نور العين

الجزء 20

مرت الايام والاسابيع وبدت التجهيزات لي عرس نسمة وعمر .... كلهم اتقسمو الاعمال بتاعتهم ... الامهات كان عليهم الريخة والبخور والهدوم والحاجات البيعرفوها براهم دي ... الرجال عليهم العزائم وحجز الصالات والفنانين ... نوران صممت الدعوات كانت على شكل وردة جوري حمراء وفيها ورقة نازلة منها مربطوة بشريط ذهبي مكتوب فيها الدعوة 😍... تهليل كان عليها فستان الزفاف والبدلة ...يعني ممكن نقول هي وزيرة العروس اهتمت بيها من كل النواحي.اما الحية الاسمها ترتيل اختارت هدوم الشباين ( الفساتين والبدل ) وخلاااص الايام جرت وكل الناس بتتكلم عن عرس بنت حسن وولد حيدر عبد العزيز .واخييييرا جا العرس .... الليلة حنة عمر ... قبل اسبوع كانت حنة نسمة .... طبعا نسمة ما حتحضر الحنة لازم انو مايشوفها .... عشان كدا مشت بيت عمتها حنين ومعاها صحباتها .في بيت حسن ....الشباب داخلين وطالعين .... وكلهم بيجهزو في نفسهم .جود كانت مع نوران في اوضتها بجهزو في نفسهم .مرام دقت الباب ودخلت .مرام : نوران حلقي ختيتي وين ؟ نوران : مسكتو لي محمد قبيل .مرام : امشي جيبيهو لي عليك الله .نوران : طيب .نوران جرت تفتش على محمد ولقتو جمب المسبح بيتكلم مع درة في التلفون .نوران : محمد الحلق القبيل وينو ؟ محمد لي درة : دقيقة زحا التلفون من اضانو : حلق شنو ؟ ما متذكر انك اديتيني شي زي دا .نوران : لااااا يا حبيبي اتذكر ما تودينا في دهية ... والا معناها حنمشي المستشفى بدل النادي .محمد : اتذكرتا اتذكرتا ... بتلقيهو في الكومودينة في اوضتي .نوران طلعت بي سرعة ... دخلت الاوضة : غايتو يا محمد بتحب البهدلة حب ... والله لو ماما شافت اوضتك دي الا تجيب ليك الثلاثة تسعات .بدت تنطط في هدوم محمد المرمية في الارض لحدي ما حصلت الكومودينة ...لقت الحلق مختوت شالتو وبي سرعة لفت .. وقفت بي خلعة لمن لقت فهد قدامها كان يادوب طالع من الحمام .... لافي بشكير ابيض في نصو ولابس كروكس الحمام .كان جسمو مبلل بالموية .... وشعرو برضو مبلول ونازل منو شوية في جبهتو من قدام ... كانت عضلاتو عاملة شغل خصوصا السكس باك ( الستة عضلات البتكون في البطن ) والتتو بتاعو ظاهر .... طبعا نوران اول مرة تشوفو ... هو ماكان عايزها تشوفو .نوران نزلت راسها في الارض ... وبس اتمنت لو الارض تنشق وتبلعها من الاحراج .فهد ابتسم ابتسامتو الساخرة وقرب منها ... وهي رجعت لي ورا ...مدا يدو ... ونوران تاني رجعت ... اتفاجأت بي انو شال بشكيرو الصغير .بدا ينشف في شعرو ومشا على جهة الحمام .نوران رفعت عينها .... كان خيط العملية لونو اسود و ممتد على طول ظهرو 💔.... وقفت لي ثواني قبل ما تطلع بي سرعة .خلاص كلهم جهزو نفسهم .. الاولاد كانو لابسين زي العريس جلاليب بلدية ... والبنات لابسين فساتين حلوة شديد ( حنزل صورتها ) ... كانو عاملين شعرهم كيرلي ... ومكياجهم خفيف ... ترتيل لمن جات نازلة كلهم عاينز ليها بي نظرات اعجاب .. الصراحة كانت جميلة.