السحر القاتل

الجزء 15

مرت كم يوم كدا .. والاتصالات والمكالمات بين سهام وبين ميادة ومن ميادة لي صلاح . والشي الواضح وماداير نقاش انو سهام بقت كل يوم تزداد غرق في ريدة عوض . وكل المكالمات البينها وبين ميادة بتكلمو عنو .. يوم قالت ليها انتي عارفة ياميادة . انا حاسة باني بدفق مويتي على الرهاب .. عوض ده قبل كدا امي سألتو .. وقال ليها ماعايزها ..

قالت ليها الوكت داك هو ما كان اتاكد من شخصيتك . لكن هسي هو عرفك كويس.. وبمجرد ماحباك ظهرت قصة هجليج .. غايتو جنس حاجات ياسهام ..

قالت ليها ياميادة انا الزول الاسمو محمد ده اصلا ما دخل راسي . حتى قبل ما اتعلق بي عوض كدا .. ياخي انا شفتو صغيرة وهو كان كبير .. وهسي ماكلف نفسو يتصل علي ناس البيت ولاعلي .. بس ماعارفة ارفضو كيف .. انا بحب عمتي شديد وعمتي بتحبني .. انا لو رفضت ولدها .. تعالي شوفي المشاكل البتحصل .. وح تقول دي امها لعبت في راسها .. وعلاقتها بي ابوي حتبوظ .. والله ماعارفة ذاتو.. بس هسي ماسكة ليهم في دايرة اقرا دايرة اقرا ..

وشكلي بي مستواي الدراسي ده من تالتة وتاني خلاص . ..

ولو رفضتو هو ح اقفل الطريق قدام عوض.. والاتنين ح يطيروا .. واااي انا ماعارفة اسوي شنو . يا ميادة انا عايزة عوض يعني اكورك ولا اعمل شنو؟

قالت ليها ان شاء الله ياسهام .. ان شاء الله بس انتي امسكي لي في قصة دايرة اقرا دي ..

انا من وقتي الفي الخرطوم .. قلت ليك ح اعمل المستحيل عشان اوفق بينكم.. ولاهسي مابقيف .. اها بعد الكلام ده بالمساء ..

كدا صلاح مشى لي ناس ميادة في البيت.. لانو ميادة يوم الاحد حتنزل المدرسة خلاص . حمدلله على السلامة ..

اها يازول ناس ميادة ديل بحبو صلاح ده حب عجيب .. ويومو اليجيهم في البيت.. البيت ده كلو بفرح .. امها مابتقول ليهو الا يا صباح الخير . وهو فعلا صباح خير .. ومن يجيهم امها بتخليهم يتكلمو بي راحتهم .. وهم ياحليلهم ونستهم كلها عن عوض وسهام .. بس الحكاية دي قربتهم لي بعض اكتر .. ميادة كل يوم بتتاكد انو صلاح انسان قيم وراقي .. وبحس بي الام الاخرين .. وصلاح بحس نفس الاحساس من ميادة ..

اصلا ياجماعة الزول الفيهو صفة حميدة .. مابتكلم بيها ويعمل ليها اعلان .. هي براها بتظهر للناس وتتحس .. يعني الزول يقول انا طيب وانا كريم وانا حنين وانا وانا .. الكلام ده مابشكل فرق في قلوب الناس .. الانجاز الحقيقي انو الناس يشوفو صفاتك على ارض الواقع هم براهم بصفوك بيها ..

اها صلاح قال لي ميادة والله ياميادة انا فرحان ليك فرح انك ملكتي الصحة .. واكتر شي فرحان لي نفسي .. انو اغلى زول في الدنيا بالنسبة لي بقى كويس واتعافا ..

قالت ليهو ده بي فضل الله .. ثم فضلك وعوض ود المهدية ههه

قال ليها دايما دايما .تتكلمي عن عوض .. قالت ليهو بتكلم بتكلم .. انت مالك ؟ ههه .. قال ليها خلاص خلاص .. ما تنفعلي وترفعي صوتك امك تقول بتشاكلو .. طبعا كلو مزاح وهظار جميل ..