#تراتيل القدر

فراق....ألم

#تراتيل القدر
همس ليل
البارت الثالث العشر
وصلت لكيت محمد مبسط بالطرمة ويبجي...
وكفت بالباب اباوع...صح ابجي بسهولة...
بس مشكلتي بهيج مواقف ابقى مذهولة...
اريد اسال محمد شصار...
صوتي مايقبل يطلع...
ولا رجلي تشيلني حتى اوصل له...
بهاللحظة طلع بابا ...شافني واكفة صافنة على محمد
اجى باتجاهي...
_فوتي بابا لا تخافين ماكو شي...
رفعت عيني له ...بس سؤال مايقبل يطلع...
جان ابالي صار شي لواحد من اهلي بس منو
ماعرف...
جرني بابا للمطبخ...وجاب كلاص مي..
_اشربي ...ماكو شي..
اريد اسال منو ...ماكدر
انطاني كلاص المي ...ورجع على محمد يكوم بيه...
دخله بالمطبخ هم... ورجع طلع...
ماعرف شلون وعيت لنفسي...
_محمد منو مات...
زاد بالبجي....اول مرة اشوفه يبجي هيج
محمد طويل ومعضل ....
_لج نور بيدي مات...مالحكت اوديه للمستشفى...
كتلوه...كال اخوه خلي نطلع...ماشجعناه
_منو هو منو شبيك احجي...
جنت كاعدة يمه...لازمة ايده
دخل بابا...سيف كتلوه...
شهكت...صدك تحجي ...
سيف من اعز اصدقاء محمد...ربى ويانا من وعيت لدنيا
هو صديق محمد...
صارلهم ٢٥ سنة صداقة...حتى نفس الكلية...
حبوا نفس البنية...واثنينهم عافوها...
كل واحد لخاطر الثاني...
بس سيف ازوج وصار عنده اثنين اطفال...
ومحمد تاخر لحد ما اقتنع بزينب يلا...
بابا حاجى محمد...كوم ابني....سيارتك دخلتها..
حاول اغسل الدم قبل لا يشوفها احد...
ظليت صافنة شنو الفلم...
جنت ابجي وية محمد...ومامنتبهة امي هم ماكو...
وبعدين دورت زينب هم مالكيتها...
بابا جان عصبي...ومنطوي...بالفترة الاخيرة
قليل الكلام صاير...
نزل بوقتها محمد مبدل...
_وين رايح...بابا حاجاه
_للفاتحة
_ابني اكعد...اعرف صاحبك...واني هم معصور كلبي عليه...
بس اهله هسة شايطين ومنطقتهم خطرة...
_ليش مايعرفوني
_ابني الخوف مو منهم...الخوف من الغريب الي مايعرف شنو انتة
ختم حجيه وعافه ودخل للغرفة...
من اجت زينب وامي...افتهمت من زينب
_همة قبل فترة هددوهم...واخوه كاله خلي نطلع...بس هو ماقبل كال اصدقائي المنطقة كلها منو يتعرض لي
_فعلا منو يسويها.
_هو الخوف مو من المنطقة...الخوف من الي دخلو لها
عموما...رجع هو ومحمد مثل كل يوم...
نزله محمد...ورجع يدخل السيارة للكراج...
يكول ما اسمع الا طلقات ...التفت شفت ملثمين خرطوه
وطلعوا بسيارتهم...
راكض عليه...لاكي بي نفس...شايلة بالسيارة
كبل للمستشفى...
بس بالطريق ميت خطية
_الله يساعد اهله...
جانت زينب تحجي واني دموعي تصب...
اذكرت من جنت زغيرة ويجي وية محمد...
جان من يضوجه ...يكوله ترة ازوجك نور
سيف يجاوبه...شنو عمي عايف نفسي اخذ ام لسان
_وانتو وين رحتوا
_رحنا عليهم ...امهم فقدت وزوجته هم...عمي كال لموا ذهبهن وفلوسهن ...هسة يجون عمام الولد ياخذوهن...
وصدك عافوا البيت مثل ماهو..
وطلعوا بطرك ارواحهم...واحنة رحنة وياهم...
_اوووف شلون وكت ....
خابرت حيدر ابجي واحجيله ....
بقينا اسبوع بعدها بابا اعصابه حيل مشدودة ...
ويوم رجعت لكيت لا محمد ولا زينب...
اسألت امي تكول راحوا لخوالج ...راح يظلون كم يوم
بوقتها....بابا خابر حيدر كاله عجل بامورك...
_ترة ابوج مصعبها نور
_مادري بهذا الحجي شوكت كاللك
جنة كاعدين بالدائرة...وحيدر كال خابرت الحجي
مو هالخميس ...الخميس الجاي الزفة
اليوم كان ثلاثاء يعني بعد ١٠ ايام...راد اقدم اجازة...
