بيرق الاحزان
همس القوارير
البارت ١٢
من طلعنا الفجر للزياره وصلنا للنجف اجرنا فندق وسبحنا ونمنا شفته ليوسف نام شويه گلت خطيه خليه يرتاح ما اگعده ابد خليه اني همين نمت تالي فزيت لگيته طالع شويه اجه جايب وياه اكل وفواكه گعدنا اكلنا وسولفنا بس احسه مهموم وضايج شايل الدنيا على راسه حقه ما ألومه ما نعرف شنو مصيرنا طلعنا زرنا وبقينا لليل بأمير المؤمنين وافترينا بالسوگ وتالي رجعنا نمنا بالفندق ثاني يوم طلعنا الكربله وصلنا اجرنا فندق وهمين ارتاحينا ونزلنا وصار ابو فاضل بوجهنا اني من شفت الگبه مالته دموعي نزلن فدوه رحتلك مولاي اريدك تشيل همي وتحل مشكلتي وگفنا باب الامام
زمن
اوگف يوسف هنا
يوسف
شعندك خلينا نفوت نصلي ونزور
زمن
يوسف وحق هذا الامام ما خنتك لا ويه ابوك ولا ويه اي واحد غيره
يوسف
انتي شنو تحجين وليش تحلفين اني ممصدگ بحجي امي واحد بالميه لا تخبليني عوفي السالفه
زمن
لا حبيبي ادري بيك بس من راح تسألك امك لازم تگلها اي حلفت وتخلص نفسك وتخلصني
يوسف
زمن اني احبج واحب راحتج واحب اهلي ومحتار بينج وبينهم بس خلاص اتخذت قراري من ارجع اطلعج بيت لوحد خلينا اي شي ناكل لو خبز وشاي ونگضيها اجارات اهم شي نرتاح تعبنا من المشاكل
زمن
الله كريم نرجع وربك يحلها
زرنا وكملنا وثاني يوم طلعنا لبغداد همين بقينا يومين بالفندق وزرنا الامامين الجوادين ورجعنا للبيت ملگينا احد بس قصي وعمي الخاتونات طالعات گلت خلي ارتاح وانام شوي صدگ نمت ما گعدت اله المغرب همين مجايات كمت سويت عشى وصليت وهن طبن من شافتني
ام يوسف
اجيتي لا هلا ولا مرحبا بيج
انه سكتت ما حجيت صبيتلهم عشى وكملت وتعشينا وگعدنا بالهول اني ويوسف وعمتي وعمي وقصي وبيداء كولنا گاعدين
يوسف
يابه اني قررت أجر بيت واطلع لان تعبت من المشاكل
ابو يوسف
اي يابه حقك واني اساعدك بالايجار
ام يوسف
شنو شنو ارتاحيتي ام الدروب تردين تاخذينه وتطلعين والله لو اموت ما تطلعون تدفني هنا يلا تطلع بس تطلعون احرگ روحي
يوسف
يمه شتردين انتي ما تفكرين براحتي اني تعبان اريد ارتاح من المشاكل
ام يوسف
المشاكل مرتك مسويتها وانت شلون تأمن بهاي الحيه بيتها لوحدها شمدريك شسوي ما تسوي
يوسف
اني واثق بيها وزمن اطهر من الطهاره لا تمسينها مهما يكون خليلي احترام هاي مرتي
ام يوسف
يعني فرت راسك على امك يعني ما تصدگ بيه اني غسلت ايدي منك من ورى هالحيه
ابو يوسف
يعني انتي لا ترحمين ولا تخلين رحمة الله تنزل والله تعبتينا دفضيها عاد خلي الولد يرتاح تموتينه يلا ترتاحين
ام يوسف
انت شبيك يا رجال لا تخبلني ابني ما يطلع افتهمت لو لا
دخلنا للغرفه وسدينا الباب تعبنا من المشاكل كولش يوسف گعد عالگاع ومدد رجليه
يعني شسوي بروحي شوكت ارتاح
