أحببتك منذ الصغر

البارت 15

البارت 15
أحببتك منذ الصغر
بقلمي روسكان
لبيج قصص روسكان
يقين .. ماخليت احد يدري بالعركه بيني وبين سرمد لابيبي ولا شجاع بس ظليت بيني وبين نفسي قلقه خاف صدوك يجي ويسوي شي بس لا ميكدر يسوي شي لان شرعا وقانونا صرت زوجة شجاع مابقه بس اشهار مراح يكدر سرمد يسوي شي ..
مرت ايام ..اسبوع بالتحديد ..مصار شي الظاهر تهديد سرمد فارغ او كلامي جاب وياه نتيجه ..
اجه يوم زواجي .. فرحانه ع خايفه ع متوترة بس الشعور الاغلب فرحانه وفرحتي مابيعهه لاحد بكنوز الدنيا ..
ماسويت البارحه حنه اسويهن حنه وزفه بيوم واحد كفافيه وبالقاعه ماردت يصير تعب مضاعف ع بيبي وخاله ام وليد الي وكفتلي وكفه عمري ماانساهه ولو عندي خاله جان موكفتلي هالوگفه ..
ردت الهوسه بالقاعه مو ببيت اهلي ماعدنه كرايب نعزمهم عزمنه الجيران وعزمت صديقاتي الطبيبات وشجاع هم عزموا كرايبهم والجوارين والاصدقاء ..

مثل اي عروس بيوم عرسهه كعدت الصبح ع هوسه بهوسه تريكت واتصلت ع شجاع يجي يوديني للصالون جيكت غراضي والجنطه الاخذهه وياي للفندق وللقاعه كولشي جاهز ماناقص شي بدلت وكعدت انتظرة يجيني ..
دقايق وصار يمي
صعدت بالسيارة وياه ..جانت الضحكه تارسه حلگي بس شجاع جان ابد مو ع بعضه ..
احسه ضايج من شي ..
شبيك حبيبي ؟
التفتلي بنظرة خطف گالي ..
مابيه شي ..
حبيبي اليوم زواجنه ..هذا اليوم الي سنين واحنه ننتظره ..فكهه عاد ..
اي ..افكهه ..
بصراحه مادققت بسبب ضوجته وصلني للصالون وكتله من اخلص اخابرك تجيني كال اوك ..
رحت وحدي طبيت وسلمت نفسي لام الصالون ..
4ساعات تعبت وجعت خابرت بيبي تجييني لان من بعد الصالون نروح للتصوير واريدهه وياي ناخذ شكم لقطه سوة ..
ورة شويه اجت هي وشجاع طبت عليه طلعتني للسيارة ..
اول ماصعدت السيارة شجاع بكامل اناقته لابس قاط حبري وجواه يلك نيلي والقميص اسود والرباط رصاصي مشطب باسود طالع انيييق الى درجه ويجنن وغمازة خدوده زايدته جمال والشعر الرمادي زاده وسامه ..

كعدت ليورة لان لابسه بدلتي والبدله نفش ..
الحمدلله شجاع رجع وجهه يضحك مادري شنو الي جان مضوجه الصبح وماشال عينه من عليه يباوعلي بالمرايه ويغمزلي ..
جنت فرحانه والضحكه شاكه حلكي ..
وصلنه للقاعه حفلتنه مختلطه يعني مو شويه ويعوفني شجاع راح نظل سوة الحفله كولهه ..
بيبي نزلت وطبت للقاعه علمود يحضرون الاغنيه الي تعلن وصول العرسان والمفروض اني ايدي بايد شجاع ننزل ونطب سوة للقاعه ..
من ظلينه وحيدنه بالسيارة التفتلي بلهفه ..
وج هاي شطالعه اليوم ناويه عليه اليوم ناويه تجلطيني ؟
هههههه اسم حبيبي ..
انت طالع تخبل ..
اخذ ايدي وباسهه وساعدني انزل من السيارة ..
نزلنه ايد بايد ..
طبينه للقاعه اشتغلت الهلاهل ..
الف الصلاة والسلام عليك يارسول الله محمد ..
انطرشت من الهلاهل وانفشخنه من الجكليت والدي جي صوته باذاني عالي والكوشه قريبه من الدي جي وصلنالهه وكعدنه ردت اجر نفس كل شويه جماعه جايين مسلمين علينه واكثرهم اصدقاء شجاع وضباط وياه وصديقاتي وعوائلهن حته الي مو هلكد صداقتي وياهه جايه والاطباء شكد فرحت لان ماعندي كرايب وماردت ابين هالشي مضوجني والحمدلله المعزومين كفوا ووفوا ..
الحرجني بالموضوع الضابط الي استنجدت بي يوم طلعت من البيت حافيه ومدمايه واركض معزوم شفته من بعيد ديتجه النه وصدوك اجه سلم علينه كمت احتراما لشخصه سلم وباركلنه هو وزوجته وراح ..
شجاع حس باحراجي ..لزم ايدي قوي وعصرهه طمني بنظراته ..وباسهه ..
رکصنه سوة سلو وغير ركصات وصديقاتي حاولن يخلني اركص وياهن بس شجاع ماقبل لان عيب الحفله مختلطه والضباط كولهه موجوده ..
كمنه كصينه الكيكه سويه بالسيف والعصير والترتيبات هاي كولهه جانت تحضيرات تكفلت بيهه مريم ..
مرت ساعتين ونص واكثر والحفله مستمرة لان الحجز 3ساعات ..
شجاع صاح لامه اجتي خاله ..
كاللهه هايمه مو كافي ..
كالتله حبيبي بكيفك ..
كالي دقايق وراجعلج ..كام وعافني ..
مادري وين راح ..ظليت اتابعه بعيوني وين يروح اخير شي فات لغرفه التبديل الي اني ابدل بدلاتي بيهه ..
دقايق ورجعلي ..
ماجنت منتبهه ع رجعته بس من اول ماطلع من غرفة التبديل بزي عسكري لابس بدلته العسكريه والنسر والنجمه (رتبة المقدم ) ع الاكتاف والهيبه واباوع الضباط كولهه وكفت استعداد وطكوله تحيه عبالك استعراض عسكري ..
الموقف كان مهيب وبي رهبه دمعت عيوني ..واني هم وكفت وابتسمت برزانه ..
وكف قريب يمي اخذلهم تحيه واتجه ناحيتي تأبط ايدي حنا ايده وخله ايدي جوة ذراعه والموسيقى بدت مو اغاني ومزيقه لاا استعراض عسكري وخطواتنه نمشي ع دگه الموسيقى ردت ابجي ..هاي اول مرة هيج اشوف ومحد جان كايلي راح يصير هيج والظاهر مجان احد يدري يعني شجاع بس متفق ويه ابو الدي جي ويمكن مطي خبر للضباط ماعرف هيج حسيت من ردات فعلهم ..
جان هذا احلا واكثر موقف بي هيبه مر بحياتي ..امشي وجلدي يكزبر وخطواتي خايفه بس..