بعدها نقدم نقل...
_يعني دايشوف الوضع ابغداد شكد صاير صعب...
شلون يريد اجيب زفة من كربلاء لهنا
_حيدر بابا هم حقه...
_شلون فهميني...لازم يحطون عراقيل
حيدر مقترح على بابا...ياخذني قبل يوم لكربلاء...ونبات اني وامي وخالاتي بالمشتمل...وثاني يوم زفة تجي تاخذني من الصالون....
الحجي رافض هالشي...
ظلينا ساكتين مانعرف شنسوي..حيدر جان حيل ضايج
_تدرين نور صار حلم عندي يتم كلشي ونزوج...
_هاحبي تعبت
_لو عمري كله اقاتل علمودج ما اتعب...حياتي بدونج ماتسوة
_لا حبيبي لا تكول هيج...
راح احاول....
من ردنا نطلع...كتله حيدوري حبي لا تضوج تفرج
جنة وحدنا بالغرفة ...جرني وباسني من كصتي
نحرجت كلش
_ادعي تفرج...بعد ماعندي صبر....
رجعت للبيت...وحيدر طلع لبيت خاله يبات...
وكال باجر اريد خبر اكيد حتى اخذج وياي
تاجرين بدلة العرس...
البيت عدنا صاير مايحتمل ...بابا ساكت وعبالك اباله شي
وامي ....مقهورة ولا واحد من ولدها يمها
ظليت افكر شسوي ...خابرت زينب اسال عليهم...
طلعت حامل...حيل فرحت لها
الصبح اجت فكرة براسي...
رحت للحجي ...بابا ممكن احجي وياك
_ادري بابا علمود الزفة...بس بابا فوك ما راح اطلعين من بيتي....
النوب مازفج بيدي...ليش شنو ماخذيج غصب لو ماعندج اهل
_صح كلامك...بس خامة نجازف بالعالم...
_هذا موضوع مابي نقاش
_لا بابا اصبر مو اناقش...بس عندي فكرة...
ابقى انزف من بيت خالي وبيدك تسلمني...
بس ماتجي زفة جبيرة...
خلي كم سيارة مقربين له..
صفن بابا علية...
_يول يابة لو ما الظروف ما ازوجج بهالطريقة ...لو ابقيج العمر كله يمي
كمت بست ايده ...فدوة اروحلك حبيبي
ركضت لغرفتي...دكيت على حيدر ماكو...
للظهر وهو ماكو منه خبر...
اخر شي خابر
_وين جنت قلقتني
_نسيت التلفون ابيت خالي
_الي واخذ عقلك
_اكو غيرها ...حبيبة كلبي...وشاعلته شعل
_هيج تحجي علية...لعد ماكولك الخبر...
_شنو احجي ولج
_ما... ماعلية
_راح اجي انعنع ضلوعج
_وينطيك كلبك
_تخلي احصلج اول...احجي
حجيتله الاتفاق...سكت شوي
_خوش...طالع لكربلا هسة...اتفق وية اهلي...
_لا شنو تطلع لكربلا...تعال اتفاهم وية بابا
_نور عمري الوقت تاخر وماكدر بعد اطلع
_عود بات ابيت خالك وباجر نطلع سوية ...هم اروح اكمل النواقص ...واجر بدلة...خوما اجر من بغداد
_ليش ما ابات يمكم...وبغرفتج
_ها شو صرت وكيح
_لا عمي شمسوين...بس اكول خليها عكب باجر اجيج..
_لا حيدر بعد هواي عندي شغلات...لخاطري حبيب عمري
_لخاطر هالحجاية جاي...
بقيت اكلب بملابسي...اشوف شلبس اول مرة يجي حيدر
من نخطبنا لسة
تقريبا ساعة ...بابا صاحني
طلعت شفت بابا واكف واحمد ....
امي كاعدة على القنفة وحاطة ايدها على راسها....
_نعم بابا
_بنتي اجمعي ذهبج وفلوسج واوراقج الرسمية
وخليها بجنطة صغيرة...
_ليش بابا خير
_بابا استعجلي اخوج يوصلنا لبيت خالج
_بس
_بس شنو احجي
_خابرت حيدر جاي حتى يتفق وياك
بابا بقى يباوع علية...واحسه تعصب حيل
_استلم الثولة شسوت...حجى احمد
روحي خابري...كولي له لا يجي...
