البارت 2
أحببتك منذ الصغر
بقلمي روسكان
لبيج قصص روسكان
عرفتكم بحياتي وجانب منهه بس لسه ماعرفتكم بنفسي ..
اسمي يقين عمري 17سنه صف خامس علمي مو كولش شاطرة مع اني ذكيه بس ماحب الدراسه احب اهتم بنفسي اكثر بشكلي وبجسمي وجمالي ومهتمه بأكلي ورشاقتي هيج سوالف يعني ..
عندي اخ توأم هو أياد هم مثلي صف خامس علمي بس شاطر نار وشرار مو مثلي وهالموضوع ميضايقني وعندي غيرة اخوان 2اكبر منعندي سرمد ضابط ملازم اول بالجيش عمرة 28سنه ممتزوج لسه شويه عقده احسه قافل بس حباب يحب بنت عمي سارة وهي الثانيه هم غثيثه ابد متنبلع ولاتحب ثكيله ع گلبي انجمعوا القافل ويه الغثيثه مدري شلون حبته هو اخويه بس مرات احسه مينجرع لان دائما يحاول يتحكم بلبسي وطلعاتي وتصرفاتي وحته مستواي الدراسي بس بابا حيييل مدللني وابد ممطيه مجال يتدخل باي شي يخصني ..
ورة سرمد يجي احمد اخويه الوسطاني مهندس وخريج يشتغل بشركه اهليه وميقبل يشتغل ويه بابا بس مرات عصريات يروح يلزم الشغل والحسابات هيج شي يعني لان بابا عنده معرض سيارات وحالتنه الماديه خير من الله ..
واحمد يحب نماء اختهه لسارة بس نماء غييييرر عن ساره هاي كولش هادئه ونازكه واحسهم هي واحمد واحد يلوك للثاني لان احمد انسان مسالم وماله علاقه بأحد و24ساعه ع الصامت ..
اما اخويه الثالث توأمي أياد رعن ووكح و24ساعه عرك ومكافش اني وياه لان هو انولد قبلي بخمس دقايق فهاريني هري اني اكبر منج ما اني اكبر منج كل كفخه يكفخنياهه ولا الثانيه ..عنيف كولش شقاه واني اخاف من هيج شقى لان خاف ضربه من ضرباته تشوه شكل وجهي او جسمي فدائما احاول مالاسنه وهم انكفخ بالشقى ..
امي توفت اول ماولدتنه صارت بيهه حمى النفاس وماتحملت توفت يعني ماشايفه امي ولا اعرفهه ..
الي ربانه ودارانه هي بيبي ام بابا جانت بعدهي بحيلهه وقوتهه ودارتنه وكبرتنه ولسه عايشه ويانه بالبيت ..
نجي اليه اني الرابعه آخر العنگود والبنيه الوحيده لذلك دلالي مضاعف خاصه من بابا وبيبيتي اني اصلا شخصيتي مرحه وطفوليه ومتهورة وطايشه ومغرورة واجتماعيه ومزاجيه ومااهتم لاكبر واحد ..
مواصفاتي ..طولي حلوو وسط ومقارنة بطول بقيه البنات اطلع اطولهن اني ..
بيضه ثلج عيوني رصاصيه شعري لاهو بني ولا هو اصفر وطويل يوصل لوركي ودائما اضفرة ضفيرتي ع طوله ..
لبسي فري ومو محجبه وبابا مافارض عليه اتحجب وماعندي سوالف تلفونات وولد ومراهقه رغم من اسمع البنات يسولفن ع حبيبهن اتمنه احب وانحب اتمنه اجرب هالشعور بس اني مزاجيه وبسرعه امل وماحب احد يقيدني احب الحريه احس روحي طير حر وماتحمل احد يقيدلي حريتي ويتحكم بتصرفاتي ..
اضحك ع نفسي مرات من اتذكر صديق اخويه من جنت صغيرة جنت صف اول او ثاني ابتدائي اسمه شجاع چان يتعارك ويه الولد الي يتحارشون بيه والبنات الي يغارن مني ومن بعدهه كام يوديني ويجيبني هو وسرمد ..
چان يشتريلي غزل البنات وموطا ..چان فارس احلامي من عمر 7سنوات .. چنت اگوله من اكبر اتزوجك وهو يگرص خدودي ويضحك عليه ..
بعدين من خلصوا سادس علمي اخويه من يوم يومه چان هاوي يروح كليه عسكريه بينما شجاع راح كليه مدنيه وافترقوا اختفى شجاع وكلمن حار بدراسته ..
بعد 4سنين هم شفته يتردد ع بيتنه لان اخويه سرمد ورة السنتين كليه عسكريه رأسا تعين وشدوله نجمه وحده رتبه ملازم اما شجاع فحاله حال اي شاب عراقي تخرج ومالكه تعيين فاخويه قنعه يدرس كليه عسكريه واقتنع وفات بيهه وهمين اول ماتخرج بعد سنتين شدوله رتبه ملازم ورجعت صداقتهم وصاروا سوة بالدوام ..
هاي عرفتكم ع حياتي ومعلومات شخصيه عني وعن عائلتي نبلش تفاصيل حياتي وايامي من بعد هذاك اليوم شلون مشت ..
مو بارت طويل بس مجرد تعريف للشخصيات ..
أنت تقرأ
أحببتك منذ الصغر
Roman d'amourقصه رومانسيه خياليه جريئه عن خسارة حب الطفوله والانتقام للقلوب المجروحه ومن ثم يلعب القدر لعبته ليجمع الحبيبين
