#تراتيل القدر

مشاكل لا تنتهي

#تراتيل القدر
همس ليل
البارت التاسع
رجعت للبيت والفرحة ماواسعتني...ماعرف شسوي...
بس اذا راد جواب مني شكول...
حجيت لزينب بقت صافنة بوجهي
_شبيج من ثول
_ماعرف نور...انتي متاكدة تكدرين تعيشين هناك
_ليش وين رايحة للمريخ...
_لا حبي انتي ماشايفة وضع المحافظات
_اكولج شبي وضعهم...ليش وضع بغداد هسة زين
_وعمي شلون ...شراح تكولين له
_هاي بوقتها...بس هسة شلون انطي جواب...
_ليش
_لج استحي..
_اكتب ياتاريخ...سجل يازمن...ام لسان حايرة شلون تحجي
_كمت عليها بالمخدة ...لج منو ام لسان ...ركضت وراها..
وهية تضحك...وتصيح
دخل محمد ...هاي شنو ليش تكتلين مرتي...
_وانتة شعليك...اخوات بينا...شدخلك
_اني المتضرر ...اذا تعوقت
_شفتي بعدج بطولج...وتبرة منج
_صدك شنو انت متضرر...جاوبته زينب
_قصده مايتحملج اذا صار بيج شي...ظلي ساكتة عليه...كل هالمدارة وتالي راسا تبرة منج
_لج لا تعلكيها اسكتي...مرتي حبيبتي اشاقة
_هو هذا موضوع بيه شقة
_اي صدك مثل ماتكول نور...مو مال شقة
علكت بينهم واني اضحك...
_اكولكم...روحوا لغرفتكم ...اريد انام...كملوا عركتكم هناك
دفعتهم خارج الغرفة...رجعت...وكفت كدام المراية
شراح اكول له...يلا الحجي يجي بوقته...
كمت اغني شيجيب باجر واصبر شلون...لا مو باجر بعد يومين...يارب تمم فرحتي...
رحت انام مكدرت...كعدت ...هسة انقهر ما انام...
افرح ما انام...اكو خطا بالكتلوك مالتي اكيد
حجيت وية والدي وكتله...قراري اتقدم...سكت
بعدين كال بيها الخير بوية...بس جان ضايج
بقى راي نور ...جنت خايف من ردها...
ومتردد هواي....بس لازم اذبحها على قبلة
حتى اعرف راسي من رجلي...
وصلت وشفتها قبلي...نظرة عينها من فتت
جانت كافية علي تحسسني اني ما اخطات من قررت
تكون لي...
بس بقى اسمعها منها....
بيومها عبالك الكل ضدي...مافرغت الغرفة ابد لنهاية الدوام
اخر شي من ردنا نطلع ...
_هسة شلون كولي لي ...اي لو لا
ضحكت وهزت راسها ب اي...
_لا احجيها اريد اسمع...
احمر وجها..جاوبت اي ...وطلعت
اوووف ربي تخلص على خير كون...
ثاني يوم...من شفتها وصار مجال لنا...
_نور ...اخذيلنا موعد وية الحجي...
سكتت ماجاوبتني...شو ماجاوبتي
_ان شاء الله
_شنو ماسمعت...وين صوتج
ضحكت
_صدقة لربج على هالضحكة...
دخلت مها...ضحكونا وياكم
رجعت للبيت واني افكر شلون راح اكول لبابا..
صار يومين من كلت جوابي لحيدر...بس عدا كم كلمة اليوم
ابد ماصار مجال نحجي...
وصلت للبيت...وصحت لزينب
_لج زينب...يريد يجي يشوف بابا
_صدك...زين انتي فتهمتي وضعه شنو
_يعني شنو
_يعني عائلته...اخوانه ..اخواته من هالامور
_وشعلية...قابل راح ازوج العائلة...ووضعه...هم ما مهم...هو مهندس ومتعين...واني هم بلكت اتعين...ونشيل نفسنا...
_الله يتمم بالخير
_هسة شلون
_شنو شلون
_شلون اكول لبابا
_كولي لعمتي..وهية تكوله
_لا لا ابد...ماما تفضحنا ماتعرفين لسانها
_انتي احجي وياه...
_استحي..
_زين كولي لمحمد
_ها...وج هم استحي
_راح اكوله اني
_اي احسن
ظليت الوب...شوكت تكله...شلون راح يبلغ بابا..