بكن نوران جات نازلة بي وراها وخطفت من الانظار كانت فاتنة رائعة خلااااابة .ممشوقة والفستان فيها خياااال .... والمكياج الخفيف العملتو ليها جود كانت بسم الله ماشاء الله .ركبو عرباتهم واتوجهو لي نادي النخيل .. كانو اول الواصلين وشوية كدا الضيوف بدو يوصلو ... وبدت الحفلة .... كانت بي واحدة من الفنانات بتاعات الدلوكة وغنت غنى خلت الناس كلها بترقص براها .شوية كدا بدت تغني في غنية يا عديلة يا بيضا يا ملايكة سيري معا 👏👏👏👏👏👏👏👏👏👏👏👏👏👏👏👏👏 ( ابشرو ☝)جا عمر راكب في حصان اسووووود ووراهو الاولاد كانو داخلين بي حركة منظمة .... نسيت اكلمكم انو فهد فكا الجبيرة .... لكن لابسة حمالة .... وكان ماسك اللجام بي يد واحدة .... النسوان يزغردو قدرتهم والرجال شغالين ابشر يا عريس .بعد شوية حصان فهد بدا يهيج ... بيصهل بي قوه وبيضرب في الارض شديد ... ويهز في راسو .... النسوان والبنات خافو وبدو يزحو من جمبو ... بتاع الشرطة حاول يمسك الحصان لكن ما هدا وبدا يهيج زيادة ... لمن الفنانة وقفت الغنية ... الاولاد ظهر في وشوهم القلق .كرم وهو بيجي جمب فهد : حاول نط منو .محمد : لا لا ماتنط ممكن يرفسك .بالرغم من الخوف الفي وشوش الناس .. فهد ماكان خايف بالعكس رافع راسو بي شموخ وبيقرب من رقبة الحصان وبيمشي فيها بيدو ... فضل كدا لحدي ماالحصان هدا ووقف .بعديها نزلو من الاحصنة وبدت الحفلة تاني والبنات قلوبهم بقت شغالة دق دق دق دق دق دق دق دق .... ونظرات الاعجاب زادت عليهو .الحفلة ربت ربا شديدة .... اصحاب عمر واصحاب محمد وناس كرم واحمد رقصو وكوركو وعملو عمايل ... طبعا فراس قااااعد يرقص مع نوران شوية وبعديها يمشي لي عمر وبعديها يرجع تاني لي نوران وتاني يمشي لي محمد المهم اتجوووول .الحفلة بعد ما خلصت والضيوف بدو يمشو وهم مبسوطييييين من الحفلة وناسها ..وكل ام بتتمنى واحد من اولاد عبد العزيز يخطب واحدة من بناتها.بعديها رجعو بيتهم ...الزفاف بعد يومين بس .نوران كانت قاعدة في درجات السلم ... وفهد جا داخل .نوران وقفت ليهو .فهد : لو سمحتي الطريق نوران : ممكن اتكلم معاك ؟فهد : ما عندي ليك وقت نوران : انت لي بتعمل كدا يا فهد .فهد : السؤال دا اسأليهو لي نفسك وجاوبي عليهو وتعالي وريني 😏نوران : حيجي يوم تعرف فيهو انك ظالمني .فهد بي ضحكة مستفزة : ما اعتقد .وطلع خلاها ... وقلبو متقطع من اسلوب كلامو معاها .ترتيل كانت واقفة في المطبخ وسمعت كلامهم وجات طالعة لي نوران .ترتيل : اسمعيني يا نوران ... دي نصيحة اخديها مني ... ابعدي من فهد دا لو بتحبيهو بي جد ... هو خلاص بقا قرفان منك بعد الصور الشافها ليك .... والحمد لله انو سترك والا هسه كنتي حتكوني في التراب .... هو كان حيموت بي سببك .... زي ما امك ماتت بي سببك ... على فكرة انتي السبب في موت امك .... ابعدي منو احسن وارحمي نفسك وخلي عندك كرامة .قطعت كلامها لمن سمعت صوت ضحكة ساااااخرة .فراس كان واقف وراها وهو بيصفق : برافو برافو برافو عليك يا انسي .