#تراتيل القدر

الوعد

#تراتيل القدر
همس ليل
البارت العاشر
_واخيرا...مامصدك راخح تفض الشغلة...
_اي والله ...اني هم كلما اكول خلص...تطلع شغلة جديدة
_كله فدوة لج...اصبر بعد سنين بس تكونين من نصيبي
مثل كل مرة انقطع الحجي بينا...
بالفترة الاخيرة ...بديت احسه يضوج...
من احد.يدخل...اصلا تجي ايام مايكدر يحجي وياي حجاية
رجعت للبيت...شفت امي ضايجة...وزينب هم
_خير شكو...احد يجاوب...
_مثل كل مرة بيداء ...جاوبت زينب
_شبيها هالمرة
_غير من وراج خليتينا حجاية بلسان اليسوة ومايسوة
_ليش ماما شسويت...
دخلت بيداء ...منو اليسوة والمايسوة عمة...لو ابوبة مايكدر بس على امي
_بيداء شبيج سالتها
_مابية شي ...بس الفقير مايعيش بهالوكت...لو لساني بطولي جان الكل حسب لي حساب
_شنو قصدج
_ماقصدي شي.
عفتها ورحت لغرفتي.بس سمعتها تتلاغى وية امي
صار سنطة عرفت بابا اجى...
للعصر ابن اخوية كلب الشربت على التخم...ماما كامت تحجي عليه...
طبعا المسالة طبيعية...دائما تحجي عليهم هية مربيتهم
طلعت بيداء...عمة شدعوة قحط خوما قحط
_مو مسالة قحط...بس خلي يتعلمون الاصول...واكو مكان للاكل
_يلا عيني ...شلون تعرفون الاصول
غثتني بحجايتها...طلعت لها
_ليش شايفتنا...مانعرف الاصول...مو عيب هالحجي
_بقت انتي تعرفيني العيب
_ليش شفتيها بايكة ناهبة...حتى ماتعرف العيب...جاوبتها امي
_طبعا ادافعين لها...كلبت الاعمام ناس على ناس...لاجل صاحبها....وانتو وياه
_احترمي نفسج...زين لو اعلمج ....بس مو صوجج صوج الي انطاج مجال....انتي اصلا مو مال احترام...
طب احمد وية ماتنتلاغى...
_هاي شكو
_انجمعن علية امك واختك...سمعتها شدكول...بس ماكو احد يردها
_مو كتلج احترمي نفسج...مامسوية اني غلط ...انتي لسانج طويل
_صاح احمد...بس فهمني شبيجن
_شفهمك...ليش اكو واحد منكم يكدر عليها ...او اصلا واحد يردها...شو حجايتكم مالها قيمة...
_احمد ليش ماسكت مرتك...امي جانت تجر بية تريد تسكتني...وزينب ماموجودة...
_اي عيني احمد داتأمرك ست نور ...غير تنفذ ..
صاح بيها احمد اسكتي
_تدري شتكول مو صوجج صوج الي ساكت عليج...تقصدك انت
ظلت حجاية منها حجاية مني...
صاح احمد...انتن ليش ماتحترمن احد
_ليش احترمت عمامها ...خلتكم علج بحلك الكل
_تخسين...مو اني الي ينحجي علي...بس البقية علي تناقل حجي ومالاكية الي يشكمها....امي سدت حلكي
بس مثل مايكولون سبق السيف العذل...
تقدم احمد باتجاهي هاي عليمن...دفعت ايد امي عن حلكي
_ماتحجي وية مرتك لعد...صار ساعة تبسمر..وتذب حجي...مامخلية اعتبار لاحد...
حتى لك مامسوية حساب ولا عبالك رجلها كدامها...
بعدني مامكملة الحجاية اجاني الراشدي يهف...
اني انصدمت ..اول مرة واحد يمد ايده علية...
امي صاحت بيه...
