ناضت ملاك الصبح علي صوت جدتها تنوض فيها لي المدرسة من الساعة سبعة الصبح وطبعا ملاك متنوضش إلا بطلوع الروح و مستواها وخر شويه بعد موتت امها في القراية ..
جدتها كانت تصيح عليها وفتحت الرواشن واخيرا ملاك استاقضت ..
الجده:"نوضي سادك نوم يا فرخة"
ملاك غطت راسها يا المخده..
ملاك بنعاس:"نبي نرقد اخطوني" الجده تنهدة وقالت بصوت عالى...
الجده:" ولله نزعل منك و معاد نكلمك ونقول لي حياة تجي ترفعك عندها..نوضي وقت عليك دعاء قريب تجيك نوضي"
ملاك نهضت من علي راسها المخده و بتسمت وهي تحك في عيونها..
ملاك:"حاضر يا حنونه كل شيء ولا زعلك وبعدك عليا"
الجده:"سلم بنتي يا ربي و انشاء لله نشوفك عروس"
ملاك:"لا مزال نبي نعيش حياتي لاحقين"
الجده:"ههههه نوضي افطري بسرعة والبسي"
ملاك هزة راسها وناضت توضت وصلت صلاتها وغيرة حوايجها ورتبت شكلها لفت وشاحها ولبسة سبيدروها وخدة شنطتها ونزلت لقت دعاء مقعمزة تراجع في التطبيق صبحوا علي بعض وفطرت ملاك بسرعة وجاء الباص طلعت هي ودعاء ووصلوا لي المدرسة لقوا اميرة مقعمزة قعمزوا يهدرزوا كلين رن الجرس خشوا لي الفصل قعمزت ملاك و دعاء جنب دبعض واميرة وصاحبتهم "ردينة" جنب بعض خشت أبلة الرياضيات.......
ملاك:"استغفر لله شن هالمخلوقة"
دعاء:"حد عمرها ما تغيب"
ملاك:" الناس كلهم يمرضوا و يغيبوا إلا هي تقول ديتول ضد البكتيريا"
دعاء:"حق ولله هههههههههه.." سمعتهم اميرة وضحكة "ههههههههههه"
الابله:"إنهوا الصوت"
حطت ملاك يديها علي خدودها و معندهاش نيه في الحصة و البنات منتبهات لي الحصة..
تمت الحصة و طلعت الابلة وكملوا باقي الحصص و طلعوا استراحة كانوا يمشوا في الساحة ويشربوا في عصير قعمزوا يهدرزوا ....
دعاء:"تعرفوا يا بنات بعد الامتحانات نبي نمشي اني وخوي محمد لي المغرب"
ملاك حست با غصة في قلبها استاحشة خوها ودموعا كانوا يبوا ينزلوا لكن شدت روحها دعاء مكانتش تقصد فيها اميرة بلحقة في دعاء...
دعاء:"سامحيني ملوكه ولله ما كنت نقصد اني نجرحك"
ملاك بإبتسامة:"لالا عادي متفكريش تمشي و تجي با السلامة"
اميرة حبت تغير السيرة..
اميرة:"شن عندنا بعد الاستراحة"
ملاك:"عندنا هههههه حصةههههههه جاكيشان هههههههههههه"
دعاء:"ههههههه اعتبروني اني اليوم في الايدارة من الضحك"
ردينة:"ههههههه اليوم كلنا في الايدارة" رن الجرس
"ترررررررررررررررررررررررن"
ناضوا البنات خشوا قريب يموتوا ضحك غير ربي ستر و مطلعوش لي الايدارة.....
تم دوام المدرسة وجوا البنات طالعين ركبت دعاء مع بواها وملاك قعدة متحسفة تمنت لو انه اخوها وامها عايشين تمنت لو انه بوها جاها خلاص حنت ليهم كانت تبي تبكي غير صوت اميرة وقف دموعها....
اميرة:'كوكه عصام جاء هيا"
ملاك لفت خدت شنطتها و مشت مع اميرة و كانا تبي تبين انه امورها تمام وجوها مليح ركبوا السيارة.......
