لمحة امل للكاتبه ام نور

البارت السابع

لمحة أمل
للكاتبة أم نور
البارت السابع

سمعت احمد متزوج عليه ساره

شلون قبل ابوها مااعرف
ليش هذا حضي
لو قابل من البداية مو احسن ....؟؟؟
ليش ورطني وتالي خله بنته فوك راسي
الله لايوفقهم
اني شنو ذنبي

هذا الخبر الوحيد لعرفته عن احمد
طول فترة حملي
جنت معززه مكرمة بين اهلي وحماتي
بس حلفتهم محد يوصل الخبر ل احمد
مااريده يحن عليه لو يشفق
ماادور شفقه بوجهه احد
ولااريد ابنه يرجعه الي

بس وكفة امي وحماتي
كلش حلوه ابد ماحسسوني زوجي هاجرني

واني هم كضيتها كله اجايز
لان حملي كلش صعب
وحالتي النفسيه صفر

مرت الاشهر
وعرفت بيه ولد وقررت اسمي عباس
وضليت احسب يوم يوم على اليوم
لي راح اشوفه بي
واخيرا اجه اليوم
كعدت الصبح عندي الم بطني ومغص قوي
وشوي شوي زاد الالم
وامي ماتقبل تاخذني للمستشفى
تكول بعد وكت انتظري
بس ترحين على وكت يأذوج
وبقيت على هاي الحاله من ل ٧صبح
لحد ساعه ب٣ضهر
اخر شي بقيت مااتحمل الوجع
اركع راسي بالحايط واصرخ
اجت ام محمد وزوجها وامي
اخذوني على المستشفى

والحمد لله اجه عبوسي
وربي سهل ولادتي
بس فرحتي بعبوسي
ماالها وصف احس نساني كل همي
احلى شعور حسيته طول حياتي
يمكن اي أم هسه من تغمض عينها
وتذكر اول صرخه طفلها
وخاصه البكر لان اول احساس للأمومه
من تذكر اول صرخه تحس قلبها حيوكف
تحس رجفه بجسمها ونفسها يتسارع

بهاي لحظات وبعز فرحتي
ذكرت لينا اختي وضليت انحب وابجي
واندعي ربي يحسسها نفس احساسي
ومايحرمها من شعور الامومه
اتمنى هذا الاحساس لكل بنيه محرومه من الطفل

بس ربنا ينطي شي وياخذ شي
اكو هواي شغلات من تنحرم منها الام تتعوض بطفل
والعكس صحيح
اني نحرمت من استقرار بيتي وحب زوجي
بس نفرجت عليه بعبوسي
بس لينا الحمد لله زوجها وحبه وحنيته
اكيد معوضها ومصبرها على اشتياقها ضناها

هنا اخذت اجازة امومه وضليت بيتي
ومرات امي تجي ومرات حماتي يباتون يمي
رغم هذا البيت ماشفت بي لسعاده بس
مااعرف ليش ارتاح بي

طلع عبوسي الاربعين ودخل عمره بالشهرين
واحنه مانعرف شي عن ابو
ولااسئل خواته عنه ابد
حسبته حساب الميت حزنت عليه فتره
وانتهى الموضوع
اخذت قرار اعيش لروحي ولعبوسي
وانسى شي اسمه احمد
بس كافي حزن تعبت وبجيت ونجرحت هواي

مرت ٦اشهر وبده يكعد عبوس ويكلب
ويناغي منسيني حتى روحي
بس ضليت احتاج فلوس
لذلك كطعت اجازتي ورجعت
علمود لاينكطع راتبي

وعبوسي ضليت ابقي يم امي
اذا هي بايته يمي يضل نايم
وتضل يمه
واءا حماتي يمته مايكعدون تودي لامي

مرت الايام واني هذا حالي
ومره من المرات اجتي بنيه
كلتلي حبيبتي اريدج لاخوي
يوصلني الصبح وكلش عجبتي
هو موافق حتى لو مطلقه

اني ضحكت ههههههه
ليش تضحكين
لا ماكو شي اضحك على الموقف
ليش كلت شي غلط اني
لا حبيبتي بس اني متزوجه
شلون اتزوج اخوج

ياااااا اني اسفه
والله ماادري سألت البنات وكالوا مطلقة

لا حبيبتي بس زوجي مسافر شغل

هنا دنيا ضاقت بعيني
رجعت للبيت ضليت ادك والطم على حظي
ليش هيج ياربي
ماعشت ويه رجلي شهر نفس العالم
من اول يوم عرسي ظلم ب ظلم

بس هنا شي بداخلي صحى وضليت
افكر بالطلاك
اي ليش مااطلك

ليش خايفة من كلمة طلاك
وليش هلكد ناس تخاف منها
وتعتبرها عار على بنتها
هاي لمطلقه هم تكدر تعيش حياتها
ويجي من يقدرها
وتكدر تكمل حياتها
يمكن هاي رساله من رب العالمين
يريد ينبهني اكو امل وره الطلاق
مو معناها نهاية الحياة

لا اكو بالدنيا لمحة أمل مهما قست ضروف

وللقصة المزيد من الاحداث
@@@@@@@@
#الناشربارق_العراقي
@@@@@@@@