أمي زاتها جات باركت لي وأنا لسه ما جمعت كويس إبوي جى داخل. قال لي أمي أنا داير البت دي دقيقتين. مشيت معاهو دخلنا غرفتي. قال لي اقعدي يا بتي. قعدت وأنا لسه ما مستوعبة. قال لي يا بتي متوكل ده ولد ناس و أصل وفصل و باين بريدك و أنا ما لي منيه في الدنيا غير راحتك أنتي وأخوأنك ومتوكل راجل ود رجال ولو ما كده ما كان وافقت عليهو. 😳قلت ليهو بابا كيف يعني وافقت عليهو مش هم جو أتقدمو بس. قال لي فعلا بس هم دائرين يعملو عرسك مع عرس أخوك عشان تسافري معاهو طوالي. دايرا أفتح خشمي أتكلم معاهو. قال لي إنا استخرت في القصة من كم يوم من وقت إبراهيم فتح معااي الموضوع وكلو خير يا بتي بس ما يمنع تستخيري أنتي برضو و قال لي يابتي إعفي لي كن عملت شئ من دون رضاك. قمت طوالي قلت ليهو يا إبوي كلامك سيف على رقبتي وايي شئ تشوفو انت كويس أعملو بس ما تزعل مني وكن انت موافق عليهو أنا زاتي موافقة. قال لي ده كان عشمي فيك يا بتي بأس رأسي وطلع. قعدت طرف السرير و أنا أبكي ماعارفه كيف وافقت عليهو 😢. بقولو القسمة لمن تجي للبت لسانها كن بقى مترين بينقطع 🤐وما بتقدر تقول لا. أمي جات لقتني قاعدة طرف السرير ببكي. حضنتني عشان تهديني هي زاتها بكت معااي 😒. بعد كم دقيقة كده مسحت دموعها و قالت صلحي وشك أعملي ليك مكياج خفيف واطلعي عشان عمك إبراهيم داير يشوفك وكمان تقعدي شوية مع متوكل. قمت زي المسيرة مشيت غسلت وشي وجيت عملت المكياج أمي جاتني راجعة قالت لي جاهزة. قلت ليها أيي. عاينت لي لقتني لابسه العباية. قالت لي سريع 😑املصي العباية والبسي فستان من فساتينك الجوة ديل. أمي اختارت لي فستان بيجي فيهو زهور صغيرة بالوردي والأخضر الليموني. لبستو و طلعت. سلم علي خالو إبراهيم وبارك لي كان بيتكلم معاي بس أنا كنت ما سامعاهو و عيني في متوكل قاعد جمب أبوهو نهائي ما رفع عينو عاين لي. بعد ما قعدت في كرسي كده قصاد متوكل طلعوا كلهم خلو لينا الصيلون. عدت ربع ساعة كاملة أنا بعاين لي متوكل وهو ما رفع رأسو. فجاءة كده قال لي ماكان قصدي .... وما لحق يكمل كلامو لأنو دموعي جرو 😭. قال لي عليك الله ما تبكي أنتي ماعارفة بيحصل فيني شنو لمن اشوف دموعك. مدا لي منديل شلتو و قشيت دموعي قبل ما زول يشوفهم. قال لي والله كل الموضوع حصل صدفة وقبل ما يكمل جو قاطعونا 😔. طلعت من الصيلون لقيت خالتو فاطمة واقفة في الحوش مع أمي من شافتني كده فكت الزغرووودة. دخلت طوالي البرندة ومن هناك على الغرفة رقدت في السرير على بطني و غلبني البكى بقيت معمضة عيوني و حاسا بي فراغ جواااي.
