#تراتيل القدر

حلم يتحقق

#تراتيل القدر
همس ليل
البارت الثاني عشر
مر شهر ونص على موافقة بابا....
بس طلع رفض والده....
رجع الخوف سيطر علينا...
خوف مو بس من رفض والده...
خوف هم من الشماتة....
كلما ماما تسألني اكول لها بس ديرتب وضعه
بعد اسبوعين كدر يقنع ابوه...
بس بابا كاله أجر يلا تجي تخطب...
جان حجته الوضع موزين ...
فحتى بعد الخطبة ...بس نكمل تجهيز البيت راسا نزوج
وهم صعبت المسألة....
كربلا صعدت ايجاراتها...العالم كامت تهج من بغداد
للمحافظات....
بغداد صارت جحيم على اهلها....
كتل على الهوية ...تهجير...تفجيرات
مناطقنا بستة العصر تحسها مهجورة...
بس الجياس النايلون...والاوراق تهف بالشارع...
جان شهر الواحد ٢٠٠٧...شتى...يعني بالخمسة ونص تظلم...
بغداد صارت قاسية على اهلها...
شهر يلا كدر يحصل مشتمل صغير...
كتله مو مهم...المهم سوة
حيدر شبه خلص شغله هنا...
كام يجي مرتين بالاسبوع...وهو هم حاول يستفاد من الوكت...حتى يحصلنا ايجار...
جنة نتواصل بالتلفونات ...
الدائرة بابا كام مايخليني اداوم يوميا...يخاف
رتبت دوامي وية جية حيدر...
والايام الي مايكون بيها موجود...
تفقد معناها....
من راد حيدر يتقدم بابا حار
كال ماكدر اخلي يجي هنا...
الوضع موزين...ومن راح يجي وية اهله
راح ينعرفون غربة من لبسهم...
اخر شي كاله انتو خطبتم رسمي...
تعالوا كعدة مهر ابيت خالي...
طبعا جانت المسالة صعبة على بابا..
بس مايكدر يعرض الناس للخطر...
عمامي ماحضروا الكعدة...
عمي الجبير بقى زعلان...وعمي ابو صهيب من باب
منطقة خوالي مايكدر يدخلها..بس كانت حجة
حضر الكعدة خوالي وابوية واخوتي
هذا كله اذكرته واني البس سيت النوم الابيض...
لعقد السيد....بيبتي ومرت خالي كالت عدنا هيج العقد
البست...ومن دخلت تلكني اخوات حيدر بالجكليت...
اني جنت بالصالون...ماعرف ترتيبات زينب وامها...
بس تفاجات ...بميز مهر...كلش حلو مسوي...
بي صينية بياضات وورد...وليلو...كعدوني خلف باب الصالة ...
واخته ام كرار غطتني بجادر ابيض...وخلو رجلي بمي وبين اصابعي حبات هيل...
هاي كل عروس تسويها بكعدة المهر...اهالينا ماعدهم هالتقليد...
شغلات بسيطة...بس جانت بالنسبة لي منتهى السعادة
بعد ذاك الصبر....
بعد ماعقدنا سيد...اخذوني اغير ملابسي ...
كانت بدلة لون ازرك...هو طلب هالشي...
وتسريحتي بسيطة...كالو راح يدخل العريس يلبس الذهب...
حسيت كلبي راح يوكف من سرعة دكاته...
صحت زينب تغطي اكتافي بشال جان وية البدلة...
دخل واني اباوع عليه مامصدكة...
هو من الباب عينه مانزلت عن عيوني...
جانت عيونه تلمع من الفرح...
ماطول يمي..بس لبسني الحلقة والذهب...
لان لازم يرجعون وراهم طريق...
جان الكل فرحان ويركص...
واني كلبي يركص وياهم...
دنك شاورني اخابرج بالليل...
طلعوا ...بعدهم استمرت حفلتنا...
بنات خالي وصديقاتي...