جا ووقف قدامها :فيني اسألك سؤال انتي كيف عرفتي انو فهد شاف صور سيئة لي نوران ؟ ترتيل اتوترت وبقت بتتكلم كلام ما مفهوم .فراس : تصدقي عن جد انتي حقيرة .ترتيل : اححححترم نفسك .... وانا لو كلمت واحد من اخواني الفوق حيقطعوك .فراس : اويلي اويلي يا سبحان الله انتي بتعرفي هاد المصطلح تبع الاحترام ..... طب شو رايك اذا قلت انا لاخوانك الفوق انك فبركتي صور لنوران .ترتيل : انت متخلف انا كيف اعمل كدا .فراس : إي بلا تمثيل ... لا تعملي حالك الحمل الوديع ... والملاك النازل من السماء ..... بعدين انتي اساسا بي اي حق بتقوللها انها السبب في موت امها ؟ على فكرة مو غريب على وحدة متلك تقول هيك حكي ... لانك ما بتخافي ربك اساسا .... و فهد كان حيموت عشانها لانو بيحبها وبيعشقها ... ومهما عملتي ما حتغيري حبو ليها ... لانو بالنهاية الرجال مننا لمن يحب بصدق مستحيل ينسى الي حباها مهما كان .... ونوران مختلفة عنك وعن شبيهاتك بكفي بس انو قلبها ابيض ونضيف .... وبوعدك يا ترتيل راح افضحك واكشف لكل الناس خباثتك المخبياها تحت مكياجك .... اتذكريني انا فراس عبد الله حافضحك .ترتيل : ت تفضحني في شنو .... وبي اي حق وبي اي دليل ؟ فراس : حتعرفي قريب يا حلوي ... حتعرفي كل شي بالتفاصيل .فراس عاين ليها من فوق لي تحت ومشا وساق معاهو نوران ( اححححي يا فراس كفيت و فيت ... هو بيقلب اللهجة لمن يغضب عشان كدا ما تتخلعو من المسلسل التركي القبل شوية دا 😂).فراس : نوران انتي بتسكتي ليها لي الحيوانة دي نوران وهي بتمسح دموعها : اعمل ليها شنو .فراس : ارجعي لي ورا واصمتيها كفففف ... لمن تنسى اسمها .نوران ضحكت ما بين دموعها .فراس : ايوا اضحكي ياخ .... والله يانوران حقك حيرجع لانو ربنا معانا .... وانتي مظلومة ... دعوة المظلوم مستجابة .... عشان كدا ادعي لي معاك بي مزة كدا ولا كدا اصلهم خلصو من حياتي الايام دي .نوران ضحكت ومسحت دموعها .فراس : ايييييه الحلاوة دي .... يلا طيري خشي جوه ما تقيفي براك .نوران : طيب تصبح على خير .فراس : وانتي من اهله .نوران دخلت اوضتها استحمت و غيرت هدومها ومسح المكياج .فتحت التلفزيون وبدت تقلب في القنوات لي مدة طويلة والنوم ابا يجيها قفلت التلفزيون .... عاينت للساعة لقتها 2 .فتحت درجها وطلعت مذكرتها ونزلت تحت جمب المسبح .شالت المذكرة بتاعتها ونزلت تحت ... قعدت في الكنبة القريبة من المسبح .بدت تشخبط في رسومات وتكتب في خواطرها .... وترجع تشوف كلام قديم هي كاتباهو .... في حاجة ماعارفنها في نوران ... عندها موهبة في الكتابة ... بس هي مخبية على اهلها موهبتها دي .قفلت المذكرة وختتها في الكنبة .... قامت ودخلت جوه المطبخ جهزت ليها اكل 🍔🍖🍗 ... بعد ما خلصت رمت الصحن في المغسلة ... فتحت الثلاجة وشالت مشروب طاقة وطلعت بره .... اول ما طلعت لقت فهد ماسك مذكرتها ..... جات جارية بي سرعة : لو سمحت اديني مذكرتي .فهد : ولو ابيت 😏نوران : اددددديني مذكرتي فيها حاجات ما بتخصك .