نور العين

الجزء 10

بعد ما خلصو من الاكل والاغاني .... قعدو كلهم دورانية في الارض .علي : انتو عارفين انا قلت نسيتوني ... كنت عايز اذكركم لكن قلت لو هم بيهتمو بي حيكلموني .في : الفضل يعود لي نوران هي الذكرتنا ... وتهليل هي النظمت الشغل ... واحنا قمنا بالتنفيذعلي : يعني انتي الذكرتيهم يا نوران ؟؟؟نوران : اي علي : انتي اصلا منو زيك .محمد : انتي الاصل والباقي تقليد ( يا ولللد )احمد : انتي 100/100 والباقي صففففر كرم : انتي الجمال والعروبة .فراس : انا شايف انو كفاية عشان الراس حيكبر شديد وانا ما معاي دبوس .نوران : كبير طبيعي يا بابا 😌نسمة : نوران شالت اي حاجة الجمال والعروبة والاصل واحنا خليتو لينا شنو .في : وريهم عليك اللهعمر : " اااخ انتي يا نسمة شايلة اي حاجة وماف مقارنة بينك وبين اي بنت في الدنيا دي "ترتيل : شنو رايكم نلعب صراحة وجراءة .وعلت اصواتهم بي حماس عشان يلعبو .ترتيل لفت القزازة واول سؤال جا لي علي ونسمة .علي : حاجة ما بتحبيها .نسمة: اشوف مريض ما عندو حق الدواء .محمد وهو بيصفق : ياخ في زول زي اختي دي .... اتحداكم تجيبو لي بت زيها 😌.السؤال التاني كان على في ومحمد في : اكتر اسمين بتحبهم ؟محمد : بدور و درة❤ في ابتسمت بي انكسار : حلووو السؤال الثالث فراس و فهد ( كتمت🙊 )فراس : صراحة ولا جراءة 😏فهد : جراءة 😏فراس : امممممم (بيفكر) شايف الصحن بتاع الاقاشي داك 🍡🍡🍡 جيبو واكل منو اتنين 😏.طبعا فراس عارف انو فهد نباتي .... لكن زي ما قلت ليكم هم الاتنين ما حبو بعض نهائي .... واحنا عارفين الاولاد لمن يكون بيكرهو بعض بيحصل شنو .محمد : لكن هو نبا.... وقبل ما يكمل جملتو فهد قام وجاب الصحن ..الناس كلها وشوشها بقت مخلوعة والعيون منطرة 😳😲.ولحظة صمت طويلة .... فهد شال الاولى .... وعاين لي فراس الكان بيرمقو بنظرة تحدي قوية .... فهد كان مبتسم ابسامة ثقة اقوى من نظرة فراس .واكلها .... وبعديها اكل التانية وما كان بيلوك كتير ... بيبلع طوالي ووشو بقا احمااااااااااااااار 🍅 وعرق جبهتو ظهر .فهد اخر مرة اكل فيها لحمة كان عمرو 5 سنوات ... بعد ما جاهو التسمم منها بقا ما بطيقا ولا بختها في خشمو وبيقفل نخرتو لمن يشم ريحتها .... اهلو قالو مع الايام حيرجع عادي ... لكن مرت الايام وما رجع ليها وخلاص بقا ما بياكل غير حاجة نباتية وهسة بعد مرور 17 سنة اكلها بي سبب فراس الكان بيتحدى فيهو ( شرير يا فراس 😂).بعد ما خلص ختا الصحن .فراس : برافووو 👏بعد مسافة حتن لفو القزازة تاني وكلهم بعاينو لي فهد .السؤال الرابع جا على ترتيل وفهد ترتيل : اول واحدة كنت بتحبها اسمها منو ؟ فهد وهو بيكح : صبا ترتيل : واو اسمها حلو .السؤال الخامس على كرم وفهد .كرم : انت الليلة حظك نحس 3 مرات ورا بعض واقعة ليك 😂 المهم .... ناوي اول ولد ليك تسميهو شنو ؟فهد : جواد .نوران : يعني الاتنين حيوانات 😂😸.وهنا كلهم ضحكو فهد : " ما مشكلة الحيوانات واحد حيكون راجلك والتاني حيكون ولدك ❤" ( من ما تلقو العلامة دي " اعرفو انو الكلام بكون بين الزول ونفسو) السؤال السادس علي ونوران .علي : حاسألك سؤال مزدوجاكنر حاجة جميلة في نظرك شنو ... واسمك معناهو شنو ؟؟؟نوران : اجمل حاجة في نظري .......... هي الام .