تكمله البارت 15
بس خطوات شجاع كولهه ثقه وكل شويه يلتفتلي ويطمني بابتسامه ثقه ..
وصلنه للسيارة وصعدني ..ساعدني وزفونه زفه تخبل محد صعد ويانه اني بالصدر وشجاع هو الي يسوق ببدلته العسكريه وخلاني براحتي ماقيدني جنت فرحانه ومنطلقه والدنيا ماسايعه فرحتي ..
الزفه توصل للبيت لان شقتنه وحدنه وهيج ليله يحتاجلهه انفراد وخصوصيه لذلك ماقبل شجاع نروح فندق كال شقتنه احسن واأمن النه ..
خاله ام شجاع فرغتلنه البيت ومقررة تروح تبات يم بيت بنته مر يم ..
دخلنه ..البيت فارغ .. شجاع لزمني من ايدي وكادني صعدني لشقتنه ..
اول مافتنه للشقه سد الباب قفلهه ..
التفتلي ..حضني من خصري قربني اله .. شم ركبتي وباسهه بوسه خفيفه كزبر جلدي من لحيته جانت مخففه ومحدده فدغدغتني من اتقرب مني ..
مد ايد ع السحابه بظهري حاول يفتحهه لزمت ايده وخر ايدي وفتحهه ..
كالي شنو المنتظريه بعد ؟
مارديت جنت غرگانه بعيونه ..
بس فتح السحاب وكعت البدله الي طلع من جسمي مو قليل ..
رجع شجاع خطوة ليورة وظل يتأملني ..ويعض بشفته ..
بده يفتح دكم قميص البدله العسكريه مالته واني تجرأت اتقرب افتحله باقي الدكم ..
جنت افتحله بالدكم وهو يباوعلي بشغف بنهم ومن خلصتهم الدكم بوس ايديه وحده ورة الثانيه ..
لزم اديه من الرسغ ومشاهن ع صدرة العاري بعد منزع قميص البدله العسكريه ..
ويه كل لمسه من اديه كان يغمض عيونه خدران مستمتع ..
فتح عيونه وسحبني للفراش نام ع ظهره ونومني فوكاه ..
ظليت اباوع بعيونه كان حاضني من خصري ويبادلني النظرات ..
تجرأت اباوع ع شفته ..تجرأت اتقرب ع شفايفه وابدي ابوس بيهن بوسات خفيفه ..
ماتحمل گلبني وووو ........

جانت احلا ليله بحياتي صرت لحبيبي ..تمم زواجنه ..يتعامل وياي كاني طفلته يخاف عليه وظليت اهمسله احبك احبك احبك ..
ظليت بفراشي ..تعبانه ونعسانه بس هو كام فات للحمام سبح ..
من طلع جنت بعدني كاعده ..
كعد ع الجربايه هو ينشف بشعرة ..
جان مبين ضايج وينشف بعصبيه ..
تلفلفت بالجرجف وتقربت منه حوطت خصرة بايديه وسندت راسي ع ظهرة من ورة ..
شبي حبيبي ؟
مابيه ..
كالهه ببرود وعصبيه ..اي رجع لبروده ..
دفعني ع كيف علمود اوخر عنه وكام علك الخاولي بالشراره ووكف وظهرة ع ميز التواليت يباوعلي ومبين ع لسانه كلام ومنتظر اللحظه الي ينطق هالكلام بيهه ..
هو بس سؤال واحد اريدج تجاوبين عليه ..
كول حبيبي اسأل ..
ليش عفتيني وتزوجتي كرار ؟

وللحكايه بقيه ..
اسفه مانشرت البارحه جان عندي خطار وباتوا يمنه
سولفولي توقعاتكم ..