فهد : متأكدة ؟ نوران : اي ... جيبها .فهد وهو بيقرا من المذكرة : كيف لا اعشقه وهو اول من اهدا انوثتي المكابرة المتخفية ذلك الفستان .... كيف لا اعشقه وهو من محى خوفي من السرعة .... ذلك الاسمر الذي دائما ما يمسح دموعي ... اعشق تفاصيله الكبيرة والصغيرة .... اعشق عيناه الكحيلتان .... اعشق لحيته المهذبة التي تشعرني بمقدار فحولته ..... وعضلاته التي دائما ما يحتويني بها .... اعشق عطرة الذي تغرق به روحي .... اعشق حروف اسمه ... اعشق ابتسامته الصافية التي تظهر الغمازاتان الغائراتان في وجهه ... فأي رجل هذا ؟ ومن اي سماء وقع ؟ نوران : اددديني مذكرتي .... دي حاجة شخصية .فهد : حتى لو الكلام عني ؟ نوران بي غيظ : منو القال ليك انو الكلام دا عنك انت ؟ فهد :والله كل المواصفات دي فيني انا .... ولا دقيقة دقيقة احتمال تكوني بتتكلمي عن فراس ؟ نوران : ما تصرف عربي كتير واديني الزفت بتاعتي .فهد : لمن تتكلمي بي اسلوب احسن حابقى اديك ليها .نوران بي غيظ رشتو بي مشروب الطاقة الفي يدها .فهد وهو بيمسح المشروب من وشو : انا عادي ممكن استحمى وازحو من جسمي وهدومي لكن مذكرتك حتزحو منها كيف ؟ ... بس ما تخافي انا حاخليها تنضف .وبي ضحكة شماتة رما المذكرة في المسبح 🌊 (شرير😠) ...نوران ما ادت نفسها فرصة طوالي نطت في الموية على الجهة الغريقة ورا مذكرتها ... فهد نطا وراها بي سرعة ... وجراها لي فوق على ركن المسبح .فهد بي غضب وصوت عالي : مجنونة انتي ؟ نوران : انا برضو المجنونة .... المذكرة الانت رميتها دي حقتي من لمن كنت في 7 اساس 😠.فهد : ما مشكلة بالمرة تجربي شعور لمن تحبي حاجة وتتعلقي بيها وفجأة تبعد عنك 😏نوران : اوووووف .... ياخ قلت ليك مليون مرة ... الصور ما حقتي انت لي ماعايز تصدقني .فهد : طيب اثبتي ... اديني دليل ... اديني اي حاجة اصدقك بيها .نوران سكتت ودموع قهر نزلت منها 😢.فهد عاين ليها لمسافة وحسا بي حاجة دافية نازلة في وشو .... #فهد العندو هيبة ماف زول بيقدر يوصل ليها ... فهد العندو رجولة جذابة .... فهد الماف زول بيقدر يعلي عليهو صوتو #بيبكي .نزلت دموعو غصبا عنو 💔 لمن شافها بتبكي .... جراها عليهو وعانقها ... كان صوتو مهزوز وعميق وهو بيقول ليها : لي عملتي كدا؟؟؟ والله انا حبيتك من جوه قلبي .نوران : ما عملت كدا والله ما عملت كدا .فهد زحاها منو وهو بيقول بي صوت غضبان : ياخ كفاية كذب .... كفاية كذب ابوس ايدك .نوران : انا اقول شنو اكتر من كدا ... الصور الف مرة قلت ليك ماااااا حقتي ياخ .فهد تاني قرب منها وبي جراءة حاصرها بيدينو .نوران : زح مني .فهد بي استهزاء : لي خايفة كدا ... انتي ما متعودة على الحاجات دي ..... نوران بقت محاصرة من قدام بي جسمو ومن ورا بي نهاية حائط المسبح ... وبالجنبات بي يدينو ..... فهد قرب منها لحدي ما بقت انفاسو الحارة في وشها .... نوران لسانها اتعقد .... وحست بي جسمها متصلب ..... وفهد لسا بيقرب منها وبقت بينهم قرابة الخمس سنتمترات بس .