بس هو اجى لزم شعري....اذا مامترباية اني اربيج من جديد
_اي حقك ابني....فعلا ماعرفت اربي...لو عرفت جان ماكلت لاختك هيج...جان هذا بابا
_بابا ماقصدت
اشر بيده يسكت احمد....بعدني مامتت وهيج مرتك تعير اختك...وانت صف وياها وفوكها تمد ايدك...
نسوان عقلهن صغير...المفروض ماتحشر نفسك وياهن...
عندك للصبح...تاخذ مرتك وتطلع...
عافنا وطلع...اني دخلت لغرفتي...
مدري ابجي من الضربة...
مدري من طردت ابوية لاحمد...
بعد ماطلعت من غرفتي...
من اجى محمد وزينب ...
دخل لغرفتي...شكو شصار...كمت ابجي
ابوية طرد احمد...احجي وياه خطية وين يروح
_لج شنو من كلب...مو ضاربج..
_ادري بس دست ابطنه من ورة مرته العوبة
_تعرفين الحجي...اذا كال شي خلص
كعدت الصبح...الكل كئيب...وامي اطخيها تبجي
صبحت وردت اطلع ...
_تعاي تريكي بابا...لا طلعين هيج
_ظل دلل بيها
_اسكتي مالج شغل هناء
_رجعت اكلت شي خفيف بس الدمعة بعيني وبست راس بابا
_لا تهتمين بابا مادام خشمي يشتم هوى
_يطيك ربي طولت العمر
طلعت ...الطريق كله اباوع من الشباك
_ها ام دميعة....
ماجاوبت محمد
_لج امي مقهورة على احمد...وهية تعرفين اسلوبها...
سكتت هم ماجاوبت...اعرف اسلوبها...بس هم اعرف هية تميز الولد لان ماعدها بس اثنين...
وصلت للدائرة....سلمت وظليت اشتغل
شفت حيدر اكثر من مرة التفت علية ...
جان بعينه سؤال...
اخر شي بقينا وحدنا...
_شبيج
_ماكو شي...
_شلون ماكو شي...وجهج مبين عليه...
سكتت...دنكت ودموعي نزلن يسابقن
جر الكرسي...وكعد من جانب الميز
_ليش هالدموع...صار شي علمود باجر...
هزيت راسي لا
_احجيلي شصاير...
هم ماجاوبت ..ماريد ياخذ فكرة عن اخوية خطا
_مشكلة بالبيت....
_كلشي وله حل....وماكو شي يسوة تبجين...
_اني هاي مشكلتي....بسهولة تنزل دموعي...
_واني ماحب اشوف دمعة من عينج تنزل....ولو عيونج تصير تخبل...
ضحكت...اول مرة اعرف وحدة عيونها تصير حلوة من تبجي
_باعي علي...ارفعي راسج شبيج..
رفعت راسي اباوع عليه
_شايفة لون السما شلون يصير صافي ويلمع بعد ماتمطر...
لون عينج هيج يصير من تبجين...شوفي هسة
تلمع وتصير تخبل...
ابوج عينه صفرة...لون عينج على منو ...امج
هزيت راسي لا
_على منو لعد...حتى اخوتج اثنينهم لون اصفر على ابوج
_بيببتي ام بابا لون عينها ازرك...بس اني من اخواني واخواتي...لون عيني عليها
_هية اقارب جدج
_لا من بغداد اصلا...علمودها جدي عاف اهله ومحافظته ...واجى لبغداد
_اذا هيج جمال حقه....بس هم لسانها طويل
_منو لسانها طويل علية...اصلا افقر مني ماكو
ضحك...بس اني اموت على الفقيرة...
سكتت ودنكت انحرج من يتحول للغزل...
_اكوم ارجع لمكاني احسن...بلكت باجر تفض...ويرحمون بحالي
رجعت امي مثل الزعلانة مني...
عرفت من زينب بيداء لامة ملابسها ورايحة لاهلها...
وعمي ابو صهيب جاي يستفهم من بابا...
نقهرت حيل....ما اريد يصير شي بين اهلي من وراي...
سمعت صوت ماما تحجي وية احمد...
