_ استغفر الله بس يا بخيتة
* ياخ انا مية ، مية شنو يا مهاد ياخ دشعلومية مرة قلت ليكي ما تناديني بخيتة برا البيت
_ اها اناديكي منو ان شاءالله !
* احم ، توته
_ هههههههههههههههه الجاب بخيته لي توتة شنو ، شوفي هنا انا والله ما حأبطل اناديكي بخيتة الا لمن تبقي شبه البنات اوول ، ياخ ياخ دا وش بت ، دا وش الواحد يصطبح بيهو ياخ ، انا نفسي اعرف المراية القاعده في اوضتك دي خاتاها كمالة عدد ! ياخ اتقي الله غينا ، البنات في الجامعه كلهم مأنتمين و مربطين الا انا وانتي يا قريعتي راااحت ، كان انتي ما دايرة يختي ، سمح انا دايرة ياخ حسي بي ..
* مهودة حبيبتي شايفهرحروف اسمي صح ، باا خاا يااا تاا ، يلا شفتي التاا دي امسكي و بناء علي هذا الحرف ناديني تووووووتة ، و اعصابك في الموااال دا ، المحاضرة دي حفظتها ،ممكن نتحرك لو سمحتي عشان نحصل المحاضزة التانيه ؟
_ استغفر الله بس
*استغفري سمح ، انا كدا حابه نفسي
_ لو بتحبي نفسك حتهتمي بيها كويس ، شنو كرشتك قدامك، و وشك كلو حبوب و بعد دا كيس التسالي في شنطتك ، ولابسه نضارة عامله قدر البرواز و لونك نصو ضاربو الشمس و شعرك منكش تحت الطرحه ،، كان جاا هواا ساي بشيل همك مع الاسكيرتو الكلووش داا بنطلون بجامتك بتاع البيت الابسا من تحت يظهر ، شي احمر و اخضر و اصفررر ..
*اوووووف انتي اصلك كدا يا مهاد كان ما نقيتي لي ما بترتاحي انا كدا مرتاحه مالي و مال الناس كل واحد يسوي الحاجة التريحو ياخ ، في البيت طول اليوم نقه ف نفس الموضوع و هنا كمان نقه ، ياخ ارحموني انا ربنا خلقني كداااااا #شششششينة من اتولدتاّا ااسوي شنو يعني !!
_ م ماتسوي شي ياا اااا ....... ب.ب ..ب... قصدي توته
*حركي حركي خلينا نمشي ..
.. السلام عليكم ، كيفكم ان شاء الله بخير
انا حابة اعرفكم بنفسي يعني الحاجات الظاهرة كتعريف معتاد ، ك ملامح حياتنا البارزة ،، زي م عرفتو في الاحداث الفوق ، انا اسمي بخيته ، خلاص اخر سنة لي في الجامعه ، لقبي حفارة الدفعه و اظن كلكم مر عليكم الاسم داا ،، انا ما حقوليكم اسم جامعتي شنو ، لكن انا متاكدة جزء منكم حالياً بيقرا في كلامي داا ، كان بيقراا معاي في نفس الجامعة، المهم عمري 22 سنة ، قصيرة بس م شديد ، مشكلتي في حياتي هي مظهري البشع ، من وانا صغيرة ما محبوبة ، ودي مشكلة مجتمعناا ، مجتمع سطحي و ياريت لو كداا و بس ، لالا بينتقدك ويجرحك بكلام negative ، من غير ما يفكر كلامو دا ممكن يزعج الانسان دا قدر كيف ، حقيقي عمري ما حسيت اني ما راضيه عن نفسي ، لانه اهدافي في حياتي كانت عميقه واكبر من الحاجات الظاهرة دي ، انا ممكن ازعل لو واحد ولا واحدة في دفعتي جاب نسبه اكبر مني ، بزعل لو في معلومة م عرفتها و بغير شديد ، بزعل لمن اكون شايفه في جامعه في اروبا ولا غيرها مستواها حلو شديد و انا م عندي قدرة اقرا فيهاا .... الخ ، دي اهدافي اللي الناس م قادرة تفهمااا ، انا مطبقه كلام ربنا ان العلم من المهد الي اللحد .. اما اسرتي مكونه من علياء اكبر مني بسنتين متزوجة و عندها توم عمر و عمار ( م ليهم اي دور ) ..
و اكبر من علياء ، عمرو داا طافش من السودان ، و اصغر مني طوالي بدور وعزالدين ، امي زوله محافظة كداا ، لمن امش جمبها ما بفرزو منو فينا ام التانيه والنوع التونسك داك لمن تنشرط بالضحك ، يعني زوله كداا شباب اكتر مني و ابوي نفس الشي ،، و ضعنا عادي جدااا ، بيتنا حقناا ،، و الشي الوحيد العامل لي مشاكل هو اسمي طبعاً ، و طبعا تاني امي مسمياني علي حبوبتي بخيتة 💔 ، بالجد عامل لي ازمة عديل ، وطوالي ف مشاكل و نقاشات وكل يوم نفس الاسطوانه ، ليه تسميني اسم قديم كدا واخواني اساميهم حلوة ، اشمعني انا تسميني علي حبوبتي و ما دايراهو و إلا تغيرو لي ......الخخ
و بينتهي النقاش ب ولاشي بس صداع وخلاص
يتبع ......
أنت تقرأ
العروس الإفتراضية
General Fiction📝 بقلم: سحر سمير من المجتمع ( قصة حقيقية) النااس !! النااس النااس ،،، مالهم الناس ؟ لا الناس ! ههه اي الناس ، كل شي في حياتنا الناس ، الناس شايفانا ! الناس بتتكلم ! لالا عشان الناس ! الناس ممكن تتكلم علينا ! اسي التاس يقولو علينا شنو ! لالا ياخ اتا...