ما اذكر ركصت بحياتي مثل ذاك اليوم
بتنا بيومها ابيت خالي ...لان صارت الليل ....
مانكدر نرجع...ظلوا بنات خالي يشاقون وياي...
اريد اخلص منهم حتى اخابره...
اخر شي هو دك علية...
_مو كتلك طمني من توصلون...
_ليش ماخابرتي من شفتيني تأخرت..
_مانطوني مجال البنات...
_ليش مارجعتوا لبيتكم...
_لا صعبة بالليل
_خامة بقيتي بالبدلة ...
_هههههه...ليش غير حفلة
_اي بس خاف واحد يشوفج بيها
_لا تخاف محد دخل ...
ليش طلعتوا بسرعة...
_علمود الطريق تعرفين وضعه...وثانيا ما اضمن نفسي
_ليش شكو...
_خرب بعمي...تكول ليش...مين جايبة هالبدلة
_شبيها ماحلوة...مو انت ردت هاللون
_تكول ماحلوة...وج حركتيني حرك...لو باقي شوي جان مامسؤول على يصير
_شبيك حيدر..
_روحي حبابة...شكد فطيرة...
رجعنا ثاني يوم لبيتنا....
يوم الداومت والكل درت بالخطوبة...كلهم تفأجوا...
واولهم مها...
_اشو من باب جنتي تشتكين منه...هسة نخطبتي له
_مابعد العداوة الا المحبة...بعد نصيب...
_شعجب عفتي كل الي اجوج...وقبلتي ترحين محافظات
_شبيها حبي المحافظات ...جاين من غير كوكب ...
_لا...بس وضعهم ...وعاداتهم غير عن بغداد
_عادي واحد يتعلم
_يلا بالعافية عليج...
_يوم لج يارب....
غير الاستغراب من احنة من طائفتين...وبهالوكت المشتغلة بيه الطائفية قبلنا...
نسوا العراق طول عمره...عوائله مختلطة المذاهب...
نسوا...الدين واحد واختلاف المعتقد مو شي اساسي
طبعا حيدر قبل اسبوع من الخطبة خلص شغله ابغداد...
بس بقى يجي يوم واحد...يحاول يرتب النهائيات حتى بعد الزواج...يداوم بكربلاء
واليوم الي يجي بيه...مانلحك نكعد سوة...دائما مشغول....
لو اكو احد يمه
_هسة جنة مامخطوبين مانكدر نحجي حجايتين سوة
نخطبنا ماكدر اشوفج ربع ساعة وحدنا...ابوج
ضارب طوق حولج
طبعا بابا جان مايقبل حيدر يجي للبيت
_حبيبي غير يخاف عليك
_شكلتي...سمعيني مرة ثانية ...
ضحكت...فعلا زلت لسان ...جنت حيل استحي اسمعه هيج كلمات
_عيديها بربج...على الاقل تصبرني...
_على شنو تصبرك...احسب نفسك بعدنا ما نخطبنا
_خرب بعمي...عاقد سيد وراح اعقد محكمة واحسب نفسي ما خاطب ...مو حرام عليج
_طبعا والله خطية عمك...تسب بيه اربع وعشرين ساعة
_منو كال اقصد عمي اخو ابوية
صفنت بوجه ...منو تقصد لعد
_صدقة للعد ...اكو عم ثاني اقرب
طنكرت راسا من افتهمت الحجاية...
_لا حيدر رجاء...مو يربونه حتى يحصلون مسبة
_لج مسبتيش هو شقة...
كمت اريد اطلع...جلب بيدي...
_عفية مزاج...بيه اربع فصول بنفس اللحظة...
بلحظة اضحكين وبنفس اللحظة تتعصبين وساعة تبجين
_اريد اصعد عندي شغل...
بس اني جنت كلش مرتبكة من لزمت ايده...
هو جان يعصر بيدي...شوي وكام يفرك بيها ناعم
_حيدر...لا يدخل احد...بس صوتي جان ناصي...