وحضري كلشي...رجعت دكيت على حيدر
_ها عمري كولي
_حيدر لاتجي بابا يكول
_هاي غير طردة...ضحك
_لا حبيبي صاير شي لا تجي
_قبل شوي تتوسلين اجي ...وهسة لا تجي
_مو كتلك ماعرف شصار...
_اني وصلت منطقتكم...خلي افتهم...
_توصل بالسلامة بعد عمري
_فدوة لعمرج..
طلعت ....بابا يكول وصلت للمنطقة
صاح بية...مو كتلج لا يجي..
اول مرة يصيح بية ...خرسيت...
رجع حاجاني بهدوء...حضري نفسج اول مايوصل نطلع
حضرت اوراقي وذهبي...بجنطة ...واذكرت الكاميرا
بيها صور المهر...اخذتها...
مرت نص ساعة وحيدر ماكو..
دكيت عليه...مارد ..كلت لعد وصل...
هسة يوصل ...وماكو.
رجعت دكيت...هالمرة فصله...
كلت لعد لبابنا وصل...طلعت اركض للمطبخ...
بس الباب ماندك...
خفت ...دكيت طلع مقفل...
بقيت ادك...والتلفون مقفل...
صار العصر وماكو...بابا سالني
_بابا...لحد ماوصل المنطقة حجيت وياه...
هسة ادك ماكو..
بابا باوع لاحمد...كال رايح لبيت ابو فهد...
هذا جيرانة من زمان...وصديق الحجي كلش
طلع بابا...واني الوب ...ما اكدر اكعد بمكان
بقيت ادك على حيدر...كله مقفل يطلع
اذن المغرب..
رحت توضيت وصليت وبقيت ادعي ربي يسلمه
سمعت صوت بابا اجى...طلعت ركض
_جيبي غراضج واطلعي وية امج واخوج لبيت خالج
_بابا شنو...وحيدر...
_بنتي اسمعي الكلام مرة وحدة...روحي اني باقي هنا
بقيت واكفة بمكاني مااعرف شسوي
ماما صاحت...لج امشي ماظل وكت...
اخذنا جنطة جتف صغيرة الي بيها المهمات...
وماقبلوا نطلع اي ملابس ويانة شي بسيط
من دنطلع...بابا جرني وحظني
_دير بالج على نفسج وعلى امج
_بابا...شكو خوفتني
_روحي بنتي اول وتالي تعرفين
طلعت وصلت لباب المطبخ التفت على بابا...
شفت ماما انطته جيس اسود...وكالت له
_هاي كل الموجود...
باس راسها...
عفتهم وطلعت صعدت بالسيارة...
الموبايل مانزل من ايدي ...ادك وارجع لورة...
اخذنا احمد لحد ماوصلنا منطقة وسط...
لكينا خالي فراس...وياه كرار..ولد ثالث ماعرفه
نزل محمد سلم عليهم...
وكفوا حجوا شوي ...
بعدين...اجى كرار وية احمد صعد...
وخالي والولد طلعوا كدامنا...
لحد ماوصلنا بيت خالي...
طبعا امي عدها اخين واحد اكبر منها ...ابو كرار...وزينب بنته..
والثاني اصغر منها ...واخت وحدة مزوجة بالخارج...
بيت خالي الجبير وياه بيبتي ...وخالي الثاني...
مشتمل بالحديقة...
طبينا...تلكتني زينب...ومحمد
خالي ابو كرار كال لزينب اخذي نور فوك...
_خالو فهموني شنو الموضوع...
_اصعدي هسة بعدين نحجي
هذا خالي عصبي ومايتفاهم...
_زينب شنو الموضوع...
_والله ماعرف...بس اصبري خلي نشوف
_لج شصبر...اني على نار كاعدة اريد اعرف حيدر وين
بهاللحظة دك الموبايل ...بحيث فزيت
باوعت قاسم اخو حيدر
جاوبته...كال حيدر مارجع...
كتله اني هم ادك عليه مايجاوب...
كال راح اخابر خوالي وارجع اخابرج.
نزلت لمحمد دحجي وياه...
_محمد هذا اخو حيدر دك علية
_شكلتي له
_كتله دادك عليه مغلق...سمعنا خالي ابو كرار
_نور جيبي التلفون...
_ليش خالو...
_جيبي دكولج حجى بعصبية...
محمد كال...انطيه نور
انطيته..
من صعدت صحت زينب...
_انطيني تلفونج...
_نور...تعرفين ابوية...مالنا خلك مشاكل
_لج بابا...بس ادك على حيدر...
جنت حافظة رقمه ...
خلص الليل بدون اي جواب...اني كاعدة ماغمضت عيني
لو لحظة...
ساعة اصلي وادعي...وساعة افتر بالغرفة...
لحد ما طلع الصبح...سمعت صوت جوة...
