ام نزار: بداخلي ممقتنعة بكلام مروج بس ما اكدر احجي كدام اخوها هو صاير نار وشرار.
خوش يمة روح ارتاح
مروج: اخذت سيارة وكبل ع البيت اول مطبيت اتلكتني امي انصدمت من شافتني ابجي ومبهذلة وتعبانة
ام نزار: اول مشفتها لطمت ع صدري.
يمة شبيها بنتي شبيج يمة
مروج: واكفة كبال امي جثة هامدة ما اتحرك اباوع بس بعيوني وكعن من ايدي الملازم والجنطة واباوع امي تلتف علية من كل الجهات وتباوعلي قميصي الدكم مالتة مشلعات مشكلتهن بدنابيس ولابسة الحذاء بدون جواريب..
سحلتني امي للهول من ايدي واني ما احجي ولا بديت اي ردة فعل .
شمرتني ع القنفة حيل كعدت واني نفس الحالة
ام نزار: ولج احجي شصاير بيج ترديني اقتنع جنتي بالمستشفى لج شبيهن ملابسج حجابج شبي وجهج ليش اصفر
مروج: شفت امي كامت تخرمش بخدودها واكفة كبالي..
لزمت ايدها وحطيت راسي ع ايدها وكمت ابجي واتوسل بيها..
يوم الله يخليج راح احجيلج بس افهميني ولتكولين لنزار والله يموتني
ام نزار: تقريبآ بديت اعرف شتريد تحجي ضربت ع كلبي..
ولج احجي احجي اسمعج
مروج: حجيتلها القصة من البداية لحد ما اجاني غيث وقنعني اخوية مسوي حادث لحد مااتعدة علية وغبت عن الوعي وصحيت .
ما اشوف امي ألة تخربطت كدامي
ام نزار: حجتلي وياريتها ماحجتلي اتمنيت ميتة بهذا اليوم اهون علية من هذا العذاب والعار ألي راح يلحقنا كبل اغمى علية
محسيت بشي بعد
مروج: كعدت بالكاع وراسها ع رجلي واضرب بيها اريدها تصحى.
ولج يمة فدوة اروحلج جاوبيني اني مروجة لج يمة والله دا اموت لتزيديها علية فدوة اروحلج بعد ما اتحمل اصحي.
رحت جبتلها مي واجيت صحصحت شوية بعدها طب علينا نزار مذعور الظاهر سمع صوتي واني اعيط لان فقدت
نزار: سمعت صوت مروج تبجي وتصيح لج يمة اكعدي كلت هاهية امي ماتت طبيت عليهم اني و وراية جهالي يتراكضون.
لج مروج شكو يمة شبيج احجو شبيكم حالتكم حالة شصار منو مات
مروج: شفتة ونشف الدم بعروقي.
ماكو شي خوية بس امي انهبطت علية و وكعت
نزار: رحت لأمي الزم بيها وابوس بيها
ام نزار: يمة ليظل بالك ماكو شي شوية من اجتي مروج ردت روحي و وكعت من شفتها
نزار: انداريت ع مروج مستحيل مو مروج اختي الاعرفها معقولة هبوط بالضغط يخربط كل احوالها ..
مروج وين جنتي شنو هاي حالتج من تتخربطين ليش مينطونا خبر الكلية مو عدهم معلومات عن كل طالب حتى اذا صار شي يبلغون اولياء الامور ليش مبلغونا ها وبعدين هبوط ضغط بسرعة يرتفع بالمغذي من الصبح لحد الساعة 7 المغرب وين جنتي