بالليل اجاني محمد...
_تعاي ولج...هاي شنو
فزيت وصدك خفت
_شنو
_هذا منو ومين تعرفيه...
شافني صفريت...غير لهجته
_تعاي دشاقة وياج...احجيلي 
_جفلتني...كلبي كام يرجف..خليت ايدي على كلبي
_شنو هالديمقراطية...ماكو مستحة...شلون وكت
ماجاوبت لن صدك استحيت
_تعاي اكعدي وحجيلي مين الولد...شنو وضعه٠
_وياي بالدائرة...وماعرف شي عنه...بس خوش ولد
_شعرفج خوش ولد
_هذا الظاهر من تصرفاته
_انطيني اسمه ...خلي اسال عنه بالدائرة قبل ماكول للحجي
بعدها بيوم داومنا...وكالعادة محمد وصلني ...من دانزل
شفت حيدر اجى باتجاهنا...
ماعرف شصار بحالي...ارتبكت حيل...
_السلام عليكم
محمد مايعرفه اصلا ...من شافه سلم...
نزل ...وتسالم وياه....اني بعد ماسمعت شكاله
لان عفتهم ...ودخلت
بقيت احوس...حيدر تاخر...شكال لمحمد
محمد شكاله...اريد اعرف
دخل حيدر سلم...وكعد بمكانه...
جان بوجود الاخرين يتصرف عادي...وكأنه ماكو شي
من نطلع الكل....باوع علي وابتسم...
_شو تبتسم ليش
_يمكم الجمعة ضيفونا...
_عفى عليك...احنة اهل الكرم
_والنعم...
_بس شلون
_اذا ابقى وراج يراد  ست اشهر يلا تفضيها ...واني مستعجل
ضحكت...دنكت واني مستحية...
_وج بابا لا تحمرين هيج...خبلتيني...شلون يعني
عزة ...شو هذا كلش انطلق بالكلام لو طخه لو اشلع مخه
لو يسكت لو ينطلق هيج...
جنت افكر هيج لان باسم قطع حديثنا
يم اهلي ...ماحجى محمد...واني اريد بس خبر
كال لبابا لا....شنو رد فعله ...
جان باقي للجمعة يومين....
خلالهم حيدر ماداوم...واني ماعرفت السبب..
وظليت الوب خاف الغى الموعد...لو غير رايه
لو صار شي عدهم...
يومين القلق كتلني ...وماكدر اسال بالدائرة احس الكل تعرف...
لحد ليلة الخميس...لا ابوية كال سوو غدة باجر..
ولا امي حاجتني....
اخر شي سحبت زينب...للغرفة ...وسديت الباب
_لج تعاي ..خرب شو ماتحجيلي شصار
_على شنو
_شنو على شنو..محمد ماكال على حيدر...
_روحي اسالي اخوج اني شكو...انتي علاقتج ...قوية بيه
_لج استحي..الشقة شي...وهاي شي ثاني...مايكول شعدها وياه
_لا مايكول ...رادت تطلع...سحبتها
_شنو نسيت ايام القتال السلمي...شلون جنت اوكفلج ...شلون جنت اوصلج اخبار محمد...سهلة اذا ماحجيتله كلشي
_وتخونين الثقة...هيج الاخوة والصداقة
_كلشي مسموح في مثل هذه الحالة....
_جنبيت الفصحى...ضحكت اني هم اكول شعجب ماسالت..
كلت الي هية تسال يلا احجي
_خرب يعني تعرفين...تعاي حبابة تحجي
_هسة صرت حبابة...يلا نسوي خير وانذبه بالشط
كفختها فضيها
_باعي محمد يكول الولد اجى عرفني على نفسه...وحجى ملخص عن وضعه وطلب يجي هو ابوه يتعرفون على عمي..
_اي...
_ومحمد يكول عجبني كلش مبين شخصية ومتحدث...وسال عليه اصدقاء محمد ...حامدين هواي بيه
تعبت
_لج كملي خرب
_كال لعمي...ساكت وكايل خلي يتفضلون...على الغدة...
حيدر رايد العصر...
_يارب...جنت شوية اكعد شوية اوكف...كملي
_شكمل خلصت باجر عمي ابو صهيب هم يجي
_طبعا هذا الضلع مال والد لازم يكون موجود
ثاني يوم الصبح كعدت...شفت ماما ضايجة...بس ماحجت لحد ماطلعوا...
