نور العين

الجزء 07

العائلة كلها صحت قبل اذان الصبح ..... الا وااااحد كلنا عارفنو ...فهد عامل نفسو ميت محمد وكرم واحمد كلهم اتلمو فيهو وبرضو ما صحا ليهم .... جاهو عمر بكباية موية متلجة وكباها فيهو حتن يادوب فتح عيونو ... وبعد ما جاهو ابوهو واداهو نهرا كدا قام على حيلو وجهز نفسو .... الرجال طلعو الصلاة .... وبعد مارجعو لقو البنات والنسوان ركبو البص ومستنينهم ... الاولاد استولو على الكنبة الورانية .... والبنات قدامهم اما الرجال والنسوان كان قاعدين قدام .... واهم عنصر برتكانة الساقوها معاهم .... وانطلق البص بيهم الى عروس البحر الاحمر.الشمس ما طلعت فمعظمهم كمل نومتو في البص واولهم فهد .بعد مرور الوقت فهد فتح عيونو كانت الساعة 9 بالصباح والجو كان مغيم وبارد وحلو شدييييد ، لقا ترتيل قاعدة جمبو .... وجمب الشباك اليمين قاعدين رنا وبسمة فاتحين الشباك و بيتونسو مع بعض .... والشباك الشمال قاعدة نسمة بتقرا في كتاب لي اجاثا كريستي .... الاولاد كلهم قدام بيتونسو مع امهاتهم .ترتيل: صباح الخير دا كلو نوم ؟ كانت شايلة علبة راني في يدها ادتها ليهو .فهد بنعاس : لسا ما وصلنا .ترتيل وهي بتضحك : لسا ما وصلنا السفرة حتكون طويلة شديد .فهد : اها .... طيب ديل مشو وين نمت وهم جمبي صحيت لقيتكم انتو .ترتيل : مشو قدام اخر ونسات .فهد : طيب اقوم امشي ليهم .فهد قام ومشا ليهم قدام .... كرم كان لافي بالكاميرا بتاعتو وبصور اي حاجة تحصل .... المهم لانو السفرة طويلة كل ساعة بيبدلو قعدتهم يعني القدام يمشو ورا ... والورا يجو قدام عشان ما يزهجو .فهد قعد جمب نوران ومرام ... شوية كدا مرام قامت منهم ....نوران كانت مركبة سماعات وماسكة التلفون ...اشعة الشمس داخلة في عيونها ومظهرة لونها العسلي الجميل .فهد : بتسمعي في اي غنية .نوران : لاااا احنا في سفر ما بفتح غنية ... انا بسمع في قران 😌.فهد : انتي بتسمعي قرآن ؟نوران : ههههه اي انت قايلني كافرة ولا شنو .فهد : ماشاء الله ... بتحبي ياتو شيخ ؟نوران بي حب : ماهر المعيقلي ... صوتو جميل ... اديك تسمع ؟ فهد : والله ممكن .نوران طوالي طلعت طرف السماعة التاني وركبتو ليهو .شوية كدا خلصت السورة .... فهد طلع السماعة ومن دون مقدمات جا محمد قعد في نصهم وكان شايل في يدو عنقود عنب بياكل منو بصوت عالي عشان يغيظ نوران .محمد : فهد عايز عنبة ؟فهد : لا ، شكرا محمد : وانتي يا نوران ؟نوران : محمد اكل بي ادب ما الا توري العالم كلو انك بتاكل 😒محمد وهو بيزيد في صوت الاكل : اكل كيف يعني انا اصلا باكل كدا .نوران : يا اما تاكل بي ادب يا اما تقوم من جنبي 😠.محمد قبل على فهد : اكلي دا فيهو حاجة يا فهد ... عيبو لي .فهد وهو بيضحك : عن نفسي غايتو ما شايفو كعب شديد ... لكن نوران شكلها متأزمة .محمد : انت الولد الخواجة البيضرب ليك كل مرة دا منو ؟ (فجأة)فهد : صحبي .في الوقت دا جا عمر وقعد معاهم .محمد : صاحبتو كيف .فهد : اول ماجيت مايزيا نزلت في سكن وهو كان معاي ...ماكنا بنطيق بعض مرة اتشاكل معاي ضربني وضربتو في النهاية جا إعتزر وبعديها بقينا اصحاب .عمر : بتتكلمو عن جوني صح ... ياخ دا هو وفهد كانو بيتكارهو كره ... كل يوم متشاكلين .... انا كنت بخاف على فهد منو 😂.