البارت 4
أحببتك منذ الصغر
بقلمي روسكان
لبيج قصص روسكان
شجاع ..ثاني يوم الصبح گعدتني امي صبحت عليهه وكمت سبحت وبدلت ..
طول الوقت من كعدت لحد هسه يقين مراحت من بالي ابدل واكول هسه دتبدل وهسه دتمشط وهي دتضفر ضفيرتهه ..
نزلت تريگت ويه امي واتصلت ع سرمد بلكت اليوم هم سيارته عطلانة بلكت اشوفهه ..ردت اي حجه علمود اشوفهه ..
صباح الخير سرمد ..
صباح النور شجاع ..
هابشر سيارتك يمك لو بعدهي بالتصليح ؟
لا والله بعدهي بالتصليح ..
مو مشكله لعد امر عليك ..
ماريد ازحمك يول ..
زحمتيش يمعود اتونس ع سوالفك ..
ماشي لعد مرلي ..
اوك دقايق واني يمك ..
شكد فرحت من كالي سيارته بعدهي بالتصليح صار عندي امل اشوفهه ..
زين هي عدهه خط والبارحه صدفت الخط عايفهه ..
حتلو يكفيني الامل وتكفيني نظرة ..منهه ..شبيه اني ..احس نفسي دا اراهق من تالي ..اني بمراهقتي ماراهقت ..
رحت وكفت كدام المرايه تعطرت ولبست الساعه والحذاء ..
بست امي براسهه وسألتهه اذا محتاجه شي وودعتهه وطلعت ..
يقين ..جنت يم اخويه دا نتريك سوة واتصل عليه شجاع سأله ع سيارته والي افتهمته من اخويه راح يمر عليه شجاع وياخذه وياه للدوام لان سيارته لسه بالتصليح ..
نصيت اكل واني اتبسم ..عرفته يريد يشوفني ..
عرفت نفس التأثير الي صار بيه صار بي ..
اني ماعرف شأحس تجاهه احسه حب ط فوله قديم وفجأة صحى داخلي ..اما هسه فشعوري مخربط تجاهه احب اشوفه واحب احجي وياه ..
تمنيت خطي يتأخر عليه بالجيه شويه واشوفه ..حتلو نظرة ..قابله ..
كمت رتبت نفسي ولبست حذائي اليوم لابسه ترانشوز كعب متصل بس يبين فلات وبدي ابيض وكيلوت اسود ماحب الشي العريض احب كولشي ضيگ و يبين مفاتن جسمي ..
لبست جنطتي وطلعت بالطارمه انتظر خطي يجي بالعاده اطلع انتظر بالباب بس سرمد هنا ومابيه حيل من الصبح انزف برزاله من سرمد ع ابو طالعه بالباب فرجه للجاي والرايح ..
سمعت صوت سيارة وگفت بالباب فتحتهه شويه وشفته هو ..شجاع وصل بس ماطلعت تعمدت وماتعمدت ..مترهم اطلع واظل واكفه وخطي لسه مجاي وبوقتهه لازم اسلم ..
اجتني عدله وردت اشلع كلبه شويه ..
سيارة ثانيه طبكت يم بابنه عرفت خطي وصل دكن عليه البنات حته اطلع ..
صحت ..
سرمد ..صديقك اجه ينتظرك برة ..
يله بيبي مع السلامه خطي اجه ..
ركضت فتحت الباب رأسا. رفع راسه من سمع صوت الباب انفتح ..
باوعتله وحييته بابتسامة وهزيت راسي فتت من يمه وصعدت بسيارة الخط ..
يمكن دگات كلبي جانت مدافع تضرب ..حسيت بحراره تطلع من وجناتي ..وصرت حمرة يمكن مو خجل ماخجلت ..بس تعرفون هذا الشعور من تمشين وانتي تعرفين العين عليج واحد يراقبج ومتابع خطواتج حته تجيج افكار انو انتي يمكن تتعثرين ويمكن توكعين وتتفشلين كدامه ..هو هذا الي جنت احس بي وخلاني احتر ووجناتي هيج تحمر ..