_اي عيني...اني اخر من يعلم...
باوعت لزينب...غمزتلي
_انتي الخير والبركة ماما...بس شكول ...اذا اني ماعرف شي
_ماتعرفين شي...اي صدكتج...
كمت بستها...فديت امي الحنون
_بس ماما هذا محافظات ...هسة انتي عفتي ولد عمج وخالج ورحتي على المحافظات
_صدك ماما تححين...انتي اصلا من النجف.. شبيها المحافظات
_ماعشنا هناك بنتي...ومابيهم شي بالعكس على الراس..
بس ماما وضعهم يختلف عن بغداد...
ماتكدرين تعيشين هناك
_مايهمني بس اخلاق الولد ...مو مهم المكان
سكتنا لان دخلت بيداء
الموضوع سكتة...ماحجى بابا ابد...
وطبعا السعادة ماشايلتني...بس ادعي اتم على خير
وبيومها نشطة من الصبح كاعدة انظف واعدل وارتب
تغدينا وبيداء كالعادة راحت لاهلها...
بس الظاهر ماتدري جان كعدت ركبة ونص...
ب٤ العصر اندك الباب...
وسمعت ترحاب بمحمد...ركضت للمطبخ اباوع من الشباك...
شفت حيدر ...وياه رجال جبير بالعمر...لابس عكال ويشماغ..ودشداشة وعباية مال عرب..بس كشخة
...عمي قبلها بنص ساعة جان جاي...
وداخلين بالصالة ...
صبينا جاي وبعدها كهوة....واريد اروح اخلي اذني على الباب...
بس استحي خاف واحد من اخوتي يشوفني
ساعة وطلعوا...بابا وصلهم للباب الخارجي...
ورجع كعد وية عمي واخوتي بالصالة...
_زينب هسة شلون نعرف الصار
_اصبري خلي يطلع محمد ونفهم
طبعا محد يكولي شي...عبالك الموضوع مايخصني
رحت لماما...اكول ماما بابا شكال على الموضوع
_يا موضوع...
_ماما....بطلي فدوة وجاوبيني
_امي شبيه ابن خالج...خوش ولد وهسة تخرج من الطبية..
_يا ابن خالي كرار...صلي على نبيج ...طول عمري احسبه مثل احمد ومحمد...حتى اشاقة وياه شقى ثكيل
وبعدين انتي تتمنين هالشي....هو يحسبني مثل زينب
_ما اتمنى بس اذا خالج كال على كرار...موضوع هذا الولد ينسد
سكتت...اني متاكدة من كرار يحسبني مثل اخته
لليل دز بابا علية...
_بابا...تعاي احجي وياج...سكت
_خير بابا حبيبي...هو ضحك
_اعرف انتي تدرين على شنو داز عليج....تعرفين يابة شكد احبج...واثق بيج ...وانتي هم الحمد لله رافعة راسي
الكل تحمد باخلاقج...بالمنطقة والدائرة...
توصلني اخبارج....لذلك ما اجبرج على شي ماترديه
سكت واخذ صفنة...
اعرف بابا ...اباله شي...من يقطع كلامه...ويصفن
_بابا...الناس خوش ناس ...والولد هم...من سألنا عليه
...بس عمج كال ولدي موجودين...واتوقع خالج هم
بحجي نفس الحجي...
من كال هيج حسيت كلبي وكع...
بس مثل ماكتلج ...ما اجبرج انتي مخيرة...
ها بنتي جاوبيني
_بكيفك بابا....
_لا مو بكيفي...اذا ترجع علي...مانطيج غير لابن عمج
بس اريد رأيج
_بابا اني ولد عمي مثل احمد ومحمد احسبهم
_زين ابن خالج...خوش ولد وطبيب..
_نفس الشي
_خلاص بابا...بس ترة الي راح اسويه لصالحج...
ماكدرت اسال شنو قصد بحجايته...
اجت بيداء العصر....لليل سمعت حجايتها وية امي
_اي عمة ليش لا...احنة هنا غربة...نسمع من برة
_على شنو...
_يعني حماتي وبنت عمي تنخطب...واسمع من برة
_اولا مانخطبت...حجي...وبعدين محد يدري بس اهلج...
