#تراتيل القدر

ذكريات

#تراتيل القدر
همس ليل
البارت الرابع عشر
فتحت عيني...اباوع مربوطة بية وايرات ...جهاز نبض
مغذي...
فريت عيني على الحولي..شفت زينب مكرفصة على القنفة مقابيل السرير...
عرفت نفسي بالمستشفى..
جنت عطشانة حيل...ردت احاجيهة...
حجيت ما طلع الصوت...حاولت مرة ثانية...
هم ماطلع صوتي...
رفعت ايدي بصعوبة...جسمي كله عبالك مخدر
وكعت ايدي على الفراش وطلعت صوت...
فزت زينب..شافتني فاتحة عيني...
راسا اجت يمي...
_حبيبتي نور حمد لله على سلامتج...
باستني...خوفتينا يمعودة...
ردت اسال شسوي هنا...
احجي بس مايطلع صوت ابد...
اشرت لها اريد اشرب...
_نور شبيج ليش ماكو صوتج...راحت جابت كلاص مي شربتني
حاجيني نور...شبيج.
جانت رفعت يدي صعبة...بس احاول افهمها ..
ليش اني هنا
_تخربتي...قاس ضغطج كرار طلع ٣ الواطي...
نقلناج لهنا على المغذي صار ٣ ايام فاقدة الوعي
اشرت على حنجرتي...وبعدين هزيت ايدي
يعني صوتي ماكو...
_لا نور احجي مابيج شي حبيبتي...
اجت شبكت راسي لصدرها...
_احجي مابي شي صوتج...
بس بدون فائدة ...ماطلع اي صوت...
ماعرف شصار بعدها ...لان رجعت نمت...
من فتحت عيني مرة ثانية...جان اكو دكتور وية...
كرار...حاول يحاجيني اني بس اباوع عليه..
اجى بابا وماما...شبكتني ماما وتبجي...
جنت ماعرف شيحجون...لان بعالم ثاني...
بس اشوف حركتهم حولي...
المستشفيات بذاك الوقت تفرغ بالليل...
نادر مايبقى طبيب...كلها تخاف...
حتى المرضى اهلهم يطلعوهم ...
ويرجعوهم الصبح...
كرار...كال لهم نطلعها بالبيت نشد المغذي...هية ماعدها علاج
رجعوني لبيت خالي...بغرفة بيبي جوة...
اسبوع بعدها ...بس نايمة...افتح عيني...
من يشكلي المغذي كرار وارجع انام...
بعد اسبوع سمعت صوت يمي...
جان بابا يحجي وية كرار وهو يغير المغذي
_يعني شلون ابني ...راح تبقى هيج
_عمي هية مصدومة...فترة وترجع ...بس يراد وكت
_هسة حتى دكاترة زينين هنا ماكو...
_حاولوا وياها بلكت تاكل...صار ١٠ ايام على المغذي..
موزين هيج
طلع كرار...فتحت عيني لبابا...
من شافني كاعدة...اجى كعد بصفي
_بابا...لخاطري ....حاولي تاكلين...
اشرت له ماكدر..
_بابا لخاطر شيبتي..تعبت بنتي ...اخوتج منة..وانتي...
بيتنا عفنا...فلوسنا راحت...كله فدوة...
انتوا ذخري..
بابا اكلي داطلعج لسوريا...ما اكدر اعالجج هنا
اشرت براسي ما اريد اطلع
_لو علية يابنتي...اموت واندفن هنا ...بس انتي واخوتج كاسرين ظهري...
طلع جابلي اكل واجت ماما وياه...حاولت تكعدني...
تسدني لها يلا اكدر...حاولت لخاطر بابا...
اكلت شوي بعدها تقيات...بقيت يومين هيج
اخر شي بابا كال لهم...اطلعها احسن...
كرار...عمي ماتتحمل الطريق
_يابة ماكو غير حل...
_زين خلي اروح وياكم...على الاقل بالطريق ...
اساعدكم
_لا بني...اني راح امر على الرمادي حتى اخذ فلوس...
من اخوتي...وين اخذك...
اذكر سندتني امي وخالي فراس...لان ماكدر اوكف لحظة
صعدت بالسيارة ليورة ورجعت نمت...
كرار ضربني ابرة مسكنة...
كال راح تبقى نايمة ...والمغذي حاولوا من يخلص
تخلون الثاني....
