#تراتيل القدر

قرار

#تراتيل القدر
همس ليل
البارت الثامن
كاعدين بالخطوبة ...شفت ابن عمي شلون فرحان ...
جان يريد ويحب اقاربه...واعرف بيه..
وهسة خطبها وهية راح تكون من نصيبه...
راح يعقد سيد...وبعدها صارت الهلاهل والتبريكات
ويهوسون له...
جو الفرح يعيشك بغير عالم....ينعش مشاعرك
من رجعنا ...واهلنا يسولفون بالخطوبة...
ام كرار رضيعتي...يوم لك خيي حيدروري
امي...يوم المنى...شوكت يومة ماتفضها...
حيدر...الله كريم...كلشي بوكته حلو...
ام كرار...والله خيي اجن بنات للخطوبة يخبلن...بس
كول من باجر نختارلك احسن وحدة بيهن..
امي....اي والله اني عيني تستنكي منهن ...كل ماكول هاي
اردن لا هاي ماتلوك لحيدر ....استنكي غيرها
ضحكتني بحجايتها ...كمت بست راسها...
يمة لا تشيلين هم...هسة مو وكتها ...
عفتهم ورحت لغرفتي....واني افكر
هذا حجيكم لو ماشايفها جان بيها مجال اقبل ....
بس هسة ما احس وحدة تملي عيني....
بدلت وتمددت على جربايتي...اسوت اليوم...
وية منو حجت...شلابسة....
غمضت عيني...واذكرت من جانت نايمة...
صح ضغطت بكلامي وياها...بس لمصلحتها
هو يوم هلكد اشتاقيت لج....يابخت الي نام حبيبه بحظنه
اندك الباب...جاوبت فوت
اخوية قاسم اصغر مني تخرج قبل السقوط بسنة وكاعد هسة بدون تعين...
_حيدر ابوية يريدك
_صار جاي هسة
رحتله...الله يساعدك يابة
_هلا بوليدي...اكعد دحاجيك
_أمرني حجي
_الله يسمع منك ويكتبها لي....بوية جا ماناوي تفرحنة وتزوج
سكتت وماحاسب حساب لهشي
_هابوية....اكولن لامك تختارك...لو ابالك بنية من جماعتنا
_لا بوية مو وكتها....خلي نشوف تاليها شلون
_تالي شنو وليدي...هية بجالك جم شهر وترجع اداوم هنا....كبرت ...وتعديت الثلاثين...شناطر بوية
_يابة صراحة...اني ماريد اغثك...وازعلك مني
بس
_ بس شنهي بوية كول
_اني اريد بنية وياي عاجبتني ...خوش بنية .
شفت ابوية سكت...وتغير لونه
_بوية بنت بغداد شيجيبها لهنا...وجمالة موظفة
_بوية تجي...شبيها هنا...شو كربلا احسن من بغداد...والناس كامت تنهزم من بغداد لهنا
_تعرف رايي بهالموضوع ...تريد تزوج تختارلك وحدة من القرية...
كام وعافني...جريت نفس...شلون تاليها...
رجعت لفراشي واني افكر...لا اكدر انساها...ولاهية تصير من نصيبي
ليش هيج مها سويتي...حاجيت مها من رجعت للغرفة
_شنو حبي..
_موكلتي شوية واكعدج شلون تعوفين الغرفة
_ماطلعت ربع ساعة...وبعدين ماكو احد ممكن يجي..
بس اني وياج باقين بلقسم...
سكتت ما اريد اكولها حيدر اجى وشافني...
برجعتنا للبيت ...
_شو صافنة...محمد حاجاني
_ماكو شي بس تعب بالدائرة...هواي اخذوا اجايز
_الناس هجت للمحافظات...والي طلع بالخارج من الوضع
ابغداد...وبالعراق كله
_صح...الله يفرجها
_البارحة احمد.يحجي وية الحجي...يريد منه نطلع
_يا...وشكال بابا...
_تعرفي لو يموت مايطلع من بيته...لو من العراق
_اسم الله عليه...واحمد مين اجته هالفكرة...شو شكد رادت منه وسن يجي يمها مقبل
وسن اختي الجبيرة عايشة برة من صار السقوط
_هسة اختلف الوضع..ومرته تريد تلحك اخوتها
_ليش منو طلع من ولد عمي
_لج شكد مطفية...عمر طلع قبل فترة قصيرة...وسهيب هم...وعامر
_ليش طلعوا...شكو يمهم
_شنو شكو عمر ضابط...وسهيب مدير ...وعامردكتور...وذولة كلهم مستهدفين هسة
سكتت واني افكر بحال العراق ليوين وصل...