جاتني مها قالت لي المغرب إذن وناس خالتو فاطمة مشو. قمت أتوضيت وجيت راجعة للصلاة لقيت مصعب قاعد في الغرفة قال لي صليتي. قلت ليهو لا قال لي لمن تصلي تعالي لي بيهناك دايرك. قلت ليهو كويس. صليت صلاتي و مشيت ليهو قال لي اقعدي قعدت في طرف السرير. قال لي متوكل ده أنتي موافقة عليهو. قلت ليهو نعم ؟؟؟. قال لي إبوي هو الوافق على الخطوبة بدون ما يأخد رأيك و أنا ما حبيت ادخل في الموضوع بس متوكل إذا أنتي ما موافقة عليهو قولي لي و أنا بتكلم مع إبوي. 😊اخوي مصعب زيو ماف الله يخليهو لي. قلت ليهو أنا ما عندي اعتراض😔 عليهو. قال لي متأكدة. قلت ليهو إيوااا. قال لي كن كدي مبروك وجى حضني وأداني حاجة كده في يدي ✉ لقيتو ظرف فتحتو لقيت جواهو 💵قروش. قال لي أنا أصلا كنت ناوي أديكي ليهم لمن تتخرجي بس دي مناسبة أهم 😊. دمعت طوالي. قال أنا ماعارف أنتو البنات جنكن بكى مالكن 😏. مسح لي دموعي و قال لي يلا أمشي. تأني يوم بيتنا أتملى ضيوف كل زول سمع بي موضوع الخطوبة جى عشان يبارك ما لقيت نفس عشان اتصل بي زول. البيت ما هدى إلا المسا. جاني تلفون من مأب باركت لي وقالت زعلانة منك 😑لأنك ما كلمتيني بي متوكل بس ربنا يتم ليك على خير و أنا مبسوطة شديد لأنو عرسنا في نفس اليوم. تأني يوم مشيت الجامعة لاقيت الشلة كتبنا أعمال السنة و بقينا على التسليم بس. كنا قاعدين في الكفتريا. لاقيت واحده من بنات جيرانا بتقرى معاي سلمت علي و قالت لي مبروك الخطوبة تستاهليهو. ومشت أتلفت لقيت الشباب كلهم بعاينو لي. رأفة وهند بي صوت واحد 😳ده شنو السمعناهو ده. قلت ليهم يوم الجمعة جو أتقدمو. رأفة قالت لي بالغتي لكن 😠 و إحنا آخر من يعلم. قعدت اتعذر ليهم 😔. حكيت ليهم الحصل كلو. 😐هند قالت ما بصدق أنو في حاجات زي دي بتحصل. و رأفة قالت لي 😌ابوكي زول عجيب إريتو يجيني عريس مرطب و إبوي يعمل كده. وقعدن يضحكن. علي ومحمد كانو ساكتين. هند قالت لي خلينا من ده كلو أهم حاجة العريس منو. قلت ليها ود جيرانا متوكل. رأفة قالت لي 😳قولي أوووقسم. هند قالت الوجيه الأسمراني وااااي أنا 😫 عاد أنتي محظوظة حظ. علي قال لي محمد أنا ما قلت ليك. المهم جاطو ساعة كاملة فوق رأسي. نهاية اليوم بعد ما سلمنا المقابلة اتصلت علي مأب قالت لي يوسف جى السودان. قلت ليها حمدلله ع سلامتو. قالت لي اللي يسلمك. بتكلم معاها كده سامعة صوت غزل. قلت ليها في الجامعة أنتي قالت لي لا في البيت بس غزل جاتني زيارة اليوم وح تقعد معانا كم يوم. قلت ليها أااه. قالت غزل عايزا تبارك ليك. سلمت علي غزل وباركت لي وقالت لي و الله العظيم فرحت ليكي شديد الله يتم ليك على خير. كنت عارفة أنو أنبساطها ده كلو عشان الساحة فضت ليها و مع ده كلو ما زعلت منها. عدى اسبوعين على الخطوبة و قررو ما يعملو شئ عشان امتحاناتي قربت و أصلا العرس محدد بعد شهر. بقيت جاريه في البحوث و المذاكرة و تجهيزات العرس.في يوم كده أنا جايه من الدكان شفت باب ناس خالتو فاطمة مفتوح وفي عربيتين 🚙🚗واقفات. و سامعا👂 جوطة كده جوه. قلت دي أمور عائليه ما عندي بيها😑 شغلة. وصلت باب بيتنا قلبي أكلني. رجعت بيت خالتو فاطمة. سلمت بي صوت عالي مافي زول رد. سامعا الجوطة تاني رجعت مأشا على الباب سمعت اسمي 😳 رجعت الصالة لقيت مرتين كده نفس المرتين إلكانو في الكرامة ومعاهن البت البت إلكانت لاصقة في متوكل وبت تانية برضو كانت في الكرامة. المرة أم البت المايعة ديك كانت بتقول لي خالتو فاطمة مالن بناتنا لمن تمشي تعرسي لي ولدك بت ناس زي ديل ناقصهم شنو. خالتو فاطمة قالت ليها ولدي وأنا حره فيهو يعرس الدايرها ومافي زول عندو حق عليهو و بناتكن ما يلزمني كل يوم طالعات ونازلات مع زول ما بينفعن نسوان ولا بيمسكن لين بيت متوكل وحيدي ما بجهجو بي عرسه زي دي فاهمات ولا لا. ردت ليها أنتي البت الاخترتيها ليهو دي فيها شنو السمح ما تامة بت مع البنات خالتو فاطمة قالت ليها. مرام دي ست ست بناتكن. كل واحده تلم بناتها وتطلع من هنا دي بتي ما برضى فيها. طوالي أنا شلت كورعيني رجعت البيت و دمعتي في خدي ما أتوقعت أنو خالتو فاطمة بتريدني قدر ده 😫بس كمان زعلت شديد لأني السبب في مشكلتها مع إخواتها.
