عاشقة والمجنون

البارت 18

مهند: مع السلامة..
طلع دكتور اسامة طلعت رقم رؤيا ودكيت عليها.
الووووو

رؤيا: دا اشتغل بملفات المرضى ودك علية رقم دولي استغربت بس فتحت خط حتى افتهم منو داك علية من رقم دولي.
الو

مهند: من سمعت صوتها الحزين اختنكت سديت الموبايل بسرعة وضميتة بجيبي حاولت الهي نفسي بأي شي حتى ما اضعف وانجبر ادك عليها.

رؤيا: كال الو وسدة عرفتة اي عرفتة من صوتة مهند .رجعت دكيت ع الرقم مرة ومرتين و تلاثة بس مجاوبني يمكن جنت اتناسة موضوعة او الهي نفسي بس من سمعت صوتة هيجلي كل جروحي ادري ليش دكيت وليش سديتة ناوي تعذبني اكثر ناوي تحرك اعصابي اكثر.

(تسريع الاحداث)...
مهند: مر اسبوع ع جيتي لبلجيكا كل يوم التقي بدكتور اسامة ومازن ويطلعوني يدلوني ع الاماكن بديت استقر وبديت اداوم بالمستشفى طبعآ ما احجيلكم ع النظافة والنظام وروح الانسانية ألي يملكوها دكاترة المستشفى ألي اداوم بيها كلش حبيت النظام والاخلاص بالعمل اندليت بعض الاماكن واستقريت بشقتي نسيت حياتي السابقة بس منسيت رؤيا دائمآ احس غصة بكلبي ما اعرف اني شريد من هالبنية..

رأفت: مضى اسبوع ع موضوعي اني و رؤيا
داومنا كالعادة محبيت اضغط عليها خليتها ع راحتها تفكر وتردلي خبر التقينا بمكان استراحتنا واجتي حجت وياية

رؤيا: محاولت افكر مجرد تفكير برأفت جنت سادة الموضوع بس احرجني من نطاني مهلة اسبوع قررت امشيهن وبعدها احجي وياه..
رأفت ممكن احجي وياك بموضوع بس مو اهنا برة

رأفت: عرفت بشنو تريد تحجي وياية.
اوكي خلي نطلع

رؤيا: طلعنا ورة المستشفى اكو ساحة جبيرة وهادئة وبيها مصطبات كعدنا ع المصطبة .
رأفت اتمنى متزعل مني بس اني ما اكدر اتقبلك بحياتي

رأفت: جنت متوقع هذا الرد منها لذلك منصدمت ..
زين ممكن اعرف ليش متتقبليني بحياتج مو جدير بالثقة لو ما اشرفج لو ما استحقج اتمنى توضحيلي

رؤيا: ابدآ مو هذا القصد انت انسان اخلاق عالية وطيب الكلب وتستحق كلشي حلو بالدنيا واتمنالك كل الخير من كل كلبي الله شاهد بس ما اكدر اتقبلك مالي نفس بيك ولا بعمري فكرت بيك غير انو زميل واخ عزيز

رأفت: اسألج سؤال وتجاوبيني بصراحة

رؤيا: اتفضل

رأفت: انتي تحبين مهند

رؤيا: خربط كل موازيني من كلي تحبين مهند.
هاي شنو الكلام لا ما احبة ولا احب اي واحد.
كمت وكفت ع حيلي

رأفت: كلشي بيج فاضحج كلشي بيج يكول تحبي ماعدى السانج ألي دينكر

رؤيا: انت وين تريد توصل

رأفت: مجرد فضول احنة اتفقنا نفتح صفحة جديدة واني طلبت الزواج منج ورفضتيني لذلك حاب نكون اصدقاء واخوان واتمنى تفتحيلي كلبج بس مراح اضغط عليج اذا مو حابة تحجيلي