عمر: غيث الله يخليك جوز من هالبنية والله مالها أذية ع احد مافد يوم شفتها حجت وية احد ع كد السلام والسؤال والجواب بابة ليش حاطها براسك والله حرام عليك مو كل اصابيعك سوة ولا كل بنات الكلية مو زينات بيهن الينطن مجال وبيهن اشرف من الشرف وهالبنية ملاحظها مافد يوم وكفت يم ولد وحجت وياه بعد ليش حاطها بعقلك ترة الله يطلعها بعرضك
غيث: لك بابة انت شكد تحجي ترة دوختني اني هالبنية مراهن عليها ولتخاف ع عرضي ماعندي لا ام ولا اخت حتى يطلع بعرضي وبعدين شبيك كاتل نفسك عليها لتخاف حالها حال البقية الوكعتهن كلهن يبيعن ثكل ويستشرفن بالبداية وبعدين يوكعن ويتوسلن وهنة الممنونات انت بس لتدخل ومالك علاقة يجيك الصافي
عمر: اسمي عمر طالب كلية مرحلة ثالثة قسم فيزياء عمري 23 سنة عندي صديق واحد مقرب رغم كل مكسراتة احبة ودائمآ انصحة واوجهة للطريق الصح والصواب بس مياخذ حجي زير نساء ولعوب بحجة داخل الكلية حتى يتونس
غيث: اسمي غيث عمري 24 سنة طالب مرحلة ثالثة قسم فيزياء عندي اخ واحد واني الصغير والمدلل عند اخوية دخلت الكلية حتى اتونس وية البنات مو حتى ادرس لان بيني وبينكم ممحتاج لا شهادة ولا تعيين ولا فلوس اخوية خيرة مغركني مواصفاتي ابيض اشقر عيوني خضر طويل رشيق نوعآ ما انيق والبنات متخبلات علية يومية اتواعد وية 2 لو 3 تقريبآ ثلاثة ارباع بنات الكلية خضعلي من كل المراحل لان عندي فلوس وسيارة وحلو يطمعن بية بس اني ما اثق بوحدة بيهن كلهن بنظري طماعات وجلبات فلوس ومضاهر
عمر: ولك غيث استهدي برحمانك مو هيج يمعود كافي مشبعت من دخلنا الكلية لليوم انت يومية مصادقلك 3 لو 4 ممليت وبعدين اذا هيج تحب النسوان ليش متتزوج واتمتع بالحلال
غيث: اكولك انت راح تكضيها علية حلال وحرام ترة تعرفني كلش زين ما اقتنع بكلامك وألي براسي اسوي
عمر: يمعود دعوفها لهل ابنية والله محترمة ومؤدبة وبعدين خاف تصدك وانت تتهور وتصير مصيبة وراها وترة الله كاعد ع الحق لابد ما فد يوم يأذيك مثل متأذي بنات العالم
غيث: اكولك اليسمعك يكول معتدي عليهن هي طلعات وطبات و ونسات وعود بس قبلات ومن امل منهن اعوفهن وبعدين هنة مكيفات ع الوضعية وترة انت هواي لحيت ادري شنو اختك لو حبيبتك هالبنية
عمر: لا اختي ولا حبيبتي بس اني اشوفها خوش ابنية وبعدين هي حتى شكلها اعتيادي حالها حال اي ابنية مابيها شي يجذب النظر لهل درجة
غيث: واني شسوي بشكلها اريد اتونس واشمرها
عمر: وشراح تستفاد بلة
غيث: تراهنت اني واحمد عليها
عمر: وصلت بيك لهل مرحلة بلة ومن شنو تراهنت
غيث: من محبس ذهب
عمر: حبيبي غيث والله اني خايف عليك الله يمهل ولا يهمل عوف هذا الدرب لتوكع بمصيبة متخلص منها