وباين عليه الارتباك
_اشتعلوا اهلي...شوكت تفرج علية
سحبت ايدي واني اضحك عليه وطلعت....
الاسبوع الثاني من الخطوبة ...حيدر ما اجى للدائرة...
اكتفى يخابرني بالليل...وخلال هاي الفترة حجالي عن كل مامر بيه من يوم الشافني
_معقولة تذكر اول مرة شفتنجي شجنت لابسة
_اي ...ابد ما انسى ذيج لللحظة
_زين حيدر ...تكول ماتتحمل ماتشوفني يومين
ليش هسة صار اكثر من اسبوع مانزلت لبغداد
_عمري انتي حياتي...قبل يدوب اشوفج واراقبج...
هسة يوميا اسمع صوتج واحجي وياج..
والاهم...اريد اخلص المشتمل ونزوج...
_بس واحد هم يشتاق يشوف مو بس يسمع الصوت
_اي اشتاقلج وبدون فائدة...
خلينا نفضها ونزوج...
_ليش شنو الفائدة...فهمني
_فطيرة...من نزوج افهمج
_وعد منك
_ماكو داعي للوعد ...اول وتالي تفهمين
طخت عندي...راسا غيرت الموضوع
_هابدالة...غيرتي الموضوع ...صبر مابقى شي
....
صادف عقد المحكمة يوم خميس...
حضر حيدر واخوه
واني وبابا وماما رحنا...
من خلصنا عقد حيدر عزم اهلي ...
بابا اعتذر منه...كاله خلصوا اموركم...
وان شاء الله الوضع يتحسن ونزوركم...
حسيت حيدر ضاج...لان طلع من المحكمة كبل لكربلاء
بالليل خابر بابا...
اترخص منه ...نجي لكربلا اهم اشوف المشتمل وهم اشتري النواقص...
وافق بس كاله لا تجي انتة...خالها الصغير يجيبهم
بس الي اخذنا ابن خالي كرار...
من وصلنا الكراج...اني وامي وزينب...
حيدر رحب بكرار...وجلب بيه....
بس كرار تشكر منه...والتفت علينا...
_من تكملون خابروني اجيكم...
اخذنا للمشتمل...وبيه تلكتنا ام كرار اخته
جان المشتمل عبارة عن مطبخ صغير وغرفة نوم صغيرة...وصالة
امي ماعجبها...كالت
_غرفة النوم صغيرة وين اكو اخشاب تكفيها
جاوبتها ام كرار...
_خالة ...حطاطة يخلون...نجار صاحبنا يسويها خلال اسبوعين...وهم اثنين...كافي عليهم
اني جنت فرحانة بالمشتمل...وشفته مشتري طباخ وثلاجة
وغسالة...
بس حسيت حيدر ضايج...كلت بس لا زعل من حجي امي..
_نور ارتاحوا وتريكو وخلي نطلع ناخذ تخم وتختارين الغرفة
_اني ماريد ريوك...خل نطلع..
_روحوا انتو ...اكيد ام احمد تعبت من الطريق..وزينب هم
جانت ام كرار تحجي
امي مثل ماعجبها الحجي...ماتعرف خاف تختار
زينب جاوبتها...منو نور هو اكو ذوق يعلى على ذوقها..
من ردنا نطلع...
_وين رايحة هيج...اشر على ملابسي
_لابسة جبة
_لا حبيبتي...اخذي عباية امج اذا ماعندج...
_رحت اخذت عباية زينب...
جنت امشي واجبح بيها...هو باوع علية وضحك
_ادري مالابسة عباية بزيارة ابد
_لا من نزور اكو عبي قبل مانفوت اخذ وحدة وعلى كد الزيارة وراسا انزعها...
من دنفتر على تخم...كتله التخم هدية من بابا...
ضاج...احتفظي بفلوسه سوي ذهب لج
_حيدر...ترة كلش طبيعي عدنا الاهل يهدون لابناتهم بزواجهن
_اي ذهب مو اغراض
_لا اغراض مو بس ذهب...بس انتة اصلا من وصلنا ضايج ...صاير شي..
