ثلوج الماضي

صغري

دور سليم الكرهبة و هز وعد للبحر اول موصلو حلت الشباك و ضهرت راسها ضربتها نسمة باااردة تشره بقات تشوف في الصغار كفاش تلعب و تجري طول تفكرت ضغرها و كفاش كانت كيف الفراشة تنقز و تلعب تفكرت اكسيدون و هزتها تنهيدة طويلة تفجع تلفتلها سليم وقلها
- لباس وعد 
-شي شي تفكرت صغري
"صغري " هي قلتها وزادت تنهيدة اخرى و هو ضرباتو في قلبو طول كيف السكين قطعتلو عروق قلبو الكل هبطت عليه كيف الجمرة حرقتلو كبيتو وقفتلو الدم في عروقو و هبطت دمعتو على خدو من غير ميحس باها 
- هبطني
مسح دموعي  فيسع من غير ميشلق للوعد هبط من الكرهبة و حملها في حضنو و حطها في الكرسي و بقى اشفلها و هي ماشيا تحرك في كرسيها هز عينيه و تلفت للبحر و هزو التخمام و بقى يتفكر في عشرين سنا التالى شني صار
واقف كيف السمبا حال عينيه و سارح في البحر و السمى
-سليييييييييم اه سليييييييم 
فاق سليم من سرحت عل صوت وعد و هي تصيح و تبكي
-وعد وعد وينك
الوج علاها كيف المهبول  دخل في حيط  - سلييييم امان وينك اجريلي
تلفت سليم يلقاها طاحت من الكرسي جات على الرملة و الكريسي مقلوب فوقها
مشي يجريلها و تحملها بدا يبكي 😭😭يبكي بالشهقة و وعد ماهي فاهمت شي
- لباس مجرالي شي شبيك سليم
سيبها من بين يديه و بقي يبكي حاط يديه على وجه و شعرو لكحل هابط على يديه و هو يبكي
وعد حال فمها ماهي فاهمت شي شبيه يبكي بحرقة يخي للهل درجت تأثر كيف طاحت؟  عادي مهيش اول مرة اطيح اصلا هي مكنتش موجوعت جيست اعلخاطر الكرسي طاح علاها هكا علاش بدات تصيح و تناديلو
اول مرة وعد تشوف سليم يبكي و يتأثر. لأول مرة تحس انو عندو احساس  
-سليم امان شبيك و الله حيرتني
-سمحني بربي 
- ههه مصار شي متخافش
جبدت منديل من جيبها و اعطتهولو باش يمسح دموعو
-اسمي وعد و وعدت روحي باش نعرف شني صار معك و نبدلك الحالة الي انت فاها
قالتها بينها و بين روحها  و هزت التلفون و كلمت سراب اختها
- الووو سراب
- وي وعد شبيك بطيت تا احلام متحيرى عليك
- اوو سمحوني نسيت مكلمتكمش، مشيت انا و سليم للبحر
- ويوااا صحة لختي، المهم اعملي جو 
- قول للتا احلام متستنانيش على العشاء
-علاه وين ماشيا
- باش ناكل انا و سليم البرى
- يا مصفارة شفما لاش هذا الكل احكي احكي جيبي صحيح
- اوووه  مخمج مخك و الله شي اتو كيف نروح نحكيلك
علقت التلفون و تلفت تلقى سليم يغزرلها
- اسمعني منيش مسيباتك الليوم و الله ورحمة ماما لاني مسيباتك
- مفهمتكش مدموزال وعد اش تقصد  و لاش لعشاء البرى
- اتو تفهم اتو تفهم
قومها من فوق الرمل وهزها في حظنو بقى يمشي باها لين وصل للكرهبة حطها و رجع اجيب في الكرسي
- و الله ماني مسيباتك يا انا يا انت هليلا
- نعم مدموزال؟ 
- شي شي. شقتلك انا على هل كلمة
هههه حشم هبط راسو و قلها اوكي
كيفما العادة هزها للريستو الي يمشولو دار سي عبد الحق في العادة
ريستو في وسط البلاد مضخم و كلاس علخر وزيد غالي مايمشولو كان الناس الهاي
- عسلامة مدموزال
-عسلامة ميسيو
-وينو سي عبد الحق مش معاكم الليلا
-لا بابا مشغول احضر للمشروع الجديد في ماليزيا 
- باهي بنتي ربي عينو و قلو اسلم عليك عم احمد المحامي
باهي عامو يوصل
ودعا وعد المحامي صاحب بوها اختارت طاولة قريبة من شباك و قعدت هي و سليم طلبو شنو باش ياكلو و بقاو يتحدثو
- سليم.. اليلة نحبك تحسبني اختك صديقتك الي تحب تحسب تحسب المهم نحبك احكيلي شنوى صاير معاك و علاش البدء مبكري كيف طحت  وزيد ماهيش اول مرة نطيح قدامك
هزاتو تنهيدة و شداتو غصة في قلبو بقى اشوفلها و ماهوش حاب لا يحكي لا يتحرك تمنى تنشق لوطا و تبلعو تمنى لوكان يفقد الذاكرة و ينسى 
- هاني نستنى فيك احكي 
عرف الي وعد شادت صحيح و ماهيش باش تسيبو كاما يحكي
- 30 جويلية 1990 وقتها عمري 10 سنين  عايش مع بابا في الدار وحدنا و ماما..... في صبيطار... الامراض العقلية.. طريق التران... بقات في صبيطار 5 سنين و نهرتها خرج في تقرير الطبيب الي هي برات و باش نروحو باها برات نوعا ما من المرض متعها .. ماما كيفك انديكابي على كرسي اما مهوش كيف الكرسي متاعك جديد و بالكوموند.. اصلا صغري عديتو في عائلة ريفية مافي حالناش باش نشرو الجديد .. نهرتها كان نهار صيف سخون علحر هزني بابا في الكميونة باش نجيبو ماما ملي عمري خمسة سنين و هي بعيدة عليا  ... خرجنا من السبيطار و حني باش نموتو بالفرحة لاكن.... يا فرحة ما تمت.....
- اش صار كمل.. سليم... كمل هاني نسمع فيك اتو كيف تحكي ترتاح 
- كنت واقف بحذا الكميونة نغزر الماما و بابا جاين من بعيد ماما حالا يديها و بابا ادز في الكرسي و جاينلي