#تراتيل القدر

يوم جديد

#تراتيل القدر
همس ليل
البارت الاول
وكفت كدام المراية واني اباوع مامصدكة راح اداوم ...رغم من الليل حددت شلبس ...مع ذلك اربع مرات غيرت  ملابسي
_يلا يمعودة فضيها
صوت اخوي محمد يصيح علي
_خلصت نازلة صبر شبيك
نزلت ركض على الدرج هاي طبيعتي ومثل كل مرة اجى صوت نبع الحنان يجلجل
_شوكت تبطلين هالركضة الا تنكسر رجلج لو يدج يلا
_مقبولة منج نبع الحنان
تقربت بست الحجي من راسه
_يسعد صباحك حبيبي
_صباح العافية بنيتي..يابة لازم تكعدين من وكت منا وهيج حتى تلحكين
_هية تنبل مال نوم شيكعدها ...والله مستخطي ابو الخط
مديت لساني اعيب له...هذا جان اخوي محمد الي اكبر من ٨ سنوات
_عوفها من الصبح بديتوا المداهرة مالتكم ماتعبون...
_فديت نبع الحنان....بستها اتشوفين شديسوي بية
_بابا تعاي تريكي محمد يوصلج بطريقه
_اني شعلي بلشت رحمة الله
_اختك بابا والوكت هسة مو زين مو مال خط
وكفت ورة الحجي ولعبت حواجبي لمحمد بالعناد
كعدت بمكاني المعتاد واباوع لعائلتي ربي يحفظهم جانوا يحجون سوة...
طبعا بابا من طلع تقاعد بقى نفس الشي يكعد ب٦ الصبح وماما متعودة تكعد وياه لذلك ...
ب٧ تلكة الريوك مصبوب على ميز الطعام والكل كاعد
علمتنا ماما لازم نتريك قبل مانطلع بس الشخص الوحيد المخالف اني....
اخوي الجبير احمد مهندس كهرباء رغم كلبه طيب بس عصبي حيل ومايتفاهم  ومشكلته هواي يسمع لزوجته بيداء الي اصلا ماكاعدة هسة تسويله ريوك... تعتمد على امي هي تريكه
بيداء بنت عمي الصغير ...اكبر مني باربع سنوات ماكملت دراسة ماجان لها واهس ...ناحية الشكل حلوة ..
بس من ناحية اللسان يرادله كص ...ماتعرف شتريد مشاكلها ماتخلص رغم عدها ولد اثنين وبنية احنة مربيهم
التفت على اخوي محمد محامي شخصيته تختلف عن احمد حجايته ماتصير اثنين وهاديء  وزوجته زينب بنت خالي اخذها عن حب وصار كم شهر مزوجين
زينب ...مدرسة وشخصيتها كلش حلوة وهي اكبر مني بسنتين وصديقتي كلش
رجعت اباوع للحجي ...فدوة لعمره هذا حبيب كلبي وصديقي
بابا...شخصية وهيبة جنتلة قليل الكلام بس من يحجي يخرس المقابيل رغم هو هسة بالستيتنات من عمره
بس ماتنطي هيج عمر ...
تبسمت واني اذكرت من جنت صغيرة اظل الح على امي تحجيلي قصتهم ...
وارجع عليه اكوله احجيلي شلون حبيت ام لسان
اقصد امي لان لسانها مايسكت ابد ....
_وين وصلتي فضيها دروح
_على كيفك وياها ...ردت عليه زوجته زينب
_راح تشتغل المذلة...بست راس بابا ...ادعيلي
_وج يكولون للام ادعيلي ...
_لا تزعلين ام لسان ...بستها ادري تدعيلي انتي
..غمزت لبابا وطلعت
_شفتها لابنتك كله من ورة دلالك
صعدت بالسيارة ..جانت الدنيا صيف وحارة...