ومن حيث اسمي اعتقد انو نور العين .فهد وهو بيضحك : نور العين دي غنية ..... نوران معناها المضيئة او اميرة النور .احمد : اوووووو ما عرفتك لكن .محمد : قاموس قاعد معانا واحنا ما عارفين .عمر : يا سلاااام غنية نور العين دي حلوة خلاص .نسمة : غنيها لينا .فهد : علي امشي جيب الجتار بتاعي من فوق .وعلي طوالي طلع جابو وجا .عمر بدا يغني وكلهم غنو معاه وكرم شغال يصور : قلبي الحقيقية ما خان لياليك انا في الماضي متروك ناجيك ما بدا الحب ابد بتنكر ليك لكن الاشواق والناس حواليك .وكلهم بصوت عالي : يانور العين انت انت وينك وين .اللون الاسمر ودرت شبابي وعشقت الجنة وفي الجنة عذابي ما قدرت اتألم والمردا شرابي يا حليل الراحو يا حليل احبابي ، الشعر الناعم ليكو اسرني والوجه الناعم بنوره غمرني ... وعيون نعسانة وبرموش تجرحني خلتني متيم للراحة جتني يا #نور_العين انا والانغام والعود في ايدي بحكيلو حكايتي ويعيد تربيتي بشكيلو همسة عودتي نشيدي يا حليل الاوطات .... الخ ترتيل : فهد غني لينا انت .فهد : صوتي كعب في العربي ترتيل : غني اجنبي ويا ريت لو تكون غنية all of meفهد : طيبوبدا يعزف ويغني وصوتو المبحوح عمل شغل جامد 👌نوران كانت بتغني معاهو بصوت منخفض .ترتيل حبت تحرجها : اوووف نوران بليز صوتك ما حلو اسكتي خليهو يغني براهو .فهد : نوران حافظاها ؟نوران : ام (اي)فهد وهو بيزح ليها محلا عشان تقعد جمبو : طيب تعالي غنيها معاي .ترتيل اتمنت لو انها قفلت خشمها و ما فتحتو ابدا .نوران قعدت جمب فهد والاتنين غنو واصواتهم دمار .بعد ما خلصو كلهم صفقو وصفرو ليهم .فراس وهو بعاين للتلفون : انا بعد دا امشي امي دقت جرس.نوران : ياخ اقعد شوية ياخ .فراس : انت عارفة امي .نسمة : سلم عليهم كلهم فراس: يوصل بإذن الله ... يلا مع السلامة فراس طلع بي جاي ... فهد استأذن منهم ودخل جوه ... جرا طوالي على الحمام .... ورجع الاقاشي الاكلو 😷 ... امو سمعت صوتو وبي سرعة جاتو .منى : مالك يا ولد بتستفرغ كدا .فهد : اوووووع ( ما وقتك هسه الولد بفضي 😂)فهد بعد ما خلص كان نفسو قايم غسل وشو ويدينو بي الصابون .... امو ناولتو البشكير .... نشف وشو .منى : اكلت شنو؟فهد : من الصباح هي واجعاني اصلا .منى : لا اكلت حاجة .فهد : بيتزا بس ( بالنسبة للاقاشي ياعمو برعي 😂)منى : اتحصنت قبل ما تطلع ؟فهد هز راسو بمعنى لا .منى :تعال مشت المطبخ لقت برتكانة قاااعدة ترطن في التلفون قدرتا .برتكانة : في حاجة ماما ؟منى : لا بس فهد بطنها واجعاها .فهد : بالنسبة لي بطنها واجعاها شايفاني في ولا حاجة .امو وهي بتلزو عشان يقعد في الكرسي : اسكت وحصن نفسك في الوقت دا😒خلطت ليهو عصير ليمون مع نعناع 🍹 ( ااااح)محمد جا داخل المطبخ : ااااه يا خونة عصير ليمون من وراي ؟ منوية كباية معاك عليك الله .منى : من عيوني احلى كباية 😂..... لكن هو استفرغ عشان كدا عملت ليهو .محمد : اهااا دا الاق..... فهد قفل ليهو خشمو بسرعة : الانبراشة ... هو قاصد الانبراشة عشان قبيل كنا منبرشين كدا في الارض .منى : فهد انت بتقول في شنو ؟فهد : بحبك .منى : انا لو قعدت معاك اكتر من كدا حاجن ... اشرب الليمون وحترتاح .... انا طالعة اوضتي لو عايز حاجة تعال .