أحببتك منذ الصغر

البارت 5 ..

البارت 5
أحببتك منذ الصغر
بقلمي روسكان
لبيج قصص روسكان
يقين ..مشت ايامي عاديه الشي المميز بيومي من يجي الليل ..
اصلا يومي كوله انتظرة ساعه ساعه بين ميجي الليل واحجي وياه ..
من اول ماكول الو لحد ماسد التلفون ضحك وسوالف وغزل اشتاقله بكل لحظه واعرفه يشتاقلي ..
صرت اشوفه يوميه لحظات بس من انتظر خطي ..بس هاللحظات عبالك عيد عندي ..
ابويه انتي ..من يحاجيني متنزل هالحجايه من حلگه وشكد احبهه بلسانه من يكولي ابويه انتي ..
بس بده يحاسبني ع لبسي يضوج من البس تنورة قصيرة يلح عليه البس حجاب واضم شعري اتضايق من تحكمه بيه بس اغلس ..
ودراستي هم يريدني اهتم بيهه واني ماحب احد يغصبني ع شي ماريده ..
هلاو ..
هلوات ..شلونج ؟
زينه ..
شبي صوتج ؟
مابي ..
شوفتحي كام اريد اشوفج ..
شجاع والله مابيه شي ..
لو مابيج جان فتحتي كام ..
ضايجه ..
من شنو ؟
بيبي مريضه شويه ضغطهه ديصعد ..
اهاا سلامتهه ..
اخذتوهه للطبيب ؟
اي دخلناهه للمستشفى ليله وطلعناهه حطولهه مغذي ..
مابيهه غيرالعافيه ..
دگيت عليهه فديو ..فتحت خط ..
اوكف لتحجي اجيب هيدفوني واجي ..
يله ..
جبت هيدفوني واجيت شكلته بالجهاز ..
اول ما شفته ..ابتسمت ..
هلاااو ..
فدوة للحلگ الي يكول هلاو ..
فدوة لغمازاتك شكد احبهن ..
خجلتني تتغزل بغمازاتي ..
شتحبين بيه بعد ؟
شعرك اسوووود ليل سرح وعالي ..احب لمن هيج تسرحه ترجعه ليورة ..
امممممم وبعد ..؟
لحيتك ..احب من تبقيهه طويله وبس تحددهه والشوارب ..
تحبين شواربي ..؟
اي ..
مو تضايقج بعدين ..
هههههه شجاع !!!
ها شنو يقين تخجل شو مامصدگ ..
لعد شنو مو بنيه وحد وماخجل ؟؟
شنو مو بنيه ..ست البنات ..ويلوكلهه الخجل ..
سكتت اتأملت وجهه الطالع كدامي بالكام ..
داعبت شاشه تلفوني من يم خدهه بأبهامي تخيلت نفسي اداعب خدهه الناعم وهي متفاعله وياي عيونهه بعيوني تباوعلي ببراءة طفله ..
ميلت راسهه شويه ويه حركه ابهامي ع شاشه المبايل تباوعلي بخدر بعيونهه الذبلانه ..
يقين مدا اتحمل والله ..
همستلي ..
شنو المدا تتحمله ؟
انتي ..عيونج ..شفايفج ..خدودج ..الضحكه ..الهمسه ..الشعر ..اويلي يايابه الشعر ..هذا مالتي ..انتي مالتي ..
احبببج ..
كلتهه وركزت بوجهه اريد اشوف ردة فعلهه ..
ظلت تباوع بوجهي بخدر ..
همستلي ..
اني هم احبك ..
غمضت عيوني براحه وتسرسحت ع المخده مالتي ..
فتحت ايدي ..
گتلهه تعالي ..بحضني ..
اشرت ع ايدي المفتوحه ..
ضحكت كالتلي بدلع ..
اجييت ..
شو كيفتي هههه
غير حبيبي ..
غمضت عيوني واخذت نفس عميق وذبيته براحه احس بنت الاوادم الكلمه منهه تشعلني شعل طفله وناضجه وتتغنج عليه ..موتتني ..
عيديهه ..اني شنو ؟
حبيبي وروحي وگلبي وعمري وحياتي ..
ياااابه ..شدتسوين بيه ارحميني ولج ابويه انتي ..
شلون ارحمك ..اسكت يعني ..
لا احجي ..كملي ..
اريد اضمك بحضني واغطيك بشعري نسوي خيمه ومابيهه بس اني وياك ..واهمس بأذنك ..احبك ..من جان عمري 7سنين ..من جنت تتعارك ويه ولد المنطقه من يتحارشون بيه ..
جنت اكولك من اكبر اتزوجك وجنت تضحك عليه ..
اي والله شمدريني هيج راح تسوين بيه ..
مامسويه شي والله ..
يكفي نظرات عيونج تخطف روحي مني ..
اسم الله ع روحك ..
يقونه حبيبي اريد اطلب منج شي واريدج تسمعين كلامي وبلاعناد ..
