عندك زولك (كنكشي) فيهو قوي بتعرفي الكنكشه.. انا من يوم ما عرفت حسن ما مدياهو أي فرصه مكنكشه فيهو ما مدياهو نفس..😂 يشوف وحده تانيه... اها يوم كدا ضرب لي قال لي عندنا حفله في قاعة الصداقه بازار ومعارض وسايقك معاي 😍.. دايره اقول ليهو لكن ما تكون بالليل قاطعني قال لي ما لكن ولا شي تسمعي كلام راجلك😑 من سمعت الكلمه دي اتشقلبت ليك في السرير وقلبت هوبه في الوطه طقشت التربيزتين والدولاب وشلت معاي فوط التربيزه 😂وتاني ما سمعت شي إلا وأمي بتقول لي علي خت ليها بصله😕 أدعكه ليها في نخرتها بس علي رفع يدو فوق ونقرني😅 في جبهتي رمشت من رمشت طوالي لفخني كف 😂قال لي مستهبله بس قومي علي حيلك..😕 هو ما عارف انا غمرانه من شنو لو عارف كان بدل البصله عرك لي شطه 😂 أهاا بس الساعه جات 5 لبست ليك ديك يا اللبسه الما خمج واتمكيجت وحسب الشعر خفيف لبست تلاتاشر بانده لزوم الشعره بوره تكون غليده وحسن يطمن علي مستقبل اولادو 😂 المهم لمن حسيت براسي بقي تقيل لكن قلت ما مشكله كلو فداك.😄.. اها اتلاقينا في شارعنا المعتاد فتح لي العربيه.😍 اول ما قعدت جمبو قال لي عطرك حلو ..😍 هو ما عارف انا لمن أجي الاقي بستحمي بالريحه حمام😂 ..قلت ليهو شكرا.. ودنقرت وتلاليشي ديل من الخجل وانا مدنقره حسيت بيهن في رقبتي..😂 قال لي نزلي الشي الفوق راسك دا (في العربيه مش في حاجه كدا بنزلوها عشان الشمس) بسسس لمن جاني حيرقان قلت خلاص بانداتي طلعن بي برا واكتشف امري😅 عيوني رقرقن قلت لي شنو😰 قال لي قدامك طوالي في العربيه لمن قلبي برد 😂نزلتها كدا وقعت ورده لونها بنفسجي انا اول مره اشوف ورد طبيعي😍 ..الورد دا انا ما بشوفو الا لمن اجي أورق الخدره... الورد الاصفر الصغار داك 🌚 ما علينا.. الصدمات كترن علي وانا انسانه قلبي رهيف وما بستحمل الحاجات دي😂 كلها جاتني سوا قبيلك غمرت وهسه بموت وحاة الله بموت.. 😅 ضحك وقال لي بتشبهك مش.😍. ( انا قلت في سري الود دا يا أحوص يا ما عندو زوق) 😁 يعني انا ما اكذب عليكم مقبوله.. 😂ما شينه وما سمحه.. لكن دا حيرني خلاني اعيد النظر فيني😁.. يعني لمن يقول لي انتي مختلفه انا بكون اليوم كلو مقنبره في المرايه 🌚 ومافي أي إختلاف نفسي أشوف الاختلاف الهو شايفو دا 🌚💔 ... وصلنا الحفله.. علي دخلتنا لقينا مره كبيره كدا سلمت علينا وعرفني بيها 😁..ولفلفنا المعارض وهناك لقيت زولتك دكتوره ساره قاشره آخر شي😐. وفل ميك اب دا غير العدسات.. 😑لمن البرنامج خلاص قرب ينتهي جات ضربت حسن في كتفه وسلمت عليهو..😑 وسلمت علي وقالت ليهو تعال أعرفك علي بنات خالتي😯.. وانا هنا خشيت في النار ومرقت.😨. قبضتو من قميصو.. 😤قلت لي حسن قال لي شنو😍 قلت لي ما تخليني😩 قال لي دقيقتين بس قلت لي طيب م تتأخر 😲قال لي أرح معاي😍 قلت ليهو لا وخلااااااص الفار لعب لي في عبي😞 البنات ديل سمحات وشديدات 😞سمح وقت هو عندو ديل جاييني انا لشنو لمن شفتو طول اتحمقت وانا شايفاهو قدامي بتونس معاهن بس مرقت وسمعتو بنادي لي وانا ماشه بسرعه لمن طلعت برا ضرب لي قال لي خليك جمب العربيه😧 اصلا البرنامج انتهي وانا قربت ليك لمن جاني قال لي ديل وقعو منك شايل ليهو باندتين😨 في يدو عيني الشمال دي رجفت براها😢... و نكرتهن حطب وهو مصر انهن وقعن مني وانا اخلف ديل ما حقاتي 😂😂 المهم جدعن.. لمن ركبنا العربيه قال لي انتي مالك مشيتي.. 