نزار: لج غبية انتي شتحجين لتسويني عصبي اني رحتلة حتى اقنعة بطريقة او بأخرى حتى يتزوجج ونغطي السالفة وانتي مكيفة مات هسة اني شسوي وامنين اخذ حقج وارجعلج اعتبارج.
صرت عصبي كمت اعيط عليها وهي منزلة راسها وتبجي طلعت الورقة مال العنوان من جيبي.
صديقة نطاني عنوان اخو هاج الزمي .
شمرتة بوجها.
اروح شكولة تعال اتزوج اختي لو اسويها كعدة عشاير وافضحج لو اكولة دليني كبر اخوك دا اروح انبشة.
عفتها وركعت الباب وطلعت..
ام نزار: سمعت عياط وصياح لزمت كلبي عرفت الولد ألي معتدي ع مروج بنفس اليوم مسوي حادث وميت طلع اخوها عصبي واني شايلة استكان الجاي وايدي ترجف.
هاك يمة يا مو ردت جاي
نزار: ماريدة انسدت نفسي مع السلامة.
ركعت باب الحوش ودخلت لبيتنا اتلكتني زينة وفتحت وياية تحقيق واني منا دمي فاير عطت بيها اخذت الجهال وطبت للغرفة تبجي واني كعدت ادخن واهز برجلي من التوتر ما اعرف اتصرف شسوي الشغلة حساسة والولد مات
مروج: دخلت علية امي تواسيني وتبجي وياية
ام نزار: ولج يمة فدوة اروحلج كافي بجي الصار صار واني امج مصدكتج واذا ع نزار فترة وينسى واذا ع كليتج اتركي هالسنة واجمعلج فلوس والسنة الجاية سافري للخارج كملي برة وعيشي هناك واني الحكج
مروج: رفعت راسي صفنت ع كلام امي شكد متفائلة وتفكر بأيجابية وكلامها حلو ومنطقي بس صعب تنفيذة.
ابتسمت بوجها.
هاهية يمة الله كريم التردي يجرالج واني بداخلي ممقتنعة ولا متفائلة مثلها بس شسوي اسايرها لتروح تموت من وراية
ام نزار: اروح فدوة لهل ضحكة كومي اسبحي وبدلي وتعالي اكعدي يمي بالهول
مروج: مالي خلك فد مرة بس ما اريد اكسر بخاطرها.
اي يمة اجيت.
طلعت وعافتني ظليت اباوع ع الورقة مال العنوان انتابني الفضول اعرف اسم اخوه و وين عنوانة سحبت الورقة وقريتها المنطقة بداخل بغداد ورايحتلها اني كعدت افكر شراح اسوي اذا رحت والتقيت بأخوه شراح اكولة وشراح يحجي علية .
كمت سبحت وبدلت وطلعت كعدت يم امي عيني ع التلفزيون بس بالي مو يمة ولا يم امي صار المغرب طبيت لغرفتي صليت ودعيت من الله يفرجها علية واستعيد قوتي .
اجتني فكرة اروح لاخوه واحجي وياه بس ما اعرف شلون راح اواجهة .
حضرت ورقة وقلم وكتبت رسالة لأمي..
يامن احتظنتني طوال حياتي
وضحت بالكثير من اجلي
امي الغالية استودعك بالله
وارجو منك المسامحة
سوف ارحل بهدوء
ولكن لن اترككِ
بأقرب فرصة سأتصل بكِ
واخبركِ ماذا حدث
ولماذا خرجت من المنزل
لا اريدكِ ان تقلقي فأنا بخير
غير ذلك
لا يوجد شيء اخاف عليه بعد الان
تحياتي لكِ ولأخي نزار وزوجته واطفاله...
دموعي تجري طبكت الورقة والقلم حطيتهن ع الميز من هسة مشتاقة لأمي وما اعرف شسوي بس لازم اتصرف ما اكدر ابقى محبوسة بالبيت ونزار كل شوية يهد علية اخاف ليتهور ويكتلني.
نمت كعدت ب 5 الفجر سبحت وصليت حطيت بجنطة صغيرة كم قطعة ملابس وملازمي ودفاتري سيفت رقم امي بالدفتر عندي كل هذا واني دموعي تجري قراري خطر ويمكن ما اكدر ارجع لهذا البيت بعد ويمكن اهلي سمعتهم تنسحك ويمكن اخوية يهدر دمي بس لازم اتصرف بكل الاحوال اني خسرانة .
انتظرت نزار يطلع للدوام ب 6 حتى اطلع وراه
صارت ب6 طلع نزار ورة ربع ساعة لبست تنورة سودة وقميص اسود وشال اسود والجنطة شلتها وامشي ع اطراف اصابيعي خاف امي تحس..
ابجي بدون صوت وخانكتني العبرة عيوني تتلفت ع بيتنا سر سعادتنا ونجاحنا وسترنا بس مع هذا مكدرت احافظ ع نفسي.
فتحت باب غرفة امي شفتها نايمة وايدها ع عيونها اتمنى هسة اشبكها وانام بحضنها وانسى كلشي صار بس صعب علية هالشي سديت باب غرفتها وطلعت .
اتمشيت شوية اخذت تكسي نطيتة العنوان ومشت السيارة بينا نسيت كلشي وع بالي بس شلون راح اشوف اخوه خاف يطلعة مثلة نذل خاف يطلع مو خوش ادمي واروح بالرجلين بس لازم احل أموري بدون ما اكلف احد .
طبعآ جزداني وياية اخذت فلوسي كلها نزار جان ينطيني مصرف وامي من تستلم راتب تنطيني كلهن جنت ضامتهن اني حريصة وما احب اصرف ألة اذا احتاجيت شي ضروري مثل ملازم لو ملابس ألي لو شغلات مال بنات..
وكفت السيارة كلي هذا الشارع بس بعد ما اعرف يا معمل منهن انت اقري اللافتة وشوفي.
اتشكرت من السايق نطيتة الكروة ونزلت.
امشي واتلفت اخر شي قريت لافتة معمل ليث للأخشاب
دخلت وخايفة وارجف معمل كلش جبير وصدى الصوت ينسمع وناس اتدك وناس تكسر خشب وناس تصبغ غرف نوم من دخلت كلها العمال صفنت علية سألت واحد منهم.
مرحبا