بعد ما طلعت فهد لزا محمد : انت مالك فضيحة كدا عايز تقوليها اني اكلت اقاشي متخلف انت ؟؟؟؟محمد : ياخ جات لا اراديا .... وبعدين انت 😂😂😂😂😂😂😂 فعلا اكلت الاقاشي .... اخ من يا فراس 😂😂😂😂😂😂 اكلك ليهو بعد كل السنوات دي .فهد : 😒.... ما تجيب لي سيرة قراش عشان انا بطني لسا طامة .محمد بي استهبال وهو بخت يدو في خشمو : خلاااص سكت سكت 🙈🙈🙈🙈.طلع من المطبخ للشباب البره .... اما محمد جا داخل اصلا عشان يخلط 📲 مع درة🙊 . في عطشت شديد فقامت عشان تجيب ليها قزازة موية دخلت المطبخ لقت برتكانة مقلعة عيونا في التلفون ..... ضحكت على شكلها وشالت القزازة .... وهي طالعة سمعت محمد بيتكلم مع درة : على فكرة كلمة بحبك ما كفاية .... انا بععععشقك انتي النفس الانا بتنفسو ..... وانا والله بس اتخرج من الجامعة حاجي اخطبك .... ما عايز اجي هسه بقروش ابوي .... في وقفت لي دقايق وهي بتعاين لي قزازة الموية .... شعورها ما بيتوصف .... بتحبو ... بتحب ضحكتو.... بتحب جنونو .... بتحبو لمن فجأة يبقى عاقل ... بتحب صرة وشو لمن يكون زعلان ... بتحب العروق الظاهرة في يدو بتحبو في اي حاجة ..... غارت بس كانت عارفة انو ما عندها حق تغير عليهو .... القزازة وقعت من يدها 💔...... وطلعت بي سرعة قبل ماهو يشوفها .... وهي طالعة طاااخ طقشت الباب بي قوة لمن وقعت في الارض ..... قامت بي سرعة ومشت المرجيحة المختوتة في الحديقة الورانية ..... وهنا اطلقت العنان لي دموعها النزلت بي حرارة 😭 ....... كانت مغطية خشمها بيدها عشان تمنع صوت شهقاتها العالي .سمعت صوت وهو بقول : في ؟؟؟رفعت راسها ..... لقتو كرم (الحنين ولد حنين) كرم : انتو مالكم الليلة اي واحدة بتبكي .... لي بتبكي ؟في صوتها ما طالع بس دموعها جارية وصوت شهقاتها المكتومة .كرم دخل جوه بي سرعة وجا وهو شايل علبة مناديل وقزازة موية .... قعد جمبها ومدا ليها المناديل.في شالت المنديل ومسحت دموعها .سكتت لي مسافة .... كرم مدا ليها قزازة الموية .شالتها وشربت منها .كرم : حصل شنو ؟ في بهدوء : ضربت راسي .كرم باستغراب: كيف ؟في : بالباب .كرم وهو بيقيف على حيلو : ممكن اشوفها .في هزت راسها بمعنى اي .كرم بيدو الدافية مسح ليها جبهتها مكان الضربة : معليش .... خلاص جات سليمة ..... نطلع بره ؟؟؟ ما تقعدي هنا براك .في : طيب .في حست بالهدوء كأنها نااااار وكبو فيها موية .وطلعو الاتنين بره .شوية كدا محمد جاهم طالع ....عمر : ما كان تجي والله .احمد : اغمى عليك جوه ؟؟؟كرم : دي ديدي الحب .محمد : هوي ما تجيب سيرتها بعدين انت بتعرفها من وين ؟كرم : انت قايلنا عورة ولا شنو بعدين الحمد لله نوران ما مقصرة معانا جايبة لينا سيرتها الذاتية كلها .محمد لي نوران: 😒 انتي بس اقعدي لي ده .نوران ردت فعلها كان كدا : 😸😸😸😸.في كل دقيقة تخت يدها في جبهتها .عمر : مالك انتي بتهبشي في جبهتك .في : اضربت فيها .فهد : ضربك شنو ؟علي : بتوجعك ؟في : بالباب .... لا ما بتوجعني شديد. محمد وهو بعاين ليها كأنها طفلة : معلييييش ان شاء في اليزعلك .في " هه لو في اليزعلني انت حتتوجع في حياتك ... حانساك يا محمد ... و حدعي كل يوم في صلاتي انو ربنا يسعدك في الدنيا والاخرة " شفتو دا الحب الحقيقي انك تتمنى السعادة للانت بتحبو حتى لو ما كان نصيبك معاهو .... مش انك تدمر حياتو او تنتقم منو .