارفاني انا من الصباح نشرت في قروب الصرفه حق الحله 😂😂 بس امي ولعت لي الحفره والدخاخين دي فوق جاتني في الاوضه مسكتني من يدي قالت لي ارح ولعت ليك الحفره وكان وشها متغير قلت ليها يمه مالك وشك مالو قالت لي مافي شي امرقي لو بقت حاره تاني ما بتلقي طريقه تقعدي فيها.. قلت ليها يمه انتي بتبكي والعبره خنقتني واتماسكنا وبقينا نبكي قلت ليها ما حابعد عنك والله اجيكي كل سنه فكتني ولزتني والدموع في عيونا بقينا نضحك.. قالت لي كل سنه يا معفنه 💔💔😂 المهم قعدت ليك ف الحفره قعده تمام قعدة متمكنات 😂 لمن امي قالت لي انا شاكه انك عرستي قبل كدا..
