EROS-ALGOS-LOGOS

Bigyan mo ako ng sagot

Hindi ako takot subukan ulit

pero takot akong masaktan sa parehong dahilan.

Huwag mo akong tanungin

Bigyan mo ako ng sagot.

Hindi ako tumatanggap ng bulaklak.

Bigyan mo ako ng kandila,

at sabay nating paglamayan

ang ating nakaraan.

Huwag mo ako hayaang lumuha sa puntod

Sabayan mo akong tumawa.

Hindi mo ako kailangang alalayan

Hindi mo kailangang maging malakas para sa akin

ayoko nang mapagpanggap

Kung mamahalin mo ako,

maging mahina ka.

at gusto ko'ng ako ang dahilan

ng kahinaan mo

Hindi mo kailangan ng mahabang mensahe

at paulit-ulit na salitang mahal kita.

ayoko nang basahin

pagod na ang aking mata

na makita ang parehong salitang

Masarap pero masakit.

Huwag mo ako sabihan ng

"mahal kita"

pero sabihin mo'ng

"Huwag mo na akong pag alalahanin ulit"

Ayoko'ng ituring mo ako'ng prinsesa

na ikukulong mo lamang sa iyong kaharian

gusto ko'ng maging parte ng iyong kawal

Dahil ayoko'ng nagpapahinga

habang nakikipaglaban ka.

Huwag mo ako'ng hayaan magpahinga

sabay tayong lalaban.

Ayoko'ng gamutin mo

ang aking sugat o punasan ang aking luha

hayaan mo akong umiyak

at manatili sa tabi ko

hanggang sa ako ay maghilom.

Hindi kita hahayaang

buhatin o pasanin ako

Gusto ko'y

alalayan natin ang isa't-isa.

pero 'pag sinabi kong hayaan mo akong mapag-isa

o hayaan mo akong magpakaligaw sa mundo,

huwag mo akong paniwalaan.

dahil ang nais ko talagang sabihin

ay gusto kong mapag-isa kasama ka

at magpakaligaw sa mundong hindi tayo kilala.

Hahayaan nating maging

estranghero tayo sa kanila,

Pero hindi natin hahayaang maging

estranghero tayo sa isa't isa.

Hindi natin babaguhin ang katapusan

para sa magandang istorya,

kundi babaguhin natin ang istorya

para sa magandang katapusan.

Hindi ako takot subukan ulit,

pero takot akong masaktan sa parehong dahilan.

Huwag mo akong tanungin.

bigyan mo ako ng kasagutan.