حكاية البت محمد ولد

الجزء 01

انا عبير....من اسمي ظاهر اني بنت....

لكن من وانا صغيرة شديد....من ما وعيت على الدنيا دي ...كان نفسي اكون ولد ...

انا اكبر واحدة عند امي وابوي.... وعندي اختي اصغر مني بسنتين اسمها رانيا ....و بعدها ولد اسمه انور اصغر مني بستة سنوات....

ممكن تقولوا انه السبب في امنيتي اني اكون ولد هو ابوي.... وانه كان عايز البكر حقه يكون ولد ....لكن ابدا... من وعيت على الدنيا ابوي ابدا ما حسسني انه كان عايزني اكون ولد...بالعكس ...من وانا صغيرة بحبني حب مبالغة.... و طاير بي طيران ...وحتى بعد امي جابت ليه الولد دة ما نقص من حبه لي ولا اهتمامه بي....

طيب ليه كنت عايزة اكون ولد ...؟؟؟؟ في كل مرحلة من مراحل حياتي كانت في اسباب مختلفة ...

ابوي عمر شغال محاسب وامي اماني شغالة في البوستة (البريد).... لما كنت صغيرة شديد وانا بشوفهم الصباح بلبسوا طالعين للشغل.... كنت بتكيف شديد و انا بشوف ابوي لبس البنطلون و شك القميص و لبس الحزام....في حين ما كان منظر امي وهي بتلبس توب الشغل الابيض داخل مزاجي شديد.... ومن عمري داك بقيت بحب البس البناطلين و الشورتات وجزم الاولاد ...كنت بحس بمتعة وانا لابسة البنطلون و شاكة البلوزة ....زي ابوي...

لما كنت في الروضة ...كان الزي بتاعنا اسكيرت بحمالات للبنات و بنطلون بحمالات للاولاد ...كان معاي في الروضة ود عمي اسمه خالد ...هو كان اكبر مني بسنة بس كنا بنمشي الروضة سواء ...وكنت في عمري الصغير داك بشعر بحسد تجاه خالد وهو لابس البنطلون للروضة في حين انا لابسة الاسكيرت ...ما بقدر اتزحلق على الزحلقانية براحتي زيه و لا اتمرجح ..لان الاسكيرت بترفع لفوق ويتكوم تحتي وانا اقعد اجرجر فيه بيجاي وبيجاي ...

الزمن داك وقتي كله كنت مقضياه مع خالد ودعمي ..ما بنتفارق اليوم كله ...في الروضة نلعب مع بعض ...وهو طبعا بحكم انه ولد واكبر مني شوية وود عمي كان ما بخلي زول يهبشني ...ولا يختى علي ...حتى لما نرجع من الروضة برضه ما بنتفارق لانه بيوتنا جنب بعض...ناكل سواء ..نلعب سواء... ننوم سواء ..الحمام دة مرات نمشي مع بعض ...كنت بريد خالد ريدة شديدة.....ويمكن دة يكون في البداية واحد من اسباب رغبتي اكون ولد ....عشان اكون زي خالد في اي شي...!!!!

بعد داك كبرت ودخلت المدرسة الابتدائية و بقت عندي اسباب زيادة واضحة تخليني اتمنى بالجد اكون ولد...

مثلا ...الولد مسموح ليه يلعب في الشارع ...مسموح ليه يكون في الشارع في اي وقت ...الصباح ...نص النهار ...واهم شي بعد المغرب...

ولما يجي راجع ما بسألوه يقولوا ليه كنت وين ....

الولد ما بقولوا ليه نضف و لا فرش الملايات و لا غسل صحن ولا كباية

الولد ما بقولوا ليه اسمع كلام اختك ...

اهم شئ...الولد ما عنده هم اسبوعي اسمه غسيل الشعر... و ما عنده عذاب تسريح الشعر ووالالم والوجع المصاحب ليه ....الولد بغسل شعره بكل سهوله... وبعد داك لو سرحه او ما سرحه ما مشكلة كبيرة ...