😢قلت ليهو ولا شي.😥. قال لي عارفه ديل قدامي من متين😑.. قلت ليهو اها.. 😐قال لي من وانا في الجامعه.😑. انا لو عاوز منهم وحده.😐.. ما كان حتلقيني معاك.😅.. قال لي انتي روحي يا ريان بس في اللحظه دي انا سنوني كلهم برا للأضراس... 😍قال لي متين حاسمعها منك قال لي ما عارف انتي بتعبري عنها بالغيره.. 😍وباينه في عيونك ليه ما عايزه تقوليها لي... 😒( قلت لي في سري أنحن بندور نعرس بس) مافي وقت 😂 ..جيب اهلك وتعال..... 😂اها قلت ليهو بقولها ليك ف وقتها قال لي علي الطلاق الا اسمعها حتي تنزلي.. 😑قلت ليهو تطلق شنو قال لي انتي قمت ضحكت ونزلت.😂. قال لي ريان ما حتقوليها قلت ليهو لا... 😂ما عارفه الجرأه دي جاتني من وين 😂 لكن قلت خليهو عشان يستعجل للعرس.. 🌚💔 ... اها الورده ديك قلت عشان ما تجف ومافي زول يشك فيني مليت لي قاروره مويه ودخلتها فيها وختيته في الاصيصه منظره كان خرافي...😍 صحيت الصباح مشيت الدكان حبت سكر نسيت الباب فاتح وانا داخله اشوف ليك غنمايه دخلت كفتت القاروره في الوطه وبتكوضم😩 في الورده.. 😳 جيت جاريه ودفرتها بكراعي وشلتهل من جضمها 😢ولبعتها هاشتني بقرونها ودفرتني في الحيطه حسيت برقبتي جمب صلبي😢 شلت الجركانه طقيته في راسه نفضت لي الجركانه هناك ونتلت لي يدي من آباطه خلاص البكيه واقفه لي في حلقي اول مره اشوف لي غنمايه مانعه قدر دا 😕 وجاتني تاني دايره تهوشني ولا كضبت رفعت يدي فوق وصمتها كف... علي وردتي الاكلتها 😢💔
اها بالليل كدا اتصل علي قلت ألو قال لي كيفك قلت ليهو تمام قال لي مساهره مالك😆 قلت ليهو منتظراك😆 قال لي وحشتك 😆قلت ليهو شديييد😆 قال لي عارفه مما نزلتي لحدي هسه انا بفكر فيك😆.. قلت ليهو وانت كمان😆.. قال لي وانا كمان شنو.. قلت ليهو بفكر فيك قال لي عارفه انك بقيت جزء من حياتي خلاص انا ما عارف متين وكيف بس خلاص ما قادر ابعد عنك.. عنقلت ليك كرعيني في الحيطه وقلبي بقي شغال دلوكه قلت لي قلت لي وانا بقيت ما قادره ابعد عنك ( في سري قلت لي ومستني شنو انا للستاير غسلتهن كويتن ومراتب الضيوف جهزتهن وحفرة الدخان نضفتها ما فضل شي
🌚✋) قال لي عارفه يعني شنو انك تدمن زول.. قلت ليهو لا.. قال لي يعني انك ما تقدر تعيش بلاهو وما تقدر تكمل يومك الا وانت بتتكلم معاهو وتشوفو.. قلت لي ف سري بااااسسس دا الانا دايراهو.. 😂 ادمني وانا ببقي ليك بنقو 🌚✋ بس أطرى لي العرس وشلت ليك المخده طبقتها وختيته قدامي
واتغطيت ليك بالبطانيه قال لي ريان قلت ليهو عيوني قال لي بحبك وما بقدر أعيش من غيرك وشغل لي اغنيه فيها مقطع بقول عايزك حلال في دنيتي واتهني بيك باقي العمر كل عام وانتي الحب... بالليل داك انا لو كنت جنيت.. ما في زول يلومني بس شعرت ليك بجسمي كشه فجأه فتحت البطانيه لقيت ليك علي اخوي من فوق لي شال مني التلفون وقال لي حسابك معاي الصباح وانا خلاص الفيني كملت ومن الخوف دايره اموت وعلي اخوي صعب ممكن عادي يقتلني ويدفني... ولا يحلق لي صلعه ويحبسني.. ولا كتلو هو... اليوم داك كلو ما جاني نوم ومن الخوف جاني وجع بطن.......
يتبع.....