فهد وهو بيبوس ليها راسها : كدا ما حتوجعك تاني .كرم : بالعكس كمان 😱احمد : حيجيها صداع 😱علي : وراسها تاني ما حيبقى كويس 😱عمر : وشها حبتشوه 😱محمد : وراسها احتمال يتفجر 😢.فهد : اعوووذ بالله فيكم ولا فيها .... الكلام تقول مدربين عليهو ديل شنو ديل تهليل : 😂 اصلهم كدا ما يلقو ليهم موضوع الا ويدور فيهو .نوران وهي بتتسائب خلاص يا جماعة انا نعست .... احنا الليلة ما نمنا صاحيين من الصباح 😪.مرام : انا برضو نعست و الله احمد : انا كمان .الساعة كانت 12 ونص وكلهم طلعو فوق بعد ما غيرو هدومهم .... الاولاد عايزين يهبلو بي عمر خلوهو يقلع النضارة وهو اصلا كان نازل يشرب موية .... وجرو كلهم من الاوضة خلوهو براهو.عمر هبش الكوميدينة مالقا النضارة 👓 ...عمر : فهد وين النضارة ... فهد ... فهد انت وين ؟ماف اي رد عمر : يا جماعة جيبو النضارة ياخ بلا هظار بايخ ... انا ما قادر اشوف كويس .قام وبدا يهبش قدامو لحدي ما حصل باب الاوضة وهو لسا بيتكلم : يا جماعة جيبو النضارة .... ياخ حرام عليكم انا ماشايف شي .نسمة جات طالعة وهي بتضحك على حركات تهليل الراقدة جوة الاوضة .... عاينت ليهو كان شكلو جميييييل من دون النضارة وعيونو خرافية ❤.نسمة : عمر ؟ عمر : اي نسمة : مالك ؟عمر : مالي ؟نسمة : وين نضارتك ؟عمر : اي ... صح نضارتي ... شكلهم شالوها مني .نسمة : اممممم ... طيب استناني هسه بجي .نسمة نزلت تحت لقتهم خاتين النضارة في الكنبه وبيضحكو وهم بيحاولو يتخيلو شكلو .نسمة شالت النضارة وجرت فيهم نور : دي حركات جديدة ولا كيف ؟ محمد : في شنو ؟نسمة : والله انا المفروض اسألكم ... شلتو النضارة لي ؟كلهم بلعو ريقهم .... طبعا دكتورة نسمة جادة وما بتحب الحركات دي .كرم : احنا بنهظر معاهو .نسمة : دا ما هظار .... دي بياخة في نظري .... امشو شوفو شكلو عامل كيف ... ما قادر حتى يشوف قدامو ... وانت يا فهد عارف اخوك ما بيشوف من دون النضارة كيف تخليهم يشيلوها .محمد : انا الشلتها .نسمة : طيب قومو معاي .... واعتذرو ليهو ... وياريت حركة زي دي تاني ما تتكرر.وطلعو كلهم بي سكات ... نسمة ربعت يدينها ووقفت وهي بتهز في رجلها وبتعاين لي محمد .... وهي جايا مع كتفو 😂😂😂 .محمد : عمر انا اسف ... اقصد احنا اسفين عشان شلنا النضارة .عمر : ما مشكلة عاااادي بس وين النضارة .محمد مداها ليهو ... نسمة : تصبحو على خير ودخلت اوضتها .وهنا الاولاد فجرو الضحكة الكاتمنها محمد نطا في عمر والاولاد دخلو وقفلو الباب .كرم : انا قلت حتقوم تضربنا الليلة 😂.محمد : نسوم دي طيبة بي طريقة لا يمكن وصفها ... بس بتزعل من الهظار الكدا .فهد : 😂 خطيرة والله ... غايتو رمت لي نظرة كدا عمر بي حب : شيلو مني النضارة كلو يوم ... شكرا ليكم ياخ ...... انا بحبكم .محمد : شنو ؟عمر : تعال عايز اوريك شي وساق محمد معاهو البلكونة .... شوية كدة .... جو طالعين ومحمد بيضحك : الله يستر يا صاحبي .احمد : قلتو شنو ؟عمر: انتو مالكم كلام ناس كبار😛فهد: دي حقارة والله 😠علي : طيب لو كلام ناس كبار كلموني معاكم 😸.فهد : انت اصلا مقعدك معانا شنو 😒 امشي اوضتك .