طلعت شفته صعد لغرفته...
_عجبج...راح يلم ملابسه ويلحك مرته
ما جاوبت ماما...رجعت لغرفتي...
شوي وطلعت ...صعدت لغرفة احمد ...دكيت الباب ودخلت
شفته يجمع ملابس له بجنطة
ظليت واكفة ماعرف شسوي...احمد اكبر مني ب١٢ سنة..
صح قليل كلام بس كلبه طيب...
رفع راسه باوعلي...
_سويتها صدك...
_تعرفين الحجي من يكول شي
_احجي وياه...بابا تعرفه حجاية طيبة ترضيه
_خليه يرتاح...وارجع احجي وياه...
تمشيت ليمه...هو وكف ...شبكته...
_اعتذر منك احمد...ماقصدت اجرحك او اقلل من احترامك...اعذرني خيي...
اني ماعندي غيركم...طبعا هاي دموع وياها تصب
_شبكني وباس راسي...
احمد اطول مني واني مثل بنية صغيرة وشابكة ابوها
_لا خيتي انتي هم اعذريني ماكان المفروض امد يدي علبج
ابوية عنده حق...نسوان مشاكلجن ماتنتهي
_زين ماتحضر باجر
_لا شلون ترضيها ماحظر مشيتج
نزلت...
التهينا اني وزينب انظف...وثاني يوم امي هية وزبنب تسوي غدة وتدردم....جان ماعاجبها الوضع
اجى خوالي اثنين...وعمي ابو صهيب واخواني هم
سمعت خالي الجبير..يحجي وية ابوية...يكله وضع منطقتكم مايطمن
بعد الساعة ٣ اجت سيارات وكان من ضمن الجايين ...
ام حيدر واخته ام كرارو خالته..
اني لبست فستان طويل مكسم على الجسم ماروني ردن...وحجاب منقش اسود وماىوني...
مكياج خفيف ...
امي صاحتني اسلم عليهم...
ام كرار...اللهم صلي على النبي...حقه اخوية...من كعدت يمي حجت هيج...شنو هالجمال
خالته كالت ليش لابسة حجاب ماكو احد بس نسوان...
عرفت قصدها تريد تشوف شعري...نزعته للحجاب
قدمنا للزلم جاي...وكهوة...بانتظار يقرون الفاتحة
شو ماكو حس...ظل كلبي يلعب...رحت للمطبخ
_زينب شو ماكو حس لهم بس صوت عالي
_دايتفقون يجوز على التفاصيل
_ماعرف شو خايفة ...خاف يصير شي
_كولي يا الله
شوي وطلعوا الزلم ....والنسوان هم...
خالي الجبير ابو كرار...من طلع من الصالة وشافني
_خالوا خوب ابن خالج اولى ....
استحيت ماجاوبته...
راح الخطار هم...واني بغرفتي الوب...انتظر زينب تجي تكولي شصار...
بس بابا دز علية...
_بابا...اني مامعترض على الولد...بس ما اريد ترحين لهناك...لذلك جان شرطي يجي يأجر ابغداد...ماعدا هاي النقطة باقي الامور الناس ما اعترضوا عليها
استحيت اسال..اذا اعترضوا على مسالة جيته لبغداد...
سكتت...هو هم مازاد عن هالحجي
انتظرت زينب تستفهم من محمد
_محمد يكول الناس كالو شتريدون جاهزين...بس ابوه اعترض من كال عمي لازم يجي يأجر ابغداد...
وطلعوا بدون اتفاق...
سكتت ماجاوبت ...
بس طلعت زينب....ماعرف شسوي...
يعني معقولة كل ماتوصل للنهاية ونكول خلصت ...
نرجع لنقطة البداية....
شلون بية
جنت فرحان خلاص بس اليوم وتصير من نصيبي...
شوكت يجي العصر ونطلع لبغداد...
من وصلنا واستقبلونا ....جانت طلباتهم معقولة وما بالغ ابوها...
بس الصدمة جانت من طلب أجر ابغداد...اباوعت لوالدي...