نوران ما حست بي نفسها الا وهي بتديهو كفففففف بي قوة 👋 اهتز لي صوتو المكان . (👏)فهد رجع لي ورا وفي وشو علامات الذهول منو الاتجرأ واداهو كف ؟نوران بي سرعة طلعت من المسبح ودخلت جوه ... عمر كان قاعد في الصالة بيكلم نسمة وشاف نوران وهي طالعة وهدومها مبلولة ووشها احمر دلالة على انها كانت بتبكي .... خلص كلامو مع نسمة وطلع بره ... لقا فهد قاعد في حافة المسبح .عمر : فهد حصل شنو ؟ فهد اتلفت عليهو ووقام على حيلو وعايز يمشي ... عمر وقف قدامو : اسمعني كويس .... نوران ما واحدة من الاشكال الكنت بتعرفها في ماليزيا... وما تنسى انها بت عمنا واخت محمد صاحبنا .... انا هناك كنت بسكت ليك لكن هنا وقسما بدين الله لو حاولت تعمل ليها حاجة الا اخليك تندم .فهد وهو بيصفق : برافو .... شوف انا ما ناقصك هسه زح من وشي .عمر رفع يدو كان عايز يديهو كف ... لكن مسك نفسو وقال بي صوت غضبان : فههههد .... احترم نفسك .... ولو ماعندك احترام لي نفسك حتحترمني انا اخوك الاكبر منك غصب عن خشمك ( انفك بالخليجي 🐸)فهد عاين ليهو في يدو الرافعة .... وبعديها عاين ليهو في عيونو ومشا .عمر قعد في الكنبة وهو بيزفر بي ضيق .صباح اليوم التالي : نوران صحت بي صوت جود وهي بتصحي فيها : زفتة قومي يابتنور العين الجزء العشروننوران بي نعاس : في شنو ؟ جود : قومي مفروض نمشي لي نسمة البنات كلهم صحو ... قومي مستنينك انتي بس .نوران : الساعة كم ؟ جود.: 10 ونص .نوران وهي بتغطي نفسها بالبطانية : ياخ لسا بدري ... خليني انوم شوية .جود وهي بتمسك الرموت بيد وتقفل المكيف ... وباليد التانية تجر البطانية : قوووومي تقوم قيامتك ... بكرة عرس اختك .... ان شاء الله العرس الماتلمي فيهو يالسنيحة ... قومي 😠نوران : خلاااااص .... خلاص قمت .جود وهي رافعة حاجب وخاتا يدينها في نصها وبتهز في رجلها : يلا قدامي .نوران وهي بتقوم : خلقتك دي خلقة مشاكل ... لئيمة .قامت جهزت نفسها ... وركبت هي وجود ومرام وفي وترتيل في العربية مع محمد .محمد جاري بيهم سريع سريع وراهو اشغال كتيرة وفجأة العربية اتقلبت ....😂😂😂😂 بهظر بهظر 😸.المهم جاري بيهم سريع .مرام : محمد الصوت البتعملو بالعربية دا اسمو شنو ؟ محمد : ياتو ؟ نوران : بتاع الزيييييييين نااااااان نييييييين عنعنعنعن دا ؟ ( 😂الله على المؤثرات الصوتية )مرام : ااااي بس ياها زاتا .محمد : ماعارف والله لكن احنا بتقول عليها فتفتا نوران : يا سولام على الفتفتا.بعد ما وصلو ودخلو لقو نسمة وصحباتها جوه عاملين عمايل يدقو ويغنو .... ومن ماشافوهم جوهم جاريين عشان يدوهم شمارات الحنة بتاعت امس .... نسمة كانت حلللللوة حلا فاكا شعرها الاسود وفيهو ميج ... ولابسة بجامة واسعة كدا لونها ابيض بس ملاك .شوية كدا اتوزعو في العربات واحدة سايقاها ترتيل وواحدة سايقاها مرام طلعو ... مشو عملو حمام مغربي ... وحمام زيت لشعرهم ... ترتيل صبغت شعرها احمر ... ونوران قصت شعرها شوية وعملت نهاياتو بالاشقر💇 ..... ورسمو حننهم وطبعا العروس اولهم .... وسوو ليهم ماسكات لي وشهم ومساج💆... وعملو المنكير💅 والبدكير المهم اتظبطو .... والبنات استلمو فساتينهم وحاجاتهم الطلبوها 👗👜👚👠👡.