طلابة عشگ ٨
زينب الموسوي
كانت الدنيا حاره والطلاب بالمحاضرات طلعت من باب الكليه اريد اخذ سياره وارجع للبيت واترك الكليه لازم اعبر الشارع مااگدر انتظر ابو حيدر السايق لان يتاخر عليه الافكار تاخذني وتجيبني وصدمتي بنايف چبيره وحقارة هذا العميد وتفكيره القذر وشني اگل لابوي ليش اريد ابطل اعبر الشارع وهناك جتي سياره سريعه شفتها سوده ضربتني وماادريت شصار صحيت نايمه بيت مااعرفه ويمي مره عجوز باوعت الها مااگدر احچي
ها يمه الحمد لله على السلامه بنيتي
انه وين هذا بيتمن
اني ام احسان بس على كيفچ انتي مكسره وجهچ مورم البارحه تمشين بالشارع واني وابني بالسياره دعمچ ابني وشلناچ جبناچ للبيت واني يمچ من البارحه لليوم اريدچ تصحين
خاله من البارحه انه هنا مابايته بيت ابوي تدرين الوادم هسه تذابحت عبالهم ناهبه خابرتوا. اهلي
دورنا بجنطتچ ماكو تلفون
خاله ليش مااخذتوني للمستشفى حتى الشرطه تكتب تقرير
بنيتي ابني جاي يناقش الماجستير ويرجع لبغداد لو ماخذيچ للمستشفى يذبونه بالحبس وامتحانه الاحد وگلنه نخابر اهلچ ونفضها
خاله فوگ مداعميني انوب اهلي دنكتوا روسهم هسه ولد عمي يدورون بجهه وابوي واخواني بجهه
شسويت عندك ربي وينه ابنچ
راح يجيب دكتوره زوجة صاحبه تشوفچ شنو بيچ
خاله خابريه مااريد دكتوره ودوني لاهلي انه ابوي شيخ عشيره الازرك وگعتكم سوده وياه هسه تشوفون صخام وشي هسه جبار المسودن يصيح گمره الناهبه وابوي ذب عگاله خاله حسبي ابنچ مكتول فوگ مامكسرني انوب حاطني بيت ماادري منين
خاله هذا بيتي وبعد عيني انتي اني وابني نروح لاهلچ ونفهمهم بس احنا غربه مالنه احد هنا لاعمام ولا اخوان
ليش انتم من المريخ والحظ جابكم عليه
عرفت ام احسان مهجره ويه زوجها
بالثمانين
لايران لان مولود هناك رايحه وياه وعدها ولد وبنات هناك بس هي تروح وترجع على العراق وابنها يشتغل بغداد والبيت والبستان ورثها من ابوها وبيه عايله فقيره تعيش بالبستان اسمهم بيت ام سعد كانت المره تداريني حاولت اگوم ماكدرت والم ضهري موتني ظليت اصرخ من الالم لحد مااجت الدكتوره زهراء ودخلت عليه گالت
هاي شنو شلون عفتوها من البارحه اليوم احسان انت دارس وتفتهم البنيه رجليها مكسره وايدها. شوف الدم على هدومها سكت ماحچى
ام احسان گالت زهراء اني ماخليته گتله ناخذها للبيت خفت عليه من السجن ومشاكل
خاله هذا شلون حچي يله نوديها للمستشفى حالتها خطره ومناك نخابر اهلها نتفاهم وياهم
دكتوره الله يخليچ ودوني لاهلي بهاي وضعيتي خلي ابوي وعشيرتي يشوفوني والله العظيم مااخليهم يشتكون ولا ياخذون فصل بس روحوا وياي حتى اهلي يصدگون انه بت عشاير صعبه البارحه مابايته بيت اهلي
حبيبتي حالتچ خطره واي تاخير يضرچ
ميخالف بس كون سمعتي محد يمسها
حچى احسان خويه خلي دكتوره زهراء على عرفها تدخلچ مستشفى واني وامي نروح لاهلچ
چا موديتني المستشفى البارحه شمالك ياحظي
والله خويه ارتبكت وماعرفت اتصرف والوالده خبصتني ماتت ماتت