هو هم باوع علية...نظرته تكلي مو كتلك بوية...
تفشلنا كدام عمامي وخوالي....
وحتى يصحح موقفنا عمي الجبير...كال مادال ماكو اعتراض على الولد....والامور الاخرى ...
هاي اتفاق بينكم يصير....
طلعنا واني اعرف والدي مستحيل يقبل اجي لبغداد...
وفعلا بس وصلنا....وراحوا اقاربنا...
_هابوية ...شكتلك...مايخلوها تجي لهنا
سكتت ماكدرت ارد عليه...بس نقهرت منها...
اني سألتها ...تجين لكربلا ...ماكالت لا...ليش حرجتني كدتم اهلي وعمامي...
خلص سويت الي علي...
داومت واني ماعرف شلون راح اواجه ....
شلون راح اعرف شنو قراره...
اعرف كل زين اهله مايريدونه يجي لبغداد...
وهو هم رافض هالفكرة...
امشي وية كل خطوة تقربني من القسم ...
تزيد من ضربات كلبي...
من دخلت وسلمت...رد السلام بس مارفع راسه...
عرفته زعلان....
بقيت الوب...اريد الغرفة تفرغ حتى اكدر احاجيه
بقى بس باسم...
كمت من مكاني لميز حيدر...مديت ايدي باوراق
الشغل...
_هذا خلص الشغل الي عندي...اكو بعد شي
اخذ الاوراق من ايدي بدون مايباوع علية...
_لا ماكو....تكدرين ست ترجعين لقسمج....
تفاجأت عمره ماكال لي ست غير مرة وحدة....
وهالمرة رك عليها ...كأنما ديكول رجعنا للرسميات بينا...
والنوب يريد ارجع اطلع من القسم...
ارتبكت...وحسيت عبالك واحد ضربني على راسي
_مافهمت...ليش رجعتني لهنا ...ليش هسة تريد ارجع للقسم
_ماعرفنا قرارج...رجعناج لهنا كلبتي الدنيا...هسة نكولج روحي لقسمج...ماعاجبج....شتريدين بالضبط...
حجى بعصبية ورفع صوته....حرجني كدام باسم...
ماكدرت ارجع اجاوبه....بس احجي اي كلمة ابجي...
رجعت لميزي...حاولت اجمع اوراقي ...وايدي ترجف
باسم حس اكو توتر...عافنا وطلع....
_للعلم ...استاذ ماعرف بطلب بابا...اني هم تفاجأت
_بس اني سألتج...وانطيتج وقت تفكرين...
المفروض تكولين لاهلج...وما تحرجيني كدام اهلي
...عموما اني ماقصرت وفيت بالوعد من جانبي
_صح....عداك العيب....احسبها علينا...
لميت اغراضي واخذت جنطي وطلعت...
مانزلت دمعة....بس احس فد شي كابت على نفسي...
ماعرف شلون خلص الدوام علية...
وصلت للبيت تعبانة حيل من كبت المشاعر...
دخلت لغرفتي...وبدون ما ابدل نمت على الجرباية
هالاسبوع تعبني كله احداث ...
الدموع الي جنت حابستهن طول اليوم نزلن...
ليش هيج سوة...بسرعة تخلى عني
وين حبه لعد...حتى ما انتظر ابررله الصار...
كلبي جان يوجعني ...
دخلت زينب...تعاي تغدي
_ما اريد ...اريد انام
_نور شبيج حبي...صاير شي...ليش تبجين
_زينب عفية عوفيني...وماريد احد يدخل الغرفة..
_براحتج
طلعت...نزعت السترة...وجريت الغطى علية...
اريد انام ...ماريد افكر
كعدت على صوت بابا
_شبيج بابا...صار شكد نايمة...
عدلت نفسي...بيش الساعة ليش
_بالثمانية....ليش نايمة بملابسج...
_تعبانة...
_كومي نتعشى سوة
هزيت راسي ...طلع...اجيت اكوم من الفراش ..