بعديها مشو محل بيتزا 🍕(💔) اكلو ورجعو طبعا نسمة كانت منقبة .رجعو البيت وبين هاك ياتجهيز وشوفو دا وصل ولا لسا ... وداك وينو والفلان الفلاني عملتو ووووو اليوم انتهى ونامو ..... جود ونوران كانو قاعدين في البلكونة بيتونسو .... نوران تلفونها ضرب ودا كان فراس .نوران : خير ؟فراس : اببببشري ... قدرت اعرف منو العمل الصور .نوران : كدي دقيقة فهمني ؟ جود جات جارية وبقت ملصقة اضانها في السماعة عشان تسمع .فراس : بتعرفي ولد عمي تايسون ؟نوران : اي .فراس : تايسون دا شيطاااااان واي شي بيعرفو ... حكيت ليهو انو في صور مفبركة بي جودة عالية وما بتتعرف بي سهولة وووو .... قال لي واااااحد بس في السودان دا كلو بيعرف يظبط الصور كدا واحد بيقرا في جامعة .......نوران : دي نفس جامعة ترتيل فراس : كدا الزيت احنا كدا لمينا في طرف الخيط .نوران : عرفك شنو احتمال يكون واحد تاني .... وحتى لو طلع هو حتعمل ليهو شنو وحيعترف كيف ؟ فراس : لا في ناس كتيرين بفبركو الصور ... لكن بكون ظاااهر انها فبركة يلا دا معلم وبيظبطها وما بتتعرف بي سهولة .... ومن حيث حيعترف كيف خليها علي ... حيعترف حيعترف .... يعني الترتيل خلاص موضوعها استحمى ... هسه انا داخل على مهمة عسكرية ادعو ربنا يسهلها علي .جود : ربنا يسهلا ليك يا فراس يا ولد ماما منيرة دنيا واخرة ويغطي عليك ويبعد عنك اولاد الحرام .فراس : 😂😂😂😂 دا شنو دا ... دي جات من وين ؟ نوران : قاعدة معاي ... ربنا يستر عليك .فراس : يلا مع السلامة نوران : مع السلامة *******************************فراس قفل الخط ... عاين لي اولاد العمو المعضلين لمن يخوفو واصحابو : مستعدين يا شباب .كلهم : اي فراس : على بركة الله .كانو واقفين جمب بيت مستنيين الولد يجي ..... فضلو مستنيين قرابة الساعتين .... ويادوب الولد جا .... عايز يفتح باب بيتهم .... بس جو هاجمين عليهو الولد .الولد : دا شنو دا فكوني .فراس : ما تحاول تعلي صوتك .... ماف زول حيسمعك الناس نايمة .الولد : عايزين مني شنو ؟ فراس : كدي عاين لي كويس ... ما عرفتني .الولد ركز فيهو واتذكرو : شوف انا مالي اي دخل بالموضوع هي القالت لي اعمل الصور دي .فراس : يعني انت عارف انا جاي لي شنو صح ؟؟؟الولد سكت .فراس وهو بيدي تلفونو لي صاحبو عشان يصور فيديو فراس : اعترف بي كل حاجة حصلت .الولد : ما حتجبرني على حاجة انا ماعايزها .فراس وهو بيضحك : انت عارف انا ولد منو ... ثواني ثواني اسهل عليك .... انا فراس عبدالله حمدابي .... اللواء عبد الله حمدابي .... يعني دم الشرطة جاري في عروقي .... حتعترف هسه بي كل الحصل ولا اخلي الشباب الحلوين ديل يوروك الطفا النور منو ..... وحاجيب ليك شرطة الخرطوم كلها ... وحيخلوك تعترف غصبا عن عينك ووقتها حافضحك فضيحة لا حصلت لا كانت وادخلك في مشاكل ما تعرف بدايتها من نهايتها .... زي ما دخلت البت المسكينة الفبركت صورها معاي في مشاكل ما عارفة تطلع منها كيف .