نوران : انت بتصاحب الكفار لي ؟ عمر : اصلا هو هناك مصاحب الجاليات كلها ... اسألي منو اي زول بيكون بيعرفو شخصية مشهورة .محمد وهو بيضحك : شكلو كان متعبك 😂😂.عمر : هو تعيب ساي كان مطلع زيت زيتي .... واول ماجا نظام خلاص الولد كبير ركب حلق في اضانو وعمل وشم في بطنو وكل يوم في نادي ليلي .نوران ومحمد في نفس الوقت : 😱😱😱 نادي ليلي ، وشم ، حلق .عمر : انا كنت زول علاقاتي محصورة شديد ... بطلع مع اصحابي وكدا بس لكن هو بس الحمد لله ... والمشكلة انو موصيني عليهو وهو ما كان بيسمع الكلام ابدا ... لمن عمل الوشم اتشاكلت معاهو واديتو كف 👋... الا جو حجزونا اصحابي ومقاطعو اسبوع كامل .محمد : فهد انت كنت كدا 😱؟ فهد وهو بيضحك : يا جماعة كان عمري 17 سنة يادوب طالع من الثانوي .... وشايف نفسي كبير ...وعمر كان عمرو 20عمر وهو بيصلح نضارتو : لكن احسن شي فيهو انو كان مهتم بي مذاكرتو ... بتاع لعب وجوطة اي ... لكن اول ما يدخل اوضتو تاني ما بيوقف قراية ... يعني بتحس بيهو بتاع لعب لكن كان مهتم بيغش الدفعة بي لعبو وبعدين بيخلعهم بالنتيجة .نوران : لسا كدا ولا خلا حركاتو ؟عمر : لا بعد ما جات السنة الثانية ليهو خلاص عقل ووقف حركات المراهقين ديك .نوران : الوشم زحيتو يا فهد .فهد : الوشم دا انا لحدي هسه ما قادر اصدق انو كان عندي الجرأة دي وعملتو ....لمن سافرنا عمرة رمضان مع ابوي هناك اعترفت ليهو ... قال لي : اهم حاجة تكون تبت توبة صادقة وتاني اياك تكررها .قلت ليهو : عايز امسحو ..... قال لي : ما بيطلع الا بالليزر ودا شي مؤلم لي درجة لا يمكن تصديقها عشان كدا خليهو ... والله يتوب عليكمحمد : ماضي اغبر يا ولد عمي 😂😂😂نوران : عايزة اشوف الوشم .فهد : لا عيب .نوران : علييييك الله 😇.فهد : ما بحب الناس تشوفو .نوران : بليز بليز بليز .محمد : ورينا ليهو والله ما بنسيح ليك مع الباقيين .فهد : انت ممكن اوريك ليهو لكن نوران لا .نوران : بيخجل مني 😂😂😂.محمد جرا نوران وقفل ليها عيونها .نوران : انت حتخططفني اصلو خلاص والله ما بشوف 🙈.فهد رفع التيشيرت الوشم كان تحت صدرو بشوية وفوق بطنو على شكل شعار القراصنة ومكتوب فيه تحت Mr. F DANEGROUS 💀 محمد : اوباااا 🙊 لكن انت كنت منتهي ياخ 😂😂😂.فهد : 😂😂😂 شديد .نوران وهي بتزح يد محمد من عيونها : اصحابك كلهم كفار .فهد : 😂😂😂 ماكلهم بس لو شفتيهم حتحبيهم .نوران : طيب عايزة اشوفهم ... ولا برضو عيب ؟فهد وهو مبتسم طلع تلفونو وبدا يفرجهم في الصور ... اصحابو كلهم حلوين وانيقين ومزز زيو 😉..... بعديها فتح ليهم فيديو كانو واقفين صف قدام المسبح بتاع السكن نط فهد في الموية بعديهو التاني بعديهو الثالث وكدا ... اشكالهم كانت تموت من الضحك ... اما الفيديو تاني في السلالم بتاعت الطوارئ في السكن كانو قاعدين كلهم في الارض بالبرمودات والشباشب خاتين كراتين بيتزا قدامهم وعلب البابريكان وفهد بيقعد في يد السلم يتزحلق بيها لحدي ما ينزل تحت وتاني يطلع يتزحلق 😂 يجي يقعد يقوم بعديهو واحد تاني وعلى هذا المنوال 😂😂😂.عمر: الشلة دي كانت عاملة شغب في الجامعة كلهم مغرورين وشايفين نفسهم واي واحد فيهم بكون مجكس اسمح واحد في الجامعة ... انا الاولاد بقولي لي معقوووولة انت وفهد حيدر اخوان .