تحركت السيارة جانت سيارة الخط ورة سيارته فتت من يمه جنت اباوع صفح اريد اشوفه بس ماريده يكول التفتتلي فجأة نزل عليه الثگل ههههههه لمحته ورحنه بطريقنه وظليت اباوع بالمرايه الجانبيه الاماميه للسيارة ..
نزل وارتجى ع باب سيارته وراسه ملتفت ناحيه سيارتنه ..ناحيتي ..
وطلعنه وبعد ماشفته ..
وصلت للمدرسه صديقات ماحب وميعجبني ماحسهن يفتهمني بس كل علاقاتي ويه البنات زماله يعني مجرد سلام ومرات للسرعه اخذ منهن حل الواجب البيتي ..
خلصت دوامي ورجعت للبيت لكيت بابا موجود ..
فرحت لان بسبب شغله ماشوفه هواي ..
هلاو بابا حبيبي ..
حضنته وبسته ..
هلوو باباتي ..
شلونك ؟
زين الحمدلله وانتي شلونج بالمدرسه .. ؟
اممممم ماشي حالي ..شعجب بابا اليوم راح تتغده ويانه ؟
عفت احمد بالمعرض ..احس روحي تعبان ..
اختفت ابتسامتي من وجهي وجعني كلبي ..
ليش بابا بشنو تحس ؟
مابيه شي باباتي بس تعبان اتغده وارتاح واخذلي كسرة نوم مايظل تعب بيه ان شاء الله ..
حضنته ..قلقت ..
لاتخافين عليه بابا ..
ديربالك ع نفسك حباب ..دوم خلي أحمد يلزملك المعرض العصر وانت بس الصبح الزمه وباقي اليوم راحه لاتعب نفسك ..
ضحك ابويه لان هيج وصيته ..
واخوج هم خطيه الصبح دوام والعصر معرض ..
اخويه بعده شاب اذا هسه وهو بحيله مايتعب لعد شوكت يتعب واحنه بعد كبرنه وهذا اقل شي نساعدك بي ..
حضني ابويه ..
وج شكبرج انتي منين متعلمه هالكلام هذا ..
عصبت عليه ..
هااا شنو قصدك ترة اني مو طفله ..
ماطولج مو طفله يله روحي بدلي وتعالي صبيلنه غده ترة ميت جوع ..
تدلل من عيوني ..
ذبيت جنطتي ..
لعد بيبي وين ؟
بغرفتهه دتصلي ..
راح اروح ابدل ع السريع واجي اصب غده ..
اوك ..
رحت فتحت عيون الطباخ ع عين هادئه وصعدت لغرفتي ابدل ع السريع لان اني هم ميته جوع ..
كملت نزلت صبيت لكيت بابا وبيبي ديحجون سوة ماعرف بأي موضوع بهالاثناء دخل أيودي ..
سلم وصعد فوگ يبدل واني دا اصب الغده استعجلته علمود ينزل شويه وكعدنه اربعتنه نتغده ونسولف ..
خلصنه وكمت شلت المواعين اغسلهن سألت بابا ..
بابا تريد جاي ..
من ايدج ؟ ..اي ..
صار تدلل ..
باوعت لأياد يباوعلي صفح معاجبه ..
هو چاي قابل شمسويه انتي ..
ماطول هو جاي متكوم انت تسويه ..
لالا عيني انتي البنيه اني رجال ..
هههههههههه .. اي بس حلوة المساعده ..
يعني شنو ؟
يعني مواعين الجاي عليك انت تحضرهن ..
شنوووو !!
لعد شعبالك مو تكول هو جاي وعود السالفه سهله ..
أياد ميشاقه وياي شقه ثگيل لان بابا يرزله ..
فكام يعضلي شفه ويتوعد بيه لان حطيته بهيج موقف يعني هسه لازم يكوم يساعدني ويحضر مواعين الجاي ..
اني غلست ..
يله ايودي شبيك ايدي مشغوله دا اغسل المواعين دقايق ترة ويصير الجاي ..
مشى اصابعه ع حنچه وسوالي اشارة اصبريلي اني اعلمج ..
حصرتني الضحكه ودرت وجهي اكمل غسل مواعين ..
كتله ..
هياتهن المواعين ع الكاونتر وذيج الصينيه الصغيرة ..
