العروس الإفتراضية

الجزء 07

اخدو قعدتهم و مشو ،

وانا النار شبت في قلبي ، مع اني لمن كتبت ليهو ف الورقه ، شوف حياتك واعتبرني م موجودة ، م كان ينفع اكون انانيه مع انسان احترمني ... كان صابح اخر امتحان لي ،، خلصتو بحمدالله ..

رجعت البيت ، قغلتا تلفوناتي ، لانو عصتم كان كل يوم بتصل يتطمن علي امتحاني كان كيف ، قفلتوو ( وانا لمن اخت حاجه في راسي بسويها ) ،، اتصلت بمهاد قلت ليها لو فاضيه عندي مشوار عايزاكي تجي معاي ، فعلا جاتني و طلعناا ، اول خطوة عملتها مشيت دكتور جلديه ،، فحص لي وشي و اداني علاجات ،، رجعت البيت

تاني يوم بديت رجيمي في صمت تاام ، بقيت بتربس باب غرفتي دي وانطط لمن الله يغفر لي ، و ابقي مارقه عادي ، بقبت بستغل اي مشوار عشان امشيهو كداري ، رغم اني كنت بتعب شديد ، لدرجة دقات قلبي دي كنت بسمعا في اضنيني ، بس كنت بقاوم ، واي معلومات غذائيه و صحيه انا طلعتها من النت، وكل اسبوع كنت بوزن ، بالجد لاني لقيت نتيجة م كنته حاسه بالارهاق ، بس من جواي كنت بعمل شي انا مقتنعه ان مافي داعي ليهوو بس لمن بفكر في ان عصصام اتخت قدام الامر الواقع و ف نفس الوقت بتعامل معاي و مقدرني كإنسانة و تعامل م لقبتو من اقري الاقربين ، وانا عارفه كل البتكلم كان داير مصلحتي و عشان اعيش زي ، زي اي بت ....

شهر بالضبط انا قاطعه تواصل و مختصرة

، بعدها سمعت امي و عليا اختي بتكلمو و بتهامسوو ان عصام نازل السودان يتزوج بعد شهر ،، و ع اساس داسين مني ، والله انا اتعاملت مع الموضوع بعقل ،، زعلت شديد ة انقهرتاا بس م قعدت و بكيت ولا يأست لاني من صغيرة متعودة اتم البديتوو ..

ضغطت نفسي اكتر و يوم بعد يوم بالجد انا اتغيرت تماماً حتي ناس بيتنا بقو مخلوعين فيني ، وين الوشط المنقرط والملان حبوب والكرشة والجسم الما منسق كأنه جسم واحدة والدة كوتة شفع ، حسيت بي راحه امي واختي و صحبتي ،، حتي بعد ضعفت وانا ماشه ف الشارع الناس م بطلت كلام ، مالا ضعفت كدي ! ي حليلا تكون مسكتا نفسيات ! صحي مش قالو راجلا حيعرس فوقا ! لكن والله البت بقت سمحه ! يا بخيتة عملتي شنو ورينا ! يا بخيتة بس م كان تضعفي شديد كداا ، وهي زاتا مقعدا كل الوقت دا شنو عند اهلا ............الخ

تفتكرو انا مفروض احس بي شنو لمن اكون عايشه في مجتمع اقصي طموحو هو الانتقاد والتعليق في حاجات بالجد ما بتخصو حاجات شخصيه ، لا و يستلمو الموضوع كأنه موضوعهم ، انا لو ما كنت انسانه مؤمنه و متعلمة و عارفه كلام ربنا بالجد انا كان وصلت لمرحله الانتحار ،،

بعدها سمعت انه عصام جاااا ، دخلت فيني رهبه خوف كداا ما عاديه و بقيت طوالي في غرفتي م بطلع منها ، جاتني مهاد قالت لي احساسك شنوو وعصام حيشوفك بعد التغير دا ، قلت ليها انا متغيرة لنفسي ما لزول و بعدين عصام مالو بي ، وعلي الاغلب حيسلمني ورقتي ، قالت لي عصام لو داير يسلمك ورقتك كان سلما ليكي من اول لحظة شافك فيهاا ، قلت ليها اسي هو جا لي عرس

قالت لي دا كلام شنو انتي جنيتي ؟

بعد يوم بالضبط ، كنت في المطبخ ، امي قالت لي عصام وامه جااين ( علي فكرة عصام ابوهو متوفي ) المغربيات كدا ، قلت ليها خير ....

