بيرق الاحزان
همس القوارير
البارت السابع
اول اسبوع من زواجي كولش مرتاحه ويوسف كولش مدللني يطب ويطلع يبوسني يروح للاسواق الي يمنا يجيبلي حلويات وكرزات وفواكه يگولي خاف تستحين تاكلين شويه بديت اتأقلم وياهم ورى الاسبوع رجع يوسف للدوام هو يطلع بثمانيه گعدت بالسبعه حضرت ملابسه وريوگه وطلع گلت خلي ارجع انام شعندي كولهم نايمين هستوني مخليه راسي عالمخده ودخلت عمتي
عمتي ام يوسف
صباح الخير زمونه شنو راح تنامين
زمن
بلي يمه گلت ارجع انام بعده وكت
ام يوسف
لا يمه لا اذا تگعدين ويه رجلج بعد ماكو نوم تگومين للبيت تنضفين تشتغلين بعد مو وكت نوم حبيبه
زمن
ماشي يمه صار
ام يوسف
باوعي انه عرفت من امج انتي شاطره وسباعيه وراح اخلي عليج المطبخ والطبخ هااا منو يسألج ويگولج منو طبخ تگولين اني الي طبخت مو انتي
زمن
ماشي يمه الي تردينه على عيني وراسي
ام يوسف
هسه گومي صبيلي ريوگ لان بعدني ممتريگه اني وعمج
رحت للمطبخ واني صافنه على حچيها بسم الله الرحمن الرحيم فاتحة خير ان شاءالله هاي البدايه طلعت جبن مثلث وسويت چاي وطگيت بيض ووديته الهم گاعدين بالهول
ابو يوسف
اي هاي النسوان المعدله مو مثل بنت اختج تگعد ويه الغدى
ام يوسف
لا عادك حدك كولشي ولا بيداء بنت اختي ام الترتيب والنداره
ابو يوسف
هاي من شوكت صايره نادره عمرنا كوله مشفناها سوت شي تعاي باباتي گعدي تريگي
زمن
لا يابه اكلت الحمدلله
رحت نضفت المطبخ ورتبته وغسلت المواعين ورحت گولتلها يمه شأسوي غدى طلعتلي لحم وباميا وبديت اطبخ كملت طبخ ودخلت لغرفتي نضفتها وبدلت وتمكيجت وتعطرت وطلعت گعدت زوجة حماية بيداء وزوجها قصي
بيداء
صباح الخير عروستنا اليوم گاعده من وكت
زمن
صباح النور اي والله احب كعدت الصبح
دخلت للمطبخ تكشف الجدوره وتباع وطلعت گعدت يم خالتها ويسولفن بصوت ناصي كعدو جهالها وزوجها طبعا ميشتغل متكل على مصرف يوسف بعدها اجه يوسف دخل الغرفه سبح وبدل بيداء من شافت رجلها گعد واجه يوسف دخلت للمطبخ صبت الغدى وحضرت كولشي وجابته.
يوسف
تعبناج بنت خالتي مشكوره
گعدنا كولنا ناكل
قصي
الباميا اليوم طيبه حيل منو طبخها
ام يوسف
اني طبختها لعد منو
يوسف
عاشت ايدج يالغاليه صودگ طيبه
اني بقيت ساكته وهي فرحانه مصدگه هي طابختها
المهم بقت حياتي هيج اشتغل ليل ونهار وما مبين وياهم عبالك خدامه الهم بس بقى يوسف مثل ما هو حنون وگلبه طيب ورقيق وياي وعمتي ام يوسف يوميه تطلعلي شغله لا خلت بطانيات ولا خلت زوالي ولا بردات ولا قنفات يوميه اغسل شي تعبت حيل وهلكت وبين فتره وفتره اروح لبيت اهلي ليله وحده وارجع يوم ثاني وطبعا عمتي كولش تحب بيداء بس اني لا واحسها تغار مني تعيب عليه وعلى تصرفاتي گدام يوسف عدى على زواجي شهرين تقريبا ونفس الروتين والحمدلله طلعت حامل ويوسف طار من الفرحه
يوسف
يمه لا تخلين زمن تشتغل هالفتره خليها ترتاح وبيداء تساعدج
ام يوسف
يمه شسالفه ما حبلنا ما خلفنا الشغل زين الها وبعدين هي شدسوي علمود غسلت المواعين
يوسف
لا يمه لا تخلينها تشتغل بس هالفتره على ما يثبت الطفل
ام يوسف
صار يمه تدلل
طبعا گدامه شكل ووراه شكل گدامه حنونه وطيبه ووراه شيطانه ما اعرف ليش هيج ضاجت مني بالرغم جنت حيل مطيعه وياها وما ارفضلها طلب بس حضي هيج ما يرهم ويه الناس فد مره من المرات تقريبا ورى تلاث اشهر من زواجنا رحنا لبيت خالت يوسف ام بيداء جنتهم