ماعرف شلون خلص الطريق...جنت اغلبه نايمة ...
لحد ماوصلنا الحدود....
من دخلنا لسوريا ...تلكانا محمد واحمد...
اذكر من شافوني تفاجأوا...بقتها١٢ يوم بس مغذي
ماباقي بية شي..
وصلنا للشقة الي مأجريها...
كانت منطقة السيدة زينب...شالني محمد شيل وصعدني
_صايرة ريشة نور ليش خيتي...
شبكني يبجي...
جابوا طبيب صديقهم للبيت..انطاني مقويات بالمغذي
كال تتقيء لان ضغطها هابط...
بقيت فترة...اخواني وبابا يوكلوني بيدهم...
بعد شهر رفعوا المغذي...وصرت اكوم واتحرك...
بس صحتي جانت كلش تعبانة ...
بقى بابا يراجع بية دكاترة...
كلهم نفس الجاية.....فقدان الصوت صدمة...
وردة فعل...يرجع من يتقبل عقلي الصدمة...
بقينة بسوريا تقريبا سنة وكم شهر...
اخواني تعبوا ...احمد اشتغل بشركة ...ومحمد
بمكتب محامي ...بس يوم يشتغل واسبوع لا...
امي باعت كل ذهبها...
دشوف هنا كومة عراقيين هاجين....
بس السني وية الشيعي...متعاونين...
وضع يضحك بالوطن يتكاتلون...وخارجه ناس تساعد ناس
اني اغلب الوكت جنت...اكعد يم الشباك...
اتفرج على الناس...
او تاخذني امي للسيدة زينب....نزور...
واكعد صافنة....
عايشة جسد بدون مشاعر...
ماكو شي يفرحني...ولا شي يقهرني...
الي يصير حولي كانه بعالم اخر....
موت الجسد صعب...بس الاصعب موت الاحساس
اني جنت هيج...ميتة من الداخل...
ماعندي اي تفاعل...
محد يكدر يفهم حالتي....
ماكو اي احساس...فراغ قاتل من الداخل...
مثل هاوية ماتعرف قرارها....
جانوا اخوتي مقدمين على اليو ان...
طلع لهم لجوء...بابا رفض...
_طلعوا انتو...اني ارجع اموت بالعراق بس يتحسن الوضع
_ياوضع يتحسن ...شو من سيء الى اسوء..
_لا يابة...تبقى النفوس الطيبة موجودة .
ولازم يتعبون من هالوضع
بابا بقى متواصل وية ابوفهد جارنا وصديقه...
مرة من المخابرات ...كاله الجماعة جابوا ناس ابيتكم...
واني حاولت اجمع الصور مال العائلة ...
بابا نقهر حيل...هذا تعب السنيين...وجانت ماما
مأثثة من احسن الاثاث...بس كله راح بغمضة عين
لان طلعنا بطرك ارواحنا...
احمد طلع ...بس محمد بقى...ماقبل يعوفنا...
بس الحمل زاد عليه...
لذلك اول ما الحجي سمع الوضع ابغداد تحسن...
والحكومة شبه سيطرت...
الناس تعبت....وكل هالامور جانت دخيلة علينا
بس اكو انجروا...لاهداف مختلفة
صح اكو تفجيرات...بس خلص الذبح والقتل...
قرر نرجع للعراق...
رجعنا...لكينا خالي مأجر مشتمل يمهم...
وزينب مجهزة شغلات اساسية...
زينب بهالوكت جابت ولد...وكان عمره سنة...
سنة كاملة وابوه ماشافه...
مثل ماخذوني ...رجعوني الفرق رحت شايليني
رجعت امشي على رجلي...
حياة اهلي رجعت بس مو مثل قبل...
والدي راح شاف بيتنا...وانطى مهلة للكاعدين يطلعون..
وبعد ماطلعوا...
امي راحت ورجعت تبجي...البيت خرابة مسوي
نص الاثاث مبيوك...والباقي مفلشي
الحجي...كال بعد ماعدنا رجعة للمنطقة...عرض البيت للبيع
واخذ اشهر وماجاب سعر...
الناس بدت تستغل وتشتري بالكسران خاصة منطقتنا حيل تعبانة جانت بالطاىفية....
اخر شي نباع...واخذنا بغير منطقة...
بس مو بكبر بيتنا...بيت عمي ابو صهيب هم رجع واشترى يمنا...
