الكفيل

الكفيل ١١

#الكفيل ١١
زينب الموسوي
طلعت ساعه اربعه الفجر اندل الجامع وكان وقت صلاه دخلت صليت وظليت ابجي من طلعت الناس
سالت الشيخ كتله اريد اسافر لولايه بيها عرب وماعرف وين اروح
كلي مشيگان كلها عرب وخاصة العراقيين حاول يعرف عني شي محجيت وزوجته وصلتني للمحطه للباصات. ومن وصلت كان العرب متواجدين سالت عن مكان اسكن بيه اخذتني مره لبنانيه عدها اصدقاء عراقيين يستضيفون لاجئين فتره الى ان يحصلون مكان وشغل واستضافوني مره عراقيه ام ليث وعرفت قصتي وگالت اني اساعدج بشغل وسياقه وسكن
خاله ام ليث حتى تلفوني اخذوه مني ورجلي عبالك كان منتظر فرصه يخلص مني
انتي صوجج لو مخبره الشرطه يعرفون منو مصور ويطلعون التلفون الي دز الرسائل ويجيبون فاطمه سحل هي وعمار وصادق وتطلع الحقيقه
واني شمدريني اشو بطلوني من المدرسه وكلشي مااعرف لاسياقه لا اندل والله مامصدگه عمار يسووي هيج
كافي من عمار عيشي حياتج وادرسي واشتغلي هو الخسران
سكنت عند ام ليث بملحق زغير ماعندي بيه حتى وساده وبارد ردت بس مكان اكون بيه وحدي حتى ابجي  من بداية عمري لليوم مبجيت بگد ذاك اليوم واخذتني لداىره الرعايه الاجتماعيه خاله ام ليث اني يمكن حامل حاسه بنفسي دايخه تعبانه
خوش كملت السبحه انوب حامل
وفعلا اكتشفت حامل. خابريه لعمار وكوليله.    لاخاله فدوه عوفيه الي كاله كافي هسه يكلي سوي تحليل نسب
مرت الايام بيه درست حتى اخذ شهاده تعادل الاعداديه وبنفس الوقت اشتغل بمطعم تسع ساعات يوميه وسقت وحصلت سياره واراجع الاطباء وحاولت كل جهدي انسى عمار وفشلت متمر ليله اذا ماابجي منه وعليه وقميصه حاضنته اكيد هسه عرف اني مااخذه قميصه
اخذت تلفون ودخلت على موقع الشركه الي يشتغل بيها كان ناشرين صور طاقم ومن ضمنهم عمار ويمه واگفه بنيه امريكيه من الغيره مانمت الليل والصبح اتصلت على الشركه  بحجة احجز
سالتهم عدكم طاقم عربي اريد يشرحلي عن الرحله
صاحولي رجال عربي سالته تعرف عمار.   نعم اعرفه  منين تعرفيه.    لا شفت صورته بالموقع وعجبني احجي وياه
   بس اعتقد عمار متزوج واتذكر زواجه صار بالباخره
وهسه عنده صديقه
  انتي تريدين تحجزبن لو تريدين عمار على العموم هو باجازه فد يومين اتصلي واطلبي تحجين ويه القاىد تحجين وياه
وفعلا بعد يومين صاحوه يحجي وياي سمعت صوته وسديت التلفون
بقيت لحالي والعرب لازم يسالون ليش لوحدج وين رجلج جنت اكول بالعراق مسافر حصلت الشهاده الاعداديه واقتربت ولادتي كانت ام ليث بكل خطوه وياي وحتى بالولاده  من ولدت كانت واكفه انجبت ولد سميته اسلام عمار كان يحب هذا الاسم ام ليث رادت تتصل بعمار ماقبلت مااريده يعرف خليني اربي ابني احسن مايظلون يعيرونه بامه واصلها كل يوم
بعد الولاده غيرت شغلي لحضانه اطفال حتى ابني يبقى وياي حاولت اكمل دراسه بس مكانت الظروف تساعد بقينا اني واسلام نعيش حياتنا ومن كبر وبدا ياشر اخذت صوره لعمار من صفحته وكبرتها وعلمته من الگله وين بابا ياشر عليه واسلام طلع نسخه من ابوه لكن التفكير بمستقبل ابني خلاني اخذ قرار اسلام لازم ينكتب باسم ابوه ميبقى الاسم فراغ مااريد الصار وياي ينعاد على ابني صح عمار خذلني وشك بيه بس ابني ماله ذنب وحتى الطلاگ مو سبب يخليني احرمه من ابوه
كانت صفحتي اسمها اسلام اسلام
وطلبت صداقته لعمار على اساس  رجال
وافق بدون ميعرف منو وصفحتي مابيها اي شي يدل على شخصيتي
وبقيت اتابعه واشوف منشورات اخواته تنزل عنده
بس هو كل الي ينشره منشورات حزينه
صور الرحلات والباخره
عرفت كوثر تزوجت واشتروا بيت البنات منزلات الصور
وفد يوم شفت رقيه ناشره منشور كاتبه شقة عمار الجديده
انجنيت اكيد راح يتزوج عندي صديقتي الاء صح من زمان مامتصله بيها اتصلت
اكلج شنو قصة عمار ليش عنده شقه لوحده راح يتزوج
لا بس هو ميحجي ويه امه واخواته والبيت اشتراه الهن وهو بالشقه من يجي اجازه
شلون عرفتي
امه وين متروح تشكي وتبجي تكول ميريدني اني واخواته ينطينا فلوس ويطلع انتي ليش مترجعين
قصه طويله الاء بس والله الدنيا وحشه بدونه معقوله ماصفن ويه روحه وافتهم ماسال روحه وين رحت
شنو هذا صوت الطفل يمج
اني اشتغل بحضانه
مرت سنتين على طلاگي وابني صار عمره سنه وتلث اشهر  والشوگ عندي يوميه يكبر اله ميمر يوم اذا ما افتح صفحته صعب تحب شخص المفروض تكرهه واليعذب اكثر ابنه يشبهه وقميصه بدا يفقد عطره بقت بس دموعي عليه كل مااحضنه
فتحت صفحته قريت التعليقات
سلامتها الحجيه
وماتشوف شر
رحت حجيت وياه على المسنجر
خيرها والدتك سلامتها
رحم الله والديك انشالله عدت الخطر
الحمد لله هي شبيها
جلطه بس عدت ممكن اعرف منو حضرتك صح اصدقاء بس مااعرفك
عمار امك قبل لاتموت بعد عمر طويل انشالله خلي تبري ذمتها واسالها عن الصور والرسائل والشباك هسه هي تترجى رحمة الله والله مايرحم ظالم اسالها
شهد
قفلت التلفون خلصت ليلتي بجي وصراع بين افتح التلفون وبين لا
الصبح بالدوام فتحت. تلاثين اتصال من عمار
رديت قفلت التلفون يمكن خوف ويمكن اريده يسال عن الحقيقه مااريد اني ابرر وادافع عن نفسي
هو يكتشفها احسن