العروس الإفتراضية

الجزء 03

مخلوعه م مصدقة ،

قلت لامي انا ما موافقه ،، طبعا اتخلعو والكانت ماسكة حاججه في يدها ججدعتا لا اراداياا وردة فعل كدا ما طبيعيه ، قلت ليهم مالكم ، عليا قالت لي اقسم بالله اجي احميكي بي براد الشاي دا يا بخيته ، كمان حتعزلي انحنا ما صدقنا ، قلت ليها ليه انا مالي الجاب دا بكرة يجيب غيرو و انا عندي جامعه و عندي ماستر و عندي احلام الزواج حيحطماا انا مافي شي جابرني ارسخ للامر الواقع ما حاخد لا اكتر لا اقل من الربنا كاتبو لي ،، حقيقي انا في عالم و الناس حولي عايشين في عالم تاني خالص ،، امي قالت لي ما تعطلي نفسك كل دا ممكن تعملي بعد الزواج ، قلت ليها هو منو دا و شافني وين ؟

قالت لي شلفك في عرس ود خللتك ورسل اهلوو ، وهو مالو ما جا ؟ قالت لي مغترب سعوديه سافر الرياض اجازتو انتهت ، اسي اهلو ديل عندهم كلام مع ابوكي بس عليك الله قولي خييرر ما تلكنيها ياخ ،،

قلت ليها حاضر يا امي التشوفوهو واللي لي نصيب فيهو بلقاهو قدام ،، اها فاتو الناس كانت جية رجال بس وكلام رجال والقالو ولدهم نفذو ، الزول جاهز و داير عرس طوالي ، بالجد اتحطمتا هو في الرياض وانا عايزة اتم جامعتي دي اخر سنة لي ، بس فرحه اهلي كانت اكبرر وافقتا رقلتا انا حتفاهم معاهو واقنعو باذن الله ، بالجد انا كنت شايفه كون يتقدم لي واحد دي عادية لكن الناس مخلوعه حتي بنات الحله سمعتهم بقطعو ، هي سجمي بخيته دي يعرسوها وانحنا الاسمح منا لسه قاعداااات ، وحدة قالت ليها اكيد دا عميان و لا معيوب غايتو ،

كل واحدة تقول كلام شكل ، بس انا كنت واثقه لانه هو شافني واختارني من بين بنات كتار كانو في العرس ،،، حتي والدته واخته لمن جونا البيت كانو بعاينو لي بنظرات ساخرة و مستفزة شديد ، و بتهامسو والله اتزكر مرة اخوهو بتقوليها ، يا حبوبه انتي متاكدة ، حبوبه تقوليهم ااي ،، وحدة ردت قالت والله يا امي الا كان ولدك دا اتعما ، طول عمرو البنات جاريات وراهو صف ، اسي يجي يختار دي ، قالت ليها شوفي يا مودة انا عمري ما حتدخل في عرس زول فيكم ، انتو الحتعيشو, و طالما هو اختارهاا يبقي براحتو ، وحدة ردة قالت ليها لكن انتي يا مرة عمي ضغطتي عليهو شديد شابكاهو اتزوج اتزوج شاف دي وبقا عليها ،، قالت ليها انا قلت ليهو اتزوج لكن ما اجبرتو علي وحدة معينه ، مرتو تبقا احتيارو .... طبعا انا بسمع واغرب شي مافي زول عامل اعتبار لي ولا لي امي وابوي ، بحسسوني اني مجردة من الاحاسيس ..

المهم توالت الايام افراح و غنا

وفي البجو للونسه والشمارات و النميمة والقطيعه كان من قريب ولا بعيد خصوصاً بنات اهلوو ، بصراحه البنات نجف ما شاءالله لمن بقيت اراجع نفسي احترت فعلا ليه اختارني اناا ،، المهم سديت دي من طين و دي من عجين ،، اول حاجه عملوها العقد عشان يرسلو اوراقي يرسل لي زيارة ، و انا نزلت امتحانات فترة ، و كنت مدروشه و اخر فترة المةضوع بقا شاغلني كتير اتمنيت اشوف الانسان داا ،، جيت لامي قلت ليها امي مافي صورة للزول داا ،، نطت فيني هي وخالتي صورة شنة انتي لاقيه و انتي وانتي خلعوني لمن سكت ..

المهم ، اوراقي جهزت

و ما اتعمل لي عرس و شيلتي كانت اتنين اتنين و مهري كان 5 الف جنيه سوداني ،، كنت لمن اتكلم او اسال ولا اطلب يسكتوني انتي لاقية ، وانتي تتمني بالجد لمن نفسيتي اتحطمت ، حسيت زي الفيني نقص

.. جا يوم سفري للرياض ، من الصباح جات الحنانه رسمت لي ، و مهاد م قصرت عملت لي مكياج قدر خبرتاا ،، طبعا لبست عبايه و نقاب من البيت ،، مشيت المطار

الكان مطمني انو عمرو اخوي في الطايف ، يعني حيكون ملجأي انه حسب فهمي انها ما بعيده من الرياض ، و كامت اول نرة ارمب فيها طياره في حياتي وكمان برااي ،، المهم ودعوني و ركبت و ما خليت آية حافظاها ما قريتاا لمن اتحركت انا روحي اتسلت و استفراغ و بهدله حمدلله ،، و الله رزقني بي وحدة قاعده جمبي شابكني شايله المكان كله انا متضايقه ومعصورة ،، جيت علي نفسي لمن وصلني ، رحله الا عاداااا ..

نزلنا من الطيارة ،

و بقيت بتلفت ، حسب كلامهم ،، بس م فاهمة شي ، كارررة شنطتي و بتلفت ،، لاقاني واحد قالي يا حرمة تدورين علي شي ؟ ّ

قبل ارد عليهو جاا واحد بي وراهوو ، قاليهو هذي حرمتي ياخوي ......

يتبع ......