الولد : خلاص حاعترف ..لكن عليك الله انا ماعايز مشاكلواوعدك من الليلة تاني الشغلانة دي حسيبها .فراس : يلا اتكلم .الولد : ترتيل دفعتي في الجامعة وصحبتي شديد حكت لي عن انها بتحب ولد عمها اسموووو فراس : فهد ؟الولد : اي فهد .. اسمو فهد وانو في واحدة صحبتها عايزة تشلبو منها لانها بتكرها .... ودايما بتعمل ليها مشاكل وهي تعبت منها عشان كدا قلت ليها انا ممكن اساعدك لو احتجتي اني اخرب سمعتها رفضت في البداية .... لكن اتفاجأة بيها بعد كم يوم بتقول لي فبرك الصور وانا حاديك قروش .... انا فبركت الصور ورسلتها ليها .... لكن والله العظيم انا دي اول مرة في حياتي احس بالذنب في حاجة عملتها لانو البت كانت صغيرة وفي براءة في وشها .فراس : اسمعني لو عايزني اسيبك في حالك ... حتجي تقول الكلام دا قدام اخوها .الولد : لااااا ... عليك الله لا انا ماعايز مشاكل .فراس : حتسمع كلامي ولا اجيب اجلك ؟الولد بي استسلام : طيب .... حا ... حاتكلم قدام اخوها ... لكن ما حيضربني .فراس : ما تخاف انت حتكون تحت حمايتي .... وما تحاول تهرب كدا ولا تتزاوغ لأني اولا مراقبك ومراقب البيت وثانيا الفيديو معاي .... وثالثا عندي ليك هدية .الولد : شنو .فراس بي كل قوتو اداهو بوكس في نص وشو لمن رعف 👊: دا لي كل دمعة نزلت من واحدة يتيمة اشرف منك ومن قبيلتك كلها انت فبركت صورها .عاين ليهو بي غيظ ومشا ووراهو اولاد عمو واصحابو المعضلين .واحد من اصحابو : فراس انت ابوك لواء ؟؟؟؟فراس : يا زول لواء شنو انا ابوي تاجر ...دي وهمه ساي .تايسون : الخطوة التانية شنو ؟ فراس وهو بيبتسم بي خبث : الخطوة التانية خلوها لي انا .... والله يا ترتيل اخليك تندمي كل غلطة عملتيها في نوران .صباح يوم العرس : البنات صحو بدري بدري .احمد ضرب لي ترتيل : وييين انتو احنا مستنينكم .ترتيل : نازلين اصبرو.جو نازلات كلهم ومنقبات .كرم واحمد لمن اتهجمو .احمد : احم ... ترتيل ممكن ثواني من وقتك بس ترتيل اتغاتت عليهو وابت ترد .احمد.: ترتيل؟ كرم بي فرحة : احمد احمد دي نوران .احمد : عرفتها كيف ؟كرم : الجزمة والوقفة .كرم واحمد جو لي نوران .كرم : دا شنو جو داعش دا يا نوران .احمد : اركبي معاي ما تخليني براي معاهم كرم : لا تركب معاي انا 😠احمد : لا انا 😠قعدو يتشاكلو فيها 😂.... في النهاية نوران ركبت مع كرم لانو احمد معاهو ترتيل .وصلو المحل وبدو يجهزو في نفسهم .احمد رجع البيت عشان يكمل باقي مهامو .... وكرم مشا استلم البدل والجزم ( اعزكم الله ) بتاعتهم الوصلت من ايطاليا .بعد ما الاولاد خلصو حاجاتهم ... مشو المحل ... نفس المكان الفيهو نسمة والبنات بس مقسومين ... قسم بيجهزو فيه العروس ... وقسم بيجهزو فيه العريس ... وطوالي نزلو فيهم شغل اشي حلقات واشي تسريحات .الساعة 5 جات ... ودا وقت الاوت دور بتاعهم .