لمحة امل للكاتبه ام نور

البارت السادس

لمحة أمل
للكاتبة أم نور
البارت السادس

موضوع الحمل كان صدمة الي
مااعرف شنو ردت فعلي
افرح ابجي
مصيري مااعرفه نوب مصير طفل وياي
ياربي شلون حيره هاي

امي هم شبكتني وضلت تبجي
هم ماتعرف تحزن على حالتي
لو تفرح وتباركلي راح اسويها بيبي
واجيبلها اول حفيد

صح اختي قبلي زوجت بس خطيه
بعدها ماصار عدها اطفال
زوجها نسبته ضعيفه
ويعالجون ماكو طفل
وده يفكرون يسافرون للاردن
يسون طفل انابيب
بس بعدهم خايفين ومترددين
لان ناس تكلهم ناجح وناس تكلهم مو ناجح
لو يصير بي اسقاط
والحيره موتتهم
وخطيه كلش مشتهين الطفل
ويتمنوا
واني لي لا على البال ولاع الخاطر ربي رزقني بطفل

ماادري والله اذا خير هذا طفل وجهه عليه
لو راح ينظلم وياي
ماادري اخاف انزله واخسر وياه كل رزقي بالحياة
لان يكولون طفل يجيب رزقه وياه
واخاف ابقي واظلمه وياي
يعيش مثل اليتيم بدون ابو

وحتى وان رجع ابو شنو الحياة لي راح يشوفها

الف سؤال بالي ...الف علامة استفهام ؟؟؟

الحل شنو ياربي ؟؟؟؟؟

امي بلغت حماتي 
وبيومها بليل اجونه هي وزوجها
وكلش فرحانه طايره من الفرح
وتبوس بيه
واخيرا راح اصير عمه
وكالت انتي بحمايتي
منا ورايح كل مصرفج عليه
وشنو تحتاجين مني
اني كفيله بيج وبلي بطنج

هنا شوي دخلت الفرحه بقلبي
من شفت اكو احد فرح
وبديت افكر واخلي ايدي ع بطني
واحس اكو شي بداخلي
سبحان الله الام تحس بطفلها
اول ماينخلق بطنها
حتى لو ماكو نبض بعده
وقبل مايتحرك تحس بحركته

فد شعور حلو ماينوصف ابد
مااعرف شلون اوصفه
بس ضليت احس اني ام

مر شهر ونص تقريب
ورحت شفت النبض
وسمعتني الدكتوره
يمه يمه شعور يخبل
راد قلبي يوكف من الفرح

هنا بديت اروح مرات لبيتي ابات
كلولي لاتعوفين بيتج كلش
ومرات يم امي
وحماتي واولادها وزوجها ماقصروا وياي

وهشكل مرت الايام
بس حملي كلش مزعج وكلساع اطيح واتخربط
بحيث اكثر الايام نايمه بالبيت
كضيتها كله اجايز
وخطيه اختي هم تجي تخدمني مرات
شكد ادعيلها

الى ان يوم فتحت الفيس
وشفت صفحة احمد مغير حالته الى متزوج
تعجبت شنو ستوه تذكر
من بحوشت اشوف مسوي اشاره بالحاله
ل ساره
هنا عرفت احمد تزوج عليه ساره
.....
وللقصة المزيد من الاحداث
@@@@@@@@@
#الناشربارق_العراقي
@@@@@@@@@