في يوم كده قبل امتحاناتي بي أسبوع كنت متفقة مع مأب نتلاقى عندنا كم شغلة ماشين نجيبها من السوق وكان معاي رأفة وهند. استنيناها مسافة ما جات رجعت ليها في التلفون كم مرة ما ردت. قلبي أكلني قلت أكيد حاصل شئ. اتفقت مع البنات كل واحده ترجع بيتها و نتلاقى مرة تانية. و اثناء ما أنا واقفة بتكلم معاهم رجعت لي مأب فتحت التلفون عايزا أشاكلها. قالت لي وهي بتبكي غزل بتموت. 😱قلت ليها و أنا مخلوعة قولي بسم الله الحاصل شنو ؟ قالت لي وصوتها بيقطع غزل انتحرت في بيتنا. والله العظيم ركابيني ساحو وبقيت اشوف طشاش طشاش. قلت ليها أنتو وين. أدتني عنوان المستشفى و كان مستشفى خاص في الخرطوم. 🚐ركبنا أمجاد وطويل على المشفى لمن وصلنا لقينا مأب ويوسف وامهم. خالتو دنيا كانت قاعده في مقاعد الانتظار قدام غرفة العمليات ويوسف واقف جمبها مأب من شافتني جات جاريه علي حضنتني وبقت تبكي و زاتي بكيت معاها 😭 برغم كل شئ قالتو غزل وعملتو ما رضيت فيها الحصل. رأفة وهند مشو سلمو على يوسف وأمو بعرفوهم معرفة صور بس. بعد ما هديت مأب مشيت سلمت ع خالتو دنيا ويوسف. واقفين كده جى الدكتور طالع. قال لينا حمدلله ع سلامتها حالتها مستقرة ح نزلها غرفة العناية الوسيطة تحت. بس أنتو بتبقو ليها شنو. يوسف قال ليهو معارف. قال ليهو طيب وين أهلها قال ليهو أبوها في امريكا ما ح يقدر يجي إلا بكرا بس عندها عمتها في الطريق. قال ليهو طيب في أوراق محتاجة توقيع. يوسف قال ليهو بوقعها ومشى مع الدكتور. بعد ما مشى يوسف قلت لي مأب أنتي الحصل شنو. قالت لي والله ما عارفة كانت تمام الصباح حتى أنها كانت جايه معاي بس لمن مشيت ليها الغرفة لقيتها مرمية في الأرض و الدم سايل من يدها وقعدت تبكي تأني. قلت ليها كدي استهدي أكيد في سبب لل عملتو دا. قالت لي يوسف 😣. قلت ليها علاقة 😳يوسف بالحصل شنو ؟ قالت لي الصباح شفتها بتتكلم مع يوسف في غرفتو 😔 ويوسف كان زعلان وبكورك فيها و طردها من غرفتو أنا ما فهمت الحصل شنو بس من طلعت من غرفة يوسف مشت ع غرفتها طوالي وكانت بتبكي قلت أخليها تهدئ شوية وبعدين افهم منها المشكلة شنو بس لمن جيت أتكلم معاها لقيتها كده.😱😱 قعدت في أقرب مقعد لقيتو وأنا بحاول افهم الكلام القالتو مأب ياربي بكون حصل شنو يوسف ما من طبعو يكون قاسي للدرجة دي ؟؟ غزل عملت شنو لمن طردها من غرفتو وعقلي بقى يودي ويجيب وغلبني الحل. جات عمت غزل تبكي هي وبناتها. كان باين من عيونهم بكى كذب 😑. بس ما علينا. نزلنا كلنا تحت مستنين ينزلو غزل هند ورافة و مأب و خالتو دنيا والعمة وبناتها كانو واقفين سوا إلا أنا ماشية و جاية في الممر بفكر 🤔في الحصل ده. جاني يوسف و قال لي دايرك في موضوع و باين عليهو كان مضايق ومتوتر.
يتبع.....