وانا والله ما كلفت نفسي ابداا لا مشيت اشتريت جديد لا عملت حاجه ، لبست لبس من العندي و القدري ، مهاد جاتني اسوي ليكي واعمل ليكي رفضتا ...

جوو ، وناس بيتنا رحبو بيهم ،، و انا طلعت سلمت ، والله عصام دا لمن وقف علي حيلو وامه منططة عيوناا ، فضل يعاين ناحية الباب الجيت منه زي المنتظر بخيته والجات دي ما اناا ،، اصلو م انسا بدهشه كدا قالي بخيته ! قلت ليهو ايوة ، امه العمري ما كرهتها دي والله واصلو م جرحتني ، قالت ماشاءالله تبارك الله ، اذكر الله يا عصام ، بس مشيت قعدتا ، و قعدو يتونسوو ..

خلونا براناا ، قالي مالك انتي ضعفني كدا ؟

قلت ليهو صحياً دا الاسلم وانت عارفني صديقه الكتب ، قالي ربنا يزيدك علم ، بس الما فهمتو انا ، ليه قطعتي مني وغيرتي شريحتك و مفروض ترجعي تجددي الاقامة وحاجات كتيرة ما قادر افهما ،،

قلت ليهوو انا اتعمدت اعمل كدا و من سافرت م كانت عندي نية للرجعه، لازم تشوف حياتك وترجع تصل للانسانه الكنت عايزة وجابوني ليك اما بالغلط ههه قعد يضحك ، قالي لي خير لي ، ربنا ما بعمل لينا حاجه الا لو فيها حير ، الله اعلم لو اتزوجت ديك كان حيحصل لي شنو ،وانا استفدت منك كتير والله ، اي نعم في لحظة الغضب قلت كلام فارغ لامي وحبوبتي ، بس انتي عارفه احساس انك تكون داير شي و تلقي شي والله ما لعيب فيكي حاشاكي ، بس المهم الاحساس داا ، و انا لقيت حياتي معاكي ، و بسببك اتحسن وضعي في الشغل ، يعني وشك وش خير

.. قلت ليهو النصيب و ربنا يهنيك ي رب

قالي يهنيني بيك ،، قلت ليهو اجي انت مش جاي تعرس ، قالي لي اااي فعلا ، لاني م عرست قبل كدااا

قلت ليهو فعلا ما عرستاا ،، قالي ربنا يتم لينا علي خيرر وان شاءالله يطلع احلا عرس .. طبعا دخلت فيني فرحه كدا والله مهما حكيت عنها ما حتحسوهاا ، بالجد حمدلله القبول اهم ممن اي حاجه ف الدنيا دي وانك تتقبل انسان بأسوأء حالاتو دا اجتياز نفسي مقدر شديد ،، حمدلله رب العالمين ..

امه جات قالت دايرة تعمل عرس تسكت بيهو الناس ،، قلت ليها الناس عمرها م حتسكت و مافي داعي نعمل شي انحنا ما دايرانو عشان الناس ، الناس غير بتاكل في لحم بعض ما بتعمل خير ،، الكمال لله ،، و بقليلو و بكتيرو ربنا يكتب الفيهو الخيرر

وفعلا زواجنا تم علي اكمل وجه وزي م انا دايرة ما زي ما الناس دايرين ...

حتزو اضانكم للناس ما حتتقدمو ، لمن تقدمو علي خطوة اقدمو عليها بملئ ارادتكم و رغباتكم ما عشان ترضي الناس ، ارضو روحكم واملو الفراغ الجواكم لحد ما تحسو بالرضاا ،، و يا ريت نبطل نجرح في بعض و نبهت في بعض ، شين ولا حلو ، سمين ولا ضعيف ، متعلم ولاجاهل ، ابيض ولا اسود ،، دا ما شي يخصك ،، ف النهايه دي حياتو وهو راضي بيهاا مافي داعي نتدخل ، فلانه عرسوها فلانه بايرة ، فلانه شينه اسي دي عرست كيف ...... دا شي رباني اسمو #النصيب ، الجاب ليها نصيبا ، بجيب ليكي نصيبك ... #ارتقو

تمت بحمدالله❤