_شغل التبربد
_لا تشتغل الطلبات احنة الصبح الجو طيب
_يلا حبيبي انتة
_بلا لواكة
_دروح مو صوجك صوجي اني احترمك...اخ كفخني
_لج اكبر منج ب٨ سنوات احترميني
_والله الا اكله  لبابا من نرجع...تستغلني لان توصلني
_سكتي عاد شكد تلغين خلي احجي وياج
_احجي سكتت
_باعي حبي الدائرة مو مثل الكلية...المجتمع غير تماما
راح تشوفين بيها اشكال..ميانة وية الولد لا تذبين على كد الشغل...بنات لا تنطين اسرارج لهم حد ماتعرفيهن ..ترة راح تشوفين لسان ينكط عسل وراج اتكصج
_ياستار...وين رايحة ...خوفتني
_لا مو هالدرجة بس خليج حذرة هو الدوائر بيه هواي نفاق
_زين ليش مو همة نفسهم جانوا بالكلية
_صح...بس الكلية غير
وصلنا وماكمل شرح ...نزل وياي وصلني للادارية ...اني قبلها اجيت سويت مقابلة وية المدير وقعت عقد بس ماعرف وين نسبوني لان اريد موقع اتعلم بما اني مهندسة
عرفت بالقسم الفني...رحت قدمت نفسي لرئيسة القسم جان اسمها سهى
صاحت على وحدة من البنات وكالت لها مهندسة جديدة وياكم علميها على طريقة شغلنا
من دخلت الغرفة لكيت اربع بنات جدد بنفس الوقت عقود وياي ...مها ونغم ورؤى وهدى
سمر كانت مهندسة اقدم منا وهي وكيل رئيس القسم مزوجة وماعدها اطفال صار سبع سنوات ومها وروئ وهدى من عمري تقريبا بس نغم لا جانت على التصنيع وبعد السقوط من مفركشين التصنيع محصلة نقل لهاي الدائرة ...
تعرفت عليهم وظلينا نسولف وسمر وزعت الشغل بينا
رجعت للبيت بالخط حتى ادليه على بيتنا ....
وصلت واني تعبانة مامتعلمة على هيج تعب وكعدة من الصبح....
مر شهر يوميا محمد الصبح يوصلني وارجع بالخط ...تعرفت زين على البنات وياي وصار عدنا فكرة عن الشغل ...رغم جانت ٢٠٠٥ ومو ذاك الشغل بس هاي الدائرة جانت دمج شركتين ويحاولون حاليا تصفية الاعمال السابقة لكل شركة ولازم يخلصون ذرعات المشاريع فالشغل عدهم هواي ...
جنت ارجع انام الظهر واكعد المغرب اطلع بيدي كلاص الجاي  بالمرجوحة واظل متمددة مابية حيل اكوم من الصعدة والنزلة بالشغل ...شافني الحجي كال يابة اذا ماتكدرين بطلي مو لازم ....
اني راسا كعدت وعدلت نفسي
_لا بابا مابية شي
_داشوفج علة طول تعبانة وين النشاط وين الهمة
_بس لان جديدة مو اكثر ...ضحك ودخل وعافني
شفت وصل لماما جانت واكفة على السنك تغسل مواعين شاروها ضحكت
اتمنى الكة هيج شخص يحبني من كل كلبه ويضحي ويقاتل علمودي....
خلي احجيلكم قصته...
بابا من الغربية اجى لبغداد لان امه بغدادية ماكدرت تعيش بالمحافظات فجدي جابها واجى لبغداد ...همة ٣ اخوان الجبير مزوج من بنت خاله ...
والدي جان الوسطاني وعمره ٢٧ سنة واكو واحد اصغر منه...
بس ماكو شاب يوصل هيج عمر وهو متعين ومايزوج وعمي اصغر منه بسنتين مايقبل يزوج قبل والدي...
