بيرق الاحزان

البارت 2

بيرق الاحزان

همس القوارير

البارت الثاني

من توفى ابويه اجوي بيت خالي گعدوا عدنا هو وزوجته وبنته گولنا ميخالف بلكت يشيل مسؤليتنا شويه ويساعد امي بمصرف البيت  هنوب ذب المسؤليه براس امي كام ما يصرف على مرته وبنته وبقت ويانا فتره تالي گامت تخبث ويانا وطردناهم من البيت بقينا فتره هيج حالنا اذا تغدينا ما نتعشى والله اتذكر جنا صايمين امي اشترلتنا   تنكه مال دبس وجان وكت رمضان قسما بالله نتسحر دبس وخبز ونتفطر دبس وخبز بالرغم خوالي وخالاتي كلهم خير من الله وعايشين بس عمرهم ما ذكرونا بشي ضاگت بينا الدنيا والمشتكى لله  اتحدى اي شخص شاف اليتم الي اني شفته ضيم وقهر وحسره مرة على وفاة ابويه ٣ سنوات ويجون يخطبون امي الى ان قررت تتزوج جان قرارها كولش صعب بالنسبه ألنا شلون راح نعيش ويه رجال غريب شلون راح يجي شخص ياخذ مكان ابويه الله يرحمه بعدها ريحته بالبيت بكل مكان مجنت اكدر اتخيل الموقف هذا ابويه الحنون الطيب الي عمره مخلانا نحتاج لشي هيج ويجي شخص يكعد بمكانه حيل صعبه اجه خالي وگالي

خالي

امشي وياي خالي اليوم باتي يمي لان امج اليوم زواجها وصعبه عليج

زمن

اي خالي اروح

لو بيدي اروح لاخر الدنيا ولا اشوف احد ولحد يشوفني اوووف شگد صعبه تعبت من التفكير والليل كوله واني دموعي على خدي واناشغ مثل الطفل مكدرت انام طلع الفجر واني گاعده كمت توضيت وصليت ورجعت نمت اندعيت من الله يصبرني اني ما ألوم امي  لان تزوجت لان رادت شخص يعينها لان تعبت من المسؤليه بس اني ما اكدر اتحمل الموقف صعب ثاني يوم رجعت لبيتنا لگيت زوج امي بالبيت سلمت ودخلت بالغرفه ضليت هيج كلما يجي ادخل للغرفه وبعد ما اطلع ومن يروح اطلع اكمل شغلي بقيت هيج فتره طويله لحد ما فد يوم من الايام جانت امي بالسوگ واني دانضف المطبخ اجه زوج امي لزم ايدي وباسها اني باوعت عليه وخفت وجريت ايدي

زوج امي اسمه كمال

كمال

باعي اني ما احب امج اني تزوجت امج علمودج انتي واني احبج

اني ضليت فاكه حلگي وارجف عفته وركضت للغرفه وقفلت الباب
صخام ان شاءالله شنو هاي وين اروح شحجي وشگول ما اگدر اگول لامي لان ما تصدكني هي ما صدگت تزوج تروح تخسر رجلها علمودي اوووف والله متت شلون شأسوي ضليت قافله غرفتي وابجي اخاف لا يكسر الباب ويجي عليه لحد ما  سمعت صوت امي بالبيت يلا فتحت الباب امي وضعها تحسن شوي گامت تهتم بروحها وچانت تحب رجلها نست ابويه  ونست حبه الها وگامت تلبس وتتمكيج وتطلع وياه كولشي انسى ولا كانوا چان عايش ابد لحد ما فد يوم جنا گاعدين وطلعت دشداشة ابويه الله يرحمه وانطتها لرجلها اني تعاركت وياها

زمن

هذه ملابس ابويه مو من حقج تنطيها لرجلج

امي

وانت شكو اني بكيفي مالج دخل افتهمتي لو لا

زمن

انت على الاقل جان داريتي مشاعرنا   واحترمتينا وگلتي خطيه يشوفون ملابس ابوهم كدامهم

امي

زمن احسلج لا تدخلين ولا تنسين اله تحجين عليه بمثابة ابوج

زمن

يخسي لا عاش ولا كان الي ياخذ مكان ابويه

امي

لج انتي صدك متستحين وانطيتج وجه

ضربتني راشدي وكتها عفتها وطلعت بقينا هيج يوميه اسويلي عركه ويه امي ومن يجي للبيت اطلع اروح ابات بيت خالي لو اكضي العصريه بيت صديقتي وجيراني ومن يصير الليل اروح انام  هو متزوج غير امي عنده زوجه ثانيه يوم عدها ويوم عدنا بس كنت اكرهه حيل عبالك من يجي للبيت عبالك جايني الموت جنت ما عندي احد اشكيله او احجيله اخاف احجي لأحد لان ما اثق بأحد من اضوج لو انقهر اكتب بورقه كل مشاعري واحساسي ومن اخلص اشككها واسويها حيل ناعم وارميها بالزباله تكرمون اكتب واني ابجي صارت الورقه هي صديقتي ورفيقتي لان محد يحس بيه عشت وحيده  المهم بمرور الايام امي صار زوجها اهم منا بحيث تاخذ الاكل من گدامنا وتنطيه اله ومره جنا ناكل بس هذا ماعون التمن والمرگه الي باقي عدنا  واجه رجلها واحنا دناكل بيه

امي

اوكفوا لا تاكلونه اوكفوا

شالته من گدامنا وحطته گدامه وضل هو ياكل  احنا بقينا واحد يباع للاخ وگمنا واحنا اصلا مماكلين

هيج بقت حياتنا بضيم وقهر ومشاكل وتعب تعبت حيل وتعبت نفسيتي وكبرت قبل أواني.  وهمين ما رجعت للمدرسه لحد ما فد يوم من الايام