العروس الإفتراضية

الجزء 02

في يووم .. بدور جاتني ، قالت لي مهاد دي جاتك براا ، قلت ليها خليها تخش من متين دي كمان عندها فراامل ، اهاا جات تووش داخله ، قالت لي اسمعي بما انو الليله جامعه مافي ، ارح نمشي العرس ، قلت ليها عرس منو يا السمحه !! قالت لي مش ولد خالك عرسو الليله بتبالغي طبعاً يا بخيتة ،،

قلت ليهاا والله متزكراهو كل شويه امي تزكرني بيهو لكن انا ما مشه ، كيف يعني ما تمشي انتي جنيتي ؟ دا ود خالك طوالي حتي ولا قرابه من بعيد ، قومي بطلي جنك داا ،،، قلت ليها انتي مالك حارقه رزك ، هو ود خالك انتي ولا ود خالي انا !!

ياخ عليك الله قومي خلينا نغير جوو ، ياخ زمن من الربة و الحفلات ، ما تنفسني بينا بالله برانا منفسنين ، اسي انتي قاعده عندك شنو ؟ عندنا اجازة تاني اسبوع ،،

اهاا امي جات داخله ،، قالت لي قومي اجهزي ، انا بطلع مع ابوك دا عشان نحصل العقد جيبي اخوانك وتعالي ، قلت ليها امي انا ...... ( طلعت و قفلت الباب وراها ) ..

مهاد قعدت تضحك قالت لي ووووويك اهاا م عندك حل تاني ، بدور قالت لي شوفي حتلبسي شنو من اسي لانو الدولاب دا كلو حتنكديهو فوق تحت و في الاخر حتعذبيني انا و ما حتعرفي تلبسي شنووو ،، عشان كدا قومي ، وواي انا حسيت بي هم زي الجبل في راسي ما دايرة امشي و فعلا في المناسبات دي عندي ازمة هدوم ، لو الجامعه عادي امشي باللبسه تلاته يوم ورا بعض ( ااي عارفه اني مؤلمة، و مؤلمة شديد كمان ) بس حقيقي حتي لو فكرت امشي اشتري حاجة بقيف ف المحل زي الطيرة م بعرف اختار و علي العلي مقاس زاتو مافي ،، المهم قمت اكلتا عشان اعرف افكر واركز ، الاكل دا متعة الحياة ،،

المهم قمته نكدتا الدولاب دا فوق تحت لحد م طلعتا شي كداا غايتو م عارفه المهم بقيت عليهو ، لمن جا الوقت كلهم لبسوو ، و مهاد جاتني ، كالعاده علقت علي شكلي عولاق ، لابسه اسكيرت و بلوزة و طرحه وكل فردة من بلد ،، المهم ركبت راس و طنشتها لمن بقينا طالعين ..

وصلنا الصاله ، دخلنا بقينا نفتش في مكان نقعد فيهوو ، لقينا طربيزة فيها بتين سلمنا عليهم ، وقعدنا جمبهم ، طبعا مسكو صيوانات بعض (اضنين بعض) و القطيعه والضحك و متاكدة فيني ،، طلعت من شنطتي روايه صغيرة وقعدت اقرا فيها ..

( اي عادي بقرا في دوشه العرس انا من حبي للقرايه عادي بقدر اركز تحت اي وضع)

،، مهاد عاينت لي و هزت راسهاا ،، اهاا البنات الجمبنا قاموو ، و بقينا قاعدين برانا انا ومهاد ... يلا قريب نهاية الحفله كداا ،، جات علينا مرة كبيرة شبه عجوزة بي نضارات

ختت يدها في كتفي لمن اتخلعتا ، انا اصلا قاعده في العرس دا زي الغريبه مع انهم اقرب الاقربين لي بس بحس انهم ما بحبوني المهم مارمختلطة بيهم ، و طبعا دا لمظهري الما مقبول و بتعرض للاستفزاز باستمرار ،، المهم م عرفتها سلمنا عليها انا و مهاد ،، قالت لي يا بنيتي انتي بت منو ؟؟

قلت ليها انا امي فوزيه و ابوي الحاج نذار ، قالت لي سمح يا بنيتي عرفتهم ، و مشت علي كداااا ... خلتنا في حيرة عجيبه كداا

م ركزت مع الموضوع شديد ، لمن قالو يا مشي ، قمنا مشينا ...

وصلنا مهاد في سكتنا ، مهاد طبعا جارتنا ساكنه في نفس الصف حقنا ، وانحنا وصلنا كمان البيت دخلت قضيت صلاة العشا و نمتا طوالي ، اها تاني يوم طلعت مشيت عند مهاد طبعا عندنا قعده جبنة يومياا بي فيشاراا و بخورها والجو حقنا داك ، اخت مهاد بتقول لي انتي يا بخيته ما تمشي عند عوض كريمات خلي يديك خلطة تظبط ليك وشك داا ،مهاد بقت تضحك قالت ليهاا بيخته م ليها في الكلام داا ، قلت ليها اهاا اختك ورتك يلا سلام انا ماشه عندي عدة و قراية ..

مخاد قالت لي وقت الله بريحك انتي ما مريحه روحك حتي ف الاجازة جارية علي الكتب ... عاينت ليها ومشيت

ودعتهم وطلعتا، لقيت اخو مهاد جاي داخل سلم علي وانا والله خجاله م متعودة زول يعبرني ، بفرح فرحه كداا ، زي فرحة يوم الوقفه ،، اها رديت السلام وهو زول عشرة كداا ، يعني بحسو م بشبه اولاد الزمن ديل ،

وصلت بيتنا ،، اها بعد اسبوع زبط ربط ،كان اول يوم دوام ف الجامعه بعد اجازة الاسبوع ديك ، ورجعت بيتنا قريب المغرب ، شفت رجال طالعين من صالونا ماشين علي الجامع استغربت قلت ي ربي ديل اهل ابوي جو من البلد ،، دخلت كدا هماا طلعو ،، لقيت بيتنا دا ماشاءالله تبارك الله ، خالتي و عليا اختي بي شفعاا و ام مهاد ،، قلت ليهم خيييير ، امي مسكتني وتبوس فيني شابكاني مبروك مبروك اخيرا جاك نصيبك قبل تتخرجي حمدلله بركة دعاي ،، قلت ليها نصيبي في شنو يا امي ،

عليا قالت لي جاك عريس احووص ، امي ضربتا قالت ليها ليه احوص يعني مالا بتي صحي هي محتاجة كم حاجه كدا وتبقي ست البنات بس برصو سمحت ، قالت ليها صدق القال القرد في عين امه غزال ،، وانا ولا هنا مخلوعه طبعاا و دا منو هو وفي شنو راسي شطططب ....

يتبع ......