بيرق الاحزان
همس القوارير
البارت ١٠
يعني ناس شايفين خير ونعمه يقفلون ثلاجه وين صايره هاي يعني علمود لا اكل هو اني شماكله ياربي تعبت نفسيتي حيل ما اعرف شلون اتصرف ووين اروح لا اهل بيهم خير لا ابو يحميني ويدافع عني شنو هالضيم لازم ابلع واسكت اجه يوسف من الدوام
ام يوسف
زمن يلا تعالي خلي نصب غدى اني وياج اوگفي افتحي الجدر
هم امي رحت حضرت مواعين ودأصب الغدى
وعينها عالباب اخاف يوسف يدخل
ام يوسف
دضوگيه للاكل گدامي اخاف مخليه بيه شي
زمن
شسالفه يمه شخلي هو اني اطلع امشي وليش اخلي شي شنو اريد منكم
ام يوسف
لا تعلين صوتج وضوگيه وانتي ساكته
امري لله الواحد القهار ضگته واكلت منه وهي تباوعلي بعين ونص معاجبها
ام يوسف
هسه يلا صبي واذا حجيتي ليوسف والله لاطردج من البيت
صبيت الغدى ودموعي على خدي وكملت گعدنا كولنا نتغدى اكل وتباع للماعون مالتي اللگمه طلعت عليه زقوم ياربي شنو هالعذاب كملو الغدى دخلت المطبخ نضفته وغسلت مواعين ورحت يم يوسف بالغرفه
زمن
يوسف الي ديصير والله فوگ احتمالي اني تعبت ليش امك هيج تكرهني شنو الجريمه الي ما تغتفر الي اني مسويتها
يوسف
شبيج حبيبتي انتي شصاير احجي
زمن
تحاسب على كولشي وتگولي تسوين سحر واليوم جابت قفل قفلت الثلاجه واني حامل يعني شاكل من اجوع انت گولي
يوسف
والله ما ادري شگولج انه هم تعبت هسه اروح احجي وياها كافي سكته
زمن
لا الله عليك بس تحجي وياها تشد وياي اكثر
يوسف
لعد الحل شنو انتي احجي
زمن
اني احجيلك لان ما عندي غيرك اشكيله واذا ما احجي اموت
يوسف
خلاص اني كولشي اجيبلج هنا بالغرفه اهم شي انتي مرتاحه اليوم اجيبلج ولا تبقين بلا اكل خلينا نشوف شنو تاليتها
زمن
والله من غير الحرب النفسيه تعبت وداعتك
يوسف
تعالي يمي يا روحي ان شاءالله بس الله يقدرني والله ما ابقى هنا اطلعج بيت لوحدج بس صبري عليه
المهم هيج بقت حياتي ويه ام يوسف من اعجن توگف على راسي حتى لا اخلي شي بالعجين ومن اطبخ تطب وتطلع عليه وحجيها مثل السم شالت شكو شامبو وبلسم وصابون بالحمام حتى لا استعمله والخبز تحسبه حساب عليه واذا لگته ناقص تگلب الدنيا عليه اني جايبتلي أفه للبيت وشگد تاكلين الجوعيه من غير الغلط بالرغم اني حامل عليه اربع اشهر ووزني ٦٠ يعني يا دوب اشبع بطني بشي قليل واگوم ويوسف خطيه ابد ما مقصر وياي بالعكس يجيب حلويات وفواكه وصمون واجبان ومعلبات يگولي معليج اني اعوضج بس اني تعبت وتعبت نفسيتي عمي ابو يوسف انسان ملتزم ويخاف الله عرف عمتي على حقيقتها وما يقبل على شغلها وياي ومرات يتعارك وياها
ابو يوسف
امينه حرام عليج البنيه فقيره وحامل رحميها من هالشغل خطيه
ام يوسف
والله انت الفقير هاي حيه انت شعرفك بالنسوان
ابو يوسف
يا حيه يمعوده هي لا تحل ولا تربط بس تريدج ترضين عليها
ام يوسف
انت شعليك بشغل النسوان اطلع من السالفه
مرات خطيه يگوم يسويلي گلاص حليب او يجيبلي شي اكله ومن تشوفه عمتي تگلب الدنيا عليا وعليه احتار شسوي وياها احتار شلون ارضيها والله تعبت واذا تشوف عمي يساعدني لو ينقهر عليه مترضى ويوسف ما بيده شي يدور حل لأمه وماكو وبدينا نجمع حتى نشتري قطعة ارض وناخذ عليها قرض ونبنيها ونعيش بسلام ونرتاح بقالنا شي قليل على شراء القطعه لحد ما فد يوم من الايام