باوعت من المحجر شفت احمد ومحمد مبدلين...
ديسلمون على امي وامي تبجي
نزلت على الدرج ركض...
_شكو وين رايحين...
اثنينهم باوعوا علية...
اجى محمد شبكني...دير بالج على نفسج
واحمد هم...من ديوخر احمد جلبت بيه
_احمد بابا وين...وحيدر شنو اخباره
جاوبت امي...هذا الهامج
_ان شاء الله ماكو غير الخير..
طلعوا...واني روحي طلعت وياهم ...
خالي ابو كرار راح وياهم...
_لا تخافين نور...ان شاء الله ماكو شي...حاجاني كرار
_كرار الله عليكم وين رايحين...
_لكربلاء
_ليش...حيدر بي شي
_راح يشوفون اهله...ويفهموهم الصار
_يعني شنو...واحد يفهمني...
باوع على امي...عمة لازم تعرف...
نور حيدر مخطوف..
من كال هيج...ماكدرت اظل واكفة...راسا كعدت على القنفة الي وراي...
_مخطوف...
_اي...عمي البارحة عرف ...وجمع فلوس ديسلمها لهم...
وجهج اصفر صار مو هيج...ان شاء الله يطلع بالسلامة لا تخافين
جاب كلاص مي انطاني ....شربت شوي وصعدت لغرفتي..
توضيت ومديت السجادة...
اصلي وادعي...دمعة مانزلت من عيني ماعرف ليش
ما اكلت شي نهائيا...شكد توسلت زينب ...امي
بقيت يومين هالحال...
ثالث ليلة ...فجاة حسيت اختنكت ...
ضاق الهوة بصدري...
اريد اجر نفس ماكو...
كلبي حيل وجعني...
طلعت بالسطح بالوحدة بالليل ...
اريد هوة...اتنفس بعمق...
بس احسه مايدخل بصدري...
حست زينب علية...طلعت شافتني مختنكة...
جابت مي تغسل بوجهي...
_شبيج نور...اتنفسي
جنت أشر على صدري...
_خلي اصيح كرار..
_لا احسن هسة
_شبيج...
_ماعرف فجاة حسيت اختنكت وضاق نفسي...
وكلبي كام يوجعني
_انتي صار يومين بدون اكل و٣ ليالي سهر...
_راح اموت اريد اطمن عليه...
حتى محمد واحمد من يوم الراحوا ماكو خبر عنهم
_اي اندك على ابوية يكول ماكو شي لحد.يتصل
للصبح واني على نفس الكعدة ...
ابد ما تغمض عيني...صليت افجر...
وكعدت على الجرباية...واني افكر رجعت راسي على الحايط
انتجيت...غمضت عيني لحظات...
شفت حيدر دايبوسني من كصتي...
نفس اخر مرة شفته بيها....
فزيت...نزلت جوة اريد اشرب مي...سمعت صوت بالصالة..
جانت الساعة بالستة الصبح...
فتت شفت ابوية مدنك ...امي تبجي...
وخالي ابو كرار...يحجي بعصبية...
كرار...خالي فراس...بيبتي...
عيوني فرتهم كلهم...ركضت لبابا بست ايده...
_بابا شخبار حيدر...ماجاوبني...
التفت على خالي...خالو وين احمد ومحمد...
_بابا ...راح نطلع لسوريا...
اخوتج هناك وصلوا هسة...
_بابا شلون تعوف زفتي ماتحضرها...
سكت وحسيت اكو غصة بصوته من حجى
_ماكو زفة بعد
_ليش...هم راح نأجل
حط ايده على جتفي...بابا عريسج زفوه خلاص
_ما فهمت ...شوكت ازوج حيدر...جان الذهول مأخذني
_لا بابا زفوه للجنة
ظليت صافنة على ابوية...اباوع بعيونه الصايرة حمر...
ما مستوعبة الي كاله
_بابا عفية...اذا تريد نبطل..ابطل بس لا تحجي هيج
سكت ودنك...بنتي هسة اهله استلموه...بيدي انطيته لابوه
وكفت...لا مستحيل ...كتلك ميخالف ابطل بس لاتكول هيج
امي زادت ونتها بالبجي...
باوعت عليها...
ابوية جان مثل المكسور مدنك....
_كولي ...وين حيدر...
حسيت واحد جرني من زندي...
جان خالي ابو كرار...ديكولج الولد كتلوه...
كتلوه بسببج انتي جبتيه...
جان يهز بية ويحجي...بس ماعرف شنو يحجي...
جانت بس كلمة وحدة تروح وترجع براسي
الولد كتلوه...بسببج...
بعدها ...اظلمت الدنيا....
...للتكملة بقية