التوبه
بارت7
اهلي مقبلوا ابقى وهمه يشوفون شهاب كل شويه يتصل بيه وبماجد بابا عاندتهم ومرضيت ارجع اتصل بابا بشهاب گله عندي بستان انطيكياه وعوفها عدنا جاوبه مرتي شنو بستان شنو عوفها هي مالها علاقة بشغلنا تضحكون عليه قدمتلها معامله للسفر وهسه اعوفها باچر اجي اخذها لو اعرف اجرها جر وبدوا اهلي الولد يريدچ وتحمليه وهسه يتغير وراح يوديچ لامريكا مفاد وياي ماارجع
اتصل بيه هو باليل
شوكت ترجعين للبيت الغرفه گلبتها الچ مزبله تعاي نظفيها
مااريد ارجع بعد ليش يابه مترجعين شنو الي ماعاجبچ بهذا الزواج
اسلوبك وياي مره تحبني مرة تريد تذلني خليتني بالبالكون ميته من البرد ورا شويه تحضني شبيك ترى هي مو عركه گلي شتريد من هذا الزواج
مااريد احبچ لان رفضتيني وهنتي كرامتي
زين اعتذر منك لان رفضتك مچنت اعرف لازم اول متخابرني گلك حبيبي
اي تگولين ولاوحدة عرفتها رفضتني
شهاب انت مو زغير المفروض تفتهم اني بت ناس طالعه من بيت مو وحده سكرانه وياك وتحسب الدقائق شوكت تخلص وتأخذ فلوسك وتروح الثاني
زين والله تعرفين بشغل بنات الليل
شهاب اني انولدت لگيت اب سكير
ماخترته بكيفي من يصحى من السكر احبه ومن يسكر اكره مااريد رجال سكير واطفالي يسألوني يوميه ليش تزوجتيه
لچ اني مومثل ابوچ ابوچ صبح وليل سكران اني بالگعدات ومرات ويه اصدقائي
نفس الشي بابا هم كان مثلك والله ماادري شگلك بعمرك صليت قريت قران رحت جامع انت مو مسلم ادري دخلت لامريكا عمرك١٢سنه بس الله موجود بكل مكان واهلك مسلمين وكانوا يشوفوك تشرب ونسوان وسخه وسكتوا عنك
يعني انتي تريديني هسه اصلي وأبطل شرب مرة وحده تعالي ونتفاهم مثل مابطلت النسوان ابطل الشرب
وشنو الضمان تحاول تبطل
اطلبي اي شي ترديه أتنازل عن الدين لابوچ انطيچ فلوس انسافر
كل هذا ميهمني ومااريده ميساوي لحظه اشوفك بيها واكف على سجادة وتصلي وتطلب التوبه والله الايمان حلو والله يحب الانسان الي يتوب
من علمچ هيچ ابوچ السكير لو من الفضائيات
بيوم من الايام راح يوگف واحد ويگل لبنتك ابوچ سكير علمتني
ماما الله يرحمها وخالتي فشلن ويه بابا بس نجحن ويانا والله يخليك انطيني فرصه اساعدك وتوب
هاله إني اول مرةشربت عمري ١٧سنه والشرب جر علاقات ويه بنات ليل وساقطات بعمري ماعرفت حب الي اعرفها حتى مااسألها شسمچ وتعرفينالباقي
هسه تريديني اتوب بيوم وليله
زين انت ليش هيچ تعاملني مرة تطردني تضرب ومرة تگولي احبچ ورجعي
انتي من البدايه تجاوزتي وغلطتي وضربتي خابرتچ اتفاهم وياچ مفاد وياچ اجتي فرصه اخذچ وادلچ ومرات اعرف غلط متهونين عليه الي قاهرني عمري ماردت وحده وگالت لا
شهاب الي تعرفهن هاي شغلتهن يبيعن عليك وعلى غيرك الحب يختلف
وانتي شفهمچ بالحب اصلا انتي الاحساس ولا مشاعر وشايفه روحچ مغروره يله شوكت تجين
ماارجع الا تعاهدني توب وتبطل وتصلي
عاهديني انتي همين تصيرين حبيبه وزوجه الي اريد اعيش علاقه حب وياچ
موافقه اعاهدك اصير حبيبه
وزوجه همين افتهمتي ماريد اغصبچ بعد انتي من دون البشر ماريدچ غصب
سافرنا لاربيل كان الجو بارد بس راد يبتعد عن الشغل گلي بالفندق خابريني وخلي نتعرف من جديد عرفت يريد يجرب العلاقة والحب اني هم اريد اجرب يمكن احبه ويتوب
يله اتصلي بيه شلون اتصل بيك اذا مااعرفك غير اول ترقمني وانتي شمدريچ بهاي السوالف شهاب شنو القصه يعني اني بالعراق عايشه هاي اعرفها من بنات الاعداديه فتت من يمه انطاني الرقم اتصلت بيه تعرفنا اني هاله وهو شهاب عمره ٣٤سنه عايش چان ويه أهله بامريكا من صار السقوط رجعوا بس هو بقى بين هنا وهناك علمود شغله
ليش انطيتني الرقم شي عجبني بيچ اول مشفتچ تختلفين متباوعين معاجبچ أحد بس روحچ وانتي ليش خابرتي
يجوز اريد انصب عليك
اي دنصبي عليه حتى اخليه اخر يوم بعمرچ
أعصابك عيني ترا هسه احضرك
وين الله وتسويها وشوفي شيصير بيچ يله تطلعين وياي شنو اطلع وياك لاعيني اني مااطلع ويه ولد
لچ تطلعين لو اجي اجرچ جر
اوف حتى بالتمثيل هم ولچ وجر بطلت ماالعب
لا هاله فدوه لاتبطلين خلي اول نطلع وأخذ وياچ صور وهددچ بيها وتصير گعدت عشائر واخذچ حتى نلم الفضيحه
كافي يمعود بهذلت الرومانسيه يله گوم نطلع
سدينا التلفون وطلعنا وستمرينا بهاي اللعبه مر اسبوع نلعب ونسولف كل يوم نقترب أكثر من بعض كنت أعد الايام الي ميشرب بيها بعد الاسبوع طلبت منه يصلي تردد بس صلى يتعاجز من صلاة الفجر بس ابقى الح وگوم حبيبي اريد اخذلك صورة وانت تصلي ويگوم اخذله صور واسويها تصميم واكتب عليها عبارات واوديها اله نزلنا للسوگ اشترينا دشداشه بيضه الصلاة وسجاده وكل ليله ادعي يارب تثبته على الصلاة لان هي الي راح تنهى عن كل الفحشاء ومنكر يارب
بليله بارده حسيت على نفسي احضنه واگله احبك تفاچأت بلي گلته اكثر منه رد عليه واني اموت عليچ
بيني وبين نفسي گلت يمكن تسرعت..يتبع
