عاشقة والمجنون

البارت 17

رؤيا: السلام عليكم

نرجس: عليكم السلام

رؤيا: حبيت اسأل ع دكتور مهند وين الكاه

نرجس: سافر البارحة باليل الدكتور

رؤيا: ضربة واجتي ع راسي مجاوبت الدكتورة خليت وطلعت وايدي ع راسي امشي وماعرف رجلية وين تريد توديني

نرجس: هاي شبيها انسطرت وطلعت معقولة تحبة للدكتور وضاربها بوري اوي هسة اني شعلية مدوخة نفسي اروح اخلص شغلي احسلي..

رؤيا: امشي واحجي بيني مابين نفسي.
ليش هيج مهند بشنو غلطت وياك بشنو أذيتك كل ذنبي انو اني حبيتك غصبآ عني بس كلبك دفنتة وية شهد هاهية الظاهر مراح يرجع بعد لازم الملم جروحي واكرس تفكيري لشغلي وبس بس شلون راح اسيطر ع عقلي حتى ميفكر بيه شلون راح اسيطر ع كلبي حتى يبطل يحبة دمرت نفسي بعلاقة مبهمة هاهية بعد ما اشوفة ظليت اتمشى بالشارع كلساع اريد اندعم عقلي مو براسي مدا احس اكو احد حوالية دا احس نفسي وحيدة بالكون وبس اني امشي

مهند: وصلت لبلجيكا للعاصمة بروكسل العصر بتوقيتهم استقبلوني بالمطار اثنين من جماعتنا الدكاترة دكتور اسامة ودكتور مازن ألي جانو بمستشفتنا وبعدها هم هاجروا اسسوا حياتهم بالخارج

دكتور اسامة: ياهلا بالجانة حبيبي هنودي شلونك مشتاقين

مهند: يحفضك الله دكتور والله حيل مشاق لشوفتك

دكتور مازن: حبيبي دكتور مهند نورت بلجيكا بجيتك

مهند: تسلم يالغالي منورة بيكم والله متدرون شكد مشتاق الكم ولسوالفكم الحلوة

دكتور مازن: يسلمك يغالي طبعآ اليوم حجزنالك بالفندق لان جاي تعبان مو مال ناخذك لمكان سكنك الجديد لان بعيد شوية عن بروكسل وباجر الصبح نروح للشقة مالتك

مهند: اي خوش حجي

دكتور اسامة: يلة عيني خلي ناخذك للفندق ترتاح شوية واحنة نضبطلك كلشي باجر

مهند: ماشي.
طلعنا للفندق اخذت مفتاح غرفتي وصعدت وصعدولي الجنطة مالتي محبيت اخذ هواي ملابس واشياء اخذت كم قطعة واخذت صورة امي وصورة شهد وياية واخذت مستمسكاتي وبحوثي غيرت خطي بس بقى رقم رؤيا عندي

صفطت غراضي وطبيت سبحت وارتاحيت شوية لليل اجة علية دكتور اسامة ودكتور مازن لان بيوتهم قريبة من الفندق

دكتور مازن: يلة ياحلو خلي نطلع نتعشا

مهند: الله يخليكم دخلوني مطعم عراقي ترة مشتاق للأكل العراقي

دكتور اسامة: ولك ملعون اليوم وصلت شبسرعة اشتاقيت للأكل العراقي

دكتور مازن: يابة مو حقة اكو اطيب من الاكل العراقي

مهند: ها رحم الله والديك دكتور مازن وين اكو اطيب من الاكل العراقي

دكتور اسامة: عمي ماشي نروح لمطعم عراقي بس ترة شوية بعيد