من رجعت لكيت ماما ضايجة ...غسلت وبدلت
وماشتهيت اتغدة ...نمت ...جنت نعسانة...
هسة بفراشج ...نامي مثل الاودام...نايمة بالدائرة واجتتج حجاية لنفسج...جنت احجي وية نفسي
عاد هو مايصدك ...بس يرزل...نفسي فديوم اوكف اكوله
انتة شعليك...
شكو حاشر نفسك بكلشي...
هو اني تخبلت ..كمت اسولف وية نفسي...
كعدت العصر...سويت شي خفيف وطلعت بالحديقة...
حديقتنا جبيرة...وبابا معتني بيها حيل ...يحب النباتات والزرع...
خالين بيها مرجوحة...وميز وكراسي...
خليت الاكل على الميز...وكعدت اكل ...شوي واجت نبع الحنان...
_غداج بخمسة العصر...
_اي شوفي الجو حلو...جان شهر الثالث...والجو طيب
_شفتي مرت اخوج...
_شبيها ..ياستار
_ادك على اخوج يطلعون برة
_خليهم يطلعون ....شتريدين منهم...لو الا كدامج تشوفينه
_مو صوجج ...صوجي احجي وية الجهال
خرب منو الجهال...ضحكت وهية عافتني ودخلت جوة
ثاني يوم كان خميس ...مالكيت حيدر...وانتظرت ما اجى
باسم هم جان مجاز...اليوم فريقي كله ماكو بس اني جاية
_حيدر عدهم خطوبة...
حجاية مها فززتني...وظليت صافنة بوجهها...
كلبي وجعني حيل...معقولة خطب هو...
ماجنت اكدر اسالها اكثر...
شراح يصبرني لحد متخلص الجمعة...
الساعة صارت شطولها...اخر شي ماكدرت اصبر
_مها كلتي حيدر عنده خطوبة...هو يخطب
_لا ابن عمه....ليش سؤالج...
_هيج بس هو مو صغير شعجب باقي لسة
_ماعرف ...يجوز يريد وحدة يمهم وينتظرها
النوب شعلتني نار....هية شمدريها ...شعجب
يكعد يحجيلها....
ويجوز صدك يريد وحدة يمهم...
فكرة تجيبني وفكرة توديني...يومين...هسة
مو كلت معلي بيه....بس حجي لسان...كلبي له غير قرار
داومت ...بيومها تكشخت ...خليت الاينر ازرك وكحل...ولبست بنطرون نيلي قماش...وفوكه قميص ابيض
وحجاب نيلي مخطط بابيض..وحذاء عالي...
باوعت على نفسي ...عبالك اريد اعيد ثقتي بنفسي...
تعطرت وطلعت...
_اليوم شنو هالكشخة...زينب سالت
_يوميا مو كشخة
_طبعا لا..بس اليوم اللاينر...ولبس شبه رسمي..
وطالعة غير شي...خاصة بالفترة الاخيرة مالج واهس بشي
_اريد ارجع لامجادي...ضحكت وطلعت
الجمعة ماخلصت ...امي تنك علية خلي اخطبلك ...
والحجي مافتح الموضوع...بس حسيته ضايج كلش
اليوم اداوم...اريد اشوفها....
وصلت قبل الكل...بدوا يجون...وهية ماكو ..تاخرت...
مدري اني من كد ما مشتاق لها احس هيج...
شوية وسمعت صوتها سلم واني احجي وية باسم...
التفت...فتحت عيني....بوية شطالعة اليوم
خرب بعمي...شلابسة ....نزلت عيني...ودرت وجهي
شعلتني شعل...
شفت باسم ضاج...رغم هو ازوج بس احسه بعده عينه منها...
صح ابد ميجاوز وياها ...بس نظراته تنقري بسهولة...
عفت الغرفة وطلعت...
ابتعد اشتاق لها....اقترب واشوفها...نار وتشب بصدري
هسة لو تصير من نصيبي هم اخليها تطلع هيج..