طبعا بابا رغم شخصيته بس ماجان يكسر لابوه كلمه...وجدي جان حاجز بنت عمه له
بابا ماجان رايدها بس مايكدر يكول لابوه لا
يوم راح يوصل امه لبيت خاله وهستوة يدك الباب يكول
_نفتح باب الجيران التفت واشوف بنية لابسة عباية وتحاول تعدل شعرها جوة العباية ...
بس شنو الوجه يضوي والعيون سود وساع ومجرورة ...ظليت صافن عليها رغم مو من طبعي اباوع على بنات الناس...
طلعت وراها مرة اكبر منها وولد شاب يطلع بكدي
استحيت ونزلت عيني ودخلت بيت خالي...
من رجعت لبيتنا ماراحت من بالي البنية...
ظليت افكر بيها ومن اغمض عيني اشوف صورتها
ماكملت الاسبوع ورحت لبيت خالي ابنهم بكدي وصاحبي
راد ندخل كتله لا خلينا هنا واكفين...
كلت عسى تطلع واشوفها ...بس ما طلعت ولا اكو حس ابيتهم...
بقيت كل اسبوع اروح لبيت خالي ...وما اشوفها
رابع روحة كلت شجاني هية مرة شفتها خطف...
ردت ارجع وانفتح باب بيتهم رفعت راسي
واشوف المرة الي وياها طلعت...تمشيت مسافة
سمعتها صاحت يلا ولج امشينا تاخرنا...
انتظرت بلكت تطلع هية ...وفعلا شفت الكمر طلع
وهية مستعجلة والعباية مفتوحة...
جان بوكتها بداية السبعينات النفانيف القصيرة يسموها مينجوب...وكل البنات يلبسنه...
ماجان اكو وعي ديني...والنفسيات هم جانت نظيفة
مو مثل هسة...
بس يابوية شلون رجلين وشلون بياض...
رجعت غضيت عيني واستغفرت ربي...
مو اني اباوع على عرض الناس ...مشت ورة امها بعد مالفت عبايتها زين حولها
ماحسيت الا واني امشي وراهن...اجت المصلحة جانت بوقتها تنقل بين المناطق ....
بغداد ماجانت هيج ازدحام واغلبه رصافة ...
مناطق جانت باب الشيخ وشارع فلسطين والكرادة والقادسية ومدينة الثورة ماصار هواي من انبنت
والكاظمية...وغيرها من المناطق
المهم...صعدت واني صعدت وراهم ...وصلن للكاظمية
يمشن واني وراهن وعيني مانزلت من عليها
جانت تمشي مدنك ماترفع راسها..
دخلن للامام يزورن واني ظليت برة
اباوع للناس تروح وتجي واسال نفسي
شبيه ملاحك نسوان ...شجاني مو عيب علية
اجيت ارجع وشفتهن طلعن واجت عيني بعينها
حسيت كلبي خفك لها...
عرفت نفسي عشكتها ...وكلت هاي الي وماتصير لغيري
هية انتبهت طول ماتمشي بالسوك وتلتفت اتشوفني
تجلب ابأمها حسيت خافت
لحد ماوصلتهن للبيت ...قررت اسال عليهم
واجي اخطبها ...
رحت لابن خالي..سألته
_شعجب تسال عليهم
_لا هيج...بس شكد اجيكم مامرة شفت احد برة ولا سمعت صوت لهم
_بيت ابو علي ذهب مصفى..اصلهم نجفي ....صار عمر جوارين ماطلعت العيبة منهم...
_ها صدك ...صراحة ابن خالي اني شفت عدهم بنية وعجبتني حيل
_ماعرف والله مانشوف بناتهم بس جهال ولدهم يطلعون للمدرسة ....خلي اسال الوالدة
ظليت اكول وية نفسي مادام ماشايفين بناتهم يعني خوش بنات
بالمرة الي بعدها شفته مارجعلي خبر سألته
_والله شكولك
_ليش خير عليها شي البنية...
وللحكاية بقية