شنو ؟؟
لبسج ..
جانت نايمه ع صفحتهه وتباوعلي بس من كتلهه لبسج كعدت ع حيلهه وتنفست بقوة ..
شبي لبسي ..
وكأنه عرفت شراح احجي وشراح اطلب منهه ..
ها شو بعدني محجيت شي تعصبتي ..
كول شبي لبسي ..مو معصبه اني ..
اريدج تغيرين بي شويه ..تننانير قصيرة ماريد ..ملابس ضيقه ماريد ..
ليش ؟
شنو ليش ..ملابسج جايبتلج العين ..اغاااار عليج ..احترك من يفوت من يمج ولد يباوعلج ويكصج من فوك ليجوة ..جد جدي يشتعل افتهمي يابشر اغاار عليج ابويه انتي ..
بس اني ممباوعه ع احد ومحد مالي عيني غيرك ..
ادري شحدج تباعين ع غيري ..
شفتهه ابتسمت ..
حبيبي ليش تعذبيني وتشلعين كلبي ..اخذي الكلمه مني ونفذيهه بدون عناد باباتي ..
شجاع اني ماحب احد يفرض عليه شي اني ممقتنعه بي مااتحمل احد يقيدني لو يتحكم بيه ..
بس اني مو اي احد ..انتي حبيبتي وتخصيني ..
شجاع عفيه لاتضوجني ..
يعني الستر يضوجج ؟
واني مو عريانه علمود تسترني ..
ماقصدي هيج ..انتي يمكن مافهمتي ولا كلمه من كلامي وياج ..
لافهمت طبعا وما اقبل هيج احد يتحكم بيه اني بس ابويه يحكمني حته اخويه الجبير من يحاول يتدخل بلبسي لو تصرفاتي بابا يمنعه يعني انتو احسن من بابا لو تخافون عليه اكثر من بابا ..
مو هيج يقين ترة فهمتيني غلط حبيبي ..
مافهمتك غلط يعني صح اني لبسي هيج وجريئه وياك عبالك اني هيج ويه اي واحد يتقربلي لو سهله ترة اني امنت بيك لان اعرفك من زمان ولان انت صديق اخويه ومو من هسه علاقتي بيك ..
والله كل هالكلام مفكر بي وابد مافكرت بيج سهله او تنطين مجال بسهوله بس انتي هم فكري بيه مد اتحمل الي يمر
تكمله بارت 5
مدا اتحمل الي يمر بالشارع ويباوعلج ويتمعن بتفاصيل جسمج من فوگ ليجوة اغاار يابنت الاوادم اغار متفهمين ..
واني ماتحمل محاولتك للتحكم بيه واجباري ع شغلات ممقتنعه بيهه ..هستوك كتلي احبج شنو هالاستغلال هذا !!
حيييل حزت بنفسي حجايتهه تجاوزهه عليه من حاسبتني اني اي واحد عادي ومتقبل اتحكم بيهه كوم وتكول عليه استغلالي كوم ثاني ..
اشششش اسكتي كافي ماريد اسمعلج صوت ..لو اريد استغلج جان هواي سويت شغلات بس هذا مو ثوبي ومو صوجج لان متقدرين الي يخاف عليج من الهوا خاف يأذيج لو مر من يمج ..
صوجي اني عبالي ادميه وتستاهلين تعبي ..
ظلت ساكته ماحجت ولاحرف ..اعرفهه مو من النوع الي تبجي راسا ..جنت عصبي وجهي احمر من العصبيه احجي واشر بايدي واباوعله من شاشه المبايل مدنكه ..
سكتنه واني بعدني افوووور فورت دمي بنت اللذين ..
اتنفس بقوة وانفاسي وزفيري يطلع قوي من ع السماعات ..
دقايق وكالتلي ..
بعد عندك شي وياي ؟
كتلهه لا ..
كالتلي ..
لعد اني رايحه ..
كتلهه الله وياج وماسمعت شكالتلي وراهه طبكت التلفون بوجهه ..
متأذي منهه ومن كلامهه ..مااستاهل منهه هالكلام ..صارلنه شهر سوة مابخلت عنه لابمشاعري ولا بحناني ولا بغيرتي عليهه ولا بخوفي ..مو اعيرهه باهتمامي بس المفروض هذني الهن حوبه من بشر يقدرك ويخاف عليك لازم ع الاقل تحسب حساب للكلمه التطلع من حلكك خاف تأذيه ..بس ولو ماكو عتب عليهه ..هي طفله ..اي بحيلتهه والذكاء والكيد مرة ناضجه بس بالتصرفات والكلام لا طفله مندفعه وطايشه واني منين ماتميل احتويهه واميل وياهه وع هواهه ..
زيني ماغزر بيهه ..
قررت هاهيه بعد ماحجي وياهه ..
لا اتصال ولا رساله ..تكول تحبني اريد اشوف شتسوي علمودي ..