عمر كان واقف قدام المراية وبحاول يربط في كرفتوو .... فهد لبس الساعة بتاعتو وبقا بيراقب في عمر .... ابتسم وقام واتجه نحو عمر لفاها عليهو : حتعرس ولحدي هسه ما بتعرف تربطها ؟ ربطها ليهو وهندمو ولفاهو على جهة المراية : اها كدا كيف ؟ عمر : شكرا .... عقبال ما اربط ليك حقتك 😉فهد : لاااا شكرا حقتي بربطها براي 😜.عمر ضحك وقبل على المراية يشوف نفسو تاني .فهد وهو واقف وراهو وبعاين ليهو في المراية : خلاص كدا ؟ ماشي تخليني ؟ عمر : اول شي انت لسا ما خلصت الجامعة يعني طول اليوم حاكون في وشك .( نسيت اوريكم انو عمر خلاص اتعين في بتروناس ) فهد : تاني حاسرق تيشرتات وجزم منو ؟ وحاتشاكل مع منو في الكورة ... ولمن اعمل غلط منو الحيعمل نفسو اكبر من بي عشرين سنة ويقعد يتفلسف فيني .عمر بي ابتسامة : انت لي محسسني اني مت ؟ ما تخاف علي قاعد حيقوم بالواجب وزيادة لكن في ادوار حتتعكس 😉.فهد وهو بيعانق اخوهو بي تأثر : حاشتاق ليك .في جاتهم داخلة : دا شنوووو عناق جماعي وانا مافيشة زحو لي شوية ... وجات اتحشرت في نصهم .علي جا فاتح الباب وهو زهجان : يا فهد ياخ ماعرفت اربط الكرفتة دي هاك اربطها لي .شاف اخوانو متعانقين 😂💔 جا جاري وركب في الكنبة ونطا من فوقهم ..... كان عناق جماعي بي معنى الكلمة بين اخوان فرحانين بي اخوهم الكبير ... بالرغم من الحزن الصغير الجواهم عشان حيفارقوه .علي : ربنا ما يحرمناش من بعض ياعيال .في وهي بتحاول تخبي دموعها : ما عشان عرست تقوم تنسانا سامع 😠 تزورنا دايما مفهوم؟ عمر : مفهوووم 😙في : بالاضافة لي اني حاشيل غرفتك 😌... حاجزاها من هسي 😋عنر وهو بيضحك علي كلام في وبعاين لي فهد : ششفت ليك بت حلوة زي دي .فهد : والله الصراحة لا .عمر وفهد باسوها في نفس الوقت عمر بالشمال 😙 وفهد باليمين😙.علي : وانا😢عمر نكش ليهو شعرو .علي : لاااااا ياخ تعبت فيهو .فهد : تعبت فيهو شنو هو منكوش طبيعي في : انت بس شعرك دا لو خليتني انفشو ليك واكويهو بيجك في نص ضهرك .علي : شايفاني بت قدامك 😒.فهد.: بالنسبة لي وانا القبل شوية دي كانت شنو ؟ علي : اربط لي الكرفته 😸.في : انا امشي اكمل لبسي ....بعد دقايق كدا كلهم جهزو وطلعو للاوت دور ... الفوتوغرافر اداهم حركات حلوة شديد ... بعد ما خلصو رجعو اتظبطو تاني وخلاص بعد دا متوجهين على الصالة .طبعا عمر لمن شاف نسمة قرب يطير زي العصافير جميييييييلة خرافية زي الاميرات ... فستانها من فوق دانتيل مكبوس والفستان ماسك من النص وبعديها نازل انسيابي وفيهو ذيل من ورا .... عمر ماشاء الله مظبط بالبدلة والكرفتة كان خياااااااال ❤.وصلت عربية ليموزين سوداء وكلهم ركبو فيها ... طبعا جود وفراس تبع الشباين ....مرام في العربية ورت اي زول دورو شنو في الدخلة ووزعت ليهم اي واحد حيدخل مع منو .... ترتيل كانت مع فهد .فراس : انا حادخل مع ترتيل .... ترتيلو اول مرة اطلب منك طلب ادخلي معاي 😸.كان مبتسم بي براءة لكن في عيونو كان في تظرة فهمتها ترتيل براها .... نظرة تحدي وتهديد .

يتبع......