علي : لااااا خلاص المفاهيم اتغيرت امبارح كنت نايم مع التوأم ورنا عشان عمري كان 14 سنة .... انا هسه عمري 15 😌.الباب دقة ....فهد وهو رافع حاجب : منو ؟-انا باسل .فهد فتح الباب باسل : صباح الخير ( عائلة مسطولة من كبيرها لي صغيرها )فهد : صباااح النور 😄باسل :ممكن انوم معاكم ... لانو علي قال هو بقا عمرو 15 وحينوم معاكم ... وانا ما عايز انوم مع البنات براي .فهد وهو بيشيلو : انت تنوم في الاوضة كللللها .وبعديها طفو النور ونامو .♡♡♡♡♡♡♡♡♡♡♡♡♡♡♡♡♡♡♡♡♡♡فهد صحا من النوم كانت الساعة 4 فجر .... لقا الاولاد كأنو الساعة 9 بالصباح .واحد بيتكلم في التلفون .... واحد بيلعب في التلفون .... وواحد فاتح التلفزيون .فهد : الساعة كم ؟كرم : 4فهد.: ومصحيكم شنو هسه .علي : نفس المصحيك 😏فهد : ورقة شفرة 😒علي : تصبح على خير .احمد : النوم طار مننا واحنا زهجانين .فهد بي خبث : شنو رايكم نسوق العربية ونفحط بيها ...احمد : عاين دا كمان .فهد : انا جادي ... اصلا الشوارع حتكون فاااااضية هسه .كرم وهو بيقفل التلفون : يلا طلعو كلهم من دون علي وباسل ... يتسللو براحة براحة زي الحرامية .وفجأة لقو نوران في وشهم .نوران : اقبض ماشين وين ؟كلهم اتخلعو .محمد : ياخ انتي مصحيك هسه شنو .نوران : نفس المصحيك ... المهم ما تغير الموضوع ماشين وين كلكم ؟عمر : سمعنا حركة في البيت ونزلنا نتأكد في شنو نوران : لاااا يا فريق الكوماندوز نازلين تتأكدو من شنو ؟احمد : من الاخر كدا ما جايينا نوم ... ماشين نقعد برا شوية .نوران : اهااا لو كدا خلاص افراج انا طالعة انوم .فهد : نوم العوافي عمر : والقلب الصافي احمد : احلام سعيدة كرم : و كوابيس بعيدة محمد : يلا اتفكفكي بالله 😋نوران وهي بتضربو : خربتها .. ياخ اتعلم منهم ... دا شنو دا .وطلعت .... الاولاد سمعو صوت الباب بيتقفل وطوالي قامو جاريين ركبو عربية لاند كروزر .... كرم هو السايق .وعمر هو الوحيد القاعد في كرسيهو (عاقل)... الباقيين طالعين بالشبابيك ... وفاتحين الموسيقى بصوت عاااااالي .العربية شوية وتتقلب من سواقة كرم .وصلو جمب البحر.. نزلو من العربية وخلو انوارها شغالة عشان شوية الواطة ضلام وقفو صف ... واحد اتنين تلاتة وقامو جارييين ... البناطلين والقمصان والتشيرتات طارت في الهواء ودخلو كلهم الموية وبقا بيسبحو ويغطسو ( استمتعو بي شبابكم 😉)بعديها طلعو وقعدو في الرملة .... السماء كانت ملياااااانة نجوم والقمر بدر ونورو عاكس في الموية اتونءو كتييير وحكو بي مواقف حصلت ليهم في حياتهم وكانو بيضحكو بضوت عالي ... وطبعا فهد لازم يصور.بعديها فهد قال بردان شديد لبسو هدومهم ورجعو العربية ... والمرة دي فهد هو السايق ....يطلع من الطريق ويرجع تاني .... يسوق شديد وتاني يخفض .... وكان بيفحط بجنون ... لقا الشارع فاضي ولعب شديد .رجعو البيت الساعة كانت 5 فجر .... استحمو بالدور .... واخر واحد كان فهد ... بعد ما استحما وطلع موية الملح دي من جسمو مرق وهو لافي بشكيرو في نصو ... وكان شايل بشكير صغير و بنشف الموية من شعرو ... كان واقف في الشباك ... فجأة شاف زول جاري بي سرعة تحت كأنو بفتش على شي .

بي سرعة دخل الحمام لبس هدومو ونزل .

يتبع......