فهد : انت ماشايف انك سيحت لي شديد 😂.محمد : نفس حركات فراس صاحب نوران شخصية مسيطرة .وهنا فهد ابتسامتو اتحولت لي ابتسامت سخرية : قلت لي فراس 😏.عمر : غايتو الحمد لله اتخرجت وارتحت منو .فضلو الاولاد يتونسو كتير وفتحو عدة مواضيع ... فهد كان كل شوية بيدي نوران نظرة كأنو بيطمأن عليها لانو بقت ما مشاركاهم في الكلام ... كانت في البداية بتعاين من الشباك وفي النهاية نامت ... جمالها بيضاعف وهي نايمة كأنها ملاك ... حاول يشيل عيونه منها لكن ما قدر ... عيونه بقت ملصقة فيها ولا اراديا قال : ماشاء الله .محمد : شنو ؟فهد : ماشاء الله شوف المناظر البي الشباك حلوة كيف الطريق الجبلي حلو شديد (طريق جبلي يا انا 😉)احمد وهو بكورك ليهم من ورا : شباب تعالو لينا هنا .وكلهم قامو وفهد ادا نوران نظرة ورجع معاهم .حنين : يا اولاد .... جبتو معاكم كتب القرآن زي ما وصيتكم ؟ الاولاد : اي فهد : انا ما جبت ماف زول قال لي .علي : انت فاضي من النوم 😏فهد : ورقة شفرة 😒علي : هاك شيل مصحفي... انا اصلا منزل تطبيق القران 😓. (احي انا من ورقة شفرة دي😂 ) .. عمتو حنين من ما ركبو ما قفلت المصحف بتخاف من السفرات الطويلة .اي واحد فتح مصحفو وبدا يقرا الا نوران النايمة ....الطريق كان كلو جبال وزي ما قلت الجو جميل شديد ومغيم .... وهم بيقرو في القرآن كان شعور حلو شديد .... كرم يقرا شوية ويقفل الكتاب يصور الناس وهم ما منتبهين ويرجع يقرا تاني .واخيييييرا وصلو مدينة بورتوسودان الجميلة (تحية لي ناس بورتسودان✋)الجو كان حلو وبارد والبحر ازرق والمنظر اجمالا راااائع .الساعة كانت 5 عصر نزلو في شاليه حلو وكبير وفيهو مسبح .فهد: انت يا محمد مش قلت حننزل في قرية سياحية ؟محمد : والله انا سمعتهم قالو كدا ماعارف لي غيرو رايهم .نسمة : الشاليه احسن من القرية حناخد راحتنا اكتر وبعدين الشاليه بتاعنا دا موقعو استراتيجي فاتح في البحر طوالي .... والمطاعم والصالات ومراكز التسوق قريبة منو .محمد : طيب يلا ندخل عشان انا تعبان .دخلو كلهم واستكشفو اوضهم .... ترتيل وفي ومرام اوضتهم واحدة ... نوران مع تهليل ونسمة .... علي والتوأم ورنا في اوضة ... والاولاد كلهم في اوضة واحدة . كانو تعبانين شديد اي زول مشا على اوضتو .... نوران كانت بتفتش على شنطتها بتاعت الضهر ونسمة ورتها انو محمد كام شايلها ..... نوران مشت لي اوضت الاولاد دقت الباب ماف زول فتح .... فتحت الباب ودخلت لقتهم مرميين زي الجنايز نايمين واحد منجدع في كنبة وواحد مرمي في الارض والتاني نايم في السرير .... الا فهد كان صاحي .... كان ماسك تلفونو وهو متمدد في السرير لابس بنطلون بجامة اسود وتيشيرت يدينو كاملة رمادي ... نوران بصوت اقرب الى الهمس: فهد فهد .فهد رفع راسو ... نوران : لو سمحت اديني شنطتي المختوتة جمبك دي ... فهد شال الشنطة واداها ليها .نوران : شكرا وبي سرعة طلعت وقفلت وراها الباب .فهد وهو مبتسم : عفوا (البت طلعت يا هناي 😂) وبعد نص ساعة كدا قام طفا النور ونام بعد الرحلة الطويلة المتعبة دي .

يتبع......

#اولا بشكركم جدا على التعليقات المحمسة والتفاعل مع الرواية... ثانيا القصة حتبتدي تحلو لانو الاحداث من هنا حتبقى مشوقة .

ثالثا ادوني توقعاتكم للاجزاء الجاية 😊