حسيت ألم بصدري من جهة كلبي...
بدلت وطلعت يمهم...
_اليوم شكو...من جيتي لسة نايمة...ماما حجت
_تعبانة
_ليش طالعة عمالة...هو مكتب
_عوفي البنية بحالها
زينب صبت عشى...جنت مامشتهية اكل...
هستوهم بدوا اكل...وامي كلبتها مناحة على احمد وجهاله
بابا تعصب...هسة يمج تشتكي من مرته وتونين
_هججت الولد...وين هسة هو جهاله
_مو صغير..عاف الاكل وكام
اني ماكدرت احجي شي..
بس لحكت بابا للصالة...
_بابا لا تضوج...حقها ابنها...وتخاف عليه
_ليش يابة مو ابني هم....بس اليوم تجاوز عليج ....لاجل مرته...باجر يجاوز على امه...
اني اعرفها بنت اخوي ....ماترتاح اذا ماتسوي مشاكل
_زين بابا افصله من البيت خلي يعزل...
سكت...هو هم هيج مفكر حلا للمشاكل
ترخصت منه ورحت لغرفتي...
الليل كله مانمت...هواي افكار تجيني...
وية الفجر نمت...كعدت على المنبه...
ردت اكوم من فراشي...ماكدرت...حسيت جسمي كله مكسر
ومن وكفت اجتني دوخة...عرفت هبط ضغطي ..
كلشي ما ماكلة البارحة...واصلا اني عندي هبوط مزمن
....
كضيت ٣ ايام بالفراش...محمد خابر ابو امجد سوولي اجازة لنهاية الاسبوع...
اكلي جان كلش قليل..بس لخاطر بابا...لان جان يلح علية
من يجي الليل ...تبدي تجيني الافكار...
ما انام الا الفجر...ثاني يوم اخلصه نوم...
صدري جان يضيق وكلبي يوجعني...
زينب ظلت تحجي علية
_صدك تحجين....عود اني جنت اكول عليج سبعة٠
تالي من اول مرة توكعين هيج....
_زينب...راسا استغنى ...اسلوبه جان محلو ابد
_ميخالف ...انجرحت كرامته....
_جان انتظر افسر الصار
_نور ...الي يشتريج اشتري...لا تخلين احد.يشمت بيج
باعي عيونج تعبت وشوفي شلون صار ازرك جواهن...باعي لنفسج شلون ضعفتي ب٣ ايام..
ساعدي نفسج وكومي حتى تكدرين اداومين...ولا تنطين مجال احد يكسرج...
مو هاي نصائحج من جنت اتمرض من ورة اسلوب محمد لو لا..لو جان حجي لسان
فكرت بكلامها...صح مو بيدي...بس حاولت اتماسك واكوم...ماريد احد يكسرني...
بابا دز على احمد...وكاله شوف مشتمل صغير واشتريه...واني اساعدك...بس اعتبره نصيبك من البيت...
امي لحت عليه ياخذ بنفس شارعنا...
وذاك الوكت البيوت نازلة....جيرانة راد يروح بغير منطقة...فبدل مشتمل بيته ...بمشتمل لبابا بغير منطقة...
وانطاه لاحمد....
صار اسبوع مامداومة...اليوم راح اداوم...واني
بداخلي اكول همزين بغير قسم حتى ما اشوف
من بدلت اباوع على نفسي بالمراية...
وجهي حيل تعبان...واصفر ...تلمست جوة عيني...
هالات صايرة...حاولت اغطيهن بالاساس...
حتى ملابسي شوي عرضت علية....
بدلت اكثر من مرة...ماريد احد ينتبه
بعدين ضحكت على نفسي...يعني منو راح ينتبه هيج
بس اني احس كل الناس تعرف من راح تباوع علي...
هزيت ايدي وطلعت...
اول ماصلت للدائرة...ومن داريد اصعد للقسم ....هو طلع من الغرفة وصار مقابيلي...
حسيت كلبي دك بوجع ....
وللحكاية بقية....