خلال هاي الفترة اني مثل ما اني...ماكو اي تقدم بصحتي
ويوم انتقلنا لبيتنا الجديد...
اخذت غرفة بالطابق الثاني مطلة على الحديقة والشارع..
اغلب وقتي مكرفصة يم الشباك اتفرج على الشارع
جنت اتواصل وياهم بالكتابة والاشارة
اول رجوعنا ...كتبت لزينب...اريد ازور كربلاء
اخذني محمد وزينب وامي...
من اجيت البس العباية...اخذتني الذكرى...
من جاب العباية حيدر...
جانت ثاني مرة اجي لكربلا حتى نكمل النواقص...
وكال اليوم تزورين المرة السابقة مازرتي...
من ردنا نطلع طلع علاكة...
_هاي لج ...
_شنو هاي حبيبي
_عباية..تعلمي تلبسيها
_بس لاتريدني البس عباية
_شلون لعد ...تريدين اخلي الناس تتفرج على جوهرتي
_البس جبة حباب
_مابي نقاش هالموضوع
طلعنا كل شوي يكلي عدلي عباتج....مو هيج تلبس
من رجعت ظليت فترة البس العباية حتى اتعلم عليها
ماجنت رافضة فكرة العباية...
بالعكس عجبني يكون يغار ومايريد احد يتمعن بية
وعيت على صوت محمد...يلا نور وين رحتي
زرنا الامامين ورجعنا
كمت كل شهر اروح ازور ...واكعد بالامام العباس
بنفس المكان الي كعدنا بيه...
وتظل عيني على الباب...
انتظر يجي ...بلكت صدفة اشوفه...
صفنت على ايدي...
جان بيها علك اخضر اذكرت...
نفس المرة الي جاب بيها العباية ...
زرنا الامام الحسين...وبعدين توجهنا للعباس
جانت قبل اكو تفتيش...بس من ندخل للصحن اكدر التقي بيه...
طلعت من التفتيش...لكيته ينتظرني
_من تخلصين زيارة...تعاي هنا مو تيهين
_شفتني طفلة
_اي بالنسبة لي...واحلى طفلة روحي يلا
زرت وطلعت شفته واكف ينتظر...
اخذني تحت ذني القبات كعدنا على الحافة
_مد ايدج
مديتها شد بيها العلك...
_هاي شنو
_هاي اخذتها باول مرة زرت ودعيت تكونين لي
وكلت اجيبج هنا والبسجياه
_اغلى هدية عندي
_اغلى من كلبي
_ماكو مقارنة...بس كون تصون حبي وماتجرحني
لزم ايدي...الج عهد العباس...ماعوفج للموت
_اسم الله عليك...ولك نفس العهد
_كومي خلي نطلع...عيب كاعدين بالحضرة ونتغزل
طلعنا لكينا ام كرار وامي وزينب ...صابين الاكل وينتظرون
كعدنا على صفحة ناكل ونسولف
جنت اذكر وعيني ماتفارك الباب...
من يومها ...مانزعته...حتى من كعدت بالمستشفى
شفته ماكو اشرت لزينب عليه...
فهمت طلعت ضامته...جابته ورجعت شدته
جنت كل ما اجي اذكر...
بس اوصل لنقطة ...
يتوقف عقلي....
مايقبل يترجم السؤال...
شنو الصار...وينه..
ليش غايب...
لهنا ويصير عندي صداع...
وارجع استسلم واعيش الذكرى...
بدون ما اطرح اسئلة...
بس شي واحد باقي بداخلي...
هو امل راح يجي يوم واشوف
دوامي تركته...واني قبلها تعينت...
من رجعنا من سوريا محمد قدملي على اجازة مرضية...
وية التقارير الموجودة وافقولي...
هالشي عرفته بعدين....
اليوم مر سنتين على خطوبتنا...
كتبت لمحمد اخذني لكربلا...
كال اجليها...
لو اخلي كرار يوصلكم...
اشرت له لا....
بعدين رتب وضعه ...
واخذنا....
من وصلنا وبنفس المكان كعدت...
مرات الكى ناس كاعدة ...اظل واكفة لحد مايفرغ المكان
كعدت...وتوجه نظري مثل كل مرة للباب
وحجيت بكلبي ...اعرف ماتقبل يوصلني...
ماخالفت رأيك...
واني صافنة ...
صار ظل علية...
رفعت عيني...اجت بعيون سودة مو غريبة علية
....وللتكملة بقية