_تعاي هذا مطعم عائلي...
دخلنا...وكعدنا بمكان منعزل...
_ابوج من خابرته مقبل اجي اخذوكم...كال خالج يجيبكم
ليش جابكم كرار
_ماقبل تجي لان يخاف عليك اولا...وبعدين خالي صار عنده شغل اعتذر...شنو المشكلة
_يعني ماكو مشكلة ابن خالج جان رايدج...هو يجيبج ويرجعج..
_منو كال جان رايدني...هذا حجي امي...كرار مثل اخوية
_مو اخوج نور...تعصب
_ضحكت ...فدوة للي يغار علية
_بدون شقة...ماحب شغلة ابن عمي ابن خالي
_قابل اكطع وية اهلي
_لا بس بحظوري
_خلص...بقت شغلة التخم
_كتلج اشتري بيهن ذهب..
_مايصير عيب من بابا...ومحمد نطاني فلوس كاونتر...هم ارجعهن
_ليش ما تلمين من كل اهلج
سكتت شفته عصبي...كلت مو مال تفاهم
طلعنا نختار التخم ...بس اني ضايجة...
وعفته هو يختار...اخر شي ضاج...
كاد ايدي وطلعني خارج المحل...يعني شلون اليوم
_اخ يدي ..جان يضغط على ايدي من يحاجيني
شسويت هسة...
_ليش ماتختارين
_كل القرارات لك وماتقبل واحد يناقش...عفتك براحتك
_ما احب هاي السلبية منج...
_خلص اذا ماتحبها...لاتزعل من اصر على شي
_يعني شنو
_اختار تخم هدية من بابا...
بلاه انت اختار...
صفن علية...خوش بس التخم...
بكلبي كلت ميخالف خطوة اولى...
_فدوة حبيب كلبي...
_لج منة العالم...
اختارينا التخم...وموديل الغرفة والكاونتر...
بس تعبت ...كتله مابية حيل بعد...
رجعنا للبيت لكينة ام كرار وامي وزينب رايحات يزورون
الاثاث ماجبناه...بقيناه وانطينة عربون...بعدين
يجبه على راحته
_شلون راحت زبنب بدون العباية...
_اكو هناك عبي...جاوبني..
_جوجة حبي انطيني ورقة وقلم خلي اسجل النواقص
_من ولج جوجة...
_ادلعك حبيبي...
شفته اقترب مني...خفت ماعرف ليش...
لزم ايدي...فتحها بيديه...وباسها من الباطن...
_نور تعرفين شكد احبج..
اني جف حلكي ...اريد احجي ما اكدر
رجع باسها...مرات ما اصدك راح تصيرين لي...
يوميا احلم باليوم اجيبج عروسة لبيتي...
جان يحجي بهمس...
اني اباوع على عيونه ذابلة ...
اقترب مني اكثر...ليش احسج خايفة...
مستحيل أذيج....صبرت كل هالمدة واصبر اكثر
بعده ما مكمل...وسمعنا فتحت الباب
ابتعد عني راسا...مو اكلج خرب بعمي
ضحكت على فزته
اخذنا لمطعم تغدينا ...وبعدها ماقبل نخابر كرار..
وصلنا لبغداد ...وهناك بالكراج خابرنا محمد اجانة
نشغلت بعدها اجهز...وعلى اساس اروح نهاية الاسبوع
لكربلا نكمل باقي اغراضنا...
يوم رجعت من الدائرة بالخط...شفت الفرع مالنا هوسة
باوعت باب بيتنا مفتوح...
وسيارة محمد بالباب...ومفتوح بابها...
حسيت رجلي ماتت...اريد اوصل للباب ...
ماكدر صار الطريق شطوله...
لحد ماوصلت ...سمعت صوت بجي ابيتنا...
باوعت لسيارة محمد بيها دم...
ركضت للبيت...وكلبي يريد يوكف ...
....وللحكاية بقية...