_استاذ باسم...استاذ حيدر وين راح...هذا الشغل العندي خلص...اريد انطي له...واشوف شعنده بعد شغل
_جيبي خلي اشوفه...واني انطيه
_تفضل ...بس مو يكول بعدين ليش ما نطيتيه لي
_ههههه...لا اني اكوله...بس ست اليوم شطالعة
_ها ..استاذ باسم...رجاء ...اخ عزيز انتة...ماحب تزعل مني...لذلك راح اعتبره مدح مو غير شي...
عفته ورجعت لمكاني...خرب بحظي ..لعاد ذاك شبيه...
من رجع حيدر...باسم حاجاه....
_هذا الشغل خلصته ست نور...
اخذه منه بدون مايكول شي...
بس باسم جفص بيها...
_شفتي ست نور ...ماكال شي لا تعصب ولا اي شي
ما جاوب حيدر...بس باوع نظرة كافية عن الكلام..
لباقي الوقت ...بقينا نشتغل وماحاول ابد يحجي وياي..
اني هم تجنبته...لان حسيته عصبي...
بقينا كم يوم هذا حالنا....الكلام معدوم بينا ..بس السلام
وهم جانت ايام ازدحام ...ومافرغت الغرفة...
يوم طكت روحي...شنو هالعذاب...بحيث احس نفسي واكفة على الحافة ...شوي وانهار
_استاذ ...بعد اكو شغل عندك اكمله..لو ارجع لقسمي
رفع راسه باوع علي...
_هيج مستعجلة تريدين تخلصين منة
ظليت اباوع عليه....بشنو اجاوب...ماعرف
_ليش هيج تسوي...ترة ما بدر مني شي غلط بحقك
ونقلت نفسي...حتة ترتاح...مو ذنبي رجعوني
تنهد بقوة...
وصلت مرحلة بعد ما اتحمل...حاولت ما احجي وياها لحد
ماضمن موافقة اهلي....
بس ماسالت نفسي هية شنو رايها...
_نور...
تفاجات اول مرة يكول اسمي...رفعت عيني له
_لا تفتحين عينج هيج...اتيه الحجي
تبسمت ودنكت اول مرة اشوفه مرتبك
_اني مرة كتلج مشاعري...وبوقتها تراجعت...لان كتلج اكو ظروف عندي...
وهسة اريد اسالج .....اعرف وضعج هنا شنو..
بس مستعدة تعوفين بغداد وترحين لكربلاء..بس اصلا
احنة مو بالمركز..وقرية مو مدينة.
اني كلبي الف بدكاته....وثوليت ماعرف شنو اجاوب...
_مافهمت..شنو قصدك
باوع علية ...وتبسم...
_يعني لو تقدمت لج...شنو رايج..
ارتبكت...ومادري شلون اوصف احساسي...
فرحة ..على عدم تصديق...هواي مشاعر مخربطة
_لا تجاوبين...اليوم اربعاء...خليها لسبت....حتى هم ارتب اموري وية اهلي...
رجعت لاهلي واني ناوي احجي وياهم ...
لازم الكه حل...ماتوقعت احبها هالدرجة..
كعدت اتفاهم وية والدي رفض...
رحت زرت الامامين...ومن فتت للعباس سلام الله عليه
نخيته بكلبي يسهل لي امري بجاهه عند الله..
اذا جان بيها صالح لي ...ويخليها من نصيبي...
جنت كاعد مهموم برة وصافن على الزرع...
شلون لو موافق الوالد...
نحطت ايد على جتفي التفت شفتها واكف وراي...
كمت من مكاني
_بوية اني اريد صالحكم...بنت بغداد متتحمل...وضعنا..هذا عمر....مو يوم ويومين...لا ياخذك العشك ...فكر زين بوية
باجر عكبة يصير عندك بزر...وتحس بمعزة الضنى
واذا بقيت على قرارك ...اخطبها لك
بس هية من ياعمام
من كتله
_جابوية راح يقبلون ينطوها لك
_ليش لا..
_هسة الوضع اختلف...مو كل الناس تقبل تنطي لطائفة ثاني...يلا بوية فكر مثل ما كتلك ورد خبر
ماخطرت على بالي مسألة اختلاف المذهب...لان ماجانت يوم حاجز عد العراقيين...
ظل كلام الوالد يدور ابالي
وللحكاية بقية