اليوم داك عدى اصبح الصباح كالعاده بنضف لمحت حفرة الدخان بالزقاق 😂شلت الكوريك وعنيتها.😉. كرته ليك التراب و مرقت ليك الاعواد ونضفتها ليك نضىييف امي جات لقتني مفنقسه في الحفره بنضف.😂.بعد خلاص نضفتها بقيت اجرب في القعده.. 😁 امي عركت عيونها تلاته مرات.. قالت لي رياااان بتسوي في شنوو يا بت دايره تفضحيني😈.. قلت ليها يمه عليك الله خليني انضفه انا ما باقي لي كتير..😂 قالت لي قومي علي حيلك سريع شوفي نضافتك والحفره دي لمن زولك دا يجي البيت انا دي البنضفه ليكي..😕. ودفار الوساخه جا برا مرقي الوساخه دي كلها انقليهاا..😑. اها مرقت كدا كاره الشوال لمحني ود جيرانا جا سلم علي قال لي وينك يا زوله انتي مختفيه كدا قلت لي عطله بس والله والامور جايطه مع البيت.. 😐 قال لي ما فتشتي شغل..😐 قلت ليهو السنتين دي انا جاريه في النهايه قنعت قال لي انا عملت معاينه مع شركه وهسه مستني الرد ..امشي قدمي لسه باب المعاينات فاتح... وانا بتكلم معاهو سمعت ليك تلفوني دقه 😍خليتو واقف بتكلم لا قلت لي عن إذنك لا دا..😂 وصلت التلفون لمن نفسي قايم لقيته دي وحده دايره من امي قروش عده😂 طوالي وانا فاتحه الخط قلت لامي انتصار ست العده في التلفون.. 😄امي هشتني بيدها وقالت لي بصوت واطي اوعك تردي.😠.. قلت ليها بصوت عالي لكن انا رديت قالت لي اتصرفي..😣 مشيت بالتلفون شويه وقلت ليها شوفي يا انتصار امي دي ما عندها ليكي قروش ف الوقت الحالي اضربي ليها في ظروف احلي من كدا... 😕 وبس هاجت فيني انا امور الحرمنه دي ما بتنفع معاي😡... قلت ليها قلتي كدا.. اها كان ما دايرين نديكي ليها بتسوي شنو وقفلت الخط😐.. دقت مرتين ما رديت.. مشيت طلعت باقي وساختي وجيت لقيته مرسله لي رساله قدر دا وفي النهايه كاتبه لي لمن اصلكم ببقى ليكم بنفسجي..😂
ما اشتغلت بالموضوع كتير.. اها باقي لي آخر شي وساخة المطبخ.. متلتحه بالكيس جمب الباب ختيته كدا اشوف ليك مره من بعيد بضراعات عاتيه شطوره داقات في صرته لا بسه توب هزاز بتورور لي من بعيد.. 😐 وانا ماسكه الشوال بيديني الاتنين عيني بقت تغمز براها... قلت معقوله تكون دي انتصار بتاعة العده...😯 أمي ما قالت لي الزوله دي بالحجم دا ... ياخ انا قربت اخش جوه اصلي صلاة الخوف... الزوله دي رفعت يدها الزي الكوريك دي ورصعت الباب كف. وفتحته.. انا حنيت علي الباب والله.. دخلت البرنده طقشت امي دفرتها هناك قلت ليها يمه انتصار ست العده برا وهايجه قالت لي انتي قلتي ليها شنو المره دي م نصيحه .. باب البرنده فتح ...(صيييت) راسه في الضل زي سقالة البنطون حاجه ضخمه..😂😂. مش الناس العاديه بتخش برجولها لا دي بتخش بشطورها 😐وباب البرنده ما دخلها دخلت سيافي... قلت لامي أضربي لناس المطافي😢 هي ناس الدفاع المدني😦 دي ما كان يسموها انتصار دي انشطار.. انفجار ... 😣 التريلا دي كان قعدت فيكي بتستفرغي مصارينك عادي..😣 جات لامي قالت ليها اسمعي هنا يا رجاء ونفسها قايم وطلعت كمان النوع الببزغ في الكلام اي كلمه معاها عشره بزغات قالت لامي انا صبرت ليكي كتير 😡.. امي قالت ليها يداب العده انا شلتها اول امس😨.. قالت ليهو هوي يا رجاء انتي وبتك انتو ما بتعرفوني وختت لي اصبعه القدر الكفته دا جمب عيني خلتني اغمز براي...😂 قلت ليها دي ما انا والله دي امي 😂 قلت في سري اي شي ولا الوش.. دي كان ادتني كف بتفهقني 😂😂 امي قالت لي امشي تلقي باقي قروش الصندوق امرقيهن اديهن ليها.. 😅ما نتسمع لينا بميه وخمسين.. 😯 دخلت جبتهن مديتن ليها وكف خمشتن ومرقت... وخلت يدي تشطشط... لمن مرقت انا وامي. الاتنين قعدنا نبكي 😂