يعني ماسمعتي من غربة
_اي ...هن بنات هالوكت هنة يجبن رجولتهن وياهن
_شنو قصدج
_ماقصدي شي
دخلت عليهن سدت الموضوع وطلعت راحت لغرفتها
ثاني يوم داومت والفرحة ماوسعتني...
دخلت القسم الفرحة مبينة بعيني
سلمت...رفع عينه مبتسم لي...
_شو اليوم فرحانة..سألت مها
_يعني شلون فرحانة...
_عيونج تلمع ...وجهج مبتسم...خاف اكو مشروع خطوبة
فزيت من حجايتها....معقولة حيدر كال لها...
_ماكو شي....عفتها وطلعت ضايجة
من رجعت جان بس باسم وحيدر يشتغلون ...
كعدت اشتغل بس روحي طافرة...من طلع باسم
_خير شكو
رفعت راسي اباوع عليه...
_شنو
_ليش هالتوتر...الصبح جنتي شحلاتج...شصار
_ماكو شي...
_مو جديدة علية ...وماعرفج...ترة اكدر اميز مزاجج من وجهج وحركة ايديج
فاجاني بالحجي..
_صدك تحجي...شلون
ضحك...صار اشهر اراقبج...حفظت حركاتج كلها
ظليت صافنة عليه وهو يباوع علية...
قطع اللحظة علينا دخلت باسم...
ردت اسال شتفق وية الحجي...بس استحيت
من رجعت افتهمت من زينب متفقين الجمعة الجاية ...يجمع عمامي وخوالي...وهو هم ويجون يخطبون
طبعا خلال الاسبوع....والدي دز ناس سالوا عليه بالمنطقة ...
يوم بقينا وحدنا...
_ابوج فد شخصية مهيبة
_اي حبيب كلبي...فدوة اروحله
_منو حبيب كلبج..اني لو هوة
ضحكت وصدك حجايته خجلتني...
_اموت على حمرة الخجل بخدودج....بوية خلص صبري..
شوكت تكونين من نصيبي...
_الله كريم...
طبعا ماكو ربع ساعة وتشوفين يجي احد...
ابد مانخلص حجاية كاملة...
يوم رجعت لكيت عمي الجبير جاي من الغربية...والوجوه مكلبة كلها...
شوي على الصوت من الصالة...وعمي طلع هو وابنه
بس مبين زعلانين
_شكو ماما...شبيه عمي
_من وراج غير
_ليش من وراي
_لو تفضيها وتاخذين من كرابيج...احس من هالهوسة
_ليش عمي ابو جبار ماعنده ولد مامزوج
_وعمج ابو صهيب..وابن خالج
_هسة عمي ابو صهيب مازعل ...هو ليش زعلان
_دخل محمد...عمي مازعلان...بس مايقبل لان الولد شيعي
_صدك تحجي...هاي من شوكت صارت سنة وشيعة...ليش امي شنو....تفضلي ابن اخوج طلع من المعادلة
مابعده الايام جانت مشحونة....عمي الجبير هدد ابوية ...يقطع علاقته وياه...اذا قبل يزوجني
بابا من دز علي...ورجع خيرني
كتله اذا اختار ابن خالي ...راح يطلع نفس المشكلة...
ومن شوكت عدنا هاي اللهجة ...مال سنة وشيعة...
_بابا ماعندي هالشي...بس ماريد اخسر عمج...
خابرو حيدر وطلبوا ياجل الموضوع...
وكبت المشاكل بين ابوية وعمي الجبير...
بالدائرة....حيدر سال عن سبب التأجيل
حجيتله...
_انتي امج مو نجفية اصلا
_اي...اهلي ماعدهم هذا النفس...بس عمي بسبب الوضع والي يشوفه ...وهو ماعايش ابغداد
_وهسة شنو...ماتوكفين وياي...
_حيدر ما كلت هيج
_نور ظليت اشهر عايش بنار ...قريبة مني وبعيدة...ومااكولج حجاية لحد ما اضمن اهل
حاولي تقنعين اهلج...
_صدك تحجي ...ما اعوفك مهما كان
_والله احبج...عمري انتي كله
من يحجي وياي هيج اسكت...استحي اكوله احبك او اني هم....
عمي ابوصهيب...هم حجى وياي...حاول يقنعني على واحد من ولده...بس كتله مثل اخواني
صار زعل بين عمي الجبير وابوية...
وبعد مرور شهر ...حدد بابا موعد لجية اهل حيدر
وللحكاية بقية