ها ايودي نسيت اكولك ترة اني اشرب جاي بالكوب ..
هذااك كوبي بالجام خان ..
هو يباوعلي بغضب عاقد حواجبه ويزفر ..
واني حاصرتني ضحكتي سويته فلم ..
فار الجاي ونصيته ..
خلصت غسل مواعين نشفت اديه وهو لسه حاير بالاستكانات ..
كتله ..
شو دجيب ..
اخذت منه الصينيه ..
انت هاي مادبرتهه وتحجي عليه ..
رتبت الاستكانات ووياهن كوبي والخواشيك وحطيت شكر طفيت الجاي وصبيتلهم ..
قدمتلهم ..
شربنه جاياتنه وبيبي راحت ترتاح بغرفتهه واياد راح يدرس وبابا كعد بالهول يباوع اخبار واني رتبت المطبخ وصعدت لغرفتي ..
فتحت جنطتي حضرت جدولي وشفت شنو تحاضيري امتحان ماعندي وكالعاده ماكو واهس للدراسه لهناك وتذكرت حجايه شجاع من كتله اني ذكيه بس ما اقرة كالي بس الغبي الي يفرط بمستقبله ودراسته ..
غصبت نفسي طلعت الكتب كلبتهه اتصفح بيهه والله ماعندي واهس اقرة ..
قريت شكم تحضير هيج قرايه شلاليه واجتني النعوسه ..شمرت الكتاب ونمت ..
والنومه نومه للمغرب ..
كعدت مسطورة راسي يوجعني ..
اباوع للساعه مخروعه ساعه ب 7بس ماعرف بالليل لو الصبح احس اني نمت هواي كمت من فراشي بسرعه لزمتني دوخه لان هواي نمت ..
كعدت شويه لا اوكع وكمت وخرت البرده اريد اشوف الدنيا نهار لو ليل ..
دنيا صيف والساعه 7مغرب يعني هستوهه دتغيب الشمس ..
شوي ارتاحيت عبالي نمت وصاير ثاني يوم الصبح وكاعده متاخرة ع دوامي ..
رحت غسلت وجهي ونزلت جوة لكيت بيبي وبابا كاعدين يباوعون تلفزيون واحمد بغرفته كاعد يحجي ويه حبيبته بنت عمي اختهه لسارة ..
واياد السجاج كالعاده بغرفته يقرة وسرمد اليوم خفر ..
اجيت كعدت يمهم ..يباوعون اخبار الوضع ميساعد ولايفتح النفس تلعب روحي من الاخبار ..
جبت مبرد كعدت يم بيبي ابرد اضافيري واحط صبغ اظافر شفاف لان ممنوع عدنه بالمدرسه نصبغ اضافيرنه بس اني جنت اخالف مرات خاصه الخميس لان بالبيت متعوده خميس جمعه وللسبت بالليل ياله امسحهن علمود دوامي الاحد ..هيج واهس عندي ..
بيبي شنسوي عشه ..
هسه نوصي احمد يجيب شي ..
اوك ..مابيه حيل اكلي شي ..
ليش حبيبه شبيج شتحسين ؟
راسي يوجعني بيبي ..
يبعد راسي راسج هسه اصيح لاحمد يجيبلنه شي نتعشه بي واخذيلج براستولايه ..
اوك ..
بيبي اخذت راسي حضنته وباسته ..
واني هم حضنتهه ..
اوووف بيبي شكد احبج ..
وخرت شويه عنهه ونمت بحضنهه خليت راسي ع رجليهه وهي فتحت شعري ..فتحت الضفيرة وظليت تمرغلي بفروة راسي شكد ارتاحيت ع حركتهه هاي ..شويه ظلت تمرغ بخفه واني ارتاح راسي يمكن جانت ضابته ومأذيته الضفيرة ومن فتحتلياهه ودلكته صار زين راح الالم مدري ايدهه عافيه وكلبهه الدافي حنين وريحني حضنهه وامانهه ..
بيبي لو شما اسويلهه ماجازيهه هي الي ربتني وكبرتني ..ربي ينطيهه من عمري ع عمرهه ومن صحتي ع صحتهه ..
هي تدلك فروة راسي واني انفخ اضافيري علمود ينشف الصبغ ..
شويه وبابا دز احمد ع عشه ..تعشينه وصعدت لغرفتي ..
ماعرف ليش الليل يجيب طاريه ع بالي ..طاري شجاع ..
طلعت مبايلي فتحت فيس ممراسلني ..
تكمله البارت 4
أحببتك منذ الصغر
ماعندي صداقه وياه ..فما اعرف فاتح فيس لو لا ..
راسلته ..هلو ..بس هيج دزيت ..
شويه وتسلمت رسالتي وهو شافهه ..
هلا وغلا ..
هيج كتبلي ..
وجهي كوله ابتسم من قريت رسالته ..
هلا بيك ..
شلونج ؟
بخير ..
انت شلونك ؟
تمام ..
سكتنه ..
يابه شنو موقته طلعتج للخط ويه جيتي حته تشوفيني ؟
رفعت حاجب ..
هاي عليمن ؟؟
عليج ..
امممممم ..
شنو ؟
ترة جنت كاعده من اتصلت ع اخويه وكتله شخبار سيارتك وكالك عطلانه وسحلت روحك علمود توصله وتشوفني ..
هههههههههههههههههه
شجاع ..شكد ....فشلتني ..
كولشي وياج مفضوح عبالك مو اني الي ربيتج ع ايدي انتي الي ربيتيني ..
ههههه لا مو لهالدرجه ..
تمددت خليت راسي ع المخده براحه ..غمضت عيوني واخذت نفس عميق وذبيته ..
همستلي بأذاني ..
اشتاقيت ..
فتحت عيوني عقدت حاجبي ..
المن ؟
لابو الالمن ..
رجعت غمضت عيوني ..تنهدت ..
ترة اني بشر وعندي گلب يعني مو صخر ..
ادري ..
لعد ليش هيج دتسوين بيه ؟
شداسوي ؟
انتي كوليلي شكاعد تسوين ؟
تحجي ببراءة وعفويه ولاكأنه مسويه شي متدري اني اشتعلت عشيرتي بكلمه مشتاقتلك ..
عادي يعني ..الي احسه داحجيلكياه ..
اوووف ياربي ..
شبيك ..
ذبيت زفير بقوة ..
مابيه شي ..
شلونج اليوم بالامتحان ؟
زوينه ..
قريتي البارحه من كتلج ؟
لاء نمت ..
واليوم ؟
ماعندي امتحان لباجر ..
جيد ..
باجر هم تجي ؟
شوكت ؟
الصبح ..
ماعرف اذا سيارة سرمد بعدهي بالتصليح اي اجي ..
ابتسمت ..
يعني اشوفك ..
تريدين تشوفيني ؟
اي اريد ..
ليش ؟
لان ..مادري ..
بيش الساعه يجيج الخط ؟
سبعه وثلث ..
حتلو سيارة سرمد صلحت امر من يم بيتكم ..
بس اشوفج ..
ابتسمت ماعرف شديصير بيه ..
مرت ايامي بين دوامي وامي والبيت ومرات ارجع من الدوام الكه اختي مريم هي مزوجه ابن عمي وعدهه ولد صغير عمرة 8اشهر ..
بس من يجي الليل يجي واهسي يجي عذابي تجي الي تخلي دكات كلبي مثل الطبل ..اجت يقين ..
شهر مر علينه واحنه نحجي سوي نتغازل ونحجي بلهفتنه واشتياقنه واحد للثاني صرت يوميه ب 7وثلث امر من يم بيتهم تطلع لخطهه غيرت طريقي حته اشوفهه لحظات همسات وابتسامات وتصعد لخطهه ..
لا اعترفتلهه ولا اعترفتلي بس احس بحبهه وتحس بحبي الهه من خوفي عليهه ..
احس بيهه طفله يمي طيش وجرأه ودلال واندفاع ماعدهه حدود وياي كولشي يجي ع بالهه تكوله وكولشي تحس بي تكوله ..
للحكايه بقيه ..
أنت تقرأ
أحببتك منذ الصغر
عاطفيةقصه رومانسيه خياليه جريئه عن خسارة حب الطفوله والانتقام للقلوب المجروحه ومن ثم يلعب القدر لعبته ليجمع الحبيبين