عصام:"شن الجو يا بنوت"
اميرة:"مليح"
ملاك:"تمام"
عصام وين ملاك تبي تمشي لي حوشنا ولا لي حوش جدتي"
ملاك:"لي حوش جدتي" انطلقوا با السيارة وعصامشغل المسجل باش يقضي علي السكوت .....
وصلوا اميرة لي حوشها وعصام وملاك كملوا لي حوش الجدة عصام بحنيته حس انه ملاك فيها شيء
عصام:"خيرك ملاك مكسده"..
ملاك با إبتسامه وراها دموع هلبا:"مخيرني شيء عادي زي كل يوم"
عصام:'قولي نعرفك انا"
ملاك خلاص انفجرت بكاء وشهيق....
عصام:"ملاك خيرك فهميني"
ملاك كملت بكاء ومردتش عليه عصام كان قريب من البحر غير الطريق وقرر يمشي لي الكافي يلي علي البحر وصلوا قعمز هوا وملاك ...
عصام:"ملاك خيرك انا خوك التاني قولي خيرك"
ملاك وهي تمسح في دموعها:"استاحشت ماما بابا أمجد علاش هكي علاش ربي خداهم مني امجد وماما"
عصام:"خلاص ربي يرحمهم وتشوفيهم في الجنة وخيره بوك قاعد واحني معاك انا معوضك علي حنيت خوك و اميمه معوضاتك بحنية امك والحياة تضحكلك من جديد خلاص انتي قويه منبيش نشوفك تبكي اقعدي قويه ولسانك طويل"
ملاك ارتاحت لي كلام عصام و هدت نفسها ومسحت دموعها...
عصام:"خلاص اتفقنا معاد في دموع وتقعدي قوية ولسانك طويل"
ملاك ابتسمت:" خلاص نوعدك اني نقعد قويه ومنضعفش"
عصام تغمد ملاك بحنية وكملوا يهدرزوا علي البحر وبعدها ناضوا يبوا يروحوا بعد كل شيء صار....
حطها في الحوش وروح خشت ملاك ولقت جدتها علي نار في تعطيل ملاك و مرواحها..جت ملاك راكبه لي دارها ...
الجدة:"وين منتي يا هوه" لفت ملاك.....
ملاك بإبتسامه:"كنت مع عصام وكيف حطني" وكملت:"نبي نغير حوايجي و قوليلي لما يوتا الغدا جيعانه موت" وركبت ....
الجدة:"ربي يهديك يا بنتي ولله تمتلي انك امورك تمام وانتي منهارة من الداخل" ومشت الجدة تكمل في الغدا...
نزلت ملاك بعد ما كلمت حياة و اطمنت عليها وعلي صغارها وكلمت بوها وقاللها انه روح و يبي يجيها يرفعها تقعد عنده يوم قبل ما يروح كانت لابسه قونه مشماشيه وبلوزة سوداء و وشاح اسود و خدت نقالها و مشت لي الكوجينه لقت غداها واتي قعمزة هي وجدتها يتغدوا.....
الجدة:"شن جو المدرسة"
ملاك:"ماشي حالها"
الجدة:"شدي روحك شهادة راك"
ملاك:"انشاء لله " و وصلها مسج فيه(وتي روحك انا جاي)ابتسمت ملاك..
ملاك:"يمه بوي جاي يبي يرفعني نقعد عنده يوم "
الجدة:"امتي روح"
ملاك:"امس " وناضت بي عجلة لي دارها وتت شنطه صغيرة فيها بجامة وشوية عطور وعبايتها ونزلت تسمع في تبيب با السيارة عرفت بوهل سلمت علي جدتها وطلعت......
______________________________
نبي تعليقاتكم ومتنسوش التصويت
هده اول روايه ليا نبي تشجعات باش
نكمل باقي الحلقات انشاء لله تعجبكم
😊😊😊😊😊😊😊
•
•
❤Malak mohammed❤
أنت تقرأ
& رح ترجعي&
Romanceمن هي هده الجميلة و الحنونه من الداخل والعكس من الخارج؟ فتاة رغم صغر سنها الا انها تحمل من القوة ما لا يحمله احد✋ اصابتها لعنة البروده لم تعد تهتم لأحد غير القريبين منها 👪 اصبحت لا تريد ان تتعلق بأحد لكي لا تخسره وتتالم 😢 اصبحت تتاقلم مع حزنها وتش...