الله يخليك وديني لاهلي وگلهم موش انت الدعمتني انت وامك شفتوني مدعومه واخذتوني للبيت فدوه خاله والله اذا ابات اليوم موش عدهم انذبح
شالني احسان وامه دخلوني للسياره بس الدكتوره انطتني مسكنات وراحت ويانا لمضيف ابوي وصلنا لگيت الوادم محزمه سلاح ومتهمين نايف ناهبني ابوي من مارجعت رايح للكليه ومتصل بالعميد العميد گايله بتك عدها علاقه ويه نايف ونايف يشتغل بالمحافطه عبالهم مهزوم وياي وجبار يهوس گمره تحب نايف وصاير تهديد وكلمن لازم حد نزلوني من السياره حطوني بمضيف ابوي واجتمعوا ولد عمامي واخواني سمعوا السالفه صارت الملامه على احسان وامه اجه شيخ عشيرة ال زون حتى يعرف الشصار
احسان گلهم عمي شتريدون اني حاضر بس عندي امتحان يوم الاحد اروح وياكم وين ماتردون افصلكم لو اعرف تطلبون روحي اني گدامكم گلت لاخوي سعدون فوتني لغرفتي
اخذني گتله سعدون الزلمه موش منا غريب اهله بايران وهنا يدرس خلوه يروح ودوني للمستشفى والشرطه گولوا اندعمت طاحت
شلون يصير كمره انتي مكسره وهو اخذچ لبيته غير نثبت بتقرير شرطه
خويه يعني اخذني لبيته شسوا قابل موش تشوف حالتي مكسره الولد فقير ابوي خلي يطيح الفصل الولد عنده امتحان ماجستير وامه خايفه منكم الله يخليك خويه لموا. السالفه وكافي من امس لليوم الناس تسولف بينا
راح سعدون لابوي فهمه طيحوا الفصل وگالوله روح بدربك مانريد منك شي بس احسان وامه اصروا يروحون ويه اهلي للمستشفى ويتكفلون بالعلاج
بالمستشفى عرفت رجلي مكسوره وعندي فقرتين مكسوره وايدي اليسار مرضوضه واشياء هواي عندي طلعت رضوض وكسور جبروا الكسور وبقيت بالمستشفى كان المستشفى خصوصي ام احسان ظلت وياي ومرت اخوي حسيبه وحچت قصه حياتي وام احسان حچت قصة حياتها عرفت فقراتي لازم يستبدلوهن ببلاتين بعمليه بس بعد ماتطيب الكسور والمشي عندي يتاخر بعد العمليه ثاني يوم كان احد الظهر زارني احسان دخل سلم علينا وگل لامه الحمد لله ناقشت الماجستير واخذت الدرجه امه ردت الحمد لله يمه
اندار عليه هسه خويه شتريدين اني حاضر اروح للشرطه اگلهم اني الدعمت
لا خويه ابوي فهم الشرطه اندعمت والسايق شرد قابل انت متعمد هذا قدر الله
بس الكليه شلون اخاف تنفصلين
الكليه انه مااريدها بيها عميد حقير سمعت گايل لاهلي ناهبه ويه طالب ميخاف الله چان خلا الناس تتذابح
زين اخذچ لايران تتعالجين
لا ابوي راح ياخذني لاربيل هو وابن عمي بدر
بدر خطيبچ مو اي خطيبي
اشوفه بالمضيف يريد يخنگني بس الحمد لله ابوچ شيخ معدل وتفهم الوضع
الحمد لله خاله ام احسان انتي روحي تعبتي حسيبه موجوده اخذي احسان وروحوا
اروح وباچر اجي عليچ ومااعوفچ لحد ماانتي تطرديني
لا خاله مااطردچ بس انتي جايه للعراق تزورين وتتونسين مو تحبسين نفسچ بالمستشفى
يمه كمره اني احب الناس والسوالف اجي للعراق اشوف الناس وارجع لايران وتعرفت عليكم بعد مااهدكم ابد
رادوا يطلعون انطاني احسان تلفون گال هذا بمكان تلفونچ الضاع بيه رقمي ورقم امي اي شي تحتاجيه خابري وانطه للممرضات فلوس حتى يدارني