شويه كدا تلفوني دقه لمن رجفت.. لانو لو طلعت انتصار انا بتشل 😂 مشيت لقيتو دا حسن قال لي انا واقف برا أمرقي. 😨 قلت لي برا وين قال لي جمب بيتكم... قلت لي سجمك وبعربيتك😰. قال لي آي.. قلت لي لكن ما بالغت قال لي في شنو.😨.. قلت لي اولا بالتبادي😂😂
ناس حلتنا ديل ما اظن في عربيه زي دي دخلت الحي قبل كدا.. اكبر عربيه هنا اتوس ومشتريها جارنا بالاقصاد المريحه😂.. يعني انت معروف غريب تاني حاجه علي اخوي كان جا شافك راقف هنا بمردقك بخليك انت والواطه واحد.😂😂. قال لي داير اشوفك قلت لي امرق الظلط وانا بجيك.. 😶 اها لبست لي عبايه ومرقت لقيته واقف برا العربيه.. مشيت سلمت عليهو..😍 قال مشتاق ليك😍.. طبعا الانسان الطبيعي ف الحاله دي برد..😂 اما انا لا... انا بتعولق حتي ارد😂 بس السنون انبشكن والابتسامات والعولاق قال لي م عارف انا مهتم بيك كدا ليه بس بالجد يا ريان انا .😅...قبل م يتم كلامو بس رفعت راسي اشوف ليك علي اخوي جاي من هناك.. طوالي زنقني بول..😂 وجاني صداع في ركبي..😐. ومسافتو قريبه يعني حيشوفني.. حيشوفني بس زحيت شويه رفعت ليك يديني الاتنين واشتغلت بتاع مرور 😁وبقيت بأشر ل حسن وشلاليفي ديل نشفن كرررر وبقن يرجفن هبابه بس😁 ..اها علي جا علي وانا مشيت ناداني قال لي دا منو قلت لي بصوت عالي والله ما بعرفه بس قال يوصفو لي مسجد قريب😅 ووصفتو لي..😅. وعيني من الغمز ما وقفت اتخيلتو ف اي دقيقه يلطشني😁.. وكان لطشني قدام حسن انا تاني لييوم الدين ما بلاقي😁.. اي شي ولا الاحراج😂.. بيتنا من الظلط مسافة خمسه دقايق بالرجلين انا مشيتها ف دقيقه قعدت شويه كدا اتصلت علي حسن قلت ليهو اها قاعد يضحك قال لي ي خوافه😁... قلت لي بطل كلام هسه قال ليك شنو قال لي وصف لي المسجد والوقت م وقت صلاة دخلتيني ف حته ضيقه قلت لي اها قال لي اتطريت اني اقول ليهو المسجد دا جمبو بيت قرايبنا المهم حكاها معاي شديد.. وفعلا الحمد لله عندي قرايبي ساكنين هناك وطلعو اصحابو.. سمعت كركبه في الباب قفلت الخط..بس جاني اداني عين حسسني انو عارف اي شي لمن عرفت حاجه ودخل.. خلى جسمي بترقط.. انا قريت سدا تزعطاشر مره واليوم كلو اتجفل براي 😂 اها راقده بالليل كدا لابسه اكياسي ولافه كعكاتي تلفوني ضرب فتحت الخط قال لي الو.😍. من الو دي انا قلبي بقي شغال دلوكه😍 قلت لي اهلين قال لي مشتاق ليك.. 😃نزلت من السرير مشيت قفلت الباب قلت الموضوع دا جاب لي شوق وكلام دقاقه😂.. قلت لي بالاكتر.😍. قال لي قبيل مالك قفلتي..😁 قلت لي علي جاا داخل.. 😃قال لي اها سألك😃. قلت ليهو لا قال لي كان يسألك عشان يعرف حاجه..😉. ( في سري قلت اححححي انا انت وين من زمان) انا فاقده حنان عديل.. قال لي ريان انا ما عارف اقول ليك شنو بس انا بالجد بالجد بحبك😍...من الصدمه والفرحه قلت لي أحلف 😂 قال لي والله العظيم بحبك.... بس كرعيني رجفن والتلفون وقع مني ودخلت في حاله انا قلت يا بموت يا بتشله..😂 انا يقول لي بحبك.. هو ما عارف انا عايشه ف جفاف لي كم سنه ع الاقل يمهد لي لكن يرميها لي رب كدا دي ما بتسوي السكته القلبيه... 😂 في اليوم داك انا قلت ليهو شنو ما عارفه لكن شكلي خرمجت واتعولقت ورغم دا كلو هو كان مبسوط.. وانا بس خليتو قفل بهنا مشيت الفيس قلبت الحاله الاجتماعيه متزوجه😂😂 ... والناس دي كلها م مصدقه.. وبتبارك لي من ضمن العملو لي لايك علي اخوي..😨
يتبع....
