زيادة على سفر ابوي وهشام وبعد سفرهم بسنة تقريبا حصلت تغييرات تانية في حياتي ... بديت اخش فترة المراهقة ....وبرضه حصلوا لي حاجتين كان عندهم اثر كبير على استايل محمد ولد بتاعي ....
الحاجة الاولى جسمي ...الواحد كان متوقع بما اني محمد ولد وكدة ابقى طويلة و معصعصة وجسمي يكون زي جسم الاولاد ...لكن اتخذلت و جسمي خذلني ...اولا طولي ما حصل 160 سم ...في بنات كتار في الفصل اطول مني ...و كمان الجسم اتقسم وبقى جسم بنات سمح ...فيه كل المميزات من الامام ومن الخلف !!!! والحاجة دي حرمتني من واحدة من الحاجات البحبها و هي لبس البناطلين و التشيرتات... حتى في البيت...
امي هي المنعتني ...قالت لي (لو عايزة تلبسي بنطلون تاني تلبسي معاه حاجة طويلة... الفنايل المشحتفة دي ما بتنفع ...)
والسبب انه نحن بيوتنا دي ابوابها فاتحة و اي زول بجي داخل في اي وقت في بيتنا عادي زي الكانه بيته...يعني عادي واحد من اولاد اعمامي ولا خالاتي يلز الباب ويجي داخل توووش ..الحالة واحدة ...وانا بجسمي المقسم دة ما بنفع البس فنايلي و تي شيرتاتي ديك تاني ...المهم واصلت في لبس البناطلين لكن بقيت البس معاها حاجات طويلة وواسعة ...
الحاجة التانية الاثرت على استايل محمد ولد كانت قلبي...
قلبي المراهق زيه وزي اي بنت تانية في عمري بدأ يهفو للجنس الاخر...للاولاد ...و اكتشفت ليك اني انسانة رومانسية شديد ...وقلبي رهيف شديد ...
طبعا زي ما قلت الفترة ديك كنت في المرحلة المتوسطة ...والبنات ياهم كلهم في فترة المراهقة ...وتلاتة ارباع البنات في المدرسة سمحات على شينات كان عندهم علاقات.مع اولاد المدارس الجنبنا....
طبعا الزمن داك موبايلات مافي ...والتواصل بين الحبايب كان عن طريق الجوابات ....اخر اليوم تلقي الورق دة يتطاقش ...جوابي و جوابك ...والحبائب واقفين اتنين اتنين تحت الشجر ...والشجعان شوية بمشوا على النيل ...
طيب انا كان موقفي شنو من الحكاية دي ...؟؟؟هل كان عندي جكس من الاولاد زي وزي البنات ؟؟؟ ابدا للاسف ما كان عندي ....ليه....؟؟
لانه مافي ولد جاء قال داير يعمل معاي علاقة ......انا غايتو فسرت الموضوع بكم حاجة ...اولا انا كنت ماسكة اولة الفصل واظن الاولاد كانوا بخافوا من اولة الفصل دي بقولوا ما بتاعة جكس و خلط وحركات زي دي عشان كدة ما بحاولوا معاي ...
تانيا اظن الاولاد كان لسة في بالهم حكاية اني محمد ولد وما عندي شغلة بالرومانسيات...اصلا اولاد المدرسة ياهم اولاد حلتنا واهلنا وبعرفوني من انا صغيرة وحايمة بالبنطلون و شعري مقصوص...
اخيرا انا كنت ما النوع البقعد يتاخر و يتحاوم جنب المدرسة داك ...من نخلص الحصص بلف طرحتي في راسي و جري على البيت ما بعاين جاي ولا جاي ..خاصة وانه امي بعد سفر ابوي للسعودية بقت متحكمة فينا اكتر من زمان ...ما بتدور الحوامة و المرقة ساي ..اظنه احساس انها بقت مسئولة مننا براها ....
أنت تقرأ
حكاية البت محمد ولد
عشوائي📝 بقلم: أمنيات محمد ولد لقب يطلق على البنت التي تتشبه بالاولاد ...تلبس مثلهم وتتصرف مثل تصرفاتهم ... عبير و منذ صغرها ارتبط بها لقب محمد ولد ...عندما كانت صغيرة لم تكن تمانع ...ولكن عندما كبرت ارادت ان تتخلص من هذا اللقب